Seng marosuh Setan pakon begu-beguni anggo nasiam manombah Naibata. Marusaha do sidea padaohkon ganup jolma humbani Naibata. Sonaha ibahen sidea? Marhitei ugama na ladung. (2 Korint 11:13-15) Sada ugama ihatahon ladung halani ajaranni manlembang humbani hasintongan ni Bibel. Ugama ladung usih songon duit na palsu​—taridah songon aslini hape palsu. Ugama palsu parohkon bahat parsualan bani nasiam.

Ugama palsu seng ongga pasonangkon Jahowa, Naibata hasintongan. Sanggah i tanoh on Jesus, dong sada kalompok ugama na laho mamunuhsi. Pangahap ni sidea domma sintong ugamani. Nini sidea: ”Sada do bapanami, ai ma Naibata.” Tongon do ai? Lang! Nini Jesus bani sidea: ”Na marbapa hubani Sibolis do nasiam.” (Johannes 8:41, 44) Sonari on bahat do halak marpingkir anggo sidea manombah Naibata, hape sasintongni bani Sibolis pakon begu-beguni do sidea manombah!​—1 Korint 10:20.

 Songon hayu na masik marbuahkon buah na masambor, ugama na ladung pe halakni masambor. Tanoh on igoki parsualan halani bahatni hajahaton. Songon parlahou na masambor, parporangan, panangko, pangarsik-arsikon, pakon pamunuhon. Sidea na manghorjahon ai adong do ugamani, tapi ugama ni sidea seng mangojur sidea manghorjahon na dear. Sidea seng boi marhasoman pakon Naibata sobali ra mubah sidea.​—Mateus 7:17, 18.

Ugama na ladung mangajar halak ase martonggo bani gana-gana. Naibata patugahkon seng bulih martonggo bani gana-gana. Tontu sintong do ai. Ai marosuh do ham bani sada halak na marsahap pitah bani gambarmu tapi lang ongga marsahap pakon ham? Boi do sisonai gabe hasomanmu? Tontu lang. Harosuh ni Jahowa ase halak marsahap hubaNi, sedo bani gana-gana atap pe gambar, na lang adong hosahni.​—2 Musa 20:4, 5.

Ugama na ladung mangajarhon boi do mamunuh halak i parporangan. Jesus patugahkon sidea hasoman ni Naibata maningon do marsihaholongan. Hita seng mamunuh halak na hinaholongan. (Johannes 13:35) Mamunuh parjahat pe salah do ai. Sanggah roh munsuh laho manangkap Jesus, seng ipaturutni susianni ai manlawan laho paluahkonsi.​—Mateus 26:51, 52.

Ugama na ladung mangajarhon iarsik-arsik do halak parjahat i apuy naraka. Tapi, Bibel patugahkon halani dousa do hamateian. (Rom 6:23) Jahowa aima Naibata parholong. Ai ra do Naibata parholong mangarsik-arsik halak sadokah ni dokahni? Tontu lang! Holi i Paradeiso, pitah sada do ugama na iharosuhkon Naibata Jahowa. (Pangungkabon 15:4) Iripaskon do holi ganup ugama na maronjolan bani ladung ni sibolis.