Haganupan Balei Harajaon Saksi-Saksi Jahowa mamboan goran ni Naibata na pansing. Halani ai, hanami dihut manjaga rumah ai totap borsih, patut pakon totap dear aima sada sibere-bere anjaha bagian na ponting humbani panombahan nami na pansing. Haganupan boi dihut marhorja.

Ra dihut paborsihkon salosei partumpuan. Salosei partumpuan, sanina pakon botou marmalas ni uhur paborsihkon pakon pajengeskon Balei Harajaon. Saminggu sahali, ibahen do panorang paborsihkon Balei ase lambin borsih. Sada sintua atap sada siparugas boi mangatur marmasam horja na laho ihorjahon, somalni mangihutkon sada daptar pareksa. Domu bani haporluanni, adong do na ra manapu, mangapel, mangalap, pajenges-jengeskon bangku hundulan, mamborsihkon kamar mandi, paborsihkon hasa pakon sormin, mambuang tompoh-tompoh atap mamborsihkon hun darat pakon humbagas Balei. Siotikanni sataun sahali, ibere ma panorang sadari na laho paborsihkon haganupan. Halani mangarahkon dakdanak dihut marhorja, hanami mangajar sidea ase hormat bai ianan partumpuan nami.​—Parambilan 4:17;5:1.

Ra mangurupi anggo adong na porlu ipadear. Siap taun, ibahen do pamareksaan bai ganup, humbagas pakon hun darat Balei Harajaon. Dob ai, tongtong ma iurus ase Balei ai totap jenges, ase manjaga pangaluaran na lang porlu. (2 Kronika 24:13; 34:10) Balei Harajaon na borsih pakon totap dear aima ianan na suman laho manombah Naibata nami. Halani rup marhorja, hanami patuduhkon aima hanami manghaholongi Jahowa pakon manghargai ianan partumpuan nami. (Psalmen 122:1) On boi mambere hasaksian na dear hubani halak na mabuei.​—2 Korint 6:3.

• Mase hanami maningon mangurus ianan partumpuan nami?

• Pangaturan aha na ibahen hanami ase Balei Harajaon totap borsih?