Sadokah bulan September, ringgas ma hita manawarhon parlajaran Bibel hubani ganup halak manggunahon brosur Hagoluhan na Martuah Sadokah ni Dokahni. Boi do ipilih hita merintis ekstra kuota 30 jam. Sonaha kegiatan khusus on ibahen?

• Sanggah Marbarita: Gunahon ma sungkun-sungkun na adong bani alaman na parpudi ase marosuh ia manangar. Dob ai patuduh ma sonaha carani marlajar Bibel manggunahon brosur ai. Dingat ma halak na marosuh mangulas Bibel pakon ham, tarmasuk ma kunjunganmu. Hassi pe sadokah on lang ra sidea marlajar Bibel, tapi ra do sahali on marosuh sidea marlajar halani mamakei brosur ampa cara na baru. Ulang ma tadingkon brosur ai anggo lang adong halak i rumah. Ulang homa kirim brosur ai bani halak na lang marosuh mangulas Bibel. Ra do adong ibahen Panitia Dinas Sidang pemusatan tambahan sadokah bulan ai.

• Cara na Legan: Anggo i kuriamu adong ibahen gerai, boi do homa ibahen ijai brosur Hagoluhan na Martuah Sadokah ni Dokahni. Patugah ma bani halak na mambuat brosur ai, boi do igunahon ai laho marlajar Bibel. Patuduh ma sonaha parlajaran Bibel ibahen. Anggo lang sosok situasini, bahen ma janji laho patuduhkon ai bani panorang na legan. Dear do anggo pengawas dinas mamilih piga-piga parbarita laho marbarita ampa manawarhon parlajaran Bibel i daerah bisnis. Boi do homa itawarhon ham parlajaran Bibel bani hasoman sahorja atap halak na ijumpahi ham sanggah mambere kesaksian tidak resmi.

Iparentahkon Jesus do hita ‘mambahen ganup halak gabe susianni’ ampa ‘mangajari sidea’. (Mat 28:19, 20) Halani ai, sadokah kegiatan khusus on marusaha ma hita manggunahon publikasi Hagoluhan na Martuah Sadokah ni Dokahni.