Bayangkon ma sarita on: Marmotor do si David hu ianan na lape ongga irohi. Tanda-tanda jalan patuduhkon anggo ia lang i dalan na tinuju. Ibotohni ma anggo ia domma kahou.

Anggo ho si David, aha na sihol bahenonmu?

Dong piga-piga pilihan bamu:

1. Manungkun halak.

2. Mangidah peta, atap manggunahon GPS.

3. Torus mardalan, anjaha mangarapkon jumpah hu ianan na tinuju.

Tongon, lang dear anggo Pilihan C.

Dearan do Pilihan B marimbangkon Pilihan A. Halani peta atap pe GPS, boi mangurupi ho patuduhkon dalan na tinuju.

Sonai ma Bibel mangurupi ho!

Buku na domma tarsar on boi

• mangurupi ho sanggah dong masalah

• mangurupi ho mamareksa diri anjaha sonaha ase gabe halak na lobih dear

• patuduhkon bamu sonaha do mandapot hagoluhan na sidearan

Sanggah hita boi marsahap, gati do hita manungkun.

• Mase langit ai balau?

• Hunja do asal ni bintang?

Dob ai isungkun hita ma pasal hagoluhan on.

• Mase hasunsahan boi tarjadi?

• Mase manisia matei?

Sonaha do porini domma adong balosni humbai sapari ibagas Bibel?

Buei halak mangkatahon, Bibel ai marisi barita na lang tongon, lang sosok be sonari on janah sunsah tumang iarusi. Tapi Bibel ai do na gabe parsoalan atap pandapot ni halak pasal Bibel?

Sontohni, pangahap ni halak Bibel mangajarhon Naibata do na manrajai dunia on. Tongon do sonai? Lutu tumang do dunia on! Bahat do sitaronon, pusok ni uhur, naborit, hamatean, hasombuhon ampa hasunsahan. Ai Naibata na parholong do mambahen haganupan ai?

Sihol do ho mambotoh balosni? Ra do ho tarsonggot manangar balos ni Bibel!

Tontu domma ididah ho anggo podah ibagas buku on ibuat humbani Bibel. Porsaya do Saksi-Saksi Jahowa anggo Bibel ai marisi podah na marguna bai hagoluhanta. Halani Bibel ai “sinahapkon ni Naibata do, anjaha marguna mamodahi, maminsang, pauli-ulihon”. (2 Timoteus 3:16, 17) Tontu ra do hanima mamparlajari Bibel, ai ma buku na sosok ope bani hagoluhanta sonari on.