Lang piga dokah ope, paima Jesus matei, ia marsahap-sahap pakon opat susianni​—Petrus, Jakobus, Johannes, ampa Andreas. Sanggah ia patugahkon tanda harorohanni bani panorang parpudi, Jesus mambere sada sungkun-sungkun na porlu, ”Ai ise do juak-juak na bujur anjaha na maruhur, na pinabangkit ni tuanni, laho mambere jabolonni mangan bani panorangni?” (Mateus 24:3, 45; Markus 13:3, 4) Jesus mambahen porsaya ganup susianni halani ia ’tuan’ ni sidea, ia manotapkon piga-piga halak na laho manoruskon pasirsirhon sipanganon partonduyon hubani ganup susianni sadokah panorang parpudi. Ise na ihatahon juak-juakni ai?

Juak-juak in aima sada hulanan na etek pangihut Jesus na iminaki tonduy na pansing. ”Juak-juak” on itandai gabe Pangurus Pusat Saksi-Saksi Jahowa. Juak-juak on pasirsirhon sipanganon partonduyon bani panorang na topat hubani haganup panombah Jahowa. Hanami margantung hubani juak-juak na bujur on ase totap mandapot ’bohal bani panorangni’.​—Lukas 12:42.

Juak-Juak on mangurus na ibagas rumah ni Naibata. (1 Timoteus 3:15) Jesus mambere tanggung-jawab na banggal bani juak-juak on laho mangurus parhorjaan organisasi Jahowa i tanoh on​—mangatur artaNi, mangarahkon horja parambilanon, ampa mangajar hanami marhitei kuria. Jadi, ase boi pasirsirhon aha na ihaporluhon bani panorang na topat, ”juak-juak na bujur pakon na maruhur” mambagihon sipanganon partonduyon marhitei buku-buku na ipakei hanami bani pangidangion, anjaha marhitei parlajaran na ipadas i partumpuan pakon partumpuan na banggal.

Juak-juak on bujur atap pe lang ra manlembang humbani hasintongan ni Bibel pakon horjani laho mangambilankon ambilan na madear, maruhur ibagas mangurus haporluhon ni Kristus i tanoh on. (Lahoan ni Apostel 10:42) Jahowa mamasu-masu sidea marhitei martambah-tambahni bilangan ni sidea pakon sipanganon partonduyon na gok tumang.​—Jesaya 60:22; 65:13.

• Ise do na itotapkon Jesus laho mambere sipanganon partonduyon hubani pangihutni?

• Mase juak-juak on isobut bujur anjaha maruhur?