1-3. Aha na gati isungkun halak pasal hamatean, janah sonaha piga-piga ugama mambalosi ai?

BIBEL marjanji hubanta, holi “seng dong be hamatean”. (Pangungkabon 21:4) Bani Pasal 5, domma iparlajari hita halani tobusan hita boi manggoluh sadokah ni dokahni. Tapi sonari matei ope jolma. (Parambilan 9:5) Ra do hita sungkun-sungkun, aha do na masa bani na matei?

² Balosni sungkun-sungkun ai porlu, tarlobih sanggah dong na hinaholonganta matei. Ra do hita tarsungkun: ‘Huja do ia laho? Ai boi ope ia mangidah atap mangurupi hita? Boi ope hita jumpah pakon sidea?’

³ Marmasam do balos ni ugama-ugama. Dong na mangajarhon anggo halak na bujur masuk surga, tapi parjahat itutung bani apuy naraka. Na legan mangajarhon sanggah matei sasada halak, tonduyni tumpu pakon tonduy kaluargani na dob matei. Na legan nari mangajarhon dobkonsi matei, iuhum ma ia janah tubuh use gabe halak na legan.

4. Aha do na sarupa bani ajaran ni ugama-ugama pasal hamatean?

⁴ Hassi pe legan na ihatahon ugama-ugama, tapi dong na sarupa bani ajaran ni sidea. Sidea mangajarhon dong ope tonduy na totap manggoluh dobkonsi matei sasada halak. Ai tongon do ai?

5, 6. Aha do na masa bani halak na matei?

⁵ Ibotoh Jahowa do sonaha halak na matei, janah domma ipatugah hubanta sanggah matei sasada halak, lang adong be ia. Jadi, dobkonsi matei sasada halak, lang adong be pingkiran pakon pangahapni. * Halak na matei lang boi mangidah, manangar, atap pe marpingkir.

⁶ Isuratkon Raja  Salomo do “halak na dob matei, aha pe lang be ibotoh”. Lang dong be holong atap domdomni, janah “seng dong be horja atap panimbangion atap habotohon atap hapentaran anggo i nagori toruh”. (Basa Parambilan 9:5, 6, 10.) Psalmen 146:4 patugahkon, dobkonsi sasada halak matei, magou ma “sura-surani”.

7. Aha na ihatahon Jesus pasal hamatean?

⁷ Sanggah si Lasarus hasomanni ai matei, nini Jesus ma bani susianni, “Si Lasarus, huan-huanta ai, domma modom.” Tapi na ihatahon Jesus ijon lang modom songon na somal. Halani nini Jesus do use, “Domma matei si Lasarus.” (Johannes 11:11-14) Jadi, isarupahon Jesus do na matei ai songon na modom. Lang ihatahon si Lasarus hu surga atap tumpu pakon kaluargani na dob matei. Lang homa ihatahon si Lasarus itutung bani apuy naraka atap pe tubuh use gabe halak na legan. Tapi, na sinok modom do  si Lasarus. Bani panorang na legan, paima ipapuho Jesus boru ni si Jairus, ihatahon do, “Seng matei ia, na modom do!”​—Lukas 8:52.

8. Hunja ibotoh hita sedo ase matei manisia itompa Naibata?

⁸ Ai ase matei do si Adam pakon si Hawa itompa Naibata? Lang! Sidea itompa Jahowa ase tongtong manggoluh janah marmalas ni uhur. Sanggah manisia itompa Jahowa, ibere hubagas uhurni rosuh ase manggoluh sadokah ni dokahni. (Parambilan 3:11) Lang dong namatoras na marosuh mangidah niombahni matua janah matei, sonai homa Jahowa. Anggo  marosuh do Naibata manisia tongtong manggoluh, mase matei manisia?

9. Mase parentah ni Jahowa hubani si Adam pakon si Hawa urah idalankon?

⁹ I pohon Eden, nini Jahowa ma bani si Adam, “Boi do panganonmu humbani ganup hayu na i pohon on, tapi anggo humbani hayu pambotohan ni na madear ampa na masambor in, seng bulih panganonmu; halani ijin ipangan ho hunjai, maningon matei do ho.” (1 Musa 2:9, 16, 17) Urah do mandalankon parentah ai, janah Jahowa do na talup manontuhon aha na madear pakon na masambor hubani si Adam pakon si Hawa. Anggo itangihon sidea Naibata, ai patuduhkon hormat do sidea bani kuasa ni Jahowa janah martarima kasih bani ganup na binere-Ni.

10, 11. (a) Sonaha Sibolis pakahouhon si Adam pakon si Hawa? (b) Mase lang dong hasasapan ni dousa bani sidea?

¹⁰ Tapi, lang itangihon sidea Jahowa. Nini Sibolis hubani si Hawa, “Adong do nani ihatahon Naibata, na so bulih panganon nasiam humbani sagala buah ni hayu na i pohon on?” Balos ni si Hawa, “Bulih do panganonnami humbani buah ni hayu na i pohon on; tapi anggo pasal buah ni hayu na i parsitongahan ni pohon on, ihatahon Naibata do, ‘Ulang pangan hanima hunjai anjaha ulang jamah ase ulang matei hanima.’”​—1 Musa 3:1-3.

¹¹ Dob ai nini Sibolis ma, “Seng tongon matei nasiam, tapi ibotoh Naibata do, anggo ipangan nasiam hunjai, gabe buha ma mata nasiam, doskon Naibata ma nasiam mambotoh na madear pakon na masambor.” (1 Musa 3:4-6) Sibolis marosuh ase si  Hawa marpingkir boi do ia manontuhon na madear pakon na masambor bani dirini. Anjaha ihatahon homa lang tongon matei si Hawa. Jadi ipangan ma buah ai janah ibere bani paramangonni. Ibotoh sidea do parentah ni Jahowa, seng bulih mangankon buah ai. Sanggah sidea mangankon ai, sidea mamilih lang mandalankon parentah-Ni, janah on patuduhkon lang hormat bani Bapa ni sidea na parholong ai. Lang dong hasasapan ni dousa bani sidea!

12. Mase borit uhur sanggah si Adam pakon si Hawa lang manangihon Jahowa?

¹² Borit tumang uhur halani sidea lang manangihon Jahowa, Panompa sidea! Rimangi ma, anggo hita pongkut marhorja pagodangkon niombah, tapi ujungni sidea manlawan hubanta, sonaha pangahapta? Ai lang borit uhurta?

13. Sanggah ihatahon Jahowa “mulak do ho gabe orbuk”, aha do artini ai?

¹³ Sanggah si Adam pakon si Hawa lang manangihon Naibata, lang boi sidea manggoluh sadokah ni dokahni. Nini Jahowa bani si Adam, “Orbuk do ho, halani ai maningon mulak do ho gabe orbuk.” (Basa 1 Musa 3:19.) Artini si Adam mulak hubani asalni aima orbuk. (1 Musa 2:7) Dob mardousa si Adam, matei ma ia, janah lang dong be.

14. Mase manisia matei?

 ¹⁴ Anggo si Adam pakon si Hawa manangihon Naibata, manggoluh ope sidea ronsi sonari. Tapi halani lang unduk, mardousa ma sidea janah matei. Dousa usih songon panahit na itean hita humbani manisia na parlobei. Ganup hita tubuh ibagas dousa, halani ai ma hita matei. (Rom 5:12) Tapi sedo ai sura-sura ni Naibata bani manisia. Ia lang marosuh hita matei. Bibel patugahkon, “munsuh” do hamatean ai.​—1 Korint 15:26.

15. Sonaha hasintongan pasal hamatean boi paluahkon hita?

¹⁵ Hasintongan pasal hamatean, paluahkon hita humbani ajaran na lepak. Bibel mangajarhon, na matei lang boi marpusok ni uhur. Lang boi hita marsahap-sahap atap pe marsiurupan pakon sidea. Halani sidea lang boi manjahati hita, lang mabiar hita bani sidea. Tapi, bahat ugama mangajarhon manggoluh ope tonduy ni na matei janah hita boi mangurupi sidea anggo hita mambere duit bani pambobai ugama, ase itonggohon janah na matei ai gabe halak na pansing. Tapi halani domma ibotoh hita hasintonganni, hita lang boi ioto-otoi.

16. Ladung aha na iajarhon buei ugama pasal halak na matei?

¹⁶ Marhitei ugama ladung, Sibolis mambahen hita marpingkir manggoluh do tonduy ni halak na matei. Sontohni, piga-piga ugama mangajarhon dong tonduy na totap manggoluh dobkonsi sasada halak matei. Ai sonai do na iajarhon ugama ni nasiam, atap hata ni Bibel do na iajarhon bani nasiam? Marhitei ladung, Sibolis padaohkon buei halak humbani Jahowa.

17. Mase ajaran apuy naraka pabutak goran ni Jahowa?

 ¹⁷ Aha na iajarhon bahat ugama mambahen hita longang. Sontohni, parjahat itutung bani apuy naraka sadokah ni dokahni. Ladung ai pabutak goran ni Jahowa. Lang ongga ipaturut-Ni manisia manaron sisonai! (Basa 1 Johannes 4:8.) Sonaha pangahapmu mangidah sada bapa manutung tangan ni anakni, laho manguhum ia? Tontu jahat tumang ma pangahap nasiam sonai, janah lang ra be nasiam marhasoman pakonsi. Ai do harosuh ni Sibolis ase hita marpingkir na jahat do Jahowa!

18. Mase lang porlu mabiar hita bani na matei?

¹⁸ Piga-piga ugama mangajarhon totap do manggoluh tonduy ni na matei. Jadi sidea maningon ihabiari janah ihormati halani sidea boi gabe hasoman atap pe munsuh hubanta. Buei halak porsaya bani ladung ai. Gabe mabiar ma sidea janah isombah ma na matei ai, sedo Jahowa. Dingat ma, na matei ai aha pe lang ibotoh, jadi lang porlu hita mabiar bani sidea. Jahowa do Sitompa hita. Ia do Naibata na sintong, pitah Ia do na talup isombah.​—Pangungkabon 4:11.

19. Sonaha hasintongan pasal hamatean boi mangurupi hita?

¹⁹ Domma ibotoh hita hasintongan pasal hamatean. Halani ai hita ipaluah humbani ajaran ugama na ladung. Anjaha hasintongan ai mangurupi hita mangarusi janji ni Naibata bani ari magira.

20. Aha do na laho iparlajari hita bani pasal na mangihut?

²⁰ Na basaia, juakjuak ni Naibata na margoran si Job mangkatahon, ‘Anggo matei sada joIma, boi do ia manggoluh use?’ (Job 14:14) Tongon do na matei boi mulak manggoluh? Marhitei Bibel, Naibata mambere balosni. On iparlajari hita bani pasal na mangihut.