Ganup hita mamorluhon duit laho pasirsirhon haporluan siganup ari. (Podah 30:8) Tongon, duit boi do parlinggoman. (Parambilan 7:12) Bani paramangon pakon parinangon, sipata ra do payah mansahapkon pasal duit. Tapi ulang halani duit, gabe maringori ibagas partongah jabuan. (Epesus 4:32) Haduasi ma nasiam marsihaporsayaon janah manriah sonaha mambalanjahon duit.

AHA NA IHATAHON BIBEL: ”Ise ma humbani nasiam na sihol pajongjong sada menara, na so hundul lobei mangetong na porlu hujai, atap na sungkup do laho mandobkon horja ai?” (Lukas 14:28) Porlu do nasiam mamingkirhon lobei sonaha manggunahon duit. (Amos 3:3) Tontuhon aha do na porlu iboli nasiam, janah sadia do bahatni duit na igunahon. (Podah 31:16) Ulang mamboli barang na lang ihaporluhon age pe dong duitmu. Marusaha ma nasiam ase ulang pala marutang.—Podah 21:5; 22:7.

NA BOI IBAHEN NASIAM:

• Porini lobih duit nasiam bani ujung bulan, rap ma nasiam manontuhon huja do bahenon duit in

• Tapi anggo lang sungkup, hurangi ma bolanja. Sontohni, rahanan ma marmasak i rumah marimbangkon mamboli sipanganon hun luar

AHA NA IHATAHON BIBEL: ”Hatahon nasiam ma na sintong.” (Epesus 4:25) Ulang mangoto-otoi pasangan hidupmu pasal sadia pandapotan ampa pangaluaranmu.

Tongtong ma nasiam marsungkun bani pasangan hidupmu laho mambahen haputusan pasal duit. (Podah 15:22) Anggo nasiam manriah pasal duit, ai parohkon hadameion ibagas partongah jabuan nasiam. Ulang iahap ham pandapotanmu duitmu sandiri, tapi duit ni kaluarga do.—1 Timoteus 5:8.

NA BOI IBAHEN NASIAM:

• Tontuhon lobei sadia bahat na boi ibalanjahon na lang pala isungkun

• Parlobei ma riahkon pasal duit, ulang dobkonsi dong parsualan