Porlu do usaha laho mangindahi pakon manjaga parhasomanan. Age pe sonai ibere do pasu-pasu bani usahamu na laho mangindahi parhasomanan pakon Naibata. Ihatahon Jesus do bani halak na porsaya bani: ”Paluahon hasintongan in ma nasiam.” (Johannes 8:32) Aha do artini?

Nasiam boi mangahapkon haluahon sonari. Boi nasiam maluah humbani ajaran ladung na dob ipararat Sibolis, pakon humbani pandoleian na iahapkon marjuta halak i sab tanoh on na lang mananda Jahowa. (Rom 8:22) Nasiam pe boi maluah humbani ”biar bani hamateian.”​—Heber 2:14, 15.

Nasiam boi mangahapkon haluahon i Paradeiso i tanoh on. Tongon, haluahon na dear tumang boi iahapkon nasiam bani ari simagira! I Paradeiso lang adong be porang, naborit, hajahaton, hasombuhon, pakon na loheian. Lang adong be namatua, na matei, hamarsikon ampa hagedukon. Pasal Naibata ihatahon Bibel: ”Ham do na mambuha tangan-Mu, anjaha Ham do na pabosur sura-sura ni sagala na manggoluh.”​—Psalmen 145:16.

 Hasoman ni Naibata boi manggoluh sadokah ni dokahni. Hagoluhan sisadokahni ai silayak-layak maharga na sihol ibere Naibata bani na mangindahi parhasomanan pakon Naibata. (Rom 6:23) Pingkirhon ma aha do artini hagoluhan sisadokahni ai bani nasiam!

Buei do panorang nasiam laho manghorjahon aha pe. Ra do sihol nasiam marlajar alat musik, manggambar, atap gabe tukang hayu. Ra do homa nasiam sihol marlajar pasal binatang pakon suan-suanan. Boi homa do nasiam mardalani hu sada-sada nagori ase jumpah pakon halak na mabuei. Ganupan on boi saud anggo nasiam manggoluh sadokah ni dokahni!

Buei do panorang nasiam laho mangindahi parhasomanan. Hagoluhan sisadokahni mambahen nasiam mananda buei hasoman ni Naibata janah mambotoh biak na madear ampa harosuhni. Dob ai, sidea pe boi gabe hasomanmu janah nasiam pe marsihaholongan. (1 Korint 13:8) Hagoluhan sisadokahni mambere panorang bamu laho marhasoman pakon ise pe na i tanoh on! Siporlunan, parhasomananmu pakon Jahowa lambin orot sadokah ni dokahni. Andohar nasiam boi marhasoman pakon Naibata sadokah ni dokahni!