Na masambor na masa i tanoh on pataridahkon Paradeiso domma dohor. Bibel patugahkon paima roh paradeiso bahat do sitaronon. Janah hita manggoluh bani panorang ai! On ma piga-piga na laho masa na tarsurat bai Bibel:

Parporangan na banggal. ”Marsilawanan do bangsa dompak bangsa, anjaha harajaon dompak harajaon.” (Mateus 24:7) Hata on talar humbani tahun 1914, domma masa dua porang dunia pakon buei ope na legan parporangan na etek. Marjuta halak matei bani porang ai.

Naborit na manrarat. Masa ma ”sampar mar sasanagori.” (Lukas 21:11) Tongon do ai? Tongon. Na borit kanker, jantung, TBC, malaria, AIDS, pakon na legan mambahen matei marjuta halak.

Na loheian. Buei do halak i sab tanoh on hahurangan sipanganon. Tiap tahun marjuta halak matei halani loheian. Ai ma pataridahkon domma dohor Paradeiso. Bibel patugahkon: ”Masa ma . . . lohei.”​—Markus 13:8.

 Lalou. ”Masa ma . . . lalou bani buei nagori.” (Mateus 24:7) Pasal lalou domma talar masa sonari on. Humbani tahun 1914 lobih sajuta halak matei halani lalou.

Parjahat. Buei halak ”paruhur duit” pakon ”mangkaholongi dirini”. Sidea ”holongan bani hisap ni daging ase bani Naibata”. Niombah ”seng pambalosi bani namatorasni”. (2 Timoteus 3:1-5) Iahap ham, tongon do sonai parlahou ni jolma sonari on? Sidea lang hormat bani Naibata, anjaha sidea manlanglangi ise pe na marlajar Bibel.

Hajahaton. ”Martambah-tambah hajahaton.” (Mateus 24:12) Ra do tongon pangahap ni ham, samboran do hajahaton sonari on marimbangkon na hinan. Ija pe halak mabiar do hona rampok, ioto-otoi atap ipamarsik.

Ganupan ai pataridahkon Harajaon Naibata domma dohor. Bibel manghatahon: ”Dob ididah hanima masa ganupan ai, botohonnima ma na dohor ma Harajaon ni Naibata.” (Lukas 21:31) Aha do Harajaon ni Naibata? Ai ma sada pamarentahan ni Naibata na adong i nagori atas na laho mambahen tanoh on gabe Paradeiso. Holi, ganup harajaon ni manisia on igantihon Harajaon ni Naibata.​—Daniel 2:44.