Sanggah hasunsahan, Saksi-Saksi Jahowa mintor mangarahkon pangurupion hubani hasoman sahaporsayaaon na hona hasunsahan. Aima patuduhkon anggo hanami tongon do marsihaholongan. (Johannes 13:34, 35; 1 Johannes 3:17, 18) Sonaha do hanami mangurupi?

Manumpaki. Sanggah masa loheian na parah na masa i Judea, halak Kristen i masa na parlobei i Antokia manongos tumpak laho mangurupi hasoman sahaporsayaon ni sidea. (Lahoan ni Apostel 11:27-30) Sonai homa do anggo ibotoh hanami sanina pakon botou nami i nagori na legan ibagas hasunsahan, hanami pe manongos tumpak marhitei kuria ase sidea boi iurupi manggoki aha na hurang bani sidea.​—2 Korint 8:13-15.

Mambere pangurupion na ihaporluhon. Ganupan sintua i ianan hasunsahan ai, mandarami ganup pagori kuria laho mamareksa sonaha do sidea. Bagian pangurupion manisia boi mangatur pasal sipanganon, bah siinumon, pakeian, ianan, pakon bagian na manambari. Buei do Saksi na pandei mambere dirini laho mangurupi mamakei duitni sandiri, dihut mangurupi atap pe padearhon rumah pakon Balei Harajaon na maseda. Marhitei parsadaan ibagas organisasi nami ampa halani hanami domma somal rup marhorja, mintor boi podas laho mambere pangurupion. Age pe hanami mambere pangurupion hubani ”hasomanta sahaporsayaon”, hanami pe marusaha mangurupi halak na legan, aha pe ugama ni sidea.​—Galatia 6:10.

Mambere ojuran ibagas partonduyon pakon pingkiran. Tarlobih na hona hasunsahan mamorluhon apoh-apoh. Bani panorang sisonai hanami mandapot gogoh humbai Jahowa, ”Naibata sipangapoh in”. (2 Korint 1:3, 4) Hanami sonang patugahkon bagah-bagah ni Bibel hubani sidea na mandolei, ase porsaya sidea hubani Harajaon Naibata na laho manasap haganup parsualan na mambahen pusok ni uhur ampa sitaronon.​—Pangungkabon 21:4.

• Mase haganup Saksi boi mintor podas mambere pangurupion sanggah roh hasunsahan?

• Pangapohon partonduyon na sonaha do ibere hanami bani sidea na hona hasunsahan?