1. Ise do na boi patugahkon cara na sintong manombah Naibata?

BUEI do ugama mangkatahon anggo sidea mangajarhon hasintongan pasal Naibata. Tapi lang tongon ai, halani legan do ajaran ni sidea pasal Naibata pakon cara manombah-Si. Sonaha do boi ibotoh hita cara na sintong laho manombah Naibata? Pitah Jahowa do na boi patugahkon sonaha cara manombah-Si.

2. Hunja do ibotoh hita cara na sintong laho manombah Naibata?

² Ibere Jahowa do banta Bibel ase ibotoh hita cara na sintong laho manombah-Si. Parlajari ma Bibel, ase iurupi hita mandapot guna humbani pangajaran-Ni, halani parduli do Jahowa hu banta.​—Jesaya 48:17.

3. Aha do na ipindo Naibata hubanta?

³ Bahat halak mangkatahon ijalo Naibata do ganup ugama. Tapi lang sonai na iajarhon Jesus. Nini do, “Seng haganup halak na mangkatahon Bangku ‘Tuhan, Tuhan!’ masuk hu Harajaon nagori atas ai, pitah na mandalankon harosuh ni Bapang-Ku.” Jadi, porlu do ibotoh hita na iharosuhkon Naibata janah mandalankon ai. Isarupahon Jesus do halak na lang manangihon Naibata pakon parjahat, “sihorjahon na ulang”.​—Mateus 7:21-23.

4. Aha do na ipatugah Jesus pasal mangkorjahon harosuh ni Naibata?

⁴ Jesus patugahkon lang sai urah mangkorjahon harosuh ni Naibata. Nini do, “Masuki hanima ma horbangan  na sompit in, ai tahar do horbangan anjaha bolag do dalan hu hamagouan, anjaha buei do halak na masuk hujai. Tapi sompit do horbangan anjaha etek do dalan na dompak hagoluhan, anjaha otik do halak na jumpahan ai.” (Mateus 7:13, 14) Dalan na etek aima cara na sintong laho manombah Naibata, manogu hu hagoluhan sisadokah ni dokahni. Dalan na bolag aima cara na salah laho manombah Naibata, manogu hu hamatean. Tapi, Jahowa lang marosuh adong na matei. Bereon-Ni do panorang bani ganup jolma ase manandai Ia.​—2 Petrus 3:9.

5. Sonaha hita boi mananda panombah na sintong?

⁵ Nini Jesus hita boi mambotoh ise do sasintongni na manombah Naibata. Uji ma na ihaporsayai ampa na ihorjahon sidea. Ia mangkatahon, “Humbani buahni do tandaonnima sidea.” Nini homa, “Ai marbuahkon na madear do sagala hayu na madear.” (Mateus 7:16, 17) On sedo artini anggo sidea na manombah Naibata ai sempurna. Tapi, marusaha do sidea mangkorjahon aha na sintong. Sonari idah hita ma ise do na manombah Naibata mangihutkon cara na sintong.

6, 7. Mase panombahan na sintong maronjolan bani Bibel? Aha na iusihi hita humbani Jesus?

⁶ Ajaranni maronjolan bani Bibel. Bibel mangkatahon, “Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoron, ase gokan dear siminik ni Naibata, mangasup bani sagala horja na madear.” (2 Timoteus 3:16, 17) Si Paulus manuratkon bani halak Kristen, “Ijalo nasiam do hata ni Naibata na  binogei nasiam hun bennami, ijalo nasiam do in, sedo songon hata ni jolma, tapi songon hata ni Naibata do.” (1 Tessalonika 2:13) Panombahan na sintong maronjolan bani Hata ni Naibata ai ma Bibel, lang maronjolan bani pingkiran ni jolma, adat, atap na leganni.

⁷ Ganup na iajarhon Jesus maronjolan bani Hata ni Naibata. (Basa Johannes 17:17.) Gati do na iajarhon Jesus ibuat humbani Hata ni Naibata. (Mateus 4:4, 7, 10) Jadi panombah na sintong mangusihi Jesus, mangajar humbani Bibel.

8. Aha do na iajarhon Jesus pasal panombahan hubani Jahowa?

⁸ Pitah Jahowa do na isombah. Psalmen 83:19 mangkatahon, “Pitah Ham do na margoran Jahowa, Na Tang Sitimbulan i sab tanoh on.” Jesus sihol ase ganup halak mananda ise do Naibata na sintong. Halani ai, ia mangajarhon goran ni Naibata bani sidea. (Basa Johannes 17:6.) Nini Jesus, “[Jahowa] Naibatamu do sisombahonmu, sahalak-Si do sibalosanmu!” (Mateus 4:10) Jadi, panombah na sintong mangusihi Jesus, pitah manombah Jahowa. Ipakei hita do goran-Ni janah mangajarhon ise do goran-Ni ampa aha do harosuh-Ni.

9, 10. Sonaha hita patuduhkon holong bani na legan?

⁹ Patuduh holong na sintong bani na legan. Iajari Jesus do susianni ase marsihaholongan. (Basa Johannes 13:35.) Lang soal hunja do asalta, aha do sukunta, bayak atap masombuh, holong do na pasadahon hita gabe songon na marsanina. (Kolosse 3:14) Halani holong, lang dihut hita marporang atap mamunuh. Bibel mangkatahon, “Hunjon do boi tandaon anak ni Naibata pakon anak ni sibolis, ganup na so mangkorjahon hapintoron seng humbani Naibata ai, sonai  homa na so marholong ni uhur bani hasomanni.” Nini homa, “Ase marsihaholongan hita. Ulang ma songon si Kain, na roh humbani na jahat ai, gabe ibunuh anggini.”​—1 Johannes 3:10-12; 4:20, 21.

¹⁰ Igunahon hita do panorang, gogoh, ampa artanta laho mangurupi ampa patoguhkon na legan. (Heber 10:24, 25) Ihorjahon hita do “na madear bani haganup halak”.​—Galatia 6:10.

11. Mase Jesus ihatahon parhiteian hubani Naibata?

¹¹ Manangihon Jesus halani ia do parhiteian hubani Naibata. Bibel mangkatahon, “Seng dong haluahon ibagas atap ise na legan, ai seng dong goran na legan i toruh ni langit ibere bani jolma, parhiteianta hu haluahon.” (Lahoan ni Apostel 4:12) Bani Pasal 5 buku on, domma iparlajari hita isuruh Jahowa do Jesus hu tanoh on gabe tobusan bani sidea na ra manangihonsi. (Mateus 20:28) Jesus do na ipilih Jahowa gabe Raja laho mamarentah i sab tanoh on. Anggo marosuh hita manggoluh sadokah ni dokahni, maningon do itangihon hita Jesus.​—Basa Johannes 3:36.

12. Mase hita lang dihut bani politik?

¹² Lang dihut bani politik. Jesus lang dihut bani politik. Sanggah itangkap ia, nini ma bani si Latus, “Ia Harajaon-Ku seng na hun dunia on.” (Basa Johannes 18:36.) Songon Jesus, hita pe setia bani harajaon ni Naibata. Halani ai ija pe marianan, hita lang dihut bani politik. Tapi, Bibel patugahkon banta ase unduk bani “pamarentah na markuasa”. (Roma 13:1) Unduk do hita bani uhum i negaranta. Tontu, anggo marlawanan do uhum ai bani titah ni Naibata, tiru hita ma apostel na mangkatahon, “Maningon balosan do  diri bani Naibata ase bani jolma!”​—Lahoan ni Apostel 5:29; Markus 12:17.

13. Aha do na laho ibaritahon pasal Harajaon ni Naibata?

¹³ Porsaya pitah Harajaon ni Naibata do na boi pasaloseihon parsoalan i tanoh on. Nini Jesus ibaritahon do “Ambilan Na Madear on pasal Harajaon” i sab dunia on. (Basa Mateus 24:14.) Lang dong pamarentahan ni jolma na boi mangkorjahon songon na ihorjahon Harajaon ni Naibata. (Psalmen 146:3) Iajari Jesus do hita manonggohon, “Sai roh ma Harajaon-Mu. Sai saud ma harosuh ni uhur-Mu i nagori tongah on songon na i nagori atas.” (Mateus 6:10) Nini Bibel, boiskonon ni Harajaon ni Naibata ma ganup pamarentahan ni jolma janah Harajaon ai ‘totap do ronsi sadokah ni dokahni’.​—Daniel 2:44.

14. Ise do na manombah Naibata marhitei cara na sintong?

¹⁴ Dob iparlajari hita ai, pingkirhon ma, ‘Ajaran ni ise do na maronjolan bani Bibel? Ise do na patugahkon goran ni Naibata? Ise do na patuduhkon holong na sintong bani na legan janah porsaya anggo Jesus roh hu tanoh on laho paluahkon hita? Ise do na lang dihut bani politik? Ise do na mangajarhon pitah Harajaon ni Naibata do na boi pasaloseihon parsoalanta?’ Pitah Saksi-Saksi Jahowa.​—Jesaya 43:10-12.

15. Aha na maningon ibahen ase ijalo Jahowa panombahanta?

¹⁵ Lang sungkup pitah porsaya dong do Naibata. Sibolis pakon begu-beguni pe porsaya do ai. Tapi, sidea lang manangihon Naibata. (Jakobus 2:19) Anggo sihol hita ijalo Naibata panombahanta, horjahon ma parentah-Ni.

16. Mase maningon itadingkon hita ugama na ladung?

 ¹⁶ Leganni ai ase ijalo Naibata panombahanta, maningon do itadingkon hita ugama na ladung. Nabi Jesaya manuratkon, “Luar ma hun tongah-tongah ni sidea, urasi dirinima.” (Jesaya 52:11; 2 Korint 6:17) Halani ai, ulang horjahon aha pe na ihorjahon ugama na ladung.

17, 18. Aha do “Babel na banggal” ai? Janah mase maningon itadingkon hita?

¹⁷ Aha do ugama na ladung ai? Ai ma ganup ugama na mangajarhon manombah Naibata marhitei cara na lang iharosuhkon-Ni. Bani Bibel, ugama na ladung ihatahon “Babel na banggal”. (Pangungkabon 17:5) Mase? Dobkonsi Bah na Sumbang, buei ajaran ugama na ladung mungkahni humbani huta Babel. Dob ai, manrarat ma ajaran ai hu sab dunia. Sontohni, sidea na tading i Babel manombah Naibata Sitolusada. Sonari, bahat do ugama mangajarhon Naibata ai Sitolusada. Tapi Bibel mangajarhon pitah sada do Naibata na sintong, ai ma Jahowa janah Anak-Ni do Jesus. (Johannes 17:3) Halak na i Babel porsaya manggoluh ope tonduy ni na matei janah boi iarsik-arsik i naraka. Tapi, ladung do ai.​—Idah Ambah ni Hatorangan 14, 17, ampa 18.

¹⁸ Naibata patugahkon, lang piga dokah nari bois ma ganup ugama na ladung. (Pangungkabon 18:8) Iarusi nasiam do mase maningon itadingkon ugama na ladung? Sihol do Jahowa ase ulang ipadokah-dokah hita mangkorjahon ai.​—Pangungkabon 18:4.

19. Aha do hasilni anggo nasiam mamilih manombah Jahowa?

¹⁹ Sanggah nasiam mamilih manadingkon ugama na ladung janah manombah Jahowa, ra do adong hasoman  atap kaluarga nasiam na marsogam ni uhur. Tapi, ihasomani Jahowa do nasiam. Marsada do nasiam pakon marjuta halak i sab dunia on na marsihaholongan. Dong pangarapan hagoluhan na sadokah ni dokahni i Paradeiso. (Markus 10:28-30) Janah ra do homa adong hasoman atap kaluaga nasiam na ra marlajar Bibel.

20. Mase porlu manombah Jahowa marhitei cara na sintong?

²⁰ Lang piga dokah nari, boiskonon ni Naibata do ganup parjahat. Dob ai mamarentah ma Harajaon-Ni hu sab tanoh on. (2 Petrus 3:9, 13) Dear tumang do on! Holi, ganup halak manombah Jahowa marhitei cara na iharosuhkon-Ni. Halani ai, porlu do ipilih hita sonari laho manombah Jahowa marhitei cara na sintong.