Haganup pagori kaluarga Betel marhorja i marmasam departemen laho mangurus horja parambilanon i sada nagori atap lobih. Adong na mangidangi i bagian panerjemahan, mansetak majallah, na mambahen gabe sada buku, manongos buku-buku, mambahen rokaman audio/video pakon mangurus na leganni.

Pangurus i Kantur Saksi-Saksi Jahowa i Sada-Sada Nagori mangawasi haganup horja. Pangurus Pusat mambere haporsayaon hubani sidea gabe sada panitia na laho mangurus kantur Saksi-Saksi Jahowa ai ma sintua-sintua na pandei, tolu halak atap lobih. Panitia on tongtong do patugahkon hubani Pangurus Pusat pasal hamajuon i nagori na iawasini, pakon patugahkon parsualan na adong. Tugah-tugah on boi mangurupi Pangurus Pusat mamutuskon parlajaran aha do na porlu iulas ibagas buku-buku na laho roh pakon parlajaran i partumpuan atap pe partumpuan na banggal. Wakil-wakil humbai Pangurus Pusat isuruh tongtong hu kantur Saksi-Saksi Jahowa i sada-sada nagori laho mambere arahan hubani Panitia ai pasal horja ni sidea. (Podah 11:14) Wakil pangurus pusat padaskon ambilan ibagas sada asara na sumurung na ibahen laho mangojurhon sidea na tading i wilayah ai.

Mambere sokongan hubani kuria-kuria bani wilayahni. Sanina-sanina na mamboban tanggung-jawab i kantur Saksi-Saksi Jahowa i sada-sada nagori, mangharosuhkon pajongjongkon kuria-kuria na baru. Sidea pe mangarahkon parhorjaanni parintis, utusan injil, pakon sintua kaliling na marhorja i wilayah ai. Sidea mangatur partumpuan na banggal, mangatur pajongjongkon Balei Harajaon na baru, anjaha mamareksa ase buku-buku itongos hu kuria-kuria laho manggoki haporluhon ni sidea. Halani sokongan humbai kantur Saksi-Saksi Jahowa, horja parambilanon boi mardalan dear anjaha taratur.​—1 Korint 14:33, 40.

• Sonaha do Pangurus i Kantur Saksi-Saksi Jahowa i Sada-Sada Nagori mangurupi Pangurus Pusat?

• Aha deba na ihorjahon i kantur Saksi-Saksi Jahowa i sada-sada nagori?