Seng ipaturut Naibata Jahowa Paradeiso iparseda parjahat. Pitah hasomanNi do holi na tading ijai. Aha do na laho masa bani parjahat? Balosni boi do ibotoh hita marhitei mamparuhurhon hagoluhan si Noak na basaia. Bani masa si Noak halak manghorjahon na masambor tapi anggo si Noak legan do humbani sidea. Marusaha do ia mandalankon harosuh ni Naibata Jahowa. Halani ai ipatugah Naibata Jahowa ma hubai si Noak pasal bah na sumbang laho manripaskon haganup parjahat. Isuruh Jahowa ma ia mambahen parau ase sidea na sajabu boi maluah sanggah roh Bah na Sumbang.​—1 Musa 6:9-18.

Si Noak pakon sajabuni mambahen parau. Ipasingat si Noak do halak pasal Bah na Sumbang. Tapi sidea lang ra manangihon. Inunut sidea do manghorjahon na masambor. Ujungni, dob salosei parau ai, ipamasuk si Noak ma pinahan-pinahan lanjar masuk ma ia hubagas parau pakon sidea na sajabu. Dob ai roh ma logou na doras ibahen Jahowa pakon udan 40 ari 40 borngin janah marbanggal ma bah i tanoh on.​—1 Musa 7:7-12.

 Matei ma haganup parjahat, tapi maluah do si Noak pakon na sajabuni. Naibata Jahowa paluahkon sidea humbani Bah na Sumbang, janah manggoluh i dunia na dob borsih humbai hajahaton. (1 Musa 7:22, 23) Bibel patugahkon sahali nari Naibata Jahowa laho manripaskon haganup na lang ra manghorjahon aha na sintong. Tapi sidea na manangihon lang iripaskon. Sidea holi boi manggoluh sadokah ni dokahni i Paradeiso.​—2 Petrus 2:5, 6, 9.

Sonari on, buei tumang do halak manghorjahon na masambor. Gok do hasunsahan i tanoh on. Gatih do isuruh Naibata Jahowa Saksi-SaksiNi laho pasingatkon sidea. Tapi sidea seng ra manangihon hata ni Jahowa pasal aha na sintong pakon na lepak. Aha ma na laho masa bani sidea? Ra do sidea mubah? Bahatan do sidea seng ra mubah. Adong do holi panorangni sanggah haganup parjahat iripaskon sadokah ni dokahni.​—Psalmen 92:8.

Tongtong do adong tanoh on; anjaha ibahen gabe paradeiso. Barang ise pe hasoman ni Naibata boi manggoluh sadokah ni dokahni i Paradeiso i tanoh on.​—Psalmen 37:29.