1. Ise do na mambere hagoluhan hubanta?

JAHOWA ai ma “Naibata na manggoluh”. (Jeremia 10:10) Sitompa hita do Ia, na mambere hagoluhan hubanta. Bibel mangkatahon, “Ham do na manompa sagala na dong; humbani rosuh-Mu do ase manjadi in haganup anjaha tartompa.” (Pangungkabon 4:11) Jadi, silayak-layak ni Jahowa do hagoluhan ai.​—Basa Psalmen 36:10.

2. Sonaha do ase martuah hagoluhanta?

² Ibere Jahowa do haporluanta, songon sipanganon ampa siinumon. (Lahoan ni Apostel 17:28) Lang pitah ai, sihol do Ia ase hita marmalas ni uhur. (Lahoan ni Apostel 14:15-17) Ase martuah hita, maningon ibalosi hita do titah ni Naibata.​—Jesaya 48:17, 18.

3. Aha do na ibahen Jahowa sanggah si Abel ibunuh si Kain?

³ Bibel mangkatahon, harga do hagoluhanta i lobei ni Jahowa. Sontohni, sanggah sogam uhur ni si Kain, anakni si Adam pakon si Hawa, mangidah si Abel saninani ai, ipasingat Jahowa do si Kain ase ulang lalab marsogam ni uhur, tapi lang itangihon. Halani gajag ringisni, “jongjong ma si Kain mandorab anggini ai, lanjar ibunuh”. (1 Musa 4:3-8) Halani ai, iuhum Jahowa ma si Kain. (1 Musa 4:9-11) Jadi, ringis ampa sogam ni uhur boi mambahen hita gabe jahat. Lang boi manggoluh sadokah ni dokahni halak sisonai.  (Basa 1 Johannes 3:15.) Laho pamalaskon uhur ni Jahowa maningon do hita mangkaholongi ganup halak.​—1 Johannes 3:11, 12.

4. Titah na ija do na ibere Naibata bani halak Israel na patuduhkon harga do hagoluhan ai?

⁴ Dobkonsi marribu tahun, ipatuduh Jahowa do na harga do hagoluhan ai, sanggah Ia mambere Sapuluh Titah bani si Musa. Sada humbani titah ai mangkatahon, “Ulang ho mamunuh.” (5 Musa 5:17) Jadi, ise pe na sangaja mamunuh, maningon matei do.

5. Sonaha pangahap ni Naibata pasal manggugurhon?

⁵ Sonaha pangahap ni Naibata pasal manggugurhon? Gari janin na lape tubuh pe, harga do ai Bani. Halani ai, ipatugah Jahowa do bani halak Israel, anggo dong sada naboru na boratan rumah tarbogbog sada dalahi, na mambahen ia haguguron, maningon matei do dalahi ai. (Basa 2 Musa 21:22, 23; Psalmen 127:3.) Hunjon ibotoh hita ma salah do manggugurhon ai.​—Idah Ambah ni Hatorangan 28.

6, 7. Sonaha do hita mangusihi Jahowa laho mangkargai hagoluhan?

⁶ Sonaha do hita mangusihi Jahowa laho mangkargai hagoluhanta pakon hagoluhan ni hasomanta? Ulang ma mangkorjahon na boi parohkon parmaraan hubanta pakon na legan. Sontohni mangissop, mangan timbaho atap pining, ampa mamakei narkoba halani ai mambahen hita boritan janah matei.

⁷ Humbani Jahowa do hagoluhan ampa angkulanta, halani ai maningon do ijaga hita. Anggo lang, butak ma hita i lobei ni Naibata. (Rom 6:19; 12:1; 2 Korint 7:1) Anggo lang ihargai hita hagoluhan ai, seng boi hita manombah Jahowa. Hassi pe payah pasohkon  hasomalan na sambor, tapi iurupi Jahowa do hita anggo marusaha mangkorjahon ai.

8. Aha do na ibahen hita ase ulang parohkon parmaraan banta atap na legan?

⁸ Domma iarusi hita harga do hagoluhan ai. Porsaya do Jahowa anggo hita boi mambahen na sidearan ase ulang roh parmaraan hubanta atap na legan. Sontohni sanggah mamboban mobil, sepeda motor, atap aha pe. Janah lang ihorjahon hita olahraga na parohkon mara. (Psalmen 11:5) Sonai homa rumahta, dear ma paruhurhon ai. Iparentahkon Jahowa do bani halak Israel, “Anggo pajongjong rumah na bayu ham, maningon bahenonmu do hondor-hondor [atap, pagar] inggot rumahmu ai, ase ulang iampeihon ham utang daroh bani rumahmu, anggo adong halak na madabuh hunjai.”​—5 Musa 22:8.

9. Sonaha do bahenonta bani binatang?

⁹ Ipardiatei Jahowa do homa na ibahen hita bani binatang. Boi do hita mamunuh binatang bahen sipanganon atap pe pakeian. Boi do homa ibunuh hita binatang na parohkon parmaraan hubanta. (1 Musa 3:21; 9:3; 2 Musa 21:28) Tapi seng boi bunuhonta binatang pitah laho marguro-guro.​—Podah 12:10.

10. Hunja do ibotoh hita na adong do hagoluhan ibagas daroh?

¹⁰ Halani dong hagoluhan ibagas daroh, harga do ai bani Jahowa. Dob si Abel ibunuh si Kain, nini Jahowa ma hu bani, “Doruh-doruh do daroh ni anggimin hu Bangku hun tanoh in.” (1 Musa 4:10) Halani harga hagoluhan ni si Abel, iuhum Jahowa ma si Kain. Dobkonsi Bah na Sumbang, ipatuduh Jahowa do homa  anggo dong hagoluhan ibagas daroh. Ibere Jahowa do daging ni binatang bahen sipanganon bani si Noak ampa kaluargani. Ia mangkatahon, “Sagala na manggulmit anjaha na manggoluh, bahen sipanganonnima ma in. Ganupan in Hubere bannima sonai homa suan-suanan simaratah.” Dob ai ipatugah homa, “Gulei, na ibagas ope hosahni, ai ma darohni, ulang pangan hanima.”​—1 Musa 1:29; 9:3, 4.

11. Aha do parentah ni Jahowa bani halak Israel pasal daroh?

¹¹ Hira-hira 800 tahun dob masa ni si Noak, iparentahkon Jahowa do homa bani halak Israel, “Sonai homa ganup halak Israel, age halak dagang na manginsolat i tongah-tongah ni sidea, na dapotan buruan sanggah marburu atap manuk-manuk na bulih panganon, maningon iduruskon do darohni ai anjaha irungkub ai bani tanoh.” Janah ihatahon use, “Seng bulih panganonnima daroh.” (3 Musa 17:13, 14) Jadi tongtong do Jahowa sihol ase juakjuak-Ni mambotoh na pansing do daroh ai. Boi do ipangan daging, tapi ulang dihut darohni. Jadi, sanggah itangkap sidea binatang, maningon iduruskon do darohni hu tanoh.

12. Aha do na iarusi halak Kristen pasal daroh?

¹² Piga-piga tahun dob matei Jesus, martumpu ma apostel pakon sintua i Jerusalem, laho mamutuskon Titah na ija do bani halak Israel na totap idalankon halak Kristen. (Basa Lahoan ni Apostel 15:28, 29; 21:25.) Iurupi Jahowa do sidea mangarusi pansing janah harga do daroh ai Bani. Jadi halak Kristen bani abad na parlobei lang boi mangankon daroh ampa daging na lape iduruskon darohni. Dos do mangankon daroh ai pakon manombah gana-gana ampa  parriah-riahon. Sonaha anggo sonari? Totap do ipindo Jahowa ase hita mangkargai daroh.

13. Mase halak Kristen lang ra manjalo transfusi darah?

¹³ Tapi, boi do halak Kristen manjalo transfusi darah? Lang boi. Iparentahkon Jahowa do hita ase ulang mangankon daroh. Anggo ipatugah dokter ulang manginum alkohol, ai ipamasuk hita do alkohol ai hu angkulanta marhitei suntik? Tontu lang. Sonai ma, parentah lang boi mangankon daroh dos do artini lang boi manjalo transfusi darah.​—Idah Ambah ni Hatorangan 29.

14, 15. Porlu do ihargai halak Kristen hagoluhan janah manangihon Jahowa?

¹⁴ Sonaha anggo nini dokter matei do hita anggo lang manjalo transfusi darah? Ganup halak maningon mambahen haputusan laho mambalosi titah ni Naibata pasal daroh. Harga do bani halak Kristen hagoluhan ai, janah ipindahi do partambaran na legan ase boi totap manggoluh, sobali transfusi darah.

¹⁵ Marusaha do hita ase totap sehat. Tapi, halani ibagas daroh ai dong hagoluhan, hita lang manjalo transfusi darah. Rahanan ma manangihon Jahowa humbani mampartahankon hagoluhanta. Nini Jesus, “Barang ise na sihol manramotkon hosahni, na mangagouhon do ai, tapi barang ise na agouan hosah halani Ahu, ai do na jumpahan.” (Mateus 16:25) Itangihon hita do Jahowa halani holong. Ia do na mambotoh sidearan hubanta. Jadi, pansing janah ihargai hita do hagoluhan usih songon Jahowa mangidah ai.​—Heber 11:6.

16. Mase juakjuak ni Naibata manangihon Ia?

¹⁶ Juakjuak ni Naibata mamilih mambalosi parentah-Ni  pasal daroh. Sidea lang mangankon daroh atap pe manjalo transfusi darah. * Tapi sidea ra manjalo partambaran na legan ase boi manggoluh. Porsaya do sidea anggo Sitompa hagoluhan do mambotoh na sidearan hubani sidea. Ai porsaya do nasiam anggo Naibata do mambotoh sidearan hubanta?

17. Sonaha do cara manggunahon daroh na iharosuhkon Jahowa?

¹⁷ Marhitei si Musa ibere Jahowa do Titah bani halak Israel, nini ma, “Ibagas daroh ai do goluh ni daging ai, anjaha Hubere do ai bennima bani anjapanjap ai laho mambahen pardearan [atap, hasasapan ni dousa] bani tonduynima; ai daroh ai do mambahen pardearan.” (3 Musa 17:11) Sanggah mardousa halak Israel, sidea mangindo ase isasap Jahowa dousani marhitei manggalangkon binatang, janah iduruskon malim ma daroh ni binatang ai bani anjapanjap. Pitah ai do cara manggunahon daroh na iharosuhkon Jahowa.

18. Aha do na boi idapot hita marhitei hagoluhan na ibere Jesus?

¹⁸ Igantihon Jesus do uhum manggalangkon binatang marhitei mambere hagoluhanni atap darohni laho manasap dousa. (Mateus 20:28; Heber 10:1) Maharga tumang do hagoluhan ni Jesus dob ipapuho hu surga. Marhitei ai ma ibere Jahowa pangarapan hagoluhan na sadokah ni dokahni bani ganup jolma.​—Johannes 3:16; Heber 9:11, 12; 1 Petrus 1:18, 19.

19. Aha do na maningon bahenonta ase borsih humbani daroh ni ganup jolma?

 ¹⁹ Martarima kasih do hita bani Jahowa halani hagoluhan ai! Halani holong, aha pe ibahen hita laho mangajar na legan ase porsaya bani Jesus, janah boi dapotan hagoluhan sadokah ni dokahni. (Hesekiel 3:17-21) Dob ai, songon apostel Paulus boi ma hita mangkatahon, ‘Borsih do ahu humbani utang ni daroh nasiam, ai seng dong hubuati age aha, hupabotohkon do bani nasiam ganup rosuh ni Naibata.’ (Lahoan ni Apostel 20:26, 27) Jadi, hita patuduhkon harga do hagoluhan ampa daroh sanggah ipatugah hita bani na legan pasal Jahowa janah harga do hagoluhan Bani.