1, 2. Aha do na gati isungkun halak?

DAKDANAK bahat do sisungkunanni. Ra do domma ipatorang nasiam, tapi dob ai isungkun sidea use, ‘Mase?’ Sanggah ibalosi nasiam, isungkun sidea homa, ‘Tapi mase?’

² Lang soal poso atap matua, gati do hita manungkun. Ra do manungkun laho mambotoh dalan atap panorang. Atap ra do homa dong sisungkunan na porlu pasal hagoluhan ampa ari magira. Tapi sanggah lang dapot balosni sisungkunan ai, lang be ra hita manungkun.

3. Mase buei halak marpingkir sunsah mangarusi balos ni sisungkunan na porlu ai?

³ Ai dong do balos ni sisungkunan ai bani Bibel? Bahat do halak mangkatahon adong, tapi sunsah iarusi. Nini sidea pitah guru atap pambobai ugama do na boi mangarusi Bibel. Na legan ra do maila manungkun. Anggo nasiam sonaha?

4, 5. Dong do sisungkunanmu na porlu? Mase maningon ipindahi ham balosni?

⁴ Ra do nasiam sihol mambotoh balos ni sisungkunan on: Maraha ahu ijon? Sonaha do halak na matei? Ise do Naibata? Jesus mangkatahon, “Pindo hanima ma, sai na bereon-Ni do bannima, pindahi hanima ma, sai na jumpahan do hanima, hartuki hanima ma, sai na bukaon-Ni do bannima.” (Mateus 7:7) Halani ai tongtong ma pindahi balosni na sintong.

 ⁵ Anggo tongtong do “ipindahi” nasiam, jumpah nasiam ma balosni bani Bibel. (Podah 2:1-5) Anjaha urah do balosni ai iarusi. Balosni ai boi mambahen malas uhur ni nasiam sonari, janah dong pangarapan bani ari magira. Eta, ulas hita ma sada sisungkunan na gati isungkun buei halak.

6. Mase buei halak marpingkir anggo Naibata seng parduli hubanta?

⁶ Halani mangidah situasi dunia on, buei halak marpingkir anggo Naibata seng parduli hubanta. Sonari bani buei ianan dong parporangan, na mardomdom, ampa sitaronon. Buei halak boritan, sunsah, atap matei. Halani ai buei halak bumbang, ‘Anggo parduli do Naibata, mase ipaturut-Ni hita sunsah?’

7. (a) Sonaha pambobai ugama mangajarhon bani halak anggo Naibata ai kejam? (b) Mase seng patut Naibata isalahkon anggo dong hasunsahan?

⁷ Sipata pambobai ugama mambahen halak porsaya kejam do Naibata. Sontohni sanggah dong hasunsahan, ihatahon ai harosuh ni Naibata. Sanggah ihatahon sonai, sasintongni Naibata do na isalahkon. Bibel mangajarhon sedo Naibata harohan ni na jahat. Jakobus 1:13 patugahkon hubanta anggo Naibata seng ra manlajou age ise pe marhitei bagei ni hajahaton. Ayat ai mangkahatahon, “Ulang ma adong na mangkatahon sanggah na tarlajou ia, ‘Na tarlajou do ahu humbani Naibata!’ Ai seng boi hona lajou Naibata laho mangkorjahon na jahat, anjaha Ia sandiri seng adong na ilajou.” Artini, hassi pe ipaturut Naibata hasunsahan, tapi Ia seng ongga mambahen hasunsahan tarjadi. (Basa Job 34:10-12.) Pardiatehon ma sada sontoh.

8, 9. Sanggah adong parsoalanta seng boi Naibata isalahkon. Bahen ma sada sontoh.

 ⁸ Dong sada garama tading i rumah bapani. Holong do bapani bani anakni. Iajarhon do ia mambahen haputusan na dear. Bani sada ari, garama ai manlawan bani bapani. Itadingkon rumah, janah ihorjahon na sambor na mambahen ia mandapot hasunsahan. Isalahkon nasiam do bapani halani seng ilarang ia manadingkon rumah? Tontu lang! (Lukas 15:11-13) Songon bapa ai, Naibata lang mamaksa manisia manangihon Ia. Jadi sanggah dong hasunsahan dingat ma sedo Naibata na mambahen ai tarjadi. Lang patut Naibata isalahkon.

⁹ Adong do piga-piga alasan mase ipaturut Naibata hasunsahan. Balosni hun Bibel holi iparlajari nasiam bani Pasal 11. Tapi, pos ma uhur ni nasiam holong do Naibata hubanta, janah sedo ia na mambahen hita sunsah. Sasintongni, pitah Ia do na boi pasaloseihon parsoalanta.​—Jesaya 33:2.

10. Mase hita porsaya anggo Naibata ra padearhon ganup na maseda halani hajahaton ni manisia?

¹⁰ Pansing do Naibata. (Jesaya 6:3) Ganup horja-Ni borsih janah dear. Jadi, hita boi porsaya Bani. Manisia lang sonai. Sipata sidea mangkorjahon na lepak. Hassi pe dong pamarentahan na bujur, tapi seng dong kuasani laho padearhon na maseda halani hajahaton ni manisia. Seng dong na markuasa usih songon Naibata. Ia boi janah ra padearhon ganup na maseda halani hajahaton ni manisia. Boiskonon-Ni do holi ganup parjahat sadokah ni dokahni.​—Basa Psalmen 37:9-11.

11. Sonaha do pangahap ni Naibata mangidah sitarononta?

¹¹ Sonaha pangahap ni Naibata mangidah sitaronon i sab dunia on pakon sitarononta? Bibel mangajarhon “holong do atei ni Jahowa bani uhum”. (Psalmen 37:28) Halani ai parduli do Ia pasal na sintong pakon na lepak. Seng marosuh Ia mangidah sitaronon ni manisia. Bibel mangkatahon, na basaia “pusok do uhur-Ni” mangidah hajahaton i sab tanoh on. (1 Musa 6:5, 6) Seng mubah-ubah Naibata. (Maleaki 3:6) Bibel mangajarhon isarihon Naibata do hita.​—Basa 1 Petrus 5:7.

12, 13. (a) Mase hita mangkaholongi janah parduli bani na legan, anjaha sonaha pangahapta mangidah sitaronon ni dunia on? (b) Mase boi hita porsaya anggo Jahowa ra pasaloseihon ganup sitaronon?

¹² Bibel mangajarhon, hita itompa usih songon rupa ni Naibata. (1 Musa 1:26) Artini sanggah itompa hita, isuankon Naibata do homa biak-Ni hubagas uhurta. Jadi sanggah lang marosuh ham mangidah hasunsahan ni halak, tarlobih ma Naibata! Sonaha hita mambotoh ai?

¹³ Bibel mangajarhon hubanta, “Naibata ai ma haholongon”. (1 Johannes 4:8) Ganup na ihorjahon Naibata halani holong. Jadi hita mangkaholongi halani Jahowa mangkaholongi. Pingkirhon ma, anggo adong kuasa bani nasiam, ra do nasiam pasaloseihon ganup sitaronon i sab tanoh on? Halani holong, tontu ra do nasiam. Sonaha Naibata? Ia simada kuasa, janah halani holong-Ni hubanta, ra do Ia manasap ganup  sitaronon. Porsaya ma nasiam, maningon saud do ganup janji Naibata na ipatugah i alaman tolu ampa ompat bani buku on! Ase boi hita porsaya bani janji-Ni, porlu do hita lambin mananda Naibata.

14. Ise do goran ni Naibata, janah mase maningon idilo hita goran-Ni?

¹⁴ Anggo nasiam sihol gabe hasoman sasada halak, somalni aha do na parlobei ipatugah? Tontu goran ni nasiam. Ai dong do goran ni Naibata? Buei do ugama mangajarhon goran-Ni ai Naibata atap Tuhan, tapi sedo ai goran-Ni. Pitah titel do ai, songon “raja” atap “presiden”. Ipatugah Naibata do goran-Ni, ai ma Jahowa. Psalmen 83:19 mangkatahon, “Andohar ibotoh sidea, pitah Ham do na margoran Jahowa, Na Tang Sitimbulan i sab tanoh on.” Bani Bibel goran ni Naibata isuratkon maribu hali. Jadi Naibata sihol ase nasiam mananda janah mandilo goran-Ni. Ia patugahkon goran-Ni, ase nasiam boi gabe hasoman-Ni.

15. Aha do artini goran ni Jahowa?

¹⁵ Goran ni Naibata, ai ma Jahowa. Artini Ia do na mambahen saud. Jadi, lang  adong na boi parontihon Naibata laho manggoki ganup janji-Ni pakon pasaudkon harosuh-Ni. Halani ai, pitah Ia do na boi mamakei goran ai. *

16, 17. Aha do artini (a) ‘Pargogoh na So Tarimbang’? (b) “Raja Sisadokahni ni dokahni”? (c) “Panompa”?

¹⁶ Psalmen 83:19 patugahkon, “Pitah Ham do . . . Na Tang Sitimbulan.” Anjaha, 1 Musa 35:11 mangkatahon Jahowa ai Naibata ‘Pargogoh na So Tarimbang’.  Aha do artini ‘Pargogoh na So Tarimbang’? Ai ma gogohan do Naibata humbani ise pe. Bani Jeremia 10:10, Jahowa ihatahon “Raja sisadokah ni dokahni”, artini tongtong do Ia adong. Psalmen 90:2 patorangkon Ia do Naibata sadokah ni dokahni. Sada halongangan do on.

¹⁷ Pitah Jahowa do Panompa. Pangungkabon 4:11 mangkatahon, “Ham Tuhan Naibatanami, na talup do Ham manjalo hasangapon, hamuliaon pakon hagogohon, ai Ham do na manompa sagala na dong; humbani rosuh-Mu do ase manjadi in haganup anjaha tartompa.” Jahowa do na manompa haganup—malekat na i surga, bintang na i langit, buah-buahan ronsi dekke na i laut.

18. Mase buei halak marpingkir anggo sidea seng boi marhasoman pakon Naibata? Tapi, aha na iajarhon Bibel?

¹⁸ Dob ibotoh piga-piga halak biak ni Jahowa na mulia, gabe mabiar ma sidea janah marpingkir, ‘Naibata ai gogoh tumang, sangap tumang, janah daoh tumang hun hubanta, mase pala hita isarihon-Ni?’ Tapi, sonai do pangahap ni Naibata? Lang. Jahowa sihol dohor hubanta. Nini Bibel “seng daoh Ia humbani ganup hita”. (Lahoan ni Apostel 17:27) Naibata sihol ase nasiam dohor Bani. Anggo ipadohor hita hu Bani, padohoron-Ni ma hubanta.​—Jakobus 4:8.

19. (a) Sonaha nasiam boi marhasoman pakon Naibata? (b) Biak-Ni na ija do na iharosuhkon nasiam?

¹⁹ Sonaha nasiam boi marhasoman pakon Naibata? Nini Jesus, “Ia hagoluhan sisadokah ni dokahni, in ma, anggo itanda sidea Ham, Naibata sisada-sada in, na sintong in, ampa Jesus Kristus, na sinuruh-Mu.” (Johannes 17:3) Tongtong ma nasiam marlajar ase lambin mananda Jahowa pakon Jesus, janah mandapot hagoluhan sisadokah ni dokahni. Bibel mangajarhon “Naibata do haholongan”. (1 Johannes 4:16) Tapi bahat ope biak-Ni na legan. Bibel patugahkon hubanta, Jahowa ai “paridop ni uhur, nanget marringis, anjaha gok holong ni uhur-Ni pakon habonaran-Ni”. (2 Musa 34:6) Pardear layak do Jahowa janah ra manasap dousa. (Psalmen 86:5) Haposan do Naibata janah sabar. (2 Petrus 3:9; 1 Korint 1:9) Marhitei mambasa Bibel, lambin bahat ma ibotoh nasiam biak ni Jahowa.

20-22. (a) Sonaha hita boi dohor bani Naibata, hassi pe seng boi Ia ididah? (b) Aha do bahenonmu anggo adong na manlanglangi marlajar Bibel?

 ²⁰ Sonaha nasiam boi dohor bani Naibata, hassi pe seng boi Ia ididah? (Johannnes 1:18; 4:24; 1 Timoteus 1:17) Sanggah mambasa Bibel, nasiam mambotoh talar do Jahowa. (Psalmen 27:4; Rom 1:20) Lambin bahat nasiam marlajar, lambin banggal ma holong ni nasiam janah lambin dohor bani Jahowa.

²¹ Anjaha iarusi nasiam ma Bapanta do Jahowa. (Mateus 6:9) Ia usih songon bapa na mangkaholongi niombahni. Ia mambere hagoluhan, janah sihol ase hita martuah. (Psalmen 36:10) Bibel mangajarhon, nasiam boi marhasoman pakon Jahowa. (Jakobus 2:23) Pingkirhon nasiam ma, Jahowa Panompa sagala na adong, sihol marhasoman pakon nasiam!

²² Ra do adong na manlanglangi nasiam marlajar Bibel, halani sidea mabiar nasiam pindah ugama. Tapi ulang ipaturut nasiam ise pe manlanglangi nasiam marhasoman pakon Jahowa. Ia boi gabe hasomanmu sidearan.

23, 24. (a) Mase porlu tongtong nasiam manungkun? (b) Aha do laho iulas hita bani pasal paduahon?

²³ Sanggah marlajar Bibel nasiam, ra do adong na lang iarusi. Ulang maila nasiam manungkun. Nini Jesus, maningon toruh maruhur do hita songon dakdanak na gati manungkun. (Mateus 18:2-4) Naibata sihol ase nasiam mandapot balosni. Jadi tongtong ma marlajar Bibel ase ibotoh nasiam ai do hasintongan.​—Basa Lahoan ni Apostel 17:11.

²⁴ Sidearan laho mananda Jahowa ai ma marlajar Bibel. Bani pasal dua, holi iulas hita mase Bibel legan humbani ganup buku.