Anggo pandapot ni Bibel, adong dua bagian bani dalahi Kristen na mandalankon horja i kuria aima ”sintua pakon siparugas”. (Pilippi 1:1) Bani haganup kuria, somalni adong piga-piga sintua pakon siparugas. Aha do horjani siparugas?

Mangurupi sintua ni kuria. Haganup siparugas, na matua atap pe na maposo aima ganup dalahi na maju bai partonduyon, boi ihaporsayai, anjaha pongkut marhorja. Sidea manghorjahon horja na mamorluhon gogoh aima horja na somal bai kuria pakon horja i Balei Harajaon. Halani ai, haganup sintua lambin urah manghorjahon horjani sidea laho mangajar pakon marmahan.

Manghorjahon marmasam-masam horja. Piga-piga siparugas isuruh mangalo-alo sidea na roh hu partumpuan. Deba nari, bagianni manjolom paralatan tata suara, mambagihon buku-buku, manjolom kas kuria, pakon mambagihon ianan na laho ihorjahon sidea marambilan. Sidea pe dihut mangurus Balei Harajaon. Haganup sintua boi do mangindo sidea ase mangurupi pagori kuria na matua. Haganupan patut do manghormati sidea halani sidea ra manghorjahon horja aha pe na ibere.​—1 Timoteus 3:13.

Mambere sonto, sonaha do dalahi Kristen na bujur. Siparugas ipilih halani paruhuran ni sidea ibagas partonduyon na dear. Sanggah padaskon ambilanni i partumpuan, sidea boi mambahen partonduyon nami lambin gogoh. Halani mambere sonto bani horja parambilanon, hanami pe lambin hinsah marambilan. Anjaha, parlahou ni sidea na sonang rup marhorja mambahen hanami marmalas ni uhur anjaha mambahen hanami lambin marsada. (Epesus 4:16) Bani panorangni, sidea pe boi do itabalhon gabe sintua.

• Dalahi Kristen na sonaha do haganup siparugas?

• Sonaha do sidea dihut mambahen horja i kuria mardalan taratur?