1, 2. Aha do na gati isungkun halak?

GATI do itangar hita barita hasunsahan, songon tsunami na parsedahon sada huta. Dong parjahat na manembaki gareja. Sada inang na matei halani kanker, manadingkon lima niombahni.

² Sanggah dong parmaraan, gati do hita sungkun-sungkun, “Mase sonai na masa?” Buei halak manungkun mase bahat hasunsahan ampa hajahaton i tanoh on. Ongga do nasiam manungkun sonai?

3, 4. (a) Aha do na isungkun si Habakuk? (b) Sonaha do balos ni Jahowa?

³ Bani Bibel, ongga do sidea na martenger ni uhur manungkun sisonai. Sontohni, isungkun si Habakuk do Jahowa, “Mase ma pataridahkonon-Mu bangku hagedukon, gabe paidah-idahonku hasunsahan? Pandorunion ampa pambahenan hajahaton do i lobeihu, masa do parsalisihan ampa paringoran.”​—Habakuk 1:3.

⁴ Bani Habakuk 2:2, 3 ibalosi Jahowa do sungkun-sungkun ni si Habakuk, janah marjanji do Ia laho padearhon aha na masa. Holong do Jahowa hubanta. Bibel mangkatahon, “Isarihon do nasiam.” (1 Petrus 5:7) Sasintongni sanggah dong hasunsahan, borit tumang do pangahap ni Naibata ase hita. (Jesaya  55:8, 9) Halani ai, ulas hita ma sungkun-sungkun: Mase bahat hasunsahan i tanoh on?

5. Aha do na iajarhon guru-guru ugama pasal hasunsahan na masa? Tapi, aha do na iajarhon Bibel?

⁵ Gati do pastor, pandita, ampa guru ugama mangkatahon hasunsahan ai harosuh ni Naibata do. Dong na mangkatahon, parmaraan na masa bani sasada halak domma itontuhon Naibata. Na legan mangkatahon, anggo dong na matei, sontohni dakdanak, ai halani Naibata sihol rap pakonsi. Tapi lang tongon ai. Lang ongga ibahen Jahowa parmaraan. Bibel mangkatahon, “Seng anjai lang sintong pambahenan ni Naibata, anjaha seng anjai papeolon ni Pargogoh Na So Tarimbang hasintongan.”​—Job 34:12.

6. Mase Naibata na isalahkon buei halak halani hasunsahan na i tanoh on?

⁶ Anggo dong hasunsahan, gati do Naibata na isalahkon. Halani iagan sidea do Naibata na manrajai dunia on. Hape songon na iparlajari hita bani Pasal 3, Sibolis do na manrajai dunia on.

7, 8. Mase i sab tanoh on bahat hasunsahan?

⁷ Ipatugah Bibel do banta “ganup dunia on ibagas kuasa ni hajahaton”. (1 Johannes 5:19) Jahat anjaha kejam do Sibolis ai. Ia do “na pakahouhon haganup dunia on”. (Pangungkabon 12:9) Halani buei halak mangusihi ia, ai do na mambahen mase i tanoh on bahat parjahat ampa parladung.

⁸ Dong alasan na legan mase bahat hasunsahan. Dob mardousa si Adam pakon si Hawa, ginomparni  pe dihut mardousa. Halani dousa, jolma mambahen hasunsahan bani hasomanni janah sihol manrajai na legan. Gati do sidea marporang janah martinggili. (Parambilan 4:1; 8:9) Sipata, masa do hasunsahan halani hita ‘tunduk bani panorang ampa na masa’. (Parambilan 9:11) Artini, boi do hita hona parmaraan halani sompong masa ai bani iananta.

9. Mase pos uhurta bani Jahowa hassi pe ipaturut-Ni hasunsahan?

⁹ Sedo Jahowa na mambahen hasunsahan. Jadi, anggo dong parporangan, hajahaton ampa penindasan, lang boi Naibata na isalahkon. Naibata lang mambahen parmaraan songon lalou, topan, ampa banjir. Ra do hita sungkun-sungkun, ‘Anggo Naibata do na sigogohan, mase lang ipasoh hasunsahan i tanoh on?’ Ibotoh hita isarihon Naibata do hita. Halani ai dong do alasan mase ipaturut-Ni hasunsahan.​—1 Johannes 4:8.

10. Ladung aha do na ihatahon Sibolis pasal Jahowa?

¹⁰ I pohon Eden, ipakahou Sibolis do si Adam pakon si Hawa. Ihatahon Sibolis, Raja na jahat do Jahowa anjaha lang mambere na dear bani sidea. Sihol do Sibolis ase sidea porsaya ia do sidearan mamarentah humbani Jahowa janah sidea lang mamorluhon Naibata.​—1 Musa 3:2-5; idah Ambah ni Hatorangan 27.

11. Sungkun-sungkun aha do na porlu ibalosi?

¹¹ Gabe manlawan ma si Adam pakon si Hawa bani Jahowa. Iagan sidea boi do sidea manontuhon na dear ampa na lepak bani diri ni sandiri. Sonaha  do Jahowa patuduhkon na lepak do sidea janah pitah Ia do na mambotoh sidearan hubanta?

12, 13. (a) Mase sidea na manlawan ai, lang mintor iripaskon Jahowa? (b) Mase Sibolis ipaturut Jahowa manrajai dunia on janah manisia mamarentah diri ni sandiri?

¹² Lang mintor iripaskon Jahowa sidea tapi ipaturut do sidea marginompari. Ase ginomparni boi mamilih ise na laho mamarentah sidea. Jahowa marosuh ase tanoh on igoki halak na sempurna. Aha pe na ibahen Sibolis lang boi manlanglangi harosuh ni Naibata.​—1 Musa 1:28; Jesaya 55:10, 11.

¹³ Sibolis manlawan Jahowa i lobei ni marjuta malekat. (Job 38:7; Daniel 7:10) Jadi ibere Jahowa ma panorang bani Sibolis laho patuduhkon tongon atap lang na ihatahon Sibolis ai. Ipaturut Jahowa ma manisia mamarentah diri ni sandiri, laho patuduhkon boi atap lang sidea marhasil anggo lang iurupi Naibata.

14. Aha do na ipatuduh humbani na masa i tanoh on?

¹⁴ Sadokah marribu tahun taridah ma manisia seng boi mamarentah diri ni sandiri. Taridah ma Sibolis do na parladung. Manisia mamorluhon Naibata. Tongon do na ihatahon nabi Jeremia, “Hubotoh do, ale Jahowa, sedo hape guru bani jolma langkahni, anjaha sedo halak pardalan-dalan na manontuhon langkahni.”​—Jeremia 10:23.

15, 16. (a) Mase dokah tumang ipaturut Jahowa hasunsahan? (b) Mase lang ipasoh Naibata hasunsahan i tanoh on?

¹⁵ Mase dokah tumang ipaturut Jahowa hasunsahan? Mase lang ipasoh Naibata hasunsahan?  Halani ihaporluhon do panorang laho patuduhkon anggo pamarentahan ni Sibolis lang marhasil. Anjaha lang adong pamarentahan ni manisia na marhasil. Hassi pe bahat hamajuan teknologi, tapi totap do adong parporangan, hajahaton ampa hasombuhan. Jadi manisia lang boi mamarentah diri ni sandiri.

¹⁶ Anggo ipasoh Naibata hasunsahan i tanoh on, doskon na mangurupi pamarentahan ni Sibolis do Ia ai, janah manisia gabe porsaya anggo sidea boi mamarentah diri ni sandiri. Hape lang tongon ai. Anggo sidea iurupi Jahowa, doskon na marladung do Ia. Hapeni lang ongga Ia marladung.​—Heber 6:18.

17, 18. Aha do na laho ibahen Jahowa bani haganup hasedaon na ibahen Sibolis?

¹⁷ Ai boi do ipadear Jahowa hasedaon na ibahen Sibolis pakon manisia? Boi. Haganupan do boi ibahen Naibata. Ibotoh Jahowa bani sada panorang taridah ma holi parladung do Sibolis ai. Dob ai bahenon-Ni ma tanoh on gabe paradeiso. Laho papuhohon-Ni ma “haganup halak na i tanoman”. (Johannes 5:28, 29) Lang adong be na boritan atap na matei. Igunahon Jahowa ma Jesus “laho mansedahon horja ni sibolis”. (1 Johannes 3:8) Halani ai martarima kasih ma hita bani Jahowa, halani ibere do panorang hubanta ase boi manandai janah mangidangi Ia. (Basa 2 Petrus 3:9, 10.) Hassi pe dong hasunsahanta, tapi iurupi Jahowa do ase boi itaron hita ai.​—Johannes 4:23; basa 1 Korint 10:13.

 ¹⁸ Lang ipaksa Jahowa hita manangihon Ia. Tapi ibere Naibata do hubanta sibere-bere na maharga. Parlajari hita ma pasal sibere-bere ai.

19. Sibere-bere aha do na ibere Jahowa hubanta? Anjaha mase hita martarima kasih halani sibere-bere ai?

¹⁹ Ibere Jahowa do sibere-bere na maharga hubanta, ai ma uhur pakon pingkiran. Binatang manggoluh mangihutkon naluri. Tapi, hita boi mamilih pasonangkon Jahowa atap lang. (Podah 30:24) Anjaha hita sedo songon robot, na mangkorjahon aha na dob itontuhon. Hita boi mamilih aha na iharosuhkon, ise do na gabe hasomanta, atap pe aha na laho ihorjahon hita. Jahowa sihol ase hita marmalas ni uhur.

20, 21. Aha do na sidearan na ipilih hita sonari?

²⁰ Sihol do Jahowa ase hita mangkaholongi-Si. (Mateus 22:37, 38) Songon sada bapa na sihol ase niombahni mangkaholongisi humbani uhur sedo halani ipaksa, sonai homa Jahowa, seng ipaksa hita ase mangidangi Ia. Sibolis, si Adam pakon si Hawa mamilih manlawan Jahowa. Hita sonaha?

²¹ Pilih ma mangidangi Jahowa. Dong marjuta halak na mamilih mangidangi Naibata sedo Sibolis. (Podah 27:11) Aha na laho bahenonta ase boi manggoluh bani dunia na baru na ijanjihon Naibata na lang dong be hasunsahan? Balosni dong bani pasal na mangihut.