Jesus Kristus patugahkon hubani susianni, ”Sonai ma marsinalsal panondangnima i lobei ni halak, ase ididah horjanima na dear in, ase ipuji sidea Bapanima na i nagori atas in.” (Mateus 5:16) Halani ai, hanami mamakei teknologi na sonari on, sontoni internet. Situs Webnami, jw.org, aima sada na boi mambere hatorangan na sah pasal haporsayaon pakon horja Saksi-Saksi Jahowa. Aha do na boi idapot Nasiam hunjai?

Balosni Bibel bani sungkun-sungkun na gati isungkun. Nasiam boi mandapot balosni sungkun-sungkun na ponting na gati isungkun halak. Umpamani risalah Sitaronon, Dong do Ujungni? ampa Boi do na Matei Mulak Manggoluh? domma sirsir bani lobih humbani 600 bahasa. Nasiam pe boi mandapot Bibel Terjemahan Dunia Baru lobih humbani 130 bahasa pakon piga-piga buku na boi mangurupi Nasiam. Umpamani buku Aha do na Iajarhon Bibel Hubanta? pakon haluaran naimbaru Ambilan na Madear pakon Sadarlah! Buei do humbani buku-buku on, boi ibasa atap ibogei i internet atap ibuat bani pormat MP3, PDF, atap EPUB. Nasiam pe boi mansetak piga-piga alaman ase boi ibere bani halak na marosuh, domu hubani sahapni! Buku-buku on dong bani piga-piga sahap halak na longah na ipasirsir bani video. Nasiam boi mambuat drama pambasaan ni Bibel, drama Bibel, pakon musik na jenges na boi ibogei Nasiam bai panorang na tonang.

Hatorangan na topat pasal Saksi-Saksi Jahowa. Ipasirsir homa barita naimbaru pakon klip video pasal horja nami i sab dunia on, na masa bani Saksi-Saksi Jahowa, pakon usaha pangurupion kemanusiaan na ibahen hanami. Nasiam boi mandapot hatorangan pasal partumpuan banggal na laho roh ampa ianan kantur Saksi-Saksi Jahowa i sada-sada nagori.

Marhitei on, hanami paliharhon hasintongan das hu ujungni tanoh. Halak humbani ganup banua, sontoni Antartika, mangahapkon gunani. Hanami martonggo ase ”rarat hata ni Tuhan in” hu sab dunia, pasangapkon Naibata.​—2 Tessalonika 3:1.

• Sonaha do jw.org boi mangurupi ase lambin buei halak marpambotoh hasintongan ni Bibel?

• Aha do na sihol itorih Nasiam bani situs Webnami?