1. Hunja do boi iparlajari hita pasal ari simagira?

ONGGA do nasiam manonton TV janah sungkun-sungkun, ‘Roh sambor ni do na masa?’ Halani bahat na sambor, on mambahen halak porsaya domma dohor ajal ni dunia on. Tongon do ai? Ai boi do ibotoh hita na laho masa bani ari simagira? Boi. Hassi pe lang boi ididah manisia aha na laho masa, tapi Naibata Jahowa mambotoh ai. Ipatugah-Ni do banta marhitei Bibel aha na laho masa bani dunia on ampa ari simagira.​—Jesaya 46:10; Jakobus 4:14.

2, 3. Aha na sihol ibotoh susian ni Jesus, janah sonaha do balos ni Jesus?

² Sanggah ibasa hita pasal ajal ni dunia on bani Bibel, artini lang ajal ni Tanoh on, tapi hajahaton do na laho salpu. Iajarhon Jesus do anggo Harajaon ni Naibata laho mamarentah hu sab tanoh on. (Lukas 4:43) Susian ni Jesus sihol mambotoh antigan do Harajaon ni Naibata roh, janah isungkun sidea ma, “Antigan ma masa ai, anjaha aha ma tanda ni paroh-Mu ampa ajal ni dunia on?” (Mateus 24:3) Lang ipatugah Jesus sadihari do ai saud. Tapi ipatugah do aha na laho masa, paima roh ajal ni dunia on. Anjaha tanda ai domma saud sonari on.

³ Bani pasal on iparlajari hita ma tanda na patuduhkon dohor mando ajal ni dunia on. Parlobei, porlu do iparlajari hita porang na i surga ase boi iarusi mase bahat hasunsahan i tanoh on.

4, 5. (a) Aha do na masa i surga dobkonsi Jesus gabe Raja? (b) Bani Pangungkabon 12:12, aha na masa i tanoh on dobkonsi Sibolis idabuhkon?

⁴ Bani Pasal 8 domma iparlajari hita anggo Jesus domma gabe Raja i surga bani tahun 1914. (Daniel 7:13, 14) Buku Pangungkabon patugahkon banta aha na masa, “Masa ma porang i nagori atas; marporang ma si Mikael [maksudni, Jesus] rap pakon sagala malekatni marmunsuh dompak naga ai [Setan]. Jadi naga ai pe rap pakon sagala malekatni roh ma marporang.” * Talu do Sibolis pakon sagala malekatni, janah idabuhkon ma sidea hu tanoh on. Marmalas ni uhur ma ganup malekat na i surga! Tapi, aha do na masa i tanoh on? Bibel patugahkon lambin bahat do hasunsahan. Mase? Marah tumang Sibolis halani “ibotoh pondok mando panorangni”.​—Pangungkabon 12:7, 9, 12.

⁵ Ibahen Sibolis do bahat hasunsahan i tanoh on halani ibotoh pondok mando panorangni paima iripaskon Naibata ia. Pardiatei hita ma aha na ihatahon Jesus pasal na masa bani panorang parpudi.​—Idah Ambah ni Hatorangan 24.

6, 7. Aha do na masa pasal porang pakon loheian sonari on?

⁶ Porang. Nini Jesus, “Marsilawanan do bangsa dompak bangsa, anjaha harajaon dompak harajaon.” (Mateus 24:7) Bueinan do na matei halani porang bani panorang sonari on marimbangkon panorang na  salpu. Sada Lembaga Pengamat Dunia patugahkon, humbani tahun 1914 dong lobih 100 juta na matei halani porang. Bueinan do na matei humbani tahun 1900 ronsi tahun 2000 marimbangkon na matei halani porang na masa sadokah 1.900 tahun na dob salpu. Ahapkon ma sonaha do sitaronon ni marjuta halak halani porang!

⁷ Loheian. Nini Jesus, “Masa ma lohei.” (Mateus 24:7) Hassi pe bahat sipanganon tapi bahat do na hurangan sipanganon. Mase? Halani seng sungkup duitni mamboli sipanganon atap lang adong juma na laho isuani sidea. Lobih samiliar halak manggoluh humbani gaji na otik tumang. Organisasi Kesehatan Dunia (WHO) patugahkon dong marjuta dakdanak matei tiap tahun halani hurang sipanganon.

8, 9. Aha do na ihatahon Jesus pasal lalou ampa panahit na dob saud sonari on?

⁸ Lalou. Nini Jesus, “Masa ma lalou na maparah.” (Lukas  21:11) Bahat do lalou na maparah na masa tiap tahun. Humbani tahun 1900, lobih dua juta halak matei halani lalou. Hassi pe dong alat na boi mambotoh na laho masa lalou, tapi tong do bahat na matei halani lalou.

⁹ Panahit. Nini Jesus dong do holi “sampar”. Urah do panahit ai manrarat janah domma bahat na matei halani ai. (Lukas 21:11) Hassi pe domma iparlajari dokter-dokter laho manambari, tapi tong do adong panahit na so boi itambari. Humbani sada barita patugahkon, tiap tahun dong marjuta halak na matei halani TBC, malaria, ampa kolera. Lang pitah ai, dong 30 panahit na baru janah piga-piga panahit ai lang boi itambari.

10. Songon na ihatahon 2 Timoteus 3:1-5 sonaha parlahou ni jolma sonari on?

¹⁰ 2 Timoteus 3:1-5 patugahkon, “Na roh ma ari hasunsahan bani panorang parpudi.”  Ipatugah apostel Paulus do sonaha parlahou ni jolma bani panorang parpudi, ai ma:

• paruhur gijang

• paruhur duit

• seng unduk bani namatorasni

• parhabutakon

• seng parholong

• seng boi manrajai diri

• parringis-ringis

• holongan bani hisap ni daging ase bani Naibata

• songon na daulat tapi lang mangkorjahon titah ni Naibata

11. Songon na ihatahon Psalmen 92:8, aha na laho masa bani parjahat?

¹¹ Bahat do parlahou sisonai bani ianan ni nasiam? I sab dunia on bahat do. Tapi dong na laho bahenon ni Naibata bani sidea. Ia marjanji, “Age pe martumbor parjahat songon poyon-poyon, anjaha marbunga sagala sihorjahon na masambor, sisedahonon do sidea sadokah ni dokahni.”​—Psalmen 92:8.

12, 13. Aha do na iajarhon Jahowa hubanta sadokah panorang parpudi?

¹² Bibel mangkatahon bani panorang parpudi bahat do sitaronon ampa hasunsahan i sab dunia on. Tapi Bibel pe patugahkon barita na dear.

¹³ Pangarusion na sintong. Pasal panorang parpudi isuratkon nabi Daniel, “Gabe tambah ma habotohon.” (Daniel 12:4) Iurupi Naibata do juakjuak-Ni ase lambin manangkasi isi ni Bibel. Ai domma saud humbani tahun 1914. Sontohni, iajar Naibata do hita mase goran-Ni ai porlu, janah aha do sura-sura-Ni bani tanoh on, aha do artini tobusan, aha do na masa bani na matei, pangarapan parpuhoon, sonaha ase martuah anjaha sonaha pamalaskon uhur-Ni. Domma iparlajari hita pitah Harajaon ni Naibata do na boi pasaloseihon ganup parsoalanta. Tapi aha do na laho ibahen hita dobkonsi mambotoh ai? Balosni dong bani Bibel.​—Idah Ambah ni Hatorangan 21 pakon 25.

14. Ija do ambilan na madear iambilankon, janah ise do na mangambilankon ai?

¹⁴ Horja parambilanon i sab dunia on. Pasal panorang parpudi, nini Jesus, “Ambilankononkon do Ambilan Na Madear on pasal Harajaon in i sab dunia on.” (Mateus 24:3, 14) Ambilan pasal Harajaon on domma ibaritahon i lobih humbani 230 nagori bani lobih 700 sahap. I sab dunia on, Saksi-Saksi Jahowa humbani ‘ganup bangsa ampa suku’ mangurupi halak ase boi marlajar pasal Harajaon ni Naibata janah aha na laho bahenonni. (Pangungkabon 7:9) Sidea lang mangindo duit. Hassi pe bahat na sogam bani sidea, tapi  songon na ihatahon Jesus lang adong na boi pasohkon horja ai.​—Lukas 21:17.

15. (a) Porsaya do nasiam hita manggoluh bani panorang parpudi, janah mase? (b) Aha na laho masa bani sidea na unduk ampa na lang unduk bani Jahowa?

¹⁵ Porsaya do nasiam hita manggoluh bani panorang parpudi? Buei na isuratkon Bibel pasal panorang parpudi domma saud. Lang piga dokah nari ipasoh Naibata ma horja parambilanon, dob ai pe ase roh “ujungni”. (Mateus 24:14) Aha do artini ujungni? Bani Harmagedon, ripaskonon ni Naibata do ganup hajahaton. Anjaha marhitei Jesus pakon malekat, boiskonon-Ni do homa ise pe na lang ra unduk hu Bani pakon Anak-Ni. (2 Tessalonika 1:6-9) Dob ai, Sibolis ampa ganup malekatni lang boi be pakahouhon jolma. Anjaha ganup na unduk bani Naibata pakon Pamarentahan-Ni, boi mangahapkon janji-Ni.​—Pangungkabon 20:1-3; 21:3-5.

16. Halani domma dohor ajal ni pamarentahan ni Sibolis, aha na porlu bahenonta?

¹⁶ Domma dohor ajal ni pamarentahan ni Sibolis. Jadi porlu isungkun hita, ‘Aha na porlu hubahen?’ Jahowa sihol ase hita pongkut marlajar Bibel janah mandalankon ai. (Johannes 17:3) Dong do partumpuan Saksi-Saksi Jahowa tiap minggu, laho mangurupi halak mangarusi isi ni Bibel. Anggo boi namin tongtong ma roh hu partumpuan ai. (Basa Heber 10:24, 25.) Anjaha ulang mabiar nasiam mambahen hamubahan domu bani na iparlajari. Hasilni lambin orot ma parhasomanan ni nasiam pakon Jahowa.​—Jakobus 4:8.

17. Mase buei halak tarsonggot sanggah roh ajal ni dunia on?

 ¹⁷ Ipatugah apostel Paulus, iripaskon do holi parjahat bani panorang na lang isangka buei halak “songon panangko borngin”. (1 Tessalonika 5:2) Nini Jesus bahat do holi halak na lang mamparuhurhon tanda anggo hita manggoluh bani panorang parpudi. Nini ma, “Songon sanggah panorang ni si Noak, sonai do parroh ni Anak ni Jolma in. Ai sanggah lape roh bah na sumbang ai, marmangan-mangan anjaha marminum-minum do sidea, marunjuk anjaha palahohon, paima jumpah ari parmasuk ni si Noak hubagas parau ai, anjaha lanjar do seng mambotoh sidea pasal ai, ronsi na roh bah na sumbang ai mangogapkon sidea haganup. Usih hujai do parroh ni Anak ni Jolma in.”​—Mateus 24:37-39.

18. Sipasingat aha do na ibere Jesus hubanta?

¹⁸ Ipasingat Jesus do hita ase ulang sibuk “halani parminum-minumon ampa parmabukon ampa holsoh-holsoh”. Jesus mangkatahon sompong do parroh ni ajal ni dunia on “songon tirangkap”. Ihatahon do homa anggo ari ai ‘maningon roh bani haganup na marianan i atas tanoh on’. Ambah ni ai ihatahon Jesus do homa, “Jaga ma hanima anjaha martonggo ma tongtong, ase margogoh hanima manimbili sagala na sihol roh ai, laho jongjong i lobei ni Anak ni Jolma in.” (Lukas 21:34-36) Mase porlu itangihon hita sipasingat ai? Halani lang piga dokah nari iripaskon ma dunia ni Sibolis. Pitah sidea na unduk bani Jahowa pakon Jesus do na maluah janah tongtong manggoluh i dunia na baru.​—Johannes 3:16; 2 Petrus 3:13.