Nasiam boi mananda Jahowa marhitei mambasa Bibel. Na basaia ipilih Naibata do piga-piga halak laho manuratkon aha harosuhNi ibagas sada buku. Buku ai igoran Bibel. Sonari, marhitei mambasa Bibel boi hita mananda Naibata. Halani Bibel marisi hata ni Jahowa, igoran do homa ai Hata ni Naibata. Bibel manghatahon, ”Seng boi [Jahowa] marladung.” (Heber 6:18) Halani ai boi hita porsaya bani Bibel. Hata ni Naibata ibagas Bibel ai ma hasintongan.​—Johannes 17:17.

Bibel ai ma silayak-layak ni Naibata na maharga hubanta. Bibel doskon sada surat humbai bapa na parholong hubani niombahni. Bani Bibel, ibagahkon Naibata do ase tanoh on gabe paradeiso. Bibel patugahkon aha na ihorjahonNi na basaia, sonari pakon i ari magira bani niombahNi na bujur. Bibel pe boi mangurupi sonaha hita maluah humbani hasunsahan janah boi marmalas ni uhur.​—2 Timoteus 3:16, 17.

 Saksi-Saksi Jahowa ai ma hasoman ni Naibata; malas do uhur sidea mangurupi nasiam mangarusi ajaran ni Bibel. Ulang malang nasiam patugahkon bani sidea anggo sihol marlajar Bibel. Bani parlajaran ai seng pala manggalar. (Mateus 10:8) Dob ai, boi do use nasiam roh hu partumpuan Saksi-Saksi Jahowa. Ianan partumpuan ai igoran Balei Harajaon. Anggo nasiam dihut bai partumpuan, roh podasni ma bahat parbinotohan nasiam pasal Naibata.

Nasiam boi mananda Naibata marhitei tinompaNi. Sontohni, Bibel manghatahon: ”Itompa Naibata ma langit pakon tanoh.” (1 Musa 1:1) Jadi sanggah Jahowa manompa ”langit”, itompa do homa mataniari. Marhitei tinompaNi, aha do na boi ibotoh hita humbani Naibata? Jahowa ai ma pargogoh na so tarimbang. Pitah Ia do na boi manompa mataniari. Ai ma na pataridahkon hapentaranNi halani porlu do hapentaron laho manompa mataniari na mambere milas, pakon lihar tapi seng ra bois.

Tinompa ni Jahowa pataridahkon holongNi hubanta. Pingkirhon ma: Buei do itompa Naibata marmasam-masam buah i tanoh on. Sasintongni, boi do pitah sada buah itompa Naibata​—atap seng pala adong buah. Tapi buei do itompa masam ni buah, warna, rupa, pakon daini. On pataridahkon Jahowa ai lang pitah Naibata parholong tapi pardear layak, pakon paridop ni uhur.​—Psalmen 104:24.