Tubuhan dakdanak parohkon malas ni uhur bani paramangon pakon parinangon, tapi bahat homa sihorjahonon. Ra do tarsonggot nasiam halani bahat bois panorang pakon gogoh laho mangurus poso-poso. Halani hurang modom ampa paruhuran na mubah-ubah boi do mambahen paramangon pakon parinangon lang marsisosokan. Maningon do nasiam mambahen pangaturan na dear sonaha do mangurus poso-poso janah patoguhkon partongah jabuan. Sonaha do podah hun Bibel boi mangurupi nasiam?

AHA NA IHATAHON BIBEL: ”Na sabar do haholongon in anjaha na basar.” Janah, ”seng ipindahi na bani sandiri, seng urah marah” haholongon in. (1 Korint 13:4, 5) Na gabe inang, patut do tongtong ipardiateihon ham poso-posomu. Tapi, ra do pangahap ni paramangonmu anggo ia lang be ipardiateihon. Halani ai, ulang ihalupahon ham porlu do ipardiateihon paramangon. Basar ampa bujur ma arahkon ham paramangonmu dihut mangurupi mangurus poso-posonima.

”Paramangon . . . maruhur ma nasiam mangkasomani sidea.” (1 Petrus 3:7) Porlu iarusi ham bahat do panorang ampa gogoh ni parinangonmu bois laho mangurus poso-posonima. Tanggungjawab baru on ra do mambahen ia pojam, loja, ampa mandolei. Anjaha, ra do sipata sogam uhurni mangidah ham. Tapi totap ma ham lamlam, halani ”dearan do parsabar humbani puanglima”. (Podah 16:32) Arusi janah urupi ma parinangonmu.—Podah 14:29.

NA BOI IBAHEN NASIAM:

• Bapa: Urupi ma parinangonmu laho mangurus poso-posonima, age pe bani borngin. Pasirsir ma bahat panorangmu bani paringangonmu ampa poso-posonima

• Inang: Ulang tulak ham sanggah paramangonmu sihol mangurupi mangurus poso-posonima. Anggo lepak na ihorjahonni ulang mintor igilai, tapi dear ma ajari sonaha manghorjahon ai

AHA NA IHATAHON BIBEL: ”Gabe sada daging ma sidea.” (1 Musa 2:24) Age pe dong niombahnima, dingat ma anggo nasiam haduasi ”sada daging” ope. Marusaha ma manjaga partongah jabuannima boi totap toguh.

Nasiam parinangon, martarimakasih ma bani pangurupion ni paramangonmu. Pataridahkon pangkargaan sisonai songon ’tambar’ artini boi patoguhkon partongah jabuannima. (Podah 12:18) Nasiam paramangon, patugah ma bani parinangonmu holong tumang do uhurmu janah hargai ia. Puji ma ia halani pongkut mangurus rumahtangganima.—Podah 31:10, 28.

”Ulang ma marsisarihon na bani dirini bei, tapi na bani hasoman ma.” (1 Korint 10:24) Tongtong ma bahen sidearan bani pasangan hidupmu. Bahen ma panorangnima laho marbual-buali, mamuji, anjaha ra manangihon. Ulang ma na porlu bani sandiri iparuhurhon pasal marsaor pakon pasangan hidupmu. Pardiateihon aha na ihaporluhon pasangan hidupmu. Bibel manghatahon, ”Idalankon paramangon ma hawajibanni bani parinangonni, sonai homa parinangon dompak paramangonni.” (1 Korint 7:3, 4) Jadi, tangkas torang ma riahkon nasiam haduasi pasal ai. Hasabaron ampa pangarusionnima boi mambahen partongah jabuannima totap toguh.

NA BOI IBAHEN NASIAM:

• Bahen ma panorangnima padua-dua

• Bahen ma age otik ase pasangan hidupmu mangahapkon holongmu bani, sontohni mambahen kartu ucapan atap mambere kado

AHA NA IHATAHON BIBEL: ”Humbani haetek-etekonmu nari, Surat Na Pansing in do, na margogoh papentarhon ham, ase marulih ham bani haluahon.” (2 Timoteus 3:15) Pingkirhon ma aha do na laho iajarhon bani poso-posonima. Sanggah lape tubuh pe, domma dong bani hasanggupan na jenges tumang laho marlajar. Ibagas kandungan boi do ia mananda soranima anjaha mangahapkon sanggah nasiam marmalas ni uhur atap sunsah. Basahon buku bani. Age pe lang iarusini aha na ibasahon, tapi lambin magodang, gabe marosuh do ia mambasa.

Ulang iagan nasiam etektu anakmu laho manangar pasal Naibata. Paturut ma ia manangar tonggonima hubani Jahowa. (5 Musa 11:19) Sanggah marguro-guro pe, patugah ma bani pasal tompaon ni Naibata. (Psalmen 78:3, 4) Dobkonsi lambin magodang poso-posonima, iarusi ma holongnima bani Jahowa anjaha ia pe marosuh mangusih nasiam.

NA BOI IBAHEN NASIAM:

• Martonggo ma mangindo hapentaran laho mangajari poso-posonima

• Ulaki ma aha na sihol ajarhononmu bani poso-posonima ase humbani na etek ia domma marlajar