Aha na isuratkon si Mateus pasal partubuh ni Jesus adong do leganni pakon aha na isuratkon si Lukas, halani marlegan-legan do halak na sihol isaritahon sidea.

Si Mateus manuratkon pasal si Josep. Umpamani, ipatugah do sonaha pangahap ni si Josep sanggah ibotohni domma boratan rumah si Maria, tapi marhitei nipi ipatorang sada malekat ma pasal aha na masa bani si Maria anjaha unduk ma ia bani parentah ni malekat ai. (Mat. 1:19-25) Dob ai, bani nipi na legan, iparentahkon malekat do homa si Josep ase maporus mamboban kaluargani hu Masir. Si Mateus pe patugahkon, isuruh malekat do si Josep ase mulak use hu tanoh Israel anjaha ujungni i Nasaret ma sidea marianan. (Mat. 2:13, 14, 19-23) Jadi bani Mateus bindu sada pakon dua, adong do pitu hali goran ni si Josep isobut janah ompat hali goran ni si Maria.

Tapi anggo si Lukas manuratkon pasal si Maria. Umpamani, ipatugah do sonaha malekat Gabriel manjumpahkonsi. Dob ai, laho ma si Maria manjumpahi sindohorni ai ma si Elisabet anjaha sonaha si Maria mamuji Jahowa. (Luk. 1:26-56) Isaritahon do homa sonaha si Simeon patugahkon bani si Maria, marsitaronon do holi Jesus i lobei ni ari. Si Lukas pe manuratkon sanggah Jesus marumur 12 tahun, laho do sidea sakaluarga hu rumah panumbahan. Anjaha isuratkon si Lukas do homa aha na ihatahon si Maria sanggah ai, sedo hata ni si Josep. Janah ipatugah do homa iparimbagaskon si Maria do na masa ai. (Luk. 2:19, 34, 35, 48, 51) Jadi bani buku Lukas bindu sada pakon dua, dong do 12 hali goran ni si Maria isuratkon anjaha tolu hali dassa goran ni si Josep. Hunjon taridah ma anggo si Mateus mansaritahon pasal pangahap ampa pambahenan ni si Josep. Tapi si Lukas manuratkon pasal pangahap ampa na masa bani si Maria.

Pasal tarombo ni Jesus pe, legan-legan do cara ni sidea manuratkon. Umpamani si Mateus manuratkon tarombo ni Jesus humbani si Josep. Halani anak angkat ni si Josep do Jesus, jadi humbani uhum Jesus do na marhak manean harajaon ni si Daud. Mase? Halani si Josep ginompar ni si Daud marhitei si Salomo. (Mat. 1:6, 16) Tapi anggo si Lukas manuratkon tarombo ni Jesus humbani si Maria. Halani si Maria do na manubuhkon Jesus jadi humbani daging, marhak do Jesus manean harajaon ni si Daud. (Rom 1:3) Mase? Halani bapa ni si Maria ai ma si Eli, ginompar ni si Daud do homa marhitei si Natan. Tapi mase si Lukas mangkatahon si Josep do anak ni si Eli, sedo si Maria? Halani sapari pitah goran ni dalahi do na ipamasuk hubagas tarombo. Jadi hassi pe si Josep ihatahon anak ni si Eli, tapi domma iarusi halak anggo si Josep ai helani do.​—Luk. 3:23.

Hassi pe marlegan-legan cara ni si Mateus pakon si Lukas manuratkon pasal tarombo ni Jesus, tapi on patuduhkon Jesus do Mesias na ibagahkon Naibata. Halak Parisei pakon halak Sadukei pe lang mamorsou anggo Jesus ai ginompar ni Raja Daud. Jadi hatorangan na dong bani buku Mateus ampa Lukas boi patoguhkon haporsayaonta na laho saud do ganup janji ni Jahowa.