Humbani buku on, domma iparlajari nasiam ibagas Bibel buei do podah na boi mangurupi nasiam pakon kaluarga. Jahowa sihol ase nasiam martuah. Anggo manombah Naibata do siporlunan bannima, Ia marjanji, ”tambahkonon-Ni do ganupan ai bannima”. (Mateus 6:33) Rosuh tumang do Ia ase nasiam gabe hasomanNi. Pakei ma ganup panorang laho patoguhkon parhasomanan nasiam bani Naibata. On ma hasurungan na boi dapot age ise pe.—Mateus 22:37, 38.

AHA NA IHATAHON BIBEL: ”’Gabe Bapa ma Ahu bannima, anjaha hanima gabe anak ampa boru Bangku,’ nini Tuhan.” (2 Korint 6:18) Rosuh tumang do Naibata anggo nasiam gabe hasomanNi. Martonggo ai ma sada dalan ase dohor Bani. Iontang Jahowa do ham ase ”totap martonggo”. (1 Tessalonika 5:17) Parduli tumang do Ia bani hinolsohmu ampa na ibagas uhurmu. (Pilippi 4:6) Sanggah nasiam rap martonggo pakon kaluarga, boi ididah sidea sonaha haporsayaonmu bani Jahowa.

Leganni martonggo bani Naibata, nasiam pe porlu do manangar Ia. Sarani, parlajari ma Bibel ampa buku-buku partonduyon. (Psalmen 1:1, 2) Rimangi ma aha na dob iparlajari nasiam. (Psalmen 77:12, 13) Leganni ai, tongtong ma roh hu partumpuan.—Psalmen 122:1-4.

Patugahkon pasal Jahowa bani halak na legan porlu do laho patoguhkon parhasomanan nasiam pakonSi. Lambin gatih nasiam mandalankon ai, lambin dohor ma pangahap nasiam Bani.—Mateus 28:19, 20.

NA BOI IBAHEN NASIAM:

• Pasirsir ma panorang bai ganup ari laho mambasa Bibel ampa martonggo

• Ulang na marsonang-sonang siporlunan, tapi bahen ma horja parambilanon siporlunan bani rumah tanggamu

AHA NA IHATAHON BIBEL: ”Padohor nasiam ma bani Naibata, jadi padohoron-Ni ma bani nasiam.” (Jakobus 4:8) Bahen ma panorang bani parlajaran Bibel kaluarga na taratur. (1 Musa 18:19) Anjaha, marhasomankon Jahowa ma ham ibagas ganup langkahmu. Laho patoguhkon parhasomanan ni rumah tanggamu pakon Naibata, ajari ma sidea ”sanggah hundul-hundul ham ibagas rumahmu, barang sanggah i pardalanan ham, barang sanggah laho modom, barang dob puho ham”. (5 Musa 6:6, 7) Usih ma si Josua na manghatahon, ”Anggo ahu pakon hasomanku sarumah, Jahowa do sibalosannami.”—Josua 24:15.

NA BOI IBAHEN NASIAM:

• Ulas ma aha na ihaporluhon i rumah tanggamu bani parlajaran Bibel kaluarga na taratur