1, 2. Aha do na masa bani si Paulus pakon si Silas i Pilippi? (Idah gambar bani alm. 9.)

BAYANGKON ma sarita on. Hira-hira tongah ni borngin, ipamasuk ma si Paulus pakon si Silas hu penjara. Golap do ijai. Seng boi mosor sidea halani ipasung do naheini anjaha maborit tumang tanggurungni halani domma ilonsingi. (Lah. 16:23, 24) Mase sonai? Halani paima ipenjarahon, dong do halak na mabuei manangkap anjaha manarad sidea hu tiga. Ijai ma sidea iuhum. Isintak ma bajuni janah ilonsingi. (Lah. 16:16-22) Sasintongni lang boi sonai ibahen halak na mabuei ai, halani halak Rom do si Paulus. *—Idah surat partoruh.

² Sanggah si Paulus i penjara, ra do ipingkiri ia na masa sadari ai anjaha pasal halak Pilipi. Lang dong rumah parguruan i Pilipi, sedo songon huta-huta na legan na irohi  si Paulus. Halani ai, i darat ni huta ai ma halak Jahudi martonggo dohorhon sada bah. (Lah. 16:13, 14) Ra do halani lang dong sapuluh halak Jahudi ijai, on ma na mambahen lang dong rumah parguruan ijai. Megah tumang do halak Pilippi ai boi gabe halak Rom. (Lah. 16:21) Ra do halani ai, lang isangka halak na mabuei ai anggo si Paulus ampa si Silas hassi pe sasintongni halak Jahudi, tapi halak Rom do use sidea. Lang ibotoh hita aha do alasan na sasintongni, domma lang adil pambahenan ni halak na mabuei ai.

3. Sungkun-sungkun aha do ra na ipingkirhon si Paulus sanggah i penjara, tapi sonaha do pangahapni?

³ Sanggah si Paulus i Pilippi, ra do ia tarsungkun-sungkun mase sonon na masa hu bani. Halani bani piga-piga bulan na salpu, hu Laut Aegea do ia i Asia Kecil. Sihol marbarita do ia hujai, tapi ilanglangi tonduy na pansing. Tapi isuruh tonduy ai ma sidea ase marbarita bani ianan na legan. (Lah. 16:6, 7) Sanggah i Troas, si Paulus mangidah sada panonggoran, dong sada dalahi mangkatahon, “Mandipar ma ham hu Makedonia.” Jadi ibotoh si Paulus ma parentah ni Naibata, maningon hujai do ia marbarita. (Basa Lahoan ni Apostel 16:8-10.) Tapi lang piga dokah dobkonsi das si Paulus i Makedonia, mintor ipenjarahon ma ia. Mase ipaturut Jahowa sonai? Sadia dokah do ia holi ipenjara? Hassi pe sonai totap do toguh haporsayaonni anjaha marmalas ni uhur. “Martonggo ma si Paulus ampa si Silas mamuji Naibata.” (Lah. 16:25) Anjaha damei ni Naibata do na manramotkon uhur ampa pingkiran ni sidea.

4, 5. (a) Patorang ma aha na masa banta boi sarupa pakon si Paulus. (b) Sonaha do na masa bani si Paulus boi sompong mubah?

⁴ Ai ongga do pangahap ni nasiam songon si Paulus? Ongga do nasiam sihol mambahen haputusan, ipindo nasiam do pangurupion ni Naibata, mangindahi podah-Ni anjaha mandalankon ai. Hape dobkonsi ai, gabe hasunsahan do na roh atap maningon ibahen nasiam ma parubahan. (Par. 9:11) Jadi ra do gabe sungkun-sungkun nasiam, ‘Mase ipaturut Jahowa sonon na masa bangku?’ Jadi, aha do na boi mangurupi nasiam ase totap martahan anjaha martenger ni uhur bani Naibata? Balosni ai boi dapot hita anggo manrimangi sonaha do ujungni na masa bani si Paulus ampa si Silas.

⁵ Sompong mubah ma haganupan. Sanggah mandoding si Paulus pakon si Silas, masa ma lalou na bolon. Dob ai, mangkabuha ma labah ni penjara ai. Tanggal ma gari ni ganup na ipenjara ai. Mangidah ai, sihol mamunuh dirini sandiri ma sijaga penjara ai, tapi mintor ilanglangi si Paulus ma. Ujungni, gabe ididi ma sijaga penjara ai pakon kaluargani. Sogod ni ai, roh ma pejabat kota laho paluahkon si Paulus pakon si Silas hun penjara janah isuruh ma sidea laho ibagas damei. Tapi dobkonsi ibotoh pejabat ai halak Rom do hape si Paulus pakon si Silas, gabe mabiar ma sidea anjaha  laho ipaluah sidea ma si Paulus pakon si Silas. Paima manadingkon huta ai, laho ma si Paulus pakon si Silas hu rumah ni si Lidia na baru ope ididi anjaha iapohi sidea ma sanina-sanina i Pilippi.​—Lah. 16:26-40.

6. Aha do na laho iulas hita?

⁶ Aha do na boi iparlajari hita humbani sarita nongkan ai? Markuasa do Jahowa laho mangurupi bani panorang na lang isangka hita. Jadi, ulang ma haru sanggah dong parlajouan. On do na iparlajari si Paulus humbani na masa ai. Taridah do on humbani surat na itongosni hu kuria Pilippi. Bani artikel on, iparlajari hita ma suratni ai na isuratkon bani Pilippi 4:6, 7. (Basa.) Dob ai, iulas hita ma sonaha Jahowa mangurupi juakjuak-Ni sapari. Anjaha sonaha do “damei ni Naibata” boi mangurupi hita totap martahan janah porsaya bani Naibata hassi pe ibagas parlajouan.

7. Aha do na iajarhon si Paulus bani sanina na i Pilippi, anjaha parlajaran aha do na boi dapot hita?

⁷ Sanggah ibasa sanina-botou i Pilippi surat ni si Paulus, ra do idingat sidea aha na masa bani si Paulus pakon si Silas janah sonaha Naibata mangurupi sidea. Humbani suratni ai, aha na iajarhon si Paulus bani sidea? Ai ma ase ulang haru, tapi martonggo ma ase mandapot “damei ni Naibata, na mangatasi haganup paruhuron”. Adong piga-piga terjemahan ni Bibel mangkatahon “lobih humbani sura-suranta”. Aha do artini ai? Jadi “damei ni Naibata” na ihatahon si Paulus, boi mangurupi hita lobih humbani na ipingkirhon hita. Anggo lang ibotoh hita aha na laho bahenon sanggah ibagas parlajouan, porsaya ma boi do Jahowa mangurupi hita lobih humbani na ipingkirhon hita.​—Basa 2 Petrus 2:9.

8, 9. (a) Hassi pe ipaturut Naibata si Paulus ibagas parlajouan, tapi parohkon aha do ujungni? (b) Mase sanina-botou na i Pilippi porsaya bani podah ni si Paulus?

⁸ Surat ni si Paulus ai pe boi do patoguhkon sanina-botou i Pilippi halani idingat sidea do aha na ibahen Jahowa hira-hira sapuluh tahun na salpu. Hassi pe ipaturut Jahowa si Paulus ampa si Silas ibagas parlajouan, tapi parohkon hadearon do ujungni, halani ai do na “mampartahankon ampa na pajonamkon Ambilan Na Madear ai”. (Pil. 1:7) Lang be barani pejabat na i Pilippi laho mangarsik-arsik kuria na baru ai. Anjaha si Lukas pe boi do tading i Pilippi, ra do halani domma ibotoh pejabat ai halak Rom do hape si  Paulus. Halani ai ma si Lukas pe boi mangurupi kuria baru i Pilippi dobkonsi laho si Paulus pakon si Silas hunjai.

⁹ Sanggah ibasa sanina-botou i Pilippi surat ni si Paulus, ibotoh sidea ma lang pitah podah tumang ai, halani domma iahapkon si Paulus sandiri. Jadi totap do iahapkon si Paulus “damei ni Naibata” hassi pe sanggah na manuratkon suratni ai, ibagas penjara Rom do ia.​—Pil. 1:12-14; 4:7, 11, 22.

10, 11. Anggo hita holsohan, aha do na boi ibahen hita, anjaha aha do na porlu idingat hita?

¹⁰ Aha do na boi mangurupi hita ase ‘ulang haru pasal aha pe’ tapi mandapot “damei ni Naibata”? Humbani surat ni si Paulus nongkan ai, maningon martonggo ma hita sanggah haru uhurta. (Basa 1 Petrus 5:6, 7.) Sanggah martonggo, iahapkon hita ma holong do Jahowa hubanta. Tongtong ma hita martarima kasih bani haganup pamberean-Ni. Dingat ma, Jahowa boi do mangurupi hita “lobih humbani na pinindonta barang na piningkiranta”—Ep. 3:20.

¹¹ Songon si Paulus pakon si Silas, ra do tarsonggot hita mangidah pangurupion ni Naibata. Hassi pe lang halongangan na ibahen Naibata, tapi aha na porlu banta do na ibere-Ni ai. (1 Kor. 10:13) Halani ai, sanggah hita mangindo pangurupion ni Naibata, maningon ihorjahon hita ma domu bani tonggonta. (Rom 12:11) Anggo sonai ibahen hita, on patuduhkon humbani uhur do hita martonggo anjaha porsaya Jahowa do na mamasu-masu hita. Dingat hita ma iurupi Jahowa do hita lobih humbani na ipingkirhon hita. Sipata, bani panorang na lang isangka do Jahowa mangurupi hita. Sonari ulas hita ma piga-piga contoh na boi patoguhkon haporsayaonta bani pangurupion ni Jahowa.

12. (a) Aha do na ibahen si Hiskia sanggah roh Raja Sanherib laho mamorangi sidea? (b) Aha do na boi iparlajari hita pasal pangurupion ni Jahowa ai?

¹² Bani Bibel, buei do na ibotoh hita pasal pambahenan ni Jahowa. Umpamani pasal si Hiskia na manrajai Juda. Domma italuhon si Sanherib hun Assur huta Juda na marbatar-batar. Sihol iporangi sidea ma homa Jerusalem. (2 Raj. 18:1-3, 13) Tapi aha ma na ibahen si Hiskia? Parlobei, martonggo ma ia bani Jahowa anjaha mangindo podah humbani nabi Jesaya. (2 Raj. 19:5, 15-20) Dob ai, ibere si Hiskia ma pirak pakon omas na ipangindo si Sanherib. (2 Raj. 18:14, 15) Dob ai ipasirsir si Hiskia ma aha na porlu laho manlinggomi huta ai. (2 Kron. 32:2-4) Jadi sonaha do ujungni? Isuruh Jahowa ma sada malekat laho mamunuh 185.000 tantara ni halak Assur ibagas na saborngin. Tontu longang do si Hiskia mangidah ai!​—2 Raj. 19:35.

13. (a) Parlajaran aha do na dapot hita humbani si Josep? (b) Aha do na masa bani si Sarah?

 ¹³ Pingkirhon ma aha na masa bani si Josep na maposo sanggah ia ipenjara. Ra do lang ongga ibayangkon si Josep, ia jadi siparkuasa na paduahon i tanoh Masir dobkonsi si Parau, atap pe ia na igunahon Naibata ase ganup kaluargani lang matei halani loheian. (1 Mus. 40:15; 41:39-43; 50:20) Pambahenan ni Jahowa ai lobih do humbani aha na ipingkirhon si Josep. Sonai homa do si Sarah ompung ni si Josep. Ra do pangahapni, pitah humbani jabolonni do ia dapotan anak. Tapi dobkonsi matua ia, itubuhkon ma si Isak halani kuasa ni Jahowa. Ra do on lang ongga tarpingkirhonsi.​—1 Mus. 21:1-3, 6, 7.

14. Mase hita boi martenger ni uhur hubani Jahowa?

¹⁴ Paima tanoh on gabe paradeiso, seng iarapkon atap ipaksa hita ase ibahen Jahowa halongangan laho pasaloseihon ganup parsoalanta. Tapi ibotoh hita, iurupi Jahowa do juakjuak-Ni lobih humbani na ipingkirhon sidea. Anjaha seng mubah Jahowa  ronsi sonari. (Basa Jesaya 43:10-13.) Tenger do uhurta bani Jahowa na laho mambere gogoh hubanta ase boi mangkorjahon harosuh-Ni. (2 Kor. 4:7-9) Aha do na boi iparlajari hita humbani si Hiskia, si Josep pakon si Sarah? Hassi pe borat parsoalanta, boi do Jahowa mangurupi hita anggo totap hita setia hu Bani.

15. Sonaha do marhitei tobusan hita boi mangahapkon “damei ni Naibata”?

¹⁵ Sonaha do hita boi mandapot “damei ni Naibata” hassi pe ibagas parlajouan? Maningon orot ma hita marhasoman pakon Jahowa. Hita boi marhasoman pakon Jahowa halani tobusan ni Jesus. Tobusan ai pataridahkon banggal ni kuasa ni Jahowa. Halani marhitei tobusan do dousanta boi isasap Jahowa anjaha boi iahapkon hita panggora ni uhur na borsih.​—Joh. 14:6; Jak. 4:8; 1 Ptr. 3:21.

16. Sonaha ma pangahapta anggo dong “damei ni Naibata” hubanta? Patorang.

¹⁶ Sonaha ma pangahapta anggo adong banta “damei ni Naibata, na mangatasi haganup paruhuron”? Bibel mangkatahon, ‘iramotkon’ ma pingkiran pakon uhurta. (Pil. 4:7) Hata “manramotkon” bani hata Gorik, somal do ipakei laho patorangkon adong sada kalompok tantara na manjaga sada huta, songon i huta Pilippi. Jadi halak na tading ijai boi ma gabe sinok modom halani mambotoh dong do tantara na manjaga hutani. Sonai homa do, anggo dong “damei ni Naibata” banta, lang be sai haru uhurta atap maretek ni uhur sanggah ibagas parlajouan. Tapi iahapkon hita ma hadameion, halani ibotoh hita holong do Naibata hubanta anjaha sihol do uhur-Ni ase totap toguh hita.​—1 Ptr. 5:10.

17. Sadokah hamarsikon banggal, aha do na mangurupi hita ase totap martenger ni uhur bani Jahowa?

¹⁷ Lang piga dokah nari, masa ma hamarsikon banggal. (Mat. 24:21, 22) Lang ibotoh hita aha do na laho masa banta marsada-sada bani panorang ai. Hassi pe sonai, ulang pala haru uhurta pasal ai. Age pe lang ibotoh hita ganup na laho bahenon ni Jahowa bani panorang ai, tapi itandai hita do Naibatanta. Domma ibotoh hita sonaha pambahenan ni Jahowa bani juakjuak-Ni sapari. Lang soal aha na masa, boi do Jahowa pasaudkon harosuh-Ni lobih humbani na ipingkirhon hita! Aha pe parsoalanta, pos ma uhurta bereon ni Jahowa ma aha na ihaporluhon hita ase boi mangahapkon “damei ni Naibata, na mangatasi haganup paruhuron”.