LAMBIN bahat do hasunsahan bani panorang parpudi on. Halani ai, porlu ma hita patuduhkon lumbang ni uhur atap hasabaron. (2 Tim. 3:1-5) Leganni ai, bahat do halak sonari pitah mamingkirhon diri sandiri, rosuh maringori, janah lang dong panrajaion diri. Jadi bahatan do halak sonari lang sabar. Halani ai rimangi ma: ‘Ai sonai do homa ahu? Halak na sonaha do na ihatahon sabar? Ase boi lambin sabar, aha ma na maningon hubahen?’

Bibel mangkatahon halak na “sabar” lang pitah martahan sanggah dong hasunsahan. Tapi porsaya do ia salpu do holi ganup sitarononni ai. Ia pe lang mamingkirhon diri sandiri tumang, tapi ipingkiri do homa pangahap ni halak. Hassi pe ra do halak ai domma mambahen borit uhurni, porsaya do ia boi do sidea mardear use. Topat ma na ihatahon Bibel, halani holong ma ase boi hita marsabar ni uhur. * (1 Kor. 13:4) Janah ihatahon “buah ni tonduy” do homa hasabaron ai. (Gal. 5:22, 23) Jadi aha ma na ibahen hita ase boi lambin sabar?

Ase boi lambin sabar, porlu do hita martonggo bani Jahowa. Ibere Ia do tonduy na pansing bani halak na porsaya hu Bani. (Luk. 11:13) Tapi lang sungkup pitah martonggo. (Ps. 86:10, 11) Maningon marusaha ma hita patuduhkon hasabaron bai ganup ari. Tapi sipata, ra do lang tarbahen hita ai. Anggo sonai, aha ma na boi mangurupi hita?

Maningon itiru hita ma Jesus Kristus. Songon na ihatahon apostel Paulus, ase boi hita patuduhkon parlahou na madear, tarmasuk hasabaron, porlu ma ipaturut hita ‘damei ni Kristus manrajai ibagas uhurta’. (Kol. 3:10, 12, 15) Ase boi sonai, songon Jesus porsaya ma hita anggo Naibata boi mangurupi hita bani panorang na topat. Anggo porsaya hita bani Jahowa, boi ma hita lambin sabar lang soal aha na masa.​—Joh. 14:27; 16:33.

Harosuhta podas ma namin dunia on gabe paradeiso. Tapi ase boi lambin sabar, porlu ma ipingkiri hita sonaha Jahowa patuduhkon hasabaron hubanta. Bibel mangkatahon, “Seng ipadokah-dokah [Jahowa] bagah-bagah-Ni, songon hinatahon ni na deba, tapi lumbang do uhur-Ni mangidah nasiam, ai ipangindo uhur-Ni ulang ma magou namin  atap ise pe, tapi das ma haganup tene hu hamubahon ni uhur.” (2 Ptr. 3:9) Jadi, anggo ibotoh hita sonaha Naibata patuduhkon hasabaron hubanta, gabe boi ma hita marsabar bani na legan. (Rom 2:4) Sanggah attigan do hita porlu marsabar?

Bai ganup ari ma namin hita patuduhkon hasabaron. Umpamani, porini adong na ponting na laho isahapkon hita, tapi iidah hita marbuali ope ia, sabar ma hita paimahon. Ulang mintor isampangi ia. (Jak. 1:19) Porlu do homa sabar hita sanggah dong na mambahen borit uhurta. Dingat ma, sanggah galek hita sabar do Jahowa pakon Jesus mangidah hita. Seng lalab idingat sidea hahuranganta. Tapi sabar do sidea paimahon ase hita mambahen hamubahon.​—1 Tim. 1:16; 1 Ptr. 3:12.

Leganni ai, somal do mintor borit uhurta sanggah dong halak na roh patugahkon hasalahanta. Ra do mintor ihatahon hita lang tongon ai. Ijon ma maningon sabar hita. Bibel mangkatahon, “Dearan do paruhur na sabar humbani si gijang uhur. Ulang maurahtu uhurmu manggila, ai ringis ibagas uhur ni halak na oto do ai marianan.” (Par. 7:8, 9) Jadi, hassi pe lang tongon na ihatahon halak pasal hita, sabar ma hita janah anget ma pingkiri sonaha do dearni hita marbalos. Sonai do na ibahen Jesus sanggah dong na mambahen sisonai hu bani.​—Mat. 11:19.

Porlu do homa sabar namatoras sanggah mangajari niombah ase ulang lepak pambahenanni. Pardiateihon ma contoh humbani si Mattias, na marhorja i Bethel i Eropa. Sanggah remaja, gati do ia iejek hasoman sakalasni halani haporsayaonni. Mungkahni, lang ibotoh namatorasni ai. Tapi, lambin dokah, iidah sidea ma lambin galek haporsayaon ni si Mattias. Gati do ia manungkun, “Ise do Naibata ai? Aha ma buktini anggo Bibel marisi Hata ni Naibata? Hunja ma ibotoh hita anggo Naibata do na marsuruh hita mangkorjahon on?” Isungkun ia do homa bapani, “Ai mahua gakni anggo lang huihutkon ugama ni ham?” Namatorasni mangkatahon ijon ma sidea porlu tumang patuduhkon hasabaron.

 Si Gillis, bapa ni si Mattias patorangkon, “Sipata songon na marah do ia manungkun ai, tapi sedo marah hubangku atap bani inangni. Pangahapni gabe sunsah do ia ibahen aturan ni Bibel ai.” Sonaha si Gillis mangurupi anakni ai? “Gati do ahu marbuali pakon anakku ai.” Itangihon si Gillis ma pandapot ni anakni janah marusaha do ia mambotoh sonaha pangahapni. Sipata, dobkonsi adong na ipatorang si Gillis bani anakni, isuruh ma anakni ai mamingkirhon ai, paima iulas sidea ulakhon. Tapi sipata si Gillis pe porlu do homa mamingkirhon pandapotni anakni, paima ia marbalos. Halani gati sidea marbuali sonai, gabe iarusi si Mattias ma aha do artini tobusan, holong do Jahowa hubanta, janah hak-Ni do mambere titah hubanta. Nini si Gillis, “Tongon porlu do panorang ase iarusi ia ganupan ai. Tapi lambin dokah lambin holong do uhurni bani Jahowa. Halani sabar hanami, ujungni boi ma iarusi anaknami hasintongan ai. Malas tumang uhurnami!”

Sobali patuduhkon hasabaron, porsaya do homa si Gillis pakon parinangonni anggo Jahowa tongtong mangurupi sidea. Si Gillis mangkatahon, “Gati do huhatahon bani si Mattias holong do hanami bani, janah itonggohon hanami do ase iurupi Jahowa ia.” Malas tumang ma uhur ni sidea halani totap marsabar.

Porlu do homa sabar hita sanggah mangurus kaluarga atap hasoman na domma dokah boritan. On ma na iahapkon si Ellen, * na tading i Eropa.

Hira-hira ualuh tahun na salpu, dua hali ma paramangon ni si Ellen hona stroke na mambahen seda otakni. Ujungni gabe songon na oto-oto ma paramangonni ai. Halani ai, borat tumang pangahap ni si Ellen. Ia mangkatahon, “Maningon sabar do ahu janah gati martonggo.” Nini use, “Gati do ahu tarapoh mardingat na ihatahon bani Pilippi 4:13, ‘Haganup do tarhorjahon ahu marhiteihon Ia, na margogohi ahu.’” Jadi halani pangurupion ni Jahowa, gabe boi ma si Ellen patuduhkon hasabaron janah totap martahan.​—Ps. 62:6, 7.

Jahowa do siusihan na sidearan pasal na patuduhkon hasabaron. (2 Ptr. 3:15) Gati do ibasa hita bani Bibel sonaha Jahowa patuduhkon hasabaron. (Neh. 9:30; Jes. 30:18) Umpamani sanggah Jahowa laho manripaskon huta Sodom, marulak-ulak do isungkun si Abraham pasal ai. Tapi itangihon Jahowa janah ibalosi do ganup sungkun-sungkunni ai. Dob ai ipatugah Jahowa do bani si Abraham porini adong sapuluh halak na pintor na tading i huta Sodom, lang saud iripaskon Jahowa huta ai. (1 Mus. 18:22-33) Hunjon ibotoh hita ma tongtong do Jahowa sabar manangihon!

Jadi ganup halak Kristen maningon patuduhkon hasabaron. Anggo marusaha hita patuduhkon hasabaron, gabe ipasangap ma Jahowa. Anjaha gabe dihut ma hita “sitean bagah-bagah ai, marhitei na marhaporsayaon ampa marsabar ni uhur”.​—Heb. 6:10-12.