Harosuh ni Sibolis ai ma ase nasiam manghorjahon hadatuon. Buei do halak mambahen galangan bani ompung-ompungni na dob matei atap pe hu pangian sada ianan ase sidea maluah humbai mara. Sidea manghorjahon ai halani mabiar bani hagogohon na lang taridah. Dong do na mamakei tintin atap pe golang na marisi. Dong do na manginum atap pe manlapui bani angkulani ”tambar” na adong nini gogohni. Dong homa do barang na dob itabasi anjaha itanom atap isimpan i rumah halani ihaporsayai boi manjaga rumah. Na legan marguru manjalo hadatuon na ihaporsayai boi mambahen bayak, pandei i parsikolahan, atap pe ase boi halak rosuh bani.

Parhasomanan pakon Jahowa paluahkon hita humbani Setan. Gogohan do Naibata Jahowa pakon malekat-malekatNi marimbangkon Setan pakon begu-beguni. (Jakobus 2:19; Pangungkabon 12:9) Sihol tumang do Jahowa pataridahkon gogohNi bani hasoman-hasomanNi​—ai ma sidea na martenger ni uhur Bani.​—2 Kronika 16:9.

Bibel patugahkon: ”Seng bulih horjahononnima partondungon.” Iburai Jahowa do hadatuon pakon partondungon halani sidea na manghorjahon ai masuk bani siding ni Sibolis.​—3 Musa 19:26.