1, 2. Ija do boi dapot hita ianan parlinggoman sonari on?

BAYANGKON ma, nasiam i darat sanggah horlom ari. Dong habahaba, longgur, mintor roh homa udan na doras tumang. Ipindahi nasiam ma ianan parlinggoman. Tontu malas pangahapmu sanggah jumpah ianan parlinggoman!

² Usih sonai ma situasinta. Lambin majangin do dunia sonari on. Ra do nasiam marpingkir, ‘Ija do boi dapot ahu parlinggoman?’ Panurat ni Psalmen mangkatahon bani Jahowa, “Haporusanku anjaha batar-batarhu, Naibatangku, anjaha hatengeran ni uhurhu.” (Psalmen 91:2) Tongon, iurupi Jahowa do hita ibagas parsoalanta janah mambere pangarapan na jenges bani ari simagira.

3. Sonaha do hita mambahen Jahowa gabe parlinggomanta?

³ Sonaha do Jahowa manlinggomi hita? Halani gogohan do Ia humbani ise pe na laho manjahati hita, iurupi do hita sanggah dong parsolanta. Hassi pe dong hasunsahan na iahapkon, pos do uhurta anggo Jahowa boi padearhon ganupan ai bani ari simagira. Bibel mangojur hita, “Ramotkon nasiam ma diri nasiam ibagas holong ni uhur ni Naibata.” (Judas 21) Porlu do hita totap dohor bani Jahowa ase boi maluah humbani hasunsahanta. Tapi, sonaha carani?

4, 5. Sonaha Jahowa patuduhkon holong-Ni hubanta?

⁴ Ase boi totap dohor bani Jahowa, dingat ma holong tumang do Ia hubanta. Rimangi ma ganup na  binahen-Ni hubanta. Ibere Jahowa do hubanta tanoh on na jenges tumang. Dong binatang-binatang ampa suan-suanan. Ibere do homa sipanganon na mantin ampa bah na borsih laho siinumonta. Marhitei Bibel ipatugah Jahowa do pasal goran pakon biak-Ni. Tapi, holong sibanggalan na ipatuduh-Ni aima isuruh-Ni Jesus hu tanoh on mambere hagoluhanni hubanta. (Johannes 3:16) Halani tobusan, dong pangarapan na jenges bani ari simagira.

⁵ Ipajongjong Jahowa do Harajaon na mamarentah hun nagori atas na laho pasaloseihon ganup hasunsahan. Harajaon ai mambahen tanoh on gabe paradeiso, na parohkon hasonangan ampa hadameion sadokah ni dokahni. (Psalmen 37:29) Leganni ai, Jahowa patuduhkon holong-Ni marhitei mangajar hita sonaha ase dear hagoluhanta sonari. Iarahkon do hita ase martonggo hu Bani, janah sihol do Ia manangar tonggonta. Torang ma, ipatuduh Jahowa do holong-Ni bani ganup halak.

6. Sonaha nasiam boi mangkargai holong ni Jahowa?

⁶ Sonaha nasiam boi mangkargai holong ni Jahowa? Martarima kasih ma bani Jahowa halani ganup na binahen-Ni. Tapi, buei do halak sonari on lang ibotoh martarima kasih. Ongga do masa sonai, sanggah Jesus i tanoh on. Humbani sapuluh dalahi na ipalum Jesus, pitah sahalak do na martarima kasih hu bani. (Lukas 17:12-17) Hita mangusihi dalahi ai, anggo tongtong martarima kasih bani Jahowa.

7. Sonaha do hita mangkaholongi Jahowa?

⁷ Porlu do homa ipatuduh hita holong bani Jahowa. Nini Jesus bani susianni, maningon do sidea mangkaholongi  Jahowa humbani gok ni uhur, humbani gok ni tonduy ampa humbani gok ni pingkiran. (Basa Mateus 22:37.) Aha do artini ai?

8, 9. Sonaha hita patuduhkon anggo hita mangkaholongi Jahowa?

⁸ Ai sungkup do pitah mangkatahon hita mangkaholongi Jahowa? Lang. Anggo hita mangkaholongi Jahowa humbani gok ni uhur, tonduy, ampa pingkiran, maningon taridah do ai humbani parlahounta. (Mateus 7:16-20) Torang do ipatugah Bibel, anggo hita mangkaholongi Jahowa, idalankon hita do parentah-Ni. Sunsah do ai? Lang, halani “seng borat titah” ni Jahowa.​—Basa 1 Johannes 5:3.

⁹ Anggo hita mangkaholongi Jahowa, martuah ma hagoluhanta. (Jesaya 48:17, 18) Tapi, sonaha do ase hita boi totap dohor bani Jahowa? Ulas hita ma ai.

10. Mase nasiam porlu tongtong marlajar pasal Jahowa?

¹⁰ Sonaha nasiam boi marhasoman pakon Jahowa? Sanggah nasiam marlajar Bibel, lambin itandai nasiam ma Jahowa. On ma na mambahen parhasomanan nasiam lambin orot. Tapi, parhasomanan on usih songon apuy, porlu ijaga nasiam ase totap gara. Carani, tongtong ma ibere nasiam soban. Sonai ma parhasomananmu boi totap toguh anggo tongtong nasiam marlajar pasal Jahowa.​—Podah 2:1-5.

11. Aha do na iahapkon nasiam humbani parlajaran Bibel?

¹¹ Anggo tongtong do iparlajari nasiam Bibel, iahapkon nasiam ma podahni na hona bai uhurmu. Pardiateihon ma sonaha pangahap dua susianni Jesus sanggah ipatorangni na tarsurat. Sidea mangkatahon, “Ai lang gara do uhurta ibagas, sanggah na pinarsahapkon-Ni ai  hita i tongah dalan, laho patorangkon banta na tarsurat in?”​—Lukas 24:32.

12, 13. (a) Sonaha do anggo lang ijaga hita holongta bani Jahowa? (b) Sonaha do bahenonta ase holong bani Jahowa totap gara?

¹² Songon dua susianni ai, gara uhurni dob iarusi na tarsurat in, ra do sonai na iahapkon nasiam sanggah iarusi nasiam isi ni Bibel. On ma na mangurupi nasiam lambin mananda Jahowa janah mangkaholongi-Si. Tapi, tontu lang ra nasiam holong ai lambin borgoh.​—Mateus 24:12.

¹³ Jaga ma parhasomanan pakon Jahowa totap toguh. Halani ai, porlu do tongtong iparlajari nasiam pasal Jahowa pakon Jesus. Janah dalankon ma na iparlajari ai ibagas goluhmu. (Johannes 17:3) Sanggah ibasa nasiam Bibel, sungkun ma dirimu: ‘Humbani ayat on, aha do  na huparlajari pasal Jahowa? Mase maningon huhaholongi Jahowa humbani gok ni uhur ampa tonduyhu?’​—1 Timoteus 4:15.

14. Sonaha tonggo patoguhkon holongta bani Jahowa?

¹⁴ Anggo adong hasomanmu na orot, tontu tongtong do nasiam marsahap pakonsi. On boi patoguhkon parhasomanannima. Sonai homa, anggo tongtong hita martonggo bani Jahowa, on patoguhkon holongta hu Bani. (Basa 1 Tesalonika 5:17.) Tonggo, ai ma sada hasurungan na maharga humbani Naibata. Tongtong ma patugah na ibagas uhurta hu Bani. (Psalmen 62:9) Ulang ma tonggo na ihapal, tapi humbagas uhur na borsih ma martonggo. Jadi, anggo tongtong iparlajari hita Bibel, janah martonggo humbagas uhur, toguh ma holongta bani Jahowa.

15, 16. Sonaha pangahap nasiam bani horja parambilanon?

¹⁵ Anggo sihol totap dohor bani Jahowa, porlu do hita patugahkon bani na legan pasal haporsayaonta. On pe sada hasurungan na maharga do. (Lukas 1:74) Iparentahkon Jesus do ganup halak Kristen ase pararatkon ambilan na madear pasal Harajaon ni Naibata. Ai domma ihorjahon nasiam on?​—Mateus 24:14; 28:19, 20.

¹⁶ Maharga do horja parambilanon bani apostel Paulus; “arta” do on bani. (2 Korint 4:7) Patugahkon pasal Jahowa ampa harosuh-Ni, ai ma horja na siporlunan. On ma cara laho mangidangi Jahowa, janah ihargai Ia do ai. (Heber 6:10) Marguna do parambilanon ai bani nasiam pakon sidea na ra manangihon, halani on mambahen sidea pakon nasiam lambin dohor bani Jahowa janah mandapot hagoluhan sisadokah ni dokahni.  (Basa 1 Korint 15:58.) Ai dong do horja na legan na boi pamalaskon uhur songon horja on?

17. Mase porlu hita ringgas bani horja parambilanon?

¹⁷ Ringgas ma bani horja parambilanon. (2 Timoteus 4:2) Porlu do ganup halak manangar pasal Harajaon ni Naibata. Bibel mangkatahon, “Dohor mando ari ni Jahowa na bolon ai, dohor mando anjaha mangolos roh.” Jadi, maningon saud do ari ai. (Sepanya 1:14; Habakuk 2:3) Lang piga dokah nari boiskonon ni Jahowa do dunia ni Sibolis na jahat on. Tapi, paima masa ai, porlu do ipasingat hita ganup halak, ase sidea boi mamilih mangidangi Jahowa.

18. Mase tongtong hita roh hu partumpuan laho manombah Jahowa?

¹⁸ Sihol do Jahowa ase hita manombah-Si rapkon ganup hasomanta sahaporsayaon. Bibel patugahkon, “Pardiateihon hita ma samah hita, ase marsiojuran hita mandalankon holong ampa horja na madear, anjaha ulang ma tadingkon hita partumpuanta, songon na dob somal bani deba halak, tapi lambin marsipagolpaan ma hita, halani na lambin dohor ma ari ai ididah nasiam.” (Heber 10:24, 25) Jadi tongtong ma hita roh hu partumpuan, halani ijai hita boi marsiojuran ampa patoguhkon na legan.

19. Aha do na mambahen hita lambin mangkaholongi hasomanta sahaporsayaon?

¹⁹ I partumpuan, jumpah nasiam do hasoman na bujur humbani marbagei suku na boi mangurupi nasiam manombah Jahowa. Tapi songon nasiam, sidea pe ra do mambahen hasalahan. Anggo sonai, sirsir ma nasiam manasap hasalahan ni sidea. (Basa Kolosse 3:13.) Tongtong ma pindahi nasiam biak ni sidea na bujur. Anggo  sonai ibahen nasiam, lambin ihaholongi nasiam ma sidea janah lambin dohor ma nasiam bani Jahowa.

20, 21. Aha do “goluh na sintong” ai?

²⁰ Marosuh do Jahowa ase ganup hasomanni mangahapkon goluh na sidearan. Bibel mangajarhon ia hagoluhan bani ari simagira, legan tumang do ai marimbangkon goluhta sisonari on.

²¹ Bani ari simagira, hita mangahapkon “hagoluhan sisadokah ni dokahni”, lang pitah 70 atap 80 tahun. Holi i paradeiso, malas ni uhur ampa hadameion do na iahapkon hita. Anjaha lang dong be naborit. Bani Bibel, ihatahon do ai “goluh na sintong”. On ma janji ni Naibata hu banta. Tapi marusaha ma ase “itangkap” hita ai.​—1 Timoteus 6:12, 19.

22. (a) Sonaha ase boi dapot hita “goluh na sintong” ai? (b) Boi do dapotta goluh na sintong ai humbani gogohta sandiri?

²² Sonaha ase boi dapot hita “goluh na sintong” ai? Maningon do hita “mangkorjahon na madear” janah “bayak bani horja na madear”. (1 Timoteus 6:18) Artini, porlu do ihorjahon hita aha na dob iparlajari humbani Bibel. Tapi goluh na sintong ai, boi dapotta lang halani gogohta sandiri. Silayak-layak humbani Jahowa do ai bani juakjuak-Ni na setia, na patuduhkon “idop ni uhur” ni Naibata. (Rom 5:15) Malas do uhur ni Jahowa mambere silayak-layak ai bani juakjuak-Ni na setia.

23. Mase maningon ibahen hita haputusan na sintong sonari?

²³ Sungkun ma dirimu, ‘Ai domma sintong panombahanku bani Naibata?’ Anggo porlu ope nasiam mambahen hamubahon, mintor horjahon ma. Anggo hita marpangunsandei bani Jahowa, janah unduk humbani uhurta, iondingi Jahowa do hita. Sadokah panorang  parpudi on, Jahowa manlinggomi juakjuak-Ni na setia. Anjaha ipastihon-Ni do sidea manggoluh sadokah ni dokahni i Paradeiso songon na dob ijanjihon-Ni. Jadi, boi do dapot nasiam goluh na sintong ai, anggo nasiam mambahen haputusan na sintong sonari!