Bayangkon ma sarita on: Sanggah ididah si Julia bani sormin, sai na mombur do idahonni. Ninuhurni ma, “Maningon huhurangi do berat badanku.” Hapeni ihatahon namatoras pakon hasomanni “merung tumang” do ia.

Sonari, domma iputuskon ia laho mangurangi berat badanni piga-piga kilo. Jadi otik ma ia mangan . . .

Anggo ho do si Julia, aha na laho bahenonmu?

Sasintongni, lang salah anggo ipardiatei ho rupamu. Bibel pe patugahkon sonaha do rupani dalahi pakon naboru sapari. Sontohni, si Sarah, si Rahel, si Abigail, si Josep pakon si Daud. Janah ipatugah Bibel do homa pasal naboru na margoran si Abisag, “jenges tumang” do ia.​—1 Raja-Raja 1:4.

Tapi, bahat do na maposo sai rupani do na tongtong ipingkiri. On parohkon masalah. Rimangi ma:

• Bani sada penelitian, dong 58 porsen anak boru na mangkatahon dirini momburtu. Tapi pitah 17 porsen do na tongon.

• Bani penelitian na legan, dong 45 porsen naboru na mangkatahon dirini mombur tapi sasintongni merung do sidea!

• Halani sihol tumang mangurangi berat badan, dong na maposo na hona anoreksia—kelainan perilaku makan yang berbahaya.

 Anggo hona anoreksia ho, pindo ma pangurupion bani namatorasmu, atap halak na legan na maruhur. Bibel mangkatahon, “Bani sagala panorang do marholong atei huan-kuan, gabe sanina ibagas hasosakan do ia, ase tubuh.”​—Podah 17:17.

Sasintongni, sifat-sifat sasada halak ai do na mambahen jenges ia atap lang. Rimangi ma si Absalom anak ni Raja Daud. Bibel mangkatahon,

“Seng dong bani sab Israel na sonai [tarsarni] halani jengesni. . . . seng dong tikasni.”​—2 Samuel 14:25.

Tapi, lang sai ipatangkas bani Bibel pasal rupani, halani gijang tumang do uhurni janah sipangoto-otoi! Halak na pailahon do ia itanda, sipanlawan ampa sipamunuh.

Ipatugah Bibel do podah na dear hubanta:

‘Pakei nasiam na baru in.’​—Kolosse 3:10.

“Ulang ma ipajagar-jagar rupani hun darat. . . , tapi jolma parbagas na ponop ai.”​—1 Petrus 3:3, 4.

Lang salah namin anggo sihol ho jenges idahon. Tapi na siporlunan ai ma sifat-sifatmu na dear. Ujungni, na mambahen ho jenges ai ma sifat-sifatmu na dear sedo rupa atap bohi na jenges! Nini anak boru na margoran si Phylicia, “Tongon buei do na marosuh bani na jenges, tapi na idingat tumang bani halak ai ma sifat-sifatmu na dear.”

Ai gati do ho ho lang marosuh bani rupamu?

Ongga do tubuh ibagas uhurmu laho operasi kecantikan atap mambahen diet na marlobihan?

Anggo boi, aha do na laho ipadear ho humbani rupamu? (Pilih ma balosni.)

• TINGGI

• BERAT

• JAMBULAN

• BENTUK BADAN

• BOHI

• WARNA KULIT

Anggo eak balosmu bani dua sisungkunan na parlobei janah pilih ma tolu atap lobih, rimangi ma on: Aha na salah ipingkiri ho pasal dirimu, lape tontu sonai pingkiran ni halak bam. Tongon, somal do anggo sai ipardiatei ho rupamu.​—1 Samuel 16:7.