1. Panjahaion aha ma na ipatugah si Jesaya pasal Jesus, janah mase gabe tarapoh hita mambotoh ai?

PANJAHAION na ipatugah nabi Jesaya pasal Jesus mambahen tarapoh uhurta. Panjahaion ai mangkatahon anggo Jesus “seng mangihutkon pangidah ni matani ia manguhumi, anjaha seng mangihutkon pambogei ni pinggolni ia mamutuskon” janah “marhitei hapintoron do uhumanni halak na masombuh”. (Jes. 11:3, 4) Mase tarapoh hita mambotoh ai? Halani sonari bahat halak manguhumi mangihutkon aha na ididah tumang. Jadi hita mamorluhon Panguhum na gokan dear songon Jesus, na lang manguhumi mangihutkon pangidah tumang!

2. Aha ma na iparentahkon Jesus, janah aha ma na laho iulas hita?

² Gati do hita manguhumi halak. Tapi halani hita lang gokan dear, gati do homa lepak panguhumionta ai. Somalni hita manguhumi halak mangihutkon aha na ididah tumang. Tapi Jesus mamarentahkon, “Ulang ma [mangihutkon] pangidah tumang panguhumion nasiam, tapi pintor ma panguhum nasiam.” (Joh. 7:24) Jadi Jesus  sihol ase hita mangusihi ia janah lang manguhumi halak mangihutkon na ididah tumang. Bani artikel on iulas hita ma tolu contoh na boi mambahen lepak panguhumionta, ai ma: asal ni sasada halak, artani, ampa umurni. Bani tiap contoh iparlajari hita ma sonaha hita mandalankon parentah ni Jesus.

3, 4. (a) Mase mubah pangahap ni si Petrus bani halak na lang Jahudi? (Tonggor ma gambar bani alm. 9.) (b) Pangarusion na baru aha ma na dapot si Petrus?

³ Bayangkon ma sonaha pangahap ni si Petrus sanggah ia isuruh hu Kesarea, hu rumah ni si Kornelius, halak na lang Jahudi. (Lah. 10:17-29) Humbani dakdanak, domma porsaya si Petrus anggo halak na lang Jahudi ai butak. Tapi dong na masa na mambahen mubah pangahapni. Umpamani, ididah si Petrus ma sada panonggoran humbani Naibata. (Lah. 10:9-16) Ididah ia ma turun hun langit hiou na bolag na marisi binatang na butak. Dob ai itangar ma sada sora na mangkatahon, “Ale Petrus, jongjong ma, sayati anjaha pangan ma!” Tapi lang ra ia. Jadi nini sora ai ma, “Na dob pinapansing ni Naibata ulang hatahon butak!” Lang ibotoh si Petrus aha do artini panonggoran ai. Dob ai roh ma suruhan ni si Kornelius laho mangalopsi. Halani panogu-noguan tonduy na pansing, laho ma si Petrus pakon sidea.

⁴ Somalni, halak Jahudi lang ra martandang hu rumah ni halak na lang Jahudi. Porini marhitei “pangidah tumang” si Petrus manguhumi, tontu lang ra ia hujai. Jadi mase ma ra ia hujai? Halani panonggoran nongkan ai, ampa panogu-noguan ni tonduy na pansing, mubah ma pangahapni mangidah sidea. Dobkonsi marbuali pakon si Kornelius, nini si Petrus ma, “Domma tangkas ididah uhurhu, na so sididah bohi Naibata. Hun bani sagala bangsa tene, ijalo do sagala na mangkabiarisi anjaha na mangkorjahon hapintoron.” (Lah. 10:34, 35) Malas tumang uhur ni si Petrus halani pangarusion naimbaru ai. Sonaha pangarusion ai boi mangurupi ganup halak Kristen?

5. (a) Aha do na maningon ibotoh ganup halak Kristen? (b) Hassi pe domma ibotoh hita ai, ra do sonaha ope pangahapta?

⁵ Marhitei si Petrus, iurupi Jahowa ma ase ganup halak Kristen mambotoh anggo Ia lang sitonggor jumbak. Lang soal hunja asalni, iharosuhkon Jahowa do ganup halak asal ma mangkabiari-Si janah mangkorjahon harosuh ni uhur-Ni. (Gal. 3:26-28; Pangk. 7:9, 10) Ra do domma ibotoh nasiam ai. Tapi sonaha anggo ibagas kaluarga atap pe i nagori ni nasiam somal do halak manonggor jumbak? Ra do tarihut-ihut  ham hassi pe pangahapmu lang sonai ham. Gari si Petrus totap ope sonai, hassi pe domma iurupi ia halak na legan mambotoh lang sitonggor jumbak Jahowa. (Gal. 2:11-14) Jadi, sonaha hita boi mandalankon parentah ni Jesus ase ulang be manguhumi halak mangihutkon na ididah tumang?

6. (a) Sonaha ase hita ulang manonggor jumbak? (b) Aha ma na ibotoh hita humbani laporan na ikirim sada sanina?

⁶ Laho mambotoh atap na dong ope biak sitonggor jumbak ibagas uhurta, pareksa hita ma dirinta. Pingkirhon ma sosok do parlahounta pakon aha na iparlajari hita hun Bibel? (Ps. 119:105) Porlu do homa isungkun hasoman, ai dong ope biak sisonai ibagas dirinta. Ra do halani domma dokah biak sisonai dong banta, lang ibotoh hita sonai ope hita. (Gal. 2:11, 14) On ma na masa bani sada sanina na bahat tanggung jawabni. Ia mangirim laporan hu kantor cabang pasal sada sanina pakon parinangonni na mambere gok panorang laho mangidangi Jahowa. Sanina ai humbani suku na gati iapasi halak. Ipatugah ia ma bani laporan ai bahat na dear pasal sanina ai. Tapi ihatahon ia do homa, “Hassi pe ia humbani [suku on], tapi parlahouni na madear patuduhkon anggo ia lang sarupa pakon bahat halak humbani [suku on], halani halak humbani [suku on] somalni jorok janah sambor parlahouni.” Aha ma parlajaranni hubanta? Lang soal aha tanggung jawabta ibagas organisasi, maningon ipareksa hita ma dirinta janah marusaha ma mambahen hamubahon anggo dong ope biak sisonai. Leganni ai, aha ope na boi ibahen hita?

7. Bahen ma contoh na patuduhkon ipalumbang hita uhurta bani na legan.

⁷ Maningon ‘ipalumbang hita ma uhurta’. Anggo sonai ibahen hita lambin holong ma hita bani sanina botou. (2 Kor. 6:11-13) Ai pitah pakon halak na sasuku atap sabangsa dassa ham ra marsaor? Anggo sonai ope ham, marusaha ma ase marsaor homa pakon na legan. Boi ma iarahkon ham sidea rup mangidangi. Atap ontang ma sidea mangan hu rumahmu. (Lah. 16:14, 15) Anggo sonai ibahen ham, lambin holong ma ham hubani sidea. Sonari ulas hita ma contoh na legan na mambahen hita manguhumi mangihutkon pangidah tumang.

8. Aha ma na boi iparlajari hita humbani 3 Musa 19:15 pasal na manguhumi?

⁸ Pangahapta boi do ipengaruhi halani bayak atap miskin sasada halak. 3 Musa 19:15 mangkatahon, ‘Seng bulih papeolonnima uhum i paruhuman; seng bulih martonggor jumbak, halak na masombuh irisai, ia halak na sangap iapiti; maningon  pintor do panguhummu bani hasomanmu.’ Sonaha ase hita lang sonai?

9. Aha ma na isuratkon si Salomo, janah aha parlajaranni?

⁹ Si Salomo manuratkon, “Age sindohorni magigi do mangidah halak na masombuh, tapi buei do huan-kuan bani halak na bayak.” Tongon, sonai do na masa. (Pod. 14:20) Aha ma parlajaranni? Anggo lang jaga hita, boi do gabe rosuhan hita marhasoman pakon sanina botou na bahat artani. Sonaha ma ujungni anggo sonai ibahen hita?

10. Sipasingat aha ma na ibere si Jakobus?

¹⁰ Anggo manonggor jumbak hita bani sanina botou halani bayak atap miskin sidea, gabe adong ma parposahan i kuria. Sonai ma na masa i kuria Kristen bani abad na parlobei. Halani ai ipasingat si Jakobus ma sidea. (Basa Jakobus 2:1-4.) Tontu lang ra hita masa sisonai ibagas kuria. Jadi aha ma na porlu bahenonta?

11. Mase parhasomanan ni sasada halak pakon Jahowa lang itontuhon halani artani?

¹¹ Tiru hita ma Jahowa. Sasada halak maharga bani  Jahowa sedo halani bayak atap miskin ia. Anjaha sedo halani arta ase boi hita marhasoman pakon Jahowa. Tongon, ongga do ihatahon Jesus “payah do halak na bayak masuk hubagas Harajaon nagori atas in”, tapi sedo artini lang boi. (Mat. 19:23) Ihatahon Jesus do homa, “Martuah ma hanima na masombuh, ai bannima do Harajaon ni Naibata!” (Luk. 6:20) Tapi on sedo mangartihon anggo ganup halak na miskin gabe ra manangar Jesus janah mandapot pasu-pasu. Bahat do homa halak na miskin lang ra mangirikkon Jesus. Jadi, parhasomananta dompak Jahowa lang itontuhon halani artanta.

12. Sipasingat aha ma na ibere hubani halak na bayak pakon na miskin?

¹² Dong do juakjuak ni Jahowa na bayak ampa na miskin. Tapi ganupan sidea holong bani Jahowa janah mangidangi-Si humbai gok ni uhurni. Bani Bibel ipasingat do halak na bayak ase “ulang marhatengeran bani habayakon na so totap in; tapi bani Naibata ma”. (Basa 1 Timoteus 6:17-19.) Ipasingat do homa juakjuak-Ni, age na bayak ampa na miskin, sonaha do ujungni anggo holongan sidea bani duit. (1 Tim. 6:9, 10) Anggo iusihi hita Jahowa, hita lang manguhumi halak halani artani. Tapi ai boi do hita manguhumi halani mangidah umur ni sasada halak?

13. Domu bani Bibel, sonaha ma namin pambahenanta bani na matua?

¹³ Gati do Bibel pasingatkon hita ase hormat bani halak na matua. 3 Musa 19:32 mangkatahon, “Maningon jongjong do ho i lobei ni halak na ubanon, anjaha maningon pasangaponmu do halak na matua, anjaha maningon habiaranmu do Naibata.” Bani Podah 16:31 ihatahon, “Uban, ai ma sortali hamuliaon, jumpah do ai marhitei goluh na pintor.” Si Paulus pe pasingatkon si Timoteus ase ulang isorgangi ia na matua, tapi maningon ibahen ma sidea songon bapa. (1 Tim. 5:1, 2) Hassi pe dong tanggung jawab ni si Timoteus laho mamodahi sanina na matua, tapi maningon maridop ni uhur janah hormat ma ia bani sidea.

14. Sadihari do hita porlu mamodahi halak na tuanan humbani hita?

¹⁴ Sonaha anggo adong na matua na sangaja mambahen hasalahan, janah iarahkon homa na legan mangkorjahon na salah ai? Jahowa marosuh ase sidea iuhum. Songon na ihatahon bani Jesaya 65:20 maningon iuhum do pardousa hassi pe “marumur saratus tahun” ia. Prinsip na sarupa boi homa ididah hita bani buku Hesekiel. (Hes. 9:5-7) Na siporlunan maningon hormatan do hita bani Jahowa, Na Adong Hun Bani Sapari, na situanan humbani ise pe. (Dan. 7:9, 10, 13, 14) Halani ai, ulang ma malang uhurta mamodahi sasada halak age pe domma matua ia.​—Gal. 6:1.

15. Aha na boi iparlajari hita humbani apostel Paulus?

¹⁵ Ai porlu do homa ihormati sanina na maposo? Eak. Si Paulus mangkatahon bani si Timoteus, “Ulang ma adong na marmapas ni uhur bam halani haposoonmu, tapi gabe siusihan ma ham bani na porsaya, ibagas hata, parlahou, holong ni uhur, haporsayaon age  hapormanon.” (1 Tim. 4:12) Sanggah si Paulus manuratkon ai, ra do umur ni si Timoteus hira-hira 30 tahun. Hassi pe sonai bahat do tanggung jawab na ibere si Paulus bani si Timoteus. Aha ma parlajaranni banta? Ulang ma hita manguhumi sasada halak halani poso ia. Dingat ma Jesus, hassi pe 33 tahun ope umurni tapi domma bahat na ihorjahon ia!

16, 17. (a) Sonaha sintua boi mamutuskon anggo sasada halak domma boi gabe siparugas atap sintua? (b) Sonaha hasomalan bani piga-piga ianan boi lang sosok pakon prinsip ni Bibel?

¹⁶ Bani piga-piga ianan somal do halak na maposo lang ihormati. Halani ai, hassi pe sasintongni dong na maposo domma boi gabe siparugas atap sintua, tapi ra do sidea lang ipilih. Tapi bani Bibel lang adong itontuhon sadiha umur ni sasada halak ase boi manjolom tanggung jawab ai. (1 Tim. 3:1-10, 12, 13; Tit. 1:5-9) Jadi anggo sintua mambahen sada aturan mangihutkon hasomalan bani iananni, artini ai ia lang mangihutkon Hata ni Naibata. Halani ai, ulang ma mapas mangidah sanina na maposo, tapi iihutkon ma prinsip ni Bibel marimbangkon pandapot sandiri atap hasomalan bani ianan ni nasiam.​—2 Tim. 3:16, 17.

¹⁷ Anggo sintua lang mangihutkon aturan ni Bibel, gabe ilanglangi sidea ma na maposo na domma sosok hinan gabe sintua atap siparugas. Bani sada nagori adong sada na maposo na gabe siparugas i kuria. Ipardiateihon sintua ma anggo ia domma sosok mangidangi gabe sintua. Tapi dong sintua na matua mangkatahon maposotu ope sanina ai gabe sintua. Halani ai, lang saud sanina ai ipilih gabe sintua. Pamingkirion sisonai domma somal i piga-piga nagori. Jadi na siporlunan maningon Bibel ma iihutkon hita. Ulang ma hita mangihutkon pingkiranta sandiri atap hasomalan bani iananta. Anggo sonai ibahen hita, on patuduhkon anggo hita mandalankon parentah ni Jesus ase ulang manguhumi mangihutkon na ididah tumang.

18, 19. Ase ulang lepak panguhumionta bani sanina botou, aha ma na porlu ibahen hita?

¹⁸ Hassi pe lang gokan dear, boi do hita mangusihi Jahowa, janah lang manonggor jumbak bani na legan. (Lah. 10:34, 35) Jadi, tongtong ma pardiateihon hita sipasingat humbani Bibel. Dalankon hita ma parentah ni Jesus ase ‘ulang [mangihutkon] pangidah tumang panguhumionta’.​—Joh. 7:24.

¹⁹ Lang piga dokah nari, uhuman ni Jesus ma ganup halak i sab dunia on. Sanggah ai, ia manguhumi sedo mangihutkon na iidah ampa na itangar tumang, tapi mangihutkon aturan ni Naibata na pintor in. (Jes. 11:3, 4) Malas tumang uhurta paima-imahon ai!