TAHUN na salpu, dong marribu sanina i sab dunia on na ipilih gabe sintua ampa siparugas. Anggo ham sada na ipilih ai, tontu malas do uhurmu mandapot tugas na baru.

Tapi, somal do homa haru pangahap dob manjalo tugas na baru. Si Jason, sada sintua na poso mangkatahon, “Sanggah baru ope ahu ipilih, haru do ahu, ai boi do huhorjahon tugas-tugas ai?” Hinan, sonai do homa pangahap ni si Musa pakon si Jeremia. Iahap sidea do anggo sidea lang talup manjalo tugas humbani Jahowa. (2 Mus. 4:10; Jer. 1:6) Anggo sonai homa pangahapmu, sonaha ase boi ham marpos ni uhur janah mambahen hamajuon? Pardiateihon ma siusihan na ibere si Timoteus.​—Lah. 16:1-3.

Hira-hira marumur 20 tahun ope si Timoteus sanggah iontang ia mangkasomani si Paulus marbarita. Ra do haru ia manjalo tugas na baru halani poso ope ia. Pangahapni lang pandei ia mangajari ampa mamodahi. (1 Tim. 4:11, 12; 2 Tim. 1:1, 2, 7) Hassi pe sonai, totap do ia mambahen hamajuon. Sapuluh tahun hunjai ihatahon si Paulus ma bani halak Kristen na i Pilippi, “Arap do uhurhu ibagas Tuhan Jesus, podas ma si Timoteus suruhonku bani nasiam.” Mase sonai ihatahon si Paulus? Ia patorangkon, “Seng adong be hasomanku na marparuhuron songonsi.”​—Pilippi 2:19, 20.

Mase si Timoteus boi gabe siusihan na madear bani sintua? Dong onom alasan. Pardiateihon ma sonaha nasiam boi mangusihi ia.

1. Parduli do ia bani na legan. Ihatahon si Paulus bani kuria Pilippi anggo si Timoteus humbani borsih ni uhur do mansarihon sidea. (Pil. 2:20) Sihol do ia mangurupi sanina botou ase orot bani Jahowa.

Tontu lang ra nasiam songon supir na lang parduli bani sewa halani sihol podas das i terminal. Domma lobih 20 tahun si William gabe sintua. Ia mangojur sintua na baru, “Haholongi ma sanina botou janah sarihon ma sidea. Ulang pitah mamingkirhon mandalankon aturan i kuria.”

2. Pangidangion do na ipalobei ia. Si Paulus mangkatahon legan do si Timoteus pakon sidea na “mangindahi na porlu bani dirini bei, seng be na porlu bani Kristus Jesus”. (Pil. 2:21) Ipardiateihon si Paulus bahat do sanina na sibuk mangkorjahon urusanni sandiri sedo mangidangi Jahowa. Tapi lang sonai anggo si Timoteus. Sanggah ibere bahat tugas ibagas pangidangion, itiru ia do si Jesaya na mangkatahon, “Ijon do ahu, suruh Ham ma ahu!”​—Jes. 6:8.

Sonaha nasiam boi seimbang mangindahi na porlu bani diri sandiri ampa na porlu bani kuria? Parlobei, irikkon ma podah ni si Paulus, “Mananda na ija siporlunan.” (Pil. 1:10) Jadi, palobeihon ma pangidangion bani Jahowa. Na paduahon, ulang lalab mangkorjahon na hurang ponting. Si Paulus mangkatahon bani si Timoteus, “Lembangi ma hisap-hisap haposoon, tapi parayak ma hapintoron, haporsayaon, holong ampa damei.”​—2 Tim. 2:22.

3. Ringgas do ia mangidangi Jahowa. Pasal si Timoteus ihatahon si Paulus do, “Songon anak rap pakon bapa marhorja do ia pakon ahu bani Ambilan Na Madear  in.” (Pil. 2:22) Seng parrayoh si Timoteus. Ringgas do ia rup marhorja pakon si Paulus. On ma na mambahen toguh parhasomanan ni sidea.

Sonari bahat do na laho sihorjahonon ibagas organisasi. Pamalaskon uhur do horja sisonai halani mambahen orot nasiam pakon sanina botou. Jadi totap ma nasiam ‘lambin surung ibagas horja ni Tuhan in’.​—1 Kor. 15:58.

4. Idalankon ia do na iparlajari. Si Paulus manurat hubani si Timoteus, “Iihutkon ham do ahu bani podah, parlahou, tujuan, haporsayaon, lumbang ni uhur, holong ampa hasabaron.” (2 Tim. 3:10) Halani idalankon si Timoteus na iajarhon, lambin tambah ma tanggung jawab na ibere hu bani.​—1 Kor. 4:17.

Ai dong do sintua hasomanmu na boi gabe siusihan bamu? Si Tom domma martahun-tahun gabe sintua. Ia mardingat dong do sahalak sintua na marpangalaman na parduli hu bani janah ra mangajarisi. Ia mangkatahon, “Somal do ahu mangindo podahni janah hudalankon do ai. On ma na mambahen pos uhurhu mandalankon tugashu.”

5. Torus do ia marlatih. Si Paulus mangojur si Timoteus, “Pasomal-somal ma dirimu mangkorjahon hadaulaton.” (1 Tim. 4:7) Sahalak parlintun, ra do adong na manlatih ia. Hassi pe sonai, porlu do ia manlatih dirini sandiri. Si Paulus patugahkon, “Nunuti ma mambasa surat na mapansing in, mamodahi ampa mangajari . . . Dalankon ma in anjaha parlahouhon, ase talar hasurunganmu bani ganup halak.”​—1 Tim. 4:13-15.

Marusaha ma ham ase lambin pandei. Ringgas ma ham marlajar Bibel janah ihutkon ma tugah-tugah naimbaru hun organisasi. Ulang iahap ham domma pandei ham. Anggo iagan ham halani bahat pangalamanmu, lang porlu be mangindahi hatorangan laho pasaloseihon parsoalan, lepak do ai. Songon si Timoteus, “jaga ma ham bani dirimu ampa bani pangajaran in”.​—1 Tim. 4:16.

6. Ipindo ia do tonduy na pansing bani Jahowa. Dob marsahap pasal pangidangion ni si Timoteus, ipasingat si Paulus do ia, “Ramotkon ma arta na madear, na pinasimpankon in bam marhitei tonduy na pansing, na marianan ibagas hita.” (2 Tim. 1:14) Ase boi totap mangidangi, porlu do si Timoteus mangindo tonduy na pansing bani Jahowa.

Si Donald na dob martahun-tahun gabe sintua mangkatahon, “Nasiam sintua, porlu do manjaga parhasomanan pakon Jahowa. On ma na mambahen toguh nasiam. Anggo ipindo nasiam tonduy na pansing janah pataridahkon buahni, dapotan pasu-pasu ma sanina botou halani nasiam.”​—Ps. 84:8; 1 Ptr. 4:11.

Bahat do sintua ampa siparugas songon ham na torus mambahen hamajuon. Dear tumang do ai! Si Jason na ipatugah nongkan mangkatahon, “Sadokah gabe sintua ahu, bahat do na huparlajari. Sonari lambin pos ma uhurhu mandalankon tugas-tugas ai. Malas tumang do uhurhu halani hasangapon do ai bangku!”

Ai torus do nasiam mambahen hamajuon? Anggo ra nasiam mangusihi si Timoteus, gabe malas ma uhur ni sanina botou ibahen nasiam.