Mase publikasi ni Saksi-Saksi Jahowa lang boi ipamasuk hu situs web na legan atap hu media sosial?

Piga-piga halak marpingkir halani gratis do publikasi ai, iagan sidea ma boi ai i-copy atap ipamasuk hu situs web na legan ampa hu media sosial. Tapi sasintongni ai domma manlanggar Syarat Pamakeion * janah mambahen masalah. Bani Syarat Pamakeion ai tangkas do ipatugah barang ise pe lang boi pamasukkon gambar, publikasi elektronik, merek dagang, musik, foto, video, atap artikel hun situs web on hu Internet (situs web, situs file-sharing, situs video-sharing atap jejaring sosial). Mase sonai?

Aha pe na dong bani situs web Saksi Jahowa ilindungi hak cipta atap undang-undang. Ponting tumang do ai ase ulang isalahgunahon halak. Dong do halak na murtad sihol pasedahon horjanta. Sipata ipamasuk do publikasinta hu situs web ni sidea ase boi itonggor halak na legan ampa Saksi Jahowa. Ganupan ai mambahen halak lang porsaya bani organisasi ni Saksi-Saksi Jahowa. (Ps. 26:4; Pod. 22:5) Dong homa na manggunahon publikasi atap logo jw.org bani iklan, aplikasi elektronik, ampa barang dagangan. Boi do namin ilarang hita ibahen sidea sonai halani publikasi pakon logo ai ilindungi undang-undang. (Pod. 27:12) Tapi ra do lang ra pengadilan mangurupi hita halani dong homa sanina botou na pamasukkon publikasi ai hu situs web na legan, atap manggunahon logo jw.org bani iklan.

Bahaya do anggo hita man-download publikasi sobali hun jw.org. Jahowa manggunahon “juakjuak na bujur anjaha na maruhur” laho pasirsirhon basaan na boi patoguhkon parhasomananta pakon-Si. (Mat. 24:45) Situs web resmi na igunahon “juakjuak” ai pitah www.pr418.com, tv.pr418.com, pakon wol.pr418.com. Anjaha tolu hansa aplikasi resmi na igunahon hita bani perangkat elektronik, ai ma JW Language^®, JW Library^®, pakon JW Library Sign Language^®. Pos ma uhurta lang dong ijai iklan atap aha pe na marisi pingkiran ni dunia on. Tapi bahaya do porini i-download hita publikasi hun aplikasi atap situs web na legan, halani ra domma iubah isini.​—Ps. 18:27; 19:9.

Leganni ai, anggo ipamasuk hita publikasi hu situs web na boi ikomentari halak, on ma na mambahen halak na murtad boi pasambor-samborhon organisasi ni Jahowa. Dob ai, dong homa sanina botou na ra marsalisih pakon sidea ijai, mambahen goran ni Jahowa lambin irisai. Tongon porlu do ipapintor hita na lepak janah mangurupi halak mambotoh ija do na sintong, tapi lang sonai carani. (1 Tim. 6:3-5; 2 Tim. 2:23-25) Dong homa halak na mambahen situs web atap akun i media sosial manggunahon goran organisasi atap anggota Pangurus Pusat. Hape, sada pe lang anggota Pangurus Pusat ai na mambahen web sandiri atap akun i media sosial.

Anggo iarahkon hita halak hu jw.org, na pararatkon “ambilan na madear” do hita ijai. (Mat. 24:14) Tongtong do iperbarui situs web ampa aplikasi ai. Jadi hita sihol ase ganup halak mandapot guna hunjai. Boi do hita mangirim publikasi marhitei link atap e-mail hubani halak na legan. Anggo sonai ibahen hita, na mangurupi halak do hita ase mandapot basaan na boi ihaporsayai, in ma humbani “juakjuak na bujur anjaha na maruhur”.