1, 2. (a) Aha na porlu idingat hita, janah mase? (b) Aha do na laho iulas hita bani artikel on?

GANUP hita porlu do marlajar sonaha mamareksa sada hatorangan laho mamastihon sintong do ai atap lang. (Pod. 3:21-23; 8:4, 5) Marusaha do Sibolis pakon dunia on laho pakahouhon pingkiranta. (Ep. 5:6; Kol. 2:8) Jadi ase ibotoh hita ija do hatorangan na sintong, maningon ipindahi hita ma buktini. Sosok do on songon na ihatahon Podah 18:13, “Halak na mintor marsampang, hape lape torang ibogei, haotoon do ai bani anjaha habadoron.”

² Bani artikel on iulas hita ma aha do na mambahen hita sunsah mandapot hatorangan na sintong. Janah iulas hita homa prinsip ni Bibel ampa contoh-contoh na mangajarhon sonaha hita mamareksa sada hatorangan.

3. Mase maningon idingat hita prinsip na isuratkon bani Podah 14:15? (Tonggor ma gambar bani alm. 3.)

³ Sonari on bahat do hatorangan na boi idapot hita. Ra do ai humbani Internet, TV, koran, e-mail, SMS, atap pe  na leganni. Ra homa adong hasomanta halani dear tujuanni, ia padaskon barita hubanta. Sipata lang marnabois barita atap hatorangan sisonai. Tapi maningon maruhur ma hita. Halani dong halak na sangaja padaskon hatorangan na lang sintong laho pakahouhon hita. Jadi prinsip ni Bibel na ija ma na boi mangurupi laho mambotoh ija do hatorangan na sintong? Podah 14:15 mangkatahon, “Halak na bodoh porsaya do bani sagala sahap, tapi halak na maruhur itimbangi do langkah-langkahni.”

4. Sonaha Pilippi 4:8, 9 mangurupi hita mamilih basaan, janah mase maningon ipastihon hita anggo hatorangan ai sintong? (Tonggor kotak “ Hunja do Boi Dapot Hita Hatorangan na Sintong”.)

⁴ Ase boi mambahen haputusan na dear, maningon ibotoh hita ma hatorangan na sintong. Halani ai maningon maruhur ma hita mamilih sibasaon. (Basa Pilippi 4:8, 9.) Ulang iparbois-bois hita panorang mambasa barita na lang boi ihaporsayai i Internet. Na siporlunan, ulang ibasa basaan na ibahen halak na murtad. Basaan sisonai boi mambahen galek haporsayaonta janah mambahen hita gabe manlembang. Hatorangan sisonai lang boi mangurupi hita mambahen haputusan na dear. Jadi, bahaya do anggo hita mambasa hatorangan sisonai.​—1 Tim. 6:20, 21.

5. Barita na lang dear aha do na itangar halak Israel, janah sonaha ujungni?

⁵ Hatorangan na salah boi parohkon hasedaon. Umpamani, pingkirhon ma sarita pasal 12 mata-mata na laho hu Tanoh Parpadanan. Dobkonsi mulak, na sapuluh mata-mata mangkatahon na lang dear. (4 Mus. 13:25-33) Ipararat sidea do barita na sambor na mambahen halak Israel mabiar janah mandolei. (4 Mus. 14:1-4) Mase mabiar sidea? Ra do iagan sidea tongon sarita ai halani bahatan na mangkatahon sonai. Halani ai, lang be porsaya halak Israel sanggah dua mata-mata na legan mangkatahon na madear pasal Tanoh Parpadanan ai. (4 Mus. 14:6-10) Lang ipareksa sidea hasintongan ni sarita ai janah lang homa porsaya sidea bani Naibata.

6. Mase lang tarsonggot hita porini dong itangar sarita na sambor pasal Saksi Jahowa?

⁶ Sanggah itangar hita sarita pasal Saksi-Saksi Jahowa, maningon jaga ma hita. Dingat hita ma Sibolis marosuh “[manuduh] saninanta”. (Pangk. 12:10) Jesus pe pasingatkon hita dong do holi halak na mangkatahon “bagei ni hata na masambor, na so tongon” dompak hita. (Mat. 5:11)  Jadi lang be tarsonggot hita porini itangar hita sarita na sambor pasal Saksi Jahowa.

7. Aha do na maningon ipingkirhon hita paima mangirim sada barita marhitei e-mail atap SMS?

⁷ Ai gati do nasiam mangirim e-mail atap SMS hubani hasomanmu? Sanggah mangidah barita atap pe manangar pangalaman na jenges, ai mintor ipatugah ham do barita ai bani na legan songon pembawa acara i TV? Tapi, paima nasiam mangirim barita ai, pingkirhon lobei: ‘Ai porsaya do ahu bani isini? Ai dong do buktini anggo ai sintong?’ Anggo lape porsaya ham sintong do ai atap lang, ulang ma ikirim ham ai. Sasap ma!

8. Aha do na ibahen piga-piga halak na lang marosuh banta, janah sonaha ase hita ulang dihut pararatkon ai?

⁸ Dong alasan na legan mase hita lang boi podas-podas mangirim sada barita. Bani piga-piga nagori na manlarang horjanta, dong do halak na pararatkon barita na pasambor-samborhon hita. Ibahen sidea sonai ase mabiar hita janah lang be marsihaporsayaon. Umpamani i Uni Soviet hinan, dong polisi rahasia na igoran KGB mangkatahon anggo piga-piga saninanta domma marpihak bani sidea. * Bahat saninanta na porsaya bani barita ai. Ujungni dong sanina botou na kaluar humbani organisasi. Bahat do namin na mulak use, tapi dong homa na lang ongga mulak halani lang dong be haporsayaon ni sidea. (1 Tim. 1:19) Sonaha ma ase ulang sonai hita? Ulang mintor porsaya bani ganup barita na itangar. Anjaha ulang ma podas-podas pararatkon barita na lang madear atap na  lape tontu sintong isini. Pindahi lobei buktini, sintong do ai atap lang.

9. Aha ope na mambahen hita sunsah mambotoh ija do barita na sintong?

⁹ Sipata dong itangar hita barita na sebagian tumang tongon isini. Dong homa sarita na lang patugahkon ganup hasintonganni. Barita sisonai lang boi ihaporsayai! On ma na mambahen hita sunsah mandapot hatorangan na sintong. Jadi aha ma na boi bahenonta ase ulang kahou?​—Ep. 4:14.

10. Mase dong halak Israel sihol mamorangi saninani sandiri, tapi aha ma na mambahen ase lang saud ai?

¹⁰ Hita boi marlajar humbani halak Israel na hinan na tading dompak barat ni Bah Jordan. (Jos. 22:9-34) Itangar sidea do halak Israel na tading dompak timur mambahen sada anjap-anjap. Iagan sidea ma halak Israel na tading i timur ai sihol manombah gana-gana janah manlembang humbani Jahowa. Jadi laho roh ma sidea mamorangi saninani ai. (Basa Josua 22:9-12.) Tapi lang ibotoh sidea sonaha na sasintongni pasal ai. Jadi paima marporang, isuruh ma piga-piga dalahi laho mangindahi sonaha na sasintongni. Ujungni ibotoh sidea ma anjap-anjap ai ibahen gabe tanda anggo halak ai sisombah Jahowa, sedo na laho manombah gana-gana. Tontu malas ma uhur ni sidea halani lang mintor mamorangi saninani, tapi ipindahi do lobei sonaha na sasintongni.

11. (a) Harugian aha ma na iahapkon si Mepiboset? (b) Mase sonai pambahenan ni si Daud dompak si Mepiboset?

¹¹ Tontu borit do uhurta anggo dong halak na pararatkon barita na lang tongon pasal hita. On ma na masa bani si Mepiboset. Domma ibere Raja Daud ganup tading-tadingan ni si Saul bani si Mepiboset. (2 Sam. 9:6, 7) Tapi dobkonsi itangar si Daud sarita na sambor pasal si Mepiboset, mintor itarik ma ganup tading-tadingan ai. Lang ipindahi ia sonaha do na sasintongni. (2 Sam. 16:1-4) Tapi dobkonsi ipatugah si Mepiboset sonaha na sasintongni, ibotoh si Daud ma domma hape lepak ia. Jadi ipaulak si Daud ma use satongah tading-tadingan ai. (2 Sam. 19:24-29) Porini ipindahi si Daud lobei sonaha na sasintongni, tontu lang podas-podas ia mambahen haputusan na marugihon si Mepiboset.

12, 13. (a) Aha ma na ibahen Jesus sanggah dong na pasambor-samborhon ia? (b) Aha ma na ibahen hita porini sonai ibahen halak hubanta?

¹² Sonaha porini adong na pararatkon barita na lang tongon pasal ham? Ongga do masa sisonai bani Jesus ampa si Johannes Pandidi. (Basa Mateus 11:18, 19.) Aha ma na ibahen Jesus? Lang iparbois-bois ia panorang laho mambuktihon anggo ai lang tongon. Tapi iojur do halak ase mampardiateihon pambahenan ampa ajaranni. Ia mangkatahon, “Gabe pintor [atap, taridah] do hapentaran  in marhitei pambahenanni.”​—Mat. 11:19.

¹³ Hita boi marlajar humbani Jesus. Sipata, ra do adong halak na pasambor-samborhon hita. Ra, gabe haru ma hita holi lang be porsaya halak hubanta. Tapi, marhitei parlahounta na madear gabe ibotoh halak ma ise do hita sasintongni. Anggo iusihi hita Jesus, on patuduhkon lang hape tongon na ihatahon sidea ai.

14, 15. Mase lang dear marpangunsandeian bani diri sandiri?

¹⁴ Domma iulas hita aha na mambahen lang urah mandapot hatorangan na boi ihaporsayai. Leganni ai, hita jolma na lang gokan dear. Ra do domma martahun-tahun hita mangidangi Jahowa, janah gabe lambin maruhur ma hita. Ra do halani pentar hita gabe lambin hormat ma halak hubanta. Ai boi do on parohkon masalah hubanta?

¹⁵ Boi. Ra do hita gabe marpangunsandeian bani diri sandiri. Halani ai, gabe pangahapta mando na manrajai pingkiranta. Ra do homa ninuhurta domma ibotoh hita situasi ai, hape lape dapot hita haganup hatoranganni. Marbahaya do anggo sonai. Bibel domma pasingatkon ase hita ulang marpangunsandeian bani pingkiranta sandiri.​—Pod. 3:5, 6; 28:26.

16. Bani contoh on, aha do na masa bani sada restoran, janah aha ma na ipingkirhon si Tom?

¹⁶ Bayangkon ma dong sada sintua na marpangalaman na margoran si Tom, laho hu restoran. Ijai iidah ia ma si John, sintua na legan, rup mangan pakon sada naboru na lang parinangonni. Tartawai janah marsidahopan  do sidea. Gabe haru ma pangahap ni si Tom mangidah ai. Ninuhurni, ‘Marsirang do holi si John pakon parinangonni? Sonaha ma niombah ni sidea?’ Ongga do iidah si Tom sonai parlahou ni halak. Anggo ham si Tom, sonaha ma pangahapmu?

17. Bani contoh ai, ujungni aha ma na ibotoh si Tom, janah aha ma parlajaranni hubanta?

¹⁷ Tapi paima lobei. Hassi pe iagan si Tom lang setia si John bani parinangonni, tapi lape ibotoh ia sonaha na sasintongni. Bani bod ni ari, itelepon ia ma si John. Ujungni, ibotoh ia ma botou ni si John do hape naboru ai, na roh hun huta na daoh. Domma dokah sidea lang pajumpah. Janah halani tongkin dassa ia singgah, pitah i restoran hansa sidea boi jumpah. Sanggah ai parinangonni pe lang boi dihut. Malas tumang ma uhur ni si Tom halani lang mintor ipararat ia sarita ai bani halak legan! Aha ma parlajaranni hubanta? Lang soal sadiha dokah hita mangidangi Jahowa, porlu do ipindahi hita ganup hatorangan ase boi mambotoh sonaha do na sasintongni.

18. Aha ma na mambahen hita mintor porsaya bani barita na lang madear pasal saninanta?

¹⁸ Na leganni na mambahen lang urah mandapot hatorangan na sintong anggo hatorangan ai markaitan pakon sanina atap botou na marsalisih pakon hita. Anggo lalab ipingkiri hita na lang madear pasal ia, gabe curiga ma hita hu bani. Dob ai, porini itangar hita barita na sambor pasalsi, ra do mintor porsaya hita hassi pe lang dong buktini. Aha ma parlajaranni? Anggo lang iambukkon hita pingkiran na bajan pasal sanina botou, gabe lang boi dapot hita hatorangan na sasintongni. (1 Tim. 6:4, 5) Maningon ambukkon hita ma pingkiran sisonai humbagas uhurta. Dingat ma anggo Jahowa sihol ase hita mangkaholongi sanina botou janah ra manalpuhon hasalahan ni sidea.​—Basa Epesus 4:2,32.

19, 20. (a) Prinsip na ija do na mangurupi hita laho mamareksa sada hatorangan? (b) Aha ma na laho iulas hita bani artikel na mangihut?

¹⁹ Sonari on, sunsah do laho mandapot hatorangan na boi ihaporsayai ampa laho mambotoh sintong do atap lang sada hatorangan. Mase? Halani lang ganupan hatorangan na itangar hita sintong isini. Jadi aha ma na boi mangurupi hita? Prinsip na dong bani Bibel! Umpamani, dong prinsip na mangkatahon haotoon do halak na marsampang paima mambotoh hasintonganni. (Pod. 18:13) Prinsip na legan, ulang mintor porsaya bani aha na itangar anggo lape ipastihon. (Pod. 14:15) Anjaha, lang soal sadiha dokah hita mangidangi Jahowa, ulang ma hita marpangunsandeian bani pingkiranta sandiri. (Pod. 3:5, 6) Prinsip ni Bibel boi manlinggomi hita anggo igunahon hita hatorangan na boi ihaporsayai laho mambotoh sintong do atap lang sada hatorangan. Dobni, boi ma hita mambahen haputusan na maruhur.

²⁰ Tapi, dong do alasan na legan na mambahen lang urah mamastihon sintong do atap lang sada hatorangan. Gati do hita mintor manguhumi marhitei aha na iidah hita. Bani artikel na mangihut iulas hita ma aha do na mambahen hita sipata sonai, janah sonaha ase ulang sonai.