1. Sonaha hita boi rap marhorja pakon Jahowa?

SANGGAH Jahowa manompa manisia na parlobei, sihol do Ia ase sidea rap marhorja pakon-Si. Sonari, hassi pe lang gokan dear manisia, boi do sidea rap marhorja pakon Jahowa bai ganup ari. Umpamani sanggah marbarita, ihatahon do hita ‘hasoman sahorja ni Naibata’. (1 Kor. 3:5-9) Hasangapon na banggal do on, halani boi hita mangkorjahon tugas na ibere Jahowa! Tapi dong ope cara na legan hita boi rap marhorja pakon-Si. Umpamani mangurupi kaluarga ampa sanina botou i kuria, bujur bani na legan, mangurupi bahat horja na iatur organisasi, atap pindah hu ianan na mamorluhon parbarita. Bani artikel on iulas hita ma sonaha hita boi mangkorjahon ganupan ai.​—Kol. 3:23.

2. Mase lang dear anggo ibandingkon hita dirinta pakon na legan?

² Sanggah mangulas artikel on, dingat hita ma lang sarupa situasi ni ganup halak, dong homa na maposo ampa na matua. Jadi, ulang ma ibandingkon nasiam aha  na boi ibahen nasiam pakon halak na legan ibagas pangidangion. Apostel Paulus mangkatahon, “Ganup ma mamareksa horjani bei; jadi halani dirini tumang ma ia mamuji-muji diri [“marmalas ni uhur”, Terjemahan Dunia Baru], sedo halani na legan.”​—Gal. 6:4.

3. Halak na mansarihon kaluarga dos do ai na marhorja pakon Jahowa. Mase?

³ Jahowa sihol ase isarihon hita kaluarganta. Umpamani, bahat do inang na maningon i rumah halani manjaga niombahni na etek ope. Dong homa na maningon manjaga namatorasni na dob matua. Ponting tumang do hita mangkorjahon ai. Bibel mangkatahon, “Anggo adong barang ise, na so mansarihon diha-dihani, tarlobih ma parrumahni sandiri, na dob marnalangkon haporsayaon do ia ai, anjaha jahatan do ia marimbang na so porsaya.” (1 Tim. 5:8) Porini dong tanggung jawab kaluarga na mambahen lang bahat panorang ni ham laho mangidangi, ulang ma maretek ni uhur. Malas do uhur ni Jahowa halani isarihon ham kaluargamu.​—1 Kor. 10:31.

4. Sonaha namatoras patuduhkon anggo na siporlunan bani sidea ai ma mangidangi Jahowa, janah aha ma hasilni?

⁴ Namatoras rap marhorja pakon Jahowa sanggah iurupi sidea niombahni ase ringgas mangidangi Jahowa. Bahat do namatoras na mambahen sisonai. Ujungni, dong ma anak pakon boruni na mambere gok panorang laho mangidangi Jahowa hassi pe daoh hun rumah. Umpamani, dong na gabe misionaris, marintis hu ianan na mamorluhon bahat parbarita, atap mangidangi i Betel. Jadi hassi pe daoh humbani niombahni, totap do iojur ase sidea mambahen pangidangion bani Jahowa na siporlunan. (3 Joh. 4) Songon si Hanna na ‘mangondoskon’ si Samuel bani Jahowa do pangahap ni sidea. Hasangapon do bani sidea halani boi rap marhorja pakon Jahowa.​—1 Sam. 1:28.

5. Sonaha hita boi mangurupi sanina botou i kuria? (Tonggor ma gambar bani alm. 21.)

⁵ Anggo lang borat tanggung jawab ni ham ibagas kaluarga, ai boi do ham mangurupi sanina botou na boritan atap pe na matua? Atap boi do ham mangurupi sanina atap botou na mangurus kaluargani? Pingkirhon ma ise do sanina botou sisonai na porlu iurupi. Umpamani, ra do adong botou na mangurus namatorasni na dob matua. Boi do ihasomani ham tongkin namatorasni ase boi ia mangurus na legan? Atap ra do adong sanina botou na porlu ialop hu partumpuan, ihasomani hu tiga, atap mangidah halak na boritan. Anggo ibahen ham sonai, dos do ai ham ra igunahon Jahowa laho mambalosi tonggo ni sidea.​—Basa 1 Korint 10:24.

6. Sonaha hita patuduhkon habujuron?

⁶ Hasoman sahorja ni Naibata bujur  do homa manjalo tamu. Bani Kitab-Kitab Junani Kristen, hata “partamueion” artini “bujur hubani halak na legan age pe lang itanda”. (Heb. 13:2) Bani Bibel, bahat do contoh na mangurupi hita sonaha mambahen sisonai. (1 Mus. 18:1-5) Jadi marusaha ma hita mambahen na bujur bani ganup halak age bani halak na lang sahaporsayaon pakon hita.​—Gal. 6:10.

7. Aha ma gunani anggo ra hita mangontang sanina botou hu rumahta?

⁷ Ai boi do ham mangontang sanina botou na mambere gok panorang ibagas pangidangion marborngin hu rumahmu? (Basa 3 Johannes 5, 8.) Marguna do ai bamu sonai homa bani halak ai. Gabe boi ma nasiam marsiojuran. (Rom 1:11, 12) On ma na iahapkon si Olaf. Sanggah poso ope ia, roh ma sintua kaliling hu kuria ni sidea. Tapi lang dong sanina botou na mangontang ia hu rumah ni sidea. Jadi, isungkun si Olaf ma bani namatorasni atap na boi do sintua kaliling ai modom i rumah. Namatorasni ai lang Saksi. Ihatahon namatorasni ai ma boi do, asal ma ra si Olaf modom i kursi. Sonai ma na ibahen ia. Lang mahua pangahapni modom i kursi, halani ibagas na saminggu ai bahat do ojuran na dapotsi humbani sintua kaliling ai. Tiap pagi rap mangan do sidea janah marbuali. Tarojur tumang do si Olaf. Ujungni marintis ma ia. Dob ai, sadokah 40 tahun na parpudi on si Olaf domma mangidangi gabe misionaris.

8. Mase maningon bujur hita hassi pe mungkahni lang ihargai halak? Bere ma contoh.

⁸ Hita boi do patuduhkon holong bani halak na legan hassi pe mungkahni lang ihargai sidea ai. Bahat do gunani anggo ibahen hita sonai. On ma na iahapkon si Yesica na marlajar Bibel pakon botounta i Spanyol. Sanggah marlajar Bibel, tangis-tangis ma ia. Jadi isungkun botou ai ma mase tangis ia. Isaritahon si Yesica ma, miskin tumang do ia hinan sanggah i Ekuador ope ia tading. Ongga do lang dong sipanganonni. Pitah tes dassa na boi ibere hubani boruni na etek ope. Marusaha ma ia papodomkon boruni ai lanjar martonggo ase iurupi. Dob ai, mintor roh ma dua Saksi hu rumahni janah mambere majallah. Tapi manggila do si Yesica janah irigati ma majallah ai. Nini, “Ai boi do gakni ipangan borungku majallah on?” Marusaha ma Saksi ai mangapohsi, tapi totap do lang ra ia. Ujungni, itadingkon dua Saksi ai ma sakaranjang sipanganon i lobei ni labah rumahni. Jadi, sanggah na marlajar nongkan ai sidea taringat ma ia pangalamanni ai. Ibotoh ia ma ibalosi Jahowa do hape tonggoni ondi ai. Halani ai sihol ma ia mangidangi Jahowa.​—Par. 11:1, 6.

9, 10. (a) Sonaha halak Israel sapari patuduhkon sidea ra mangidangi Jahowa? (b) Sonaha ganup sanina boi mangurupi ibagas kuria?

⁹ Sapari, bahat do cara na ibahen halak Israel laho patuduhkon anggo sidea rosuh mangidangi Naibata. (2 Mus. 36:2; 1 Kron. 29:5; Neh. 11:2) Sonai homa sonari on, boi ma igunahon hita arta ampa hapandeianta laho mangurupi sanina botou. Anggo sonai ibahen nasiam, martuah janah ipasu-pasu Jahowa ma nasiam.

¹⁰ Bani Bibel, iojur do ganup sanina ase ra mangidangi gabe siparugas atap sintua. Ai do homa sada cara rap marhorja pakon Jahowa. (1 Tim. 3:1, 8, 9; 1 Ptr. 5:2, 3) Ganup sintua ampa siparugas ra mangurupi, mangojur, janah patoguhkon sanina botou. (Lah. 6:1-4) Ai ongga do ham isuruh sintua mangurupi bagian tata tertib, mangurus majallah atap pe daerah dinas, ampa padearhon na maseda i Balei Harajaon? Bahat do sanina na mangkorjahon ai gabe marmalas ni uhur.

11. Aha do gunani na iahapkon sada botou halani mangurupi horja pambangunan?

¹¹ Bahat do horja pambangunan na ibahen organisasi. Sidea na mangurupi horja ai, gati do mandapot hasoman-hasoman na baru. Umpamani, domma 18 tahun Botou Margie dihut mangurupi horja pajongjongkon Balei Harajaon. Sanggah marhorja, ipardiateihon ia ma botou na maposo na boi iurupi janah ilatih ia. Pangahapni, on ma panorang na topat bani sidea laho marsiojuran. (Rom 1:12) I pudian ni ari sanggah dong sitarononni, hasoman sahorjani i pambangunan hinan  roh mangurupisi. Ongga do ham dihut bani horja pambangunan? Hassi pe lang ibotoh ham martukang, boi do ham dihut bani horja sisonai.

12. Sonaha ham boi mangurupi sidea na hona bencana?

¹² Hita pe boi do rap marhorja pakon Jahowa sanggah mangurupi sanina botou na hona bencana. Umpamani boi do isumbangkon hita duit bani sidea. (Joh. 13:34, 35; Lah. 11:27-30) Boi do homa hita paborsihkon atap padearhon aha na dob maseda. Dong sada contoh humbani botou Gabriela hun Polandia. Maseda tumang do rumahni halani banjir. Tapi malas tumang uhurni dobkonsi ididah roh sanina botou hun kuria na dohor laho mangurupi ia. Halani mangidah ai, lang be parsoalan pangahapni hassi pe magou ganup artani. Nini do, “Hasangapon do bangku boi gabe Saksi-Saksi Jahowa na orot holong parsaninaonni i sab dunia on. Malas tumang uhurhu.” Sonai ma homa pangahapni bahat halak na mandapot pangurupion sisonai. Anjaha sanina botou na dihut mangurupi pe malas do homa uhurni.​—Basa Lahoan 20:35; 2 Korint 9:6, 7.

13. Mase holongta bani Jahowa boi lambin toguh anggo hita mangurupi na legan? Bere ma contoh.

¹³ Cara na legan hita boi rap marhorja pakon Jahowa ai ma mangurupi sidea na mangungsi. On ma na ibahen si Stephanie pakon sanina botou na legan. Iurupi sidea ma sanina botounta na mangungsi hu Amerika Serikat halani parporangan. Ipindahi ma rumah ampa barang-barang na ihaporluhon pangungsi ai. Si Stephanie mangkatahon, “Gabe tarojur ma hanami halani martarima kasih janah marmalas ni uhur do sidea na iurupi ai. Iagan kaluarga-kaluarga ai hanami domma mangurupi sidea. Hape sasintongni sidea do na mangurupi hanami. Holong, hasadaon, ampa haporsayaon ni sidea patoguhkon holongnami bani Jahowa. On ma na mambahen hanami lambin mangkargai haganup na ibahen organisasi bannami.”

14, 15. (a) Sonaha si Jesaya rap marhorja pakon Jahowa? (b) Sonaha hita boi mangusihi si Jesaya?

¹⁴ Ai ra do ham mambere lambin bahat panorang laho marhorja rap pakon Jahowa? Ai ra do ham pindah bani  ianan na mamorluhon bahat parbarita? Tongon, lang maningon pindah nasiam hu ianan na daoh laho patuduhkon habujuron. Tapi dong do sanina botou na mangkorjahon ai. Sidea ai usih songon nabi Jesaya. Sanggah ihatahon Jahowa, “Ise do sisuruhon-Ku: Ise do utusannami?” balosni, “Ijon do ahu, suruh Ham ma ahu!” (Jes. 6:8) Ai ra do ham mangurupi organisasi ni Jahowa? Aha ope na boi ibahen ham laho marhorja rap pakon Jahowa?

¹⁵ Jesus mangkatahon, “Bolag do sisabion, tapi otik do siparhorja. Ai pe, elek-elek hanima ma Simada sisabion in, ase ipaingkat siparhorja bani sisabion-Ni in!” (Mat. 9:37, 38) Ai boi do ham marintis janah pindah hu ianan na mamorluhon bahat parbarita? Atap, boi do ham mangurupi halak na legan mangkorjahon ai? Bahat sanina botou na domma mangkorjahon ai mangkatahon ai do cara sidearan laho patuduhkon holong bani Naibata ampa hasoman. Ai dong ope cara na legan na boi ibahen ham laho marhorja pakon Jahowa? Anggo sonai ibahen ham, gabe marmalas ni uhur ma ham.

16, 17. Aha ope na boi ibahen ham ase boi rap marhorja pakon Jahowa?

¹⁶ Ai ra do ham mangurupi horja i Betel atap pambangunan na ibahen organisasi? Boi do ham mangidangi ijai piga-piga ari ibagas na saminggu? Tongtong do organisasi mangindahi halak na ra mangidangi bani ianan na mamorluhon. Janah ipindahi do homa halak na ra mangkorjahon aha pe na itugaskon hassi pe lang dong pangalamanni. Ihargai Jahowa do ganup halak na ra mambahen parubahan laho mangkorjahon sisonai.​—Ps. 110:3.

¹⁷ Ai ra do ham dihut bani sikolah na ibahen organisasi? Boi do ra ham mandaptar hu Sikolah bani Parbarita Harajaon. Bani sikolah ai, sanina botou na dob marintis iajari ase boi mandalankon lambin bahat tugas na ibere organisasi. Sidea na mandaptar maningon ra mangidangi ija pe sidea itugaskon. Ai ra do ham rap marhorja pakon Jahowa marhitei cara ai?​—1 Kor. 9:23.

18. Aha ma gunani anggo totap hita rap marhorja pakon Jahowa?

¹⁸ Halani hita juakjuak ni Jahowa, maningon bujur ma hita marsibere-bere janah marsihaholongan. Tongtong ma parduli bani halak na legan ase martuah, damei, anjaha marmalas ni uhur hita. (Gal. 5:22, 23) Lang soal sonaha situasinta, anggo itiru hita habujuron ni Jahowa janah rap marhorja pakon-Si gabe martuah ma hita!​—Pod. 3:9, 10.