Bai buku-buku Gorik Kristen gati do mansobut Barnabas pakon Apostel Paulus. Sidea marhorja gabe Sintua Kaliling na manjumpahi kuria-kuria na parlobei. Mase? Halani sidea sari bai hagoluhan hasoman sahaporsayaon. Paulus manghatahon anggo ia sihol ”laho use mangidah saninanta in” laho manonggor sonaha do pargoluhan ni sidea. Ra do ia mandalani marratus-ratus batu marrohi pakon pagogohkon partonduyon ni sidea. (Lahoan ni Apostel 15:36) Haganup sintua kaliling nami, sonari on pe sihol manghorjahon na sarupa.

Sidea roh laho mangojur hanami. Sahalak sintua kaliling hu kuria-kuria manjumpahi hira-hira 20 kuria, anjaha tading ijai sadokah saminggu, dua hali sataun. Buei do gunani na idapot hanami humbani pangahapan ni sidea bai hagoluhan sanina-sanina on, atap pe parinangonni anggo domma marhajabuan. Marusaha do sidea mananda haganup pagori kuria, na matua pakon na maposo anjaha sidea pe hinsa do laho manghasomani hanami marambilan atap pe mangajarhon Bibel. Haganup sintua kaliling on mambere panorangni laho marmahan rapkon ganup sintua. Ase pagogohkon hanami, sidea padaskon ambilan-ambilan na mangojurhon bai partumpuan pakon partumpuan na banggal.​—Lahoan ni Apostel 15:35.

Sidea mampardiateihon haganup pagori. Haganup sintua kaliling mambere uhur pasal partonduyon kuria-kuria. Sidea marrapot pakon haganup sintua ampa si parugas laho mangidah hamajuan na dob idapot, anjaha mambere podah na sosok laho mandalankon horja ibagas kuria. Sidea mangurupi haganup parintis sonaha ase boi marhasil bani parambilanon. Anjaha sidea pe sonang marsitandaan pakon sidea na baru ope masuk hu bai saksi, pakon mambogei pasal hamajuon partonduyon ni sidea. Sanina-sanina on ra do mambere dirini gabe ”hasoman sahorja bani Nasiam”. (2 Korint 8:23) Haporsayaon pakon horja sidea bani Naibata patut do iusih.​—Heber 13:7.

• Aha do tujuan haganup sintua kaliling laho manjumpahi kuria-kuria?

• Aha do gunani na boi idapot bani harorohan ni sidea?