1, 2. (a) Aha na mambahen sibere-bere maharga bani nasiam? (b) Tobusan ai ma silayak-layak ni Naibata na sibanggalan. Mase?

SIBERE-BERE na maharga aha do na ongga ijalo nasiam? Sibere-bere ai lang maningon mahal ase maharga. Anggo sibere-bere ai na iporluhon, malas do uhur nasiam janah martarima kasih do nasiam.

² Humbani ganup sibere-bere ni Naibata, dong sada na porlu tumang hubanta. Ai ma silayak-layak na sibanggalan bani manisia. Bani pasal on, iparlajari hita anggo Jahowa mambere anak-Ni, Jesus Kristus gabe tobusan, ase hita boi tongtong manggoluh. (Basa Mateus 20:28.) Jesus roh hu tanoh on bahen tobusan, patuduhkon Jahowa mangkaholongi hita.

3. Mase manisia matei?

³ Tobusan aima sada cara na ipakei Jahowa laho paluahkon manisia humbani dousa ampa hamatean. (Epesus 1:7) Ase iarusi mase tobusan ai porlu, ibotoh hita ma lobei aha na masa maribu tahun na salpu i pohon Eden. Ompungta, si Adam pakon si Hawa mardousa. Halani ai matei ma sidea. Halani hita manean dousa humbani sidea, hita pe matei.​—Idah Ambah ni Hatorangan 9.

4. Ise do si Adam, janah sonaha ia itompa?

⁴ Sanggah si Adam itompa Jahowa, ibere-Ni do  ganup na maharga bani si Adam, ai ma hagoluhan, pingkiran, ampa angkula na gokan dear atap pe sempurna. Lang ongga boritan, matua, atap pe matei. Halani Jahowa do na manompa si Adam, ihatahon ma ia anak ni Naibata. (Lukas 3:38) Tongtong do Jahowa marsahap bani. Ibere Jahowa do horja na pamalaskon uhur bani si Adam, janah ipatugah do parentah-Ni.​—1 Musa 1:28-30; 2:16, 17.

5. Bibel mangkatahon si Adam itompa “songon rupa ni Naibata”. Aha do artini ai?

⁵ Si Adam itompa “songon rupa ni Naibata”. (1 Musa 1:27) Artini, ia boi mangusihi biak ni Jahowa, songon holong, hapentaran, hapintoron, ampa hagogohon. Lang songon robot, si Adam boi mamilih na sintong atap na lang. Anggo si Adam mamilih manangihon Naibata, boi do ia manggoluh sadokah ni dokahni i Paradeiso.

6. Aha do na magou sanggah si Adam lang manangihon Naibata? Aha do hinorhonni hubanta?

⁶ Tapi halani lang manangihon Naibata, magou ma parhasomananni pakon Jahowa, hagoluhan na sempurna, janah iusir hun Paradeiso. Ujungni matei ma si Adam (1 Musa 3:17-19) Lang dong be pangarapan bani si Adam pakon si Hawa. Halani si Adam, “masuk dousa in hu dunia on . . . anjaha marhitei dousa in roh hamatean, anjaha sonai ma das hamatean in bani haganup jolma, halani haganup sidea mardousa”. (Rom 5:12) Jadi, sanggah mardousa si Adam, “tarjual” ma dirini pakon hita, gabe jabolon ni dousa ampa hamatean. (Rom 7:14) Dong do pangarapan hubanta? Adong.

7, 8. Aha do tobusan ai?

 ⁷ Aha do tobusan ai? Boi do dua artini. Parlobei, tobusan aima arga na igalar laho paluahkon sasahalak. Paduahon, aima arga na igalar laho manutupi harugian.

⁸ Lang dong manisia na boi manggalar harugian halani dousa ni si Adam. Tapi, ibahen Jahowa do cara ase boi hita maluah humbani dousa ampa hamatean. Parlajari hita ma sonaha Ia mambere tobusan, janah aha do gunani hubanta.

9. Sonaha tobusan boi igalar?

⁹ Lang dong na boi manobus aha na dob magou ibahen si Adam. (Psalmen 49:8, 9) Mase? Halani tobusanni maningon hagoluhan na sempurna. Bibel mangkatahon Jesus Kristus “mamberehon diri-Ni gabe tobus mangkopkop haganup”. (1 Timoteus 2:6) Dos do hagoluhan ni Jesus na sempurna pakon hagoluhan na dob magou ibahen si Adam.

10. Sonaha Jahowa pasirsirhon tobusan?

¹⁰ Sonaha Jahowa pasirsirhon tobusan? Isuruh Jahowa Anak na hinaholongan-Ni hu tanoh on. Anak-Ni ai ma Jesus, tompaon na parlobei. (1 Johannes 4:9, 10) Jesus ra manadingkon Bapani i surga. (Pilippi 2:7) Ipapindah Jahowa ma hagoluhan ni Jesus hun surga hu tanoh on janah tubuh ma Jesus gabe manisia na sempurna.​—Lukas 1:35.

11. Boi do sada halak manobus ganup manisia?

¹¹ Halani mardousa si Adam, lang dong be manisia na sempurna. Boi do sada halak paluahkon ganup ginompar ni si Adam humbani hamatean? Boi.  (Basa Rom 5:19.) Jesus na lang mardousa mambere hagoluhanni na sempurna gabe tobusan. (1 Korint 15:45) Marhitei ai, ganup ginompar ni si Adam boi maluah humbani hamatean.​—1 Korint 15:21, 22.

12. Mase marsik tumang sitaronon ni Jesus?

¹² Bible patugahkon sonaha sitaronon ni Jesus paima matei. Ilonsingi, igantung bani sada hayu, janah manaron hamarsikon ronsi matei. (Johannes 19:1, 30; Lahoan ni Apostel 10:39) Mase marsik tumang sitaronon ni Jesus? Halani Sibolis mangkatahon lang dong manisia na totap martenger ni uhur sanggah ilajou. Jadi, Jesus patuduhkon manisia na sempurna, boi totap martenger ni uhur age pe ibagas sitaronon. Tontu megah do Jahowa bani Jesus!​—Podah 27:11; idah Ambah ni Hatorangan 15.

13. Sonaha do tobusan igalar?

¹³ Sonaha tobusan igalar? Bani 14 Nisan tahun 33 kalender ni halak Jahudi, ipaturut Jahowa ma Jesus ibunuh munsuh-munsuhni. (Heber 10:10) Dobkonsi tolu ari, ipagoluh Jahowa ma Jesus ibagas partonduyon. Sasintongni boi do Jesus totap manggoluh gabe manisia na sempurna i tanoh on. Tapi, sanggah Jesus naik hu surga, ibere do hagoluhanni na sempurna ai bani Jahowa laho manobus ginompar ni si Adam. (Heber 9:24) Halani ai ma hita boi maluah humbani dousa ampa hamatean.​—Basa Rom 3:23, 24.

14, 15. Sonaha ase dousanta isasap?

¹⁴ Hita boi mandapot guna humbani sibere-bere ni Naibata. Pardiateihon ma aha do gunani tobusan hubanta sonari on ampa bani ari magira.

¹⁵ Hasasapan ni dousa. Sunsah do mangkorjahon na dear bai ganup panorang. Gati do lepak parsahap ampa parlahounta. (Kolosse 1:13, 14) Sonaha ase boi isasap dousanta? Maningon do hita solsoli pambahenanta na lepak janah martoruh ni uhur mangindo hasasapan ni dousa bani Jahowa. Pos ma uhurta, ra do Jahowa manasap dousanta.​—1 Johannes 1:8, 9. 

16. Sonaha ase borsih panggora ni uhurta?

¹⁶ Panggora ni uhur na borsih. Sanggah lepak pambahenanta, ra do hita bulinsah atap pe maretek ni uhur. Tapi, ulang mandolei. Anggo ra hita mangindo hasasapan ni dousa bani Jahowa, porsaya ma, ra do Ia manangihon janah manasap dousanta. (Heber 9:13, 14) Sihol do Jahowa ase hita patugahkon holsoh ni uhurta hu Bani. (Heber 4:14-16) Hasilni, boi iahapkon hita hadameion humbani Naibata.

17. Pasu-pasu aha na boi dapot hita halani Jesus matei mangkopkop hita?

¹⁷ Pangarapan hagoluhan sisadokah ni dokahni. “Upah halani dousa, ai ma hamatean, tapi silayak-layak ni Naibata do hagoluhan na sadokah ni dokahni marhitei Kristus Jesus Tuhanta.” (Rom 6:23) Halani Jesus domma matei mangkopkop hita, boi hita tongtong manggoluh janah marmalas ni uhur. (Pangungkabon 21:3, 4) Tapi, sonaha hita boi mandapot pasu-pasu ai?

18. Hunja do na botoh anggo Jahowa mangkaholongi hita?

¹⁸ Tontu malas do uhur nasiam sanggah manjalo kado na maharga. Tobusan ai ma sibere-bere siharganan humbani Naibata, janah patut do hita martarima kasih. Johannes 3:16 patugahkon, halani “holong ni uhur ni Naibata bani dunia on, pala do Anak-Ni na sasada in iberehon”. Holong tumang uhur ni Jahowa hubanta, halani ai ibere do Jesus, Anak na hinaholongan-Ni. Halani Jesus mangkaholongi hita, ia pe ra matei mangkopkop hita. (Johannes 15:13) Tobusan pataridahkon anggo Jahowa pakon Jesus mangkaholongi hita.​—Galatia 2:20.

19, 20. (a) Sonaha nasiam boi gabe hasoman ni Jahowa? (b) Sonaha nasiam pataridahkon haporsayaon bani tobusan ni Jesus?

¹⁹ Dob iparlajari nasiam holong ni Naibata, sonaha nasiam boi gabe hasoman-Ni? Sunsah do mangkaholongi halak na so itanda. Johannes 17:3 mangkatahon porlu do mananda Jahowa. Anggo itanda nasiam Ia, lambin holong ma nasiam Bani, ra ma nasiam pamalaskon uhur-Ni, janah nasiam pe gabe hasoman-Ni. Jadi, totap ma nasiam mananda Jahowa marhitei marlajar Bibel.​—1 Johannes 5:3.

²⁰ Porsaya ma bani tobusan ni Jesus. Bibel mangkatahon, “Na porsaya bani Anak in, dapotan hagoluhan na sadokah ni dokahni.” (Johannes 3:36) Aha do artini ai? Artini, horjahon ma ganup na iparentahkon Jesus. (Johannes 13:15) Jadi, lang pitah mangkatahon porsaya bani Jesus, tapi maningon do taridah humbani pambahenanta. Bani Jakobus 2:26 ihatahon, “Matei age haporsayaon, na so marhorja.”

21, 22. (a) Mase porlu dihut bani ari Pardingatan hamatean ni Jesus? (b) Aha do na laho iulas hita bani Pasal  6 pakon 7?

 ²¹ Dihut bani ari Pardingatan hamatean ni Jesus. Bani borngin paima matei Jesus, iparentahkonni do hita ase mardingat hamateanni. Tiap tahun ibahen do ai, janah igoran ma ai Pardingatan hamatean ni Jesus. (Mateus 26:26-28) Sihol do Jesus ase hita mardingat hagoluhan na sempurna na dob ibereni. Nini Jesus, “Bahen hanima ma sonin, gabe pardingatan Bangku.” (Basa Lukas 22:19.) Sanggah dihut hita bani pardingatan ai, on patuduhkon idingat hita do tobusan ampa holong ni Jahowa pakon Jesus hubanta.​—Idah Ambah ni Hatorangan 16.

²² Tobusan ai ma sibere-bere na siharganan hubanta. (2 Korint 9:14, 15) Janah marguna do homa tobusan ai bani marjuta halak na dob matei. Mase sonai? On iulas hita bani Pasal 6 pakon 7.