1. Aha do na patuduhkon anggo Jahowa ai rosuh marsibere-bere?

MUNGKAHNI pitah Jahowa sandiri do na i surga. Dob ai itompa Ia ma malekat i surga ampa manisia i tanoh on. “Naibata na martuah” do Ia janah rosuh homa mambere na madear. (1 Tim. 1:11; Jak. 1:17) Iajari Jahowa do homa hita ase rosuh marsibere-bere, halani ai do na mambahen hita martuah.​—Rom 1:20.

2, 3. (a) Anggo ra hita marsibere-bere, mase ai mambahen hita martuah? (b) Aha do na laho iulas hita bani artikel on?

² Itompa Naibata do manisia usih songon rupa-Ni. (1 Mus. 1:27) Artini hita boi mangusihi biak ni Jahowa. Jadi ase martuah hita, maningon ra ma hita mangusihi Ia halani sonai  do hita itompa. Hassi pe lang gokan dear, boi do hita mangusihi Jahowa marhitei ringgas marsibere-bere janah parduli bani na legan.​—Pil. 2:3, 4; Jak. 1:5.

³ Iulas hita ma piga-piga parlajaran humbani Bibel na mangurupi hita ase rosuh marsibere-bere. Bani artikel on iparlajari hita ma: mase malas uhur ni Jahowa anggo ra hita marsibere-bere, mase maningon ra hita marsibere-bere ase boi mandalankon tugas na ibere Naibata hubanta, janah mase ai mambahen hita martuah. Anjaha iulas hita ma homa mase hita maningon tongtong marsibere-bere.

4, 5. Sitiruon aha ma na ibahen Jahowa pakon Jesus, janah mase hita maningon maniru sidea?

⁴ Sihol do Jahowa ase hita maniru Ia, anjaha malas do uhur-Ni anggo ra hita marsibere-bere. (Ep. 5:1) Sihol do homa Ia ase martuah hita. Taridah do on humbani angkulanta ampa tanoh on na jenges itompa ase hita marmalas ni uhur. (Ps. 104:24; 139:13-16) Jadi anggo marusaha homa hita mambahen halak na legan marmalas ni uhur, na pasangapkon Jahowa do hita ijai.

⁵ Maningon ra do homa hita maniru Jesus. Ibere do siusihan sonaha marsibere-bere. Nini do, “Anak ni Jolma in pe, seng roh Ia ase iidangi halak, tapi ase mangidangi do, anjaha iberehon do hosah-Ni bahen tobus ni buei jolma.” (Mat. 20:28) Anjaha iojur apostel Paulus do homa halak Kristen ase ‘songon paruhuron ni Kristus Jesus ma paruhuron ni sidea! . . . Ipalumei do diri-Ni anjaha ipakei rupa ni jabolon’. (Pil. 2:5, 7) Jadi pingkirhon ma, ‘Ai marusaha do ahu mangirikkon siusihan na ibahen Jesus?’​—Basa 1 Petrus 2:21.

6. Parlajaran aha ma na idapot humbani sarita ni Jesus pasal halak Samaria na bujur? (Tonggor ma gambar bani alm. 15.)

⁶ Malas do uhur ni Jahowa anggo hita mangusihi-Si pakon Jesus. Halani ai paruhurhon hita ma halak na legan janah pingkirhon ma sonaha carani mangurupi sidea. Jesus patuduhkon ponting tumang do ai humbani saritani pasal halak Samaria na bujur. (Basa Lukas 10:29-37.) Ibahen Jesus sarita ai halani dong halak Jahudi na manungkun, “Ise do goranon hasomanku?” Humbani balos ni Jesus taridah ma anggo hita maningon ra marsibere-bere songon halak Samaria ai, ase malas uhur ni Jahowa mangidah hita. Maningon ra ma hita mangurupi ise pe halakni lang soal hunja asalni.

7. Sonaha hita patuduhkon anggo hita porsaya pambahenan ni Jahowa do na sidearan?

⁷ Anggo hita ringgas marsibere-bere janah lang pitah mamingkirhon diri sandiri, ai patuduhkon hita porsaya pambahenan ni Jahowa do na sidearan. On boi ibotoh hita humbani aha na masa i pohon Eden. Sibolis mangkatahon martuahan do si Adam pakon si Hawa anggo sidea pitah mamingkirhon diri sandiri janah lang manangihon Jahowa. Halani ai sihol ma si Hawa ase songon Naibata. Si Adam pe rosuhan do mambahen malas uhur ni si Hawa marimbangkon Naibata.  (1 Mus. 3:4-6) Hape sambor do ujungni. Jadi lang adong sahalak pe na boi martuah anggo pitah mamingkirhon dirini sandiri.

8. Mase ma si Adam pakon si Hawa porlu mamingkirhon halak na legan?

⁸ Hassi pe mungkahni si Adam pakon si Hawa dassa na dong i pohon Eden, tapi porlu do homa ipingkirhon sidea halak na legan. Mase? Halani ibere Jahowa do tugas bani sidea. Iparentahkon do sidea ase marginompari janah mambahen tanoh on gabe paradeiso. (1 Mus. 1:28) Jadi ipingkirhon si Adam pakon si Hawa ma namin sonaha ase ginomparni holi boi martuah. Rap marhorja ma ganupan sidea mambahen tanoh on gabe paradeiso. Ai do harosuh ni Jahowa bani sidea.

9. Mase martuah manisia anggo ibahen sidea tanoh on gabe paradeiso?

⁹ Tapi laho pasaudkon sura-sura ni Jahowa ai, porlu ma sidea manangihon Jahowa. Anggo ibahen sidea tanoh on gabe paradeiso, masuk ma sidea hu parsaranan ni Naibata. (Heb. 4:11) Tontu porini idalankon sidea ganupan ai malas ma uhur ni sidea! Anjaha ipasu-pasu Jahowa ma sidea halani parduli bani halak na legan janah lang mamingkirhon diri sandiri.

10, 11. Sonaha ase hita ringgas marbarita ampa mangajari halak gabe susian ni Jesus?

¹⁰ Sonari on ibere Jahowa do homa tugas na ponting banta. Isuruh do hita ase marbarita janah mambahen halak gabe susian ni Jesus. Ase boi idalankon hita tugas ai,  maningon ihaholongi hita ma Jahowa ampa halak na legan. Maningon parduli do hita bani na legan.

¹¹ Si Paulus mangkatahon ganup halak na mambaritahon ampa na mangajarhon hasintongan bani halak na legan isobut do ‘hasoman sahorja ni Naibata’. (1 Kor. 3:6, 9) Hasangapon do on hubanta! Jadi ase boi gabe ‘hasoman sahorja ni Naibata’, maningon ma igunahon hita panorang, gogoh, ampa artanta, laho mandalankon tugas ai.

12, 13. Sonaha pangahap ni ham sanggah marbarita janah mangurupi halak marlajar Bibel?

¹² Malas do homa uhurta anggo hita ra mambere panorang ampa gogohta laho marbarita. On ma na iahapkon bahat sanina botou sanggah mangurupi halak marlajar Bibel. Malas tumang uhurta anggo halak na iajari hita mangarusi hasintongan, lambin toguh haporsayaonni, janah mambahen hamubahon. Ra do homa sidea mansaritahon bani halak hasintongan na iparlajari sidea. Jesus pe malas do uhurni mangidah 70 susianni ‘mulak ibagas malas ni uhur’ dobkonsi marbarita.​—Luk. 10:17-21.

¹³ Bahat do sanina botou na marmalas ni uhur halani mangidah parlajar Bibel mambahen hamubahon. Sonai ma na iahapkon Botou Anna. * Pindah do ia hu ianan na mamorluhon bahat parbarita i Eropa Timur. Ia mangkatahon, “Malas tumang uhurhu ijon halani bahat halak na ra marlajar Bibel. Jadi sanggah mulak hu rumah, lang be masalahku na hupingkirhon. Tapi masalah ni parlajar Bibelku do na hupingkirhon, sonaha carani mangurupi ampa patoguhkon uhur ni sidea. Gabe porsaya ma ahu ‘martuahan do na mambere ase na manjalo.’”​—Lah. 20:35.

14. Sonaha hita boi marmalas ni uhur hassi pe bahat halak lang ra manangar baritanta?

¹⁴ Hassi pe bahat halak lang ra manangihon hita sanggah marbarita, boi do hita marmalas ni uhur halani domma ipadas hita barita ai. Iparentahkon Jahowa do bani si Hesekiel, “Hatahon ma hatang-Ku bani sidea, atap ra sidea manangihon atap lang.” Ai do homa harosuh ni Jahowa hubanta. (Hes. 2:7; Jes. 43:10) Jadi porini lang ra halak manangihon baritanta, idingat Jahowa do pambahenanta ai. (Basa Heber 6:10.) Sada sanina mangkatahon,  “Hita do manuan ampa maniram. Dob ai martonggo ma ase Jahowa na patubuhkon bonih hasintongan in.”​—1 Kor. 3:6.

15. Ai maningon bani halak na mangkargai dassa hita ra marsibere-bere?

¹⁵ Jesus sihol ase hita ringgas marsibere-bere. Ai do na mambahen hita martuah. Anggo ra hita marsibere-bere gabe tarojur ma halak mangkorjahon sisonai. Halani ai ma iojur Jesus hita, “Bere nasiam ma, ase ibere bani nasiam! Parsuhatan na madear, na nionjat, na nidugur anjaha na pinajunjun bereonni bani abingan nasiam; ai parsuhatan na sinuhatkon nasiam do, suhatkonon bani nasiam.” (Luk. 6:38) Ra do lang ganup halak mangkargai sanggah nasiam marsibere-bere. Hassi pe sonai totap ma nasiam ringgas marsibere-bere. Sai adong do gunani anggo hita marsibere-bere.

16. Hubani ise ma hita marsibere-bere, janah mase?

¹⁶ Halak na rosuh mersibere-bere lang mangarap balasan. Jesus mangkatahon, “Anggo mambahen pesta-pesta ham, dilo ham ma na masombuh, na marsining, na repat ampa na mapitung. Gabe martuah ma ham, ai seng tarbalos sidea ai bamu.” (Luk. 14:13, 14) Bibel mangkatahon, “Halak [na rosuh marsibere-bere] dapotan pasu-pasu do.” Janah ihatahon do homa, “Martuah ma halak na marpanatap bani halak na galek.” (Pod. 22:9; Ps. 41:1) Jadi hita ra marsibere-bere halani sihol mangurupi halak na legan.

17. Aha deba na boi ibere hita ase hita martuah?

¹⁷ Sanggah si Paulus patugahkon na ihatahon Jesus,  “martuahan do na mambere ase na manjalo”, ijon artini lang pitah duit dassa na boi ibere hita. Tapi boi do homa hita mangojur, mamodahi janah mangurupi sidea. (Lah. 20:31-35) Ibere si Paulus do sitiruon na patuduhkon ponting tumang do manggunahon panorang ampa gogohta laho mangurupi halak, janah mangkaholongi sidea.

18. Aha do na ihatahon piga-piga peneliti pasal na marsibere-bere?

¹⁸ Sada peneliti na marlajar pasal parlahou ni jolma mangkatahon martuah do sasada halak anggo rosuh ia marsibere-bere. Adong do use sada artikel na mangkatahon lambin marmalas ni uhur do halak na ra mangurupi halak na legan. Halani ai iojur sidea ma buei halak ringgas mangurupi ase martuah janah sehat. Tapi domma ibotoh hita ganup na ihatahon sidea ai, halani domma dokah ipatugah Jahowa ai ibagas Bibel.​—2 Tim. 3:16, 17.

19, 20. Mase nasiam rosuh marsibere-bere?

¹⁹ Bahat halak sonari on pitah mamingkirhon diri sandiri. Halani ai ra do gabe lang urah hita marsibere-bere. Tapi Jesus pasingatkon ase hita mangkaholongi Jahowa humbani gok ni uhur, tonduy, pingkiran, ampa gogohta. Anjaha maningon ihaholongi hita homa hasoman songon dirinta sandiri. (Mrk. 12:28-31) Songon na dob iulas hita nongkan, halak na mangkaholongi Jahowa sihol do mangusihi-Si. Bujur do Jahowa pakon Jesus marsibere-bere. Jadi sidea sihol ase sonai homa hita halani ai do na parohkon hatuahon. Anggo idalankon hita ai, na pasangapkon Jahowa do hita ijai. Janah marguna do homa ai hubanta pakon bani halak na legan.

²⁰ Tontu domma marusaha nasiam mangurupi halak marhitei bujur marsibere-bere, tarlobih hubani hasomanta sahaporsayaon. (Gal. 6:10) Anggo tongtong nasiam mambahen sisonai, martarima kasih do sidea janah holong ma sidea bani nasiam. Nasiam pe gabe martuah. Bibel mangkatahon, “Halak pardear layak dapotan layak-layak, anjaha halak na ra mambere siinumon, jumpahan siinumon do.” (Pod. 11:25) Ibagas hagoluhan ampa pangidangionta, bahat do cara patuduhkon habujuron. Bani artikel na mangihut iulas hita ma cara na legan laho marsibere-bere.