Bani panjahaion ni Bibel ihatahon, dob matei Jesus, masuk ma guru-guru na parladung hu tongah-tongah ni halak Kristen i masa na parlobei, janah pasedahon hasintongan ni Bibel. (Lahoan ni Apostel 20:29, 30) Ujungni, haganupan ai tongon do tarjadi. Ipasaor sidea do ajaran ni Jesus pakon ajaran si pajuh begu-begu, janah Hakristenan na ladung lambin mararat. (2 Timoteus 4:3, 4) Mase boi hita porsaya, domma manjolom habotohon ni Bibel pasal aha do sasintongni na iajarhon Bibel?

Das ma panorangni hubani Jahowa na laho patidakkon hasintongan. Panjahaion ni Naibata bani ’panorang parujungan, gabe tambah ma habotohon’. (Daniel 12:4) Bani taun 1870 sada tumpuan na etek na mandarami hasintongan, manrimangi domma buei hape ajaran ni gareja na manlembang humbani Bibel. Halani ai, sidea marusaha mangarusi ajaran na sasintongni, anjaha Jahowa pe mamasu-masu sidea mambere pangarusion pasal hasintongan ai.

Halak na pintor manangkasi Bibel. Parlajar ni Bibel na ringgas ai, aima sidea na parlobei, mamakei sada sara na ipakei hanami ope sonari on. Sidea mamparlajari Bibel sada-sada parlajaran. Porini dong ayat na lang iarusi, sidea mandarami ayat-ayat na legan na laho patorangkon ai. Dob dapot rimpunanni na topat bani haganup isini Bibel, isuratkon sidea ma. Jadi, ipaturut sidea ma Bibel ai na patorangkon aha do artini ayat-ayat na adong ibagas Bibel. Marhitei on, sidea mandapot use hasintongan pasal goran, Harajaon Naibata, harosuhNi bani manisia pakon tanoh on, sonaha halak na dob matei, aha do pangarapan bani na matei. Sidea pe maluah ma humbani marmasam haporsayaon pakon hasomalan na ladung.​—Johannes 8:31, 32.

Bani taun 1879, Parlajar ni Bibel mangarusi das ma panorangni na laho pararatkon hasintongan. Bani taun ai, sidea mamungkah parsetakan majallah na totap hinaluarhon hanami das hubani sonari on aima Ambilan Na Madear Pasal Harajaon Ni Naibata Jahowa. Sonari, hanami padaskon hasintongan ni Bibel i 240 nagori bani lobih hurang 750 bahasa. Habotohon na sintong lambin buei!

• Dob matei Jesus, aha do na masa pasal hasintongan ni Bibel?

• Sonaha do hanami mandapot use hasintongan humbai Bibel?