Surat humbani Pangurus Pusat
Jahowa do Guru na sidearan humbani haganup. Iontang Ia do hita ase mangajari halak na legan pasal-Si. Bibel mangkatahon, “Domma patut jadi guru nasiam.” (Heb. 5:12) Jadi, isuruh do hita mangajarhon hasintongan pasal Jahowa ibagas kaluarga, i kuria, ampa bani pangidangion. Sada hasangapon na banggal do on hubanta. Tontu martarima kasih ma hita janah sihol mambahen na sidearan. Sonaha carani?
Podah ni apostel Paulus hubani si Timoteus boi mangurupi hita, “Nunuti ma mambasa surat na mapansing in, mamodahi ampa mangajari.” Ihatahon homa, “Anggo ihorjahon ham in, na paluahkon dirimu do ham ijin sonai age na manangihon ham.” (1 Tim. 4:13, 16) Artini, barita na ipadas ham ai boi paluahkon halak na legan. Halani ai, ponting tumang do hita ase lambin pandei mambasa ampa mangajar. Jadi brosur on boi mangurupi hita. Aha na adong bani buku on?
Adong do ayat bani tiap awal parlajaran. On boi mangurupi hita ase mambotoh prinsip ni Bibel bani parlajaran ai atap siusihan na boi itiru
Dingat ma Jahowa do “Guru” na Sibanggalan. (Jes. 30:20) Hassi pe brosur on boi mangurupi hita lambin pandei mambasa ampa mangajar, tapi humbani Jahowa do barita na ipadas hita ai. Ia do na manogu sasahalak hu organisasi-Ni. (Joh. 6:44) Halani ai, martonggo ma ase iurupi tonduy na pansing. Anjaha tongtong ma marusaha manggunahon Bibel. Sanggah mangajar, ulang ma ibahen hita pandapotta sandiri, tapi urupi ma sidea mambotoh sonaha pangahap ni Jahowa. Urupi ma sidea ase lambin mangkaholongi Jahowa.
Nasiam iontang ase padaskon barita na sipontingan bani panorang sonari on. Porsaya do hanami anggo nasiam boi dear mangkorjahon ai “domu hubani gogoh na binere ni Naibata”.—1 Ptr. 4:11.
Hasomanmu sahorja,
Pangurus Pusat Saksi-Saksi Jahowa
