1, 2. Mase tonggo ai sada silayak-layak na maharga, janah mase porlu ibotoh hita na ihatahon Bibel pasal ai?

BANI Jahowa, Sitompa langit ampa tanoh on, songon santektek bah bani ember do ididah-Ni sagala bangsa i sab tanoh on. (Psalmen 115:15; Jesaya 40:15) Hassi pe sonai, bani Psalmen 145:18, 19 ihatahon, “Dohor do Jahowa bani sagala na mandilo-Si, bani haganup na mandilo-Si ibagas hasintongan. Sura-sura ni na mangkabiari-Si isuhuni do, itangar do doruh-doruh ni sidea anjaha ipaluah do sidea.” Sada hasurungan do tonggo ai! Jahowa, Pargogoh na So Tarimbang in, sihol ase hita dohor Bani, janah sihol manangar tonggonta. Torang ma anggo tonggo ai sada hasurungan, silayak-layak na maharga humbani Jahowa hubani ganupan hita.

² Tapi, Jahowa ra manangar anggo hita martonggo domu bani harosuh ni uhur-Ni. Sonaha mangkorjahon ai? Ulas hita ma aha na ihatahon Bibel pasal tonggo.

3. Mase nasiam porlu martonggo bani Jahowa?

³ Jahowa sihol ase hita martonggo hu Bani. Hunja do ibotoh hita ai? Basa ma Pilippi 4:6, 7. Pingkirhon ma pangindoan-Ni ai. Sitompa langit ampa tanoh on, parduli tumang banta janah sihol ase iuseihon hita ganup holsoh ni uhurta hu Bani.

4. Mase tongtong martonggo bani Jahowa mambahen parhasomananta lambin orot hu Bani?

 ⁴ Marhitei tonggo hita boi dohor bani Jahowa. Usih songon na marhasoman, lambin orot ma parhasomanan ni sidea anggo tongtong marsahapi pasal pingkiran, holsoh, ampa pangahapni bei. Sonai homa, tonggo mambahen lambin orot parhasomanan nasiam pakon Jahowa. Marhitei Bibel Ia patugahkon pingkiran ampa pangahap-Ni, aha na sihol bahenon-Ni bani ari simagira. Marhitei tonggo, nasiam pe boi tongtong patugahkon aha na ibagas uhurmu hu Bani.​—Jakobus 4:8.

5. Hunja do ibotoh hita lang ganupan tonggo itangar Jahowa?

⁵ Ai ganup do tonggo itangar Jahowa? Lang. Bani masa ni nabi Jesaya, ihatahon Jahowa do bani halak Israel, “Age pe ipagati hanima martonggo, seng tangaron-Ku ai; ai gok daroh do tangannima.” (Jesaya 1:15) Jadi,  anggo lang ijaga hita parlahounta, lambin daoh ma hita humbani Jahowa, janah on mambahen tonggonta lang itangar-Ni.

6. Mase ihaporluhon haporsayaon? Janah sonaha hita pataridahkon ai?

⁶ Ase itangar Jahowa tonggonta, porlu do hita porsaya hu Bani. (Markus 11:24) Apostel Paulus patorangkon, “Anggo seng porsaya halak, seng tarbahen harosuh ia bani Naibata, ai halak na sihol mandohori Naibata, maningon porsaya do ia adong Naibata, anjaha Ia mambere upah bani na mangindahi-Si.” (Heber 11:6) Tapi, pitah porsaya lang sungkup. Porlu do tangkas taridah haporsayaon ai marhitei mandalankon titah-Ni bai ganup ari.​—Basa Jakobus 2:26.

7. (a) Mase maningon hormat anjaha toruh maruhur hita sanggah martonggo bani Jahowa? (b) Sonaha hita tulus sanggah martonggo?

⁷ Maningon do hita hormat janah toruh maruhur sanggah martonggo bani Jahowa. Mase sonai? Porini hita marsahap pakon raja atap presiden, tontu hormat do hita. Naibata Pargogoh na So Tarimbang do Jahowa. Jadi, ai lang lobih hormat ampa toruh maruhur do hita sanggah marsahap pakon-Si? (1 Musa 17:1; Psalmen 138:6) Tulus ma hita sanggah martonggo, artini humbani borsih ni uhur ma sahapta, ulang marganjang-ganjang.​—Mateus 6:7, 8.

8. Sanggah hita mangindo ibagas tonggo, aha do na porlu ihorjahon use?

⁸ Sanggah hita mangindo ibagas tonggo, horjahon ma domu bani aha na itonggohon. Sontohni, anggo hita martonggo ase ibere hagoluhan ari-ari, ulang ma hita marayoh marhorja janah mangarap Jahowa manggoki haporluanta. Maningon do hita ringgas janah ra  mangkorjahon aha pe. (Mateus 6:11; 2 Tessalonika 3:10) Anggo hita mangindo ase iurupi manadingkon hasomalan na sambor, padaoh ma dirinta humbani aha pe na mambahen hita mardousa. (Kolosse 3:5) Sonari, ulas hita ma sungkun-sungkun na gati isungkun halak pasal tonggo.

9. Bani ise do hita martonggo? Aha do na iajarhon Johannes 14:6 pasal tonggo?

⁹ Bani ise do hita martonggo? Iajarhon Jesus do susianni ase martonggo bani ‘Bapa na i nagori atas’. (Mateus 6:9) Nini Jesus use, “Ahu do dalan in pakon hasintongan ampa hagoluhan. Seng dong na das hubani Bapa in, anggo seng marhiteihon Ahu.” (Johannes 14:6) Jadi pitah bani Jahowa do hita martonggo marhiteihon Jesus. Aha do artini martonggo marhiteihon Jesus? Jesus isuruh Jahowa roh hu tanoh on laho paluahkon hita humbani dousa ampa hamatean. (Johannes 3:16; Rom 5:12) Iminaki Jahowa do homa Jesus gabe Sintua ni Malim ampa Panguhum. Jadi, porlu do hita mangkargai horja na sumurung na binere ni Jahowa bani Jesus ase ijalo tonggonta.​—Johannes 5:22; Heber 6:20.

10. Ai maningon jongjong atap manrogop do hita sanggah martonggo? Patorang ma.

¹⁰ Ai maningon jongjong atap manrogop do hita sanggah martonggo? Lang, Jahowa lang mangindo hita ase jongjong atap manrogop sanggah martonggo. Bibel patugahkon, lang soal atap sonaha pe posisinta, siporlunan bani Jahowa ai ma maningon hormat janah maruhur na sintong. (1 Kronika 17:16; Nehemia 8:7; Daniel 6:11; Markus 11:25) Boi do hita martonggo ija pe  janah attigan pe, arian atap borngin ni ari. Boi do homa hita marsora atap pe marsahap ibagas uhur sanggah martonggo. Pos ma uhurta, itangar Jahowa do tonggonta hassi pe na legan lang boi manangar ai.​—Nehemiah 2:1-6.

11. Aha do deba na boi itonggohon hita bani Jahowa?

¹¹ Aha do na porlu itonggohon? Aha pe na iharosuhkon Jahowa boi itonggohon. Bibel patugahkon, “Anggo ipindo hita atap aha domu hubani rosuh ni uhur-Ni, itangihon do hita.” (1 Johannes 5:14) Boi do pasal dirinta itonggohon? Boi. Usih songon na marsahap pakon hasoman, hita pe boi patugahkon aha na dong ibagas uhur atap pingkiranta bani Jahowa. (Psalmen 62:9) Boi do hita mangindo ase ibere tonduy na pansing laho mangkorjahon na sintong. (Lukas 11:13) Boi do homa hita mangindo hagogohon ampa hauhuron ase boi mambahen haputusan na dear sanggah dong parsoalan. (Jakobus 1:5) Porlu do ipindo hita hasasapan ni dousa humbani Jahowa. (Epesus 1:3, 7) Tonggohon homa halak na legan songon kaluarganta pakon hasomanta i kuria.​—Lahoan ni Apostel 12:5; Kolosse 4:12.

12. Aha do na siporlunan ibagas tonggonta?

¹² Aha do na siporlunan ibagas tonggonta? Pasal Jahowa pakon harosuh-Ni. Martarima kasih ma bani Jahowa halani ganup na binahen-Ni. (1 Kronika 29:10-13) Sonai do tonggo na iajarhon Jesus bani susianni sanggah ia i tanoh on. (Basa Mateus 6:9-13.) Jesus mangajarhon, na parlobei itonggohon ai ma ase ipapansing goran ni Naibata. Dob ai, porlu do itonggohon sidea ase roh Harajaon ni Naibata janah saud harosuh ni uhur-Ni i tanoh on. Dob itonggohon ganup na siporlunan ai,  boi ma itonggohon hagoluhan siganup ari. Anggo Jahowa ampa harosuh-Ni do na parlobei itonggohon, on pataridahkon ai do na siporlunan banta.

13. Sadiha ganjang do dearni tonggonta?

¹³ Sadiha ganjang do dearni tonggonta? Lang dong ipatugah Bibel. Boi do ganjang atap pondok, mangidah situasi. Sontohni, ra do pondok tonggo laho mangan. Tapi, ra do ganjang tonggonta sanggah sihol martarima  kasih atap patugahkon holsoh ni uhurta. (1 Samuel 1:12, 15) Ulang ma marganjang-ganjang sanggah martonggo ase ipuji-puji, songon tonggo ni halak bani masa ni Jesus. (Lukas 20:46, 47) Seng iharosuhkon Jahowa tonggo sisonai. Na siporlunan Bani, ai ma tonggo na humbagas uhur.

14. Sadiha gati hita martonggo, janah aha na boi iparlajari hita pasal Jahowa?

¹⁴ Sadiha gati hita martonggo? Jahowa marosuh anggo hita tongtong martonggo. Bibel mangkatahon maningon do hita “golgol bani tonggo”, “totap martonggo”, janah “martonggo arian pakon borngin” hu Bani. (Rom 12:12; 1 Tessalonika 5:17; 1 Timoteus 5:5) On patuduhkon sirsir do Jahowa manangar tonggonta.  Jadi, puji ma Jahowa bai ganup ari halani holong ampa dear layak-Ni. Pindo ma panoguan, gogoh, ampa pangapohon hun Bani. Anggo tongtong do hita martonggo, ai patuduhkon hita mangkargai hasurungan ni tonggo.

15. Mase hita mangkatahon “amen” dob salosei martonggo?

¹⁵ Mase hita mangkatahon “amen” dob salosei martonggo? “Amen” artini “saud ma”. Sonai ma caranta patugahkon anggo ai do tongon na ipindo humbagas uhurta. (Psalmen 41:14) Bibel mangajarhon, sanggah hita dihut martonggo rapkon halak simbuei patut do homa hita mangkatahon “amen”. Boi do ibagas uhur atap marsora, laho patuduhkon anggo hita setuju bani na itonggohon.​—1 Kronika 16:36; 1 Korint 14:16.

16. Ra do Jahowa mambalosi tonggonta? Patorang ma.

¹⁶ Tongon do Jahowa ra mambalosi tonggonta? Tongon, ra do Ia. Nini Bibel, “Sitangihon tonggo” do Naibata ai. (Psalmen 65:3) Itangar janah ibalosi Jahowa do tonggo ni marjuta halak na bujur. Anjaha Ia mambalosi tonggo marhitei piga-piga cara.

17. Sonaha Jahowa mamakei malekat ampa juakjuak-Ni na i tanoh on laho mambalosi tonggonta?

¹⁷ Ipakei Jahowa do malekat ampa juakjuak-Ni na i tanoh on laho mambalosi tonggonta. (Heber 1:13, 14) Sontohni, sanggah sidea martonggo mangindo pangurupion ase boi mangarusi isi ni Bibel, mintor roh do Saksi Jahowa. On ma bukti anggo malekat dihut mangambilankon “Ambilan Na Madear” i sab tanoh on, songon na ihatahon Bibel. (Basa Pangungkabon 14:6.) Bahat homa saninanta na mangahapkon, dob martonggo sidea pasal holsoh atap haporluanni, roh ma  pangurupion humbani hasomanta i kuria.​—Podah 12:25; Jakobus 2:16.

18. Sonaha Jahowa mamakei tonduy na pansing ampa Bibel laho mambalosi tonggonta?

¹⁸ Leganni ai, Jahowa mambalosi tonggonta marhitei tonduy na pansing. Sanggah mangindo pangurupion ibagas parsoalanta, ibere Jahowa do tonduy na pansing ase ipargogohi janah itogu hita. (2 Korint 4:7) Ibalosi Jahowa do homa tonggonta marhitei Bibel ase maruhur hita mambahen haputusan. Sanggah mambasa Bibel, ra do adong ayat-ayat na boi mangurupi hita. Dob ai, i partumpuan, ra do ipakei Jahowa hasomanta na mambere komentar ampa sintua na marambilan, mambere podah na jenges domu bani haporluanta.​—Galatia 6:1.

19. Mase sipata pangahapta songon na lang ibalosi Jahowa tonggonta?

¹⁹ Sipata, ra do sungkun-sungkun ibagas uhurta, ‘Mase lang ibalosi Jahowa tonggongku?’ Dingat ma, Jahowa do na mambotoh sonaha janah attigan panorang na topat mambalosi tonggo ai. Ibotoh-Ni do haporluanta. Halani ai, pongkut ma martonggo ase taridah na tongon-tongon do hita mangindo janah porsaya tumang hu Bani. (Lukas 11:5-10) Ra do tonggonta ibalosi Jahowa marhitei cara na so panagaman. Sontohni, hita mangindo ipaluah humbani hasosakanta. Hassi pe ipaturut Jahowa parsoalan ai totap adong, tapi ibere do hita hagogohon ase boi manaron ai.​—Basa Pilippi 4:13.

20. Mase maningon gati hita martonggo bani Jahowa?

²⁰ Sada hasurungan na maharga do boi marsahap pakon Jahowa! Anjaha pos ma uhurta anggo Jahowa ra manangar tonggonta. (Psalmen 145:18) Lambin gati hita martonggo bani Jahowa, lambin orot ma parhasomananta pakon-Si.