1, 2. (a) Aha do na ihatahon si Elipas pakon si Bildad pasal pambahenan ni jolma i lobei ni Jahowa? (b) Aha na ihatahon Jahowa pasal ai?

LOBIH HUMBANI 3.000 tahun na salpu, roh ma tolu hasoman ni si Job manjumpahkonsi. Sada humbani sidea ai ma si Elipas hun Teman, manungkun bani si Job, “Mintor dong ma nani guna ni jolma bani Naibata? Lang, bani dirini tumang do marguna halak na maruhur? Mintor adong ma tumaram gunani bani Pargogoh Na So Tarimbang in, anggo pintor ho? Atap mintor adong ma untung-Ni hunjai, anggo ipadaulat ho parlahoumu?” (Job 22:1-3) Bani si Elipas, ganupan ai balosni lang. Anjaha hasomanni na legan ai ma si Bildad hun Sua, mangkatahon lang tarbahen jolma pintor i lobei ni Naibata.—Basa Job 25:4.

² Si Elipas pakon si Bildad marusaha ase si Job marpingkir na soya-soya do ganup pambahenanni i lobei ni Naibata Jahowa. Ihatahon sidea anggo jolma sarupa do songon ngitngit, gilok-gilok, atap goya na lang maharga.  (Job 4:19; 25:6) Ai halani toruh ni uhur do sidea mangkatahon ai? (Job 22:29) Sasintongni, pitah Jahowa do Na Tang Sitimbulan, janah etek tumang do jolma marimbangkon-Si. Umpamani, anggo hita bani pakpak ni dolog atap mangidah hun jendela ni kapal terbang, taridah etek do ganupan na i toruh ai, gabe ibotoh hita ma etek tumang do hita. Ai sonai do Jahowa mangidah pangidangionta? Lang! Ihatahon Jahowa do anggo si Elipas, si Bildad, pakon si Sopar domma marladung. Tapi malas do uhur ni Jahowa mangidah si Job janah ihatahon do ia “juakjuak-Ku”. (Job 42:7, 8) Jadi, pos ma uhurta hassi pe lang gokan dear, dong do “guna ni jolma bani Naibata”.

3. Aha do na ihatahon si Elihu pasal pambahenanta i lobei ni Jahowa? Aha do maksudni?

³ Itangar si Elihu do parsahapan ni si Job pakon tolu hasomanni ai. Dob ai isungkun si Elihu ma pasal Naibata Jahowa bani si Job, “Anggo pintor ham, aha pamberemu Bani? Atap aha dong ijalo hun bamu?” (Job 35:7) Ai sarupa do maksud ni si Elihu pakon sidea na tolu ai? Lang. Halani sidea na tolu ai hansa ipasingat Jahowa, seng dihut si Elihu. Legan do na ihatahon si Elihu. Ia mangkatahon hassi pe hita manombah Naibata Jahowa, sedo artini anggo Ia mandapot guna hun banta. Halani Naibata Jahowa do simada haganup, aha pe lang dong na boi ibahen hita na mambahen Ia lambin bayak atap gogoh. Humbani Naibata do hapentaranta, janah ipardiatei do sonaha hita manggunahon ai.

4. Sonaha pangahap ni Jahowa anggo maridop ni uhur hita bani na legan?

⁴ Sanggah maridop ni uhur hita bani hasomanta, sarupa do ai ibahen hita hubani Naibata Jahowa. Podah 19:17 mangkatahon, “Na papinjamkon bani Jahowa do halak, na maridop ni uhur bani halak na masombuh, anjaha Ia do na mambaloskon ai bani.” Jadi ipardiateihon Jahowa do pambahenanta. Hassi pe Ia Sitompa haganup, tapi anggo hita maridop ni uhur bani na legan, songon na papinjamkon hu Bani do ai, janah ibalaskon Jahowa do holi ai. Jesus pe setuju do pasal ai.—Basa Lukas 14:13, 14.

5. Sungkun-sungkun aha do na laho iulas hita?

⁵ Na basaia, iontang Jahowa do Nabi Jesaya laho mangidangi-Si janah padaskon tonah-Ni. (Jes. 6:8-10) Rosuh uhur ni si Jesaya manjalo ontangan ai, janah nini ma, “Ijon do ahu, suruh Ham ma ahu!” Sonari, iontang Jahowa do homa manisia na martenger ni uhur dihut bani horja-Ni. Dong marribu juakjuak ni Jahowa na mangusihi si Jesaya. Hassi pe dong marmasam tantangan, sirsir do sidea mangidangi Jahowa age ija pe. Tapi dong do ra na  marpingkir, ‘Malas do uhurhu mambere gok panorang laho mangidangi Jahowa, tapi ai maningon do huhorjahon ai? Dihut atap lang ahu, ai lang salosei do ganup horja ni Jahowa?’ Ongga do sonai pangahapmu? Eta, ulas hita dua contoh ai ma si Debora pakon si Barak, na boi mangurupi hita mambalosi sungkun-sungkun ai.

6. Mase songon na urah tentara ni si Jabin manaluhon halak Israel?

⁶ Tentara ni Israel do si Barak, janah nabi naboru do si Debora. “Parah tumang do halak Israel iarsik” si Jabin, raja ni tanoh Kanaan sadokah 20 tahun. Kojam do tentara ni si Jabin. Halani ai, gabe mabiar ma halak Israel luar hun rumahni. Adong do 900 gareta bosi ni si Jabin, tapi halak Israel lang dong sonai sinjatani laho manlinggomi sidea.—Panguh. 4:1-3, 13; 5:6-8. * (Idah surat partoruh.)

7, 8. (a) Aha do na parlobei iparentahkon Jahowa bani si Barak? (b) Sonaha halak Israel manaluhon tentara ni si Jabin? (Idah gambar bani alaman 27.)

⁷ Anggo iimbangkon bani tentara ni si Jabin, songon na urah do manaluhon halak Israel. Tapi marhitei si Debora, iparentahkon Jahowa do si Barak, “Bingkat ma ho, laho hu Dolog Tabor, anjaha bobahon ma sapuluh ribu halak humbani ginompar ni Naftali pakon Sebulon, anjaha juljulonku ma manjumpahkon ho, hu lambung ni Bah Kison, si Sisera, puanglima ni bala ni si Jabin rap pakon garetani ampa balani, anjaha Ahu mangondoskonsi hubagas tanganmu.”—Panguh. 4:4-7.

⁸ Ipindahi ma halak na ra dihut, janah ipatumpu ma 10.000 halak hu Dolog Tabor. Dob ai marporang ma sidea hu Taanak. (Basa Panguhum 4:14-16.) Ai iurupi Jahowa do halak Israel? Eak. Sompong roh ma haba-haba, na mambahen ianan ai gabe marhubang. On mangurupi halak Israel ase monang. Jadi iayak tentara ni si Barak ma tentara ni si Sisera hira-hira 24 kilometer daohni, das hu Haroset. Tapi i tongah dalan, masuk ma hu hubangan gareta ni si Sisera. Jadi maporus ma ia hu Saanim dohorhon Kades. Dob ai marponop ma ia bani tenda ni sada naboru ai ma si Jael. Loja do si Sisera janah modom ma ia. Sanggah sinok modom ia, pangkar do si Jael pamateihonsi. (Panguh. 4:17-21) Monang do halak Israel ibahen Jahowa! * (Idah surat partoruh.)

9. Aha na boi iparlajari hita humbani Panguhum 5:20, 21 pasal marporang dompak si Sisera?

⁹ Lambin buei ma na iparlajari hita humbani Panguhum bindu 4, anggo ibasa hita bindu 5. Bani Panguhum bindu 5:20, 21 ihatahon, “Hun langit marporang bintang-bintang, humbani dalan ni sidea iporangi sidea si Sisera. . . . Bah Kison mangayubkon sidea.”  Humbani ayat on, ai ihatahon do sidea iurupi malekat ni Naibata Jahowa sanggah marporang? Atap na roh do udan batu? Lang adong ipatugah Bibel. Tapi, masuk akal do hita marpingkir anggo Naibata Jahowa parohkon udan batu laho paluahkon juakjuak-Ni ase 900 gareta nongkan ai borat mardalan. Bani Panguhum 4:14 ampa 15, dong tolu hali ihatahon anggo Jahowa do na mambahen sidea monang, sedo halani 10.000 halak Israel na ra dihut marporang ai.

10, 11. Aha do Meroz ai? Mase ia ipapai?

¹⁰ Sonari, ulas hita ma parlajaran na legan. Dob monang halak Israel, mandoding ma si Debora pakon si Barak laho mamuji Jahowa. Sidea mandoding, “Papai ma Meroz, nini malekat ni Jahowa, sabonar papai ma pangisini, halani seng roh sidea mangurupi Jahowa, mangurupi Jahowa mangkasomani parporang na borani.”—Panguh. 5:23.

¹¹ Aha do Meroz ai? Lang pala tangkas ibotoh hita. Tapi halani domma ipapai Meroz ai, gabe magou ma ai. Ra do Meroz ai sada huta na pangisini lang ra mangurupi si Barak bani parporangan. Sanggah ipindahi 10.000 halak ase ra dihut marporang manlawan halak Kanaan, ra do ibotoh halak na i huta Meroz ai. Atap ra do Meroz ai huta na ibontas si Sisera sanggah lintun laho paluahkon diri hun si Barak. Bayangkon ma ididah sidea sada puanglima laho paluahkon dirini! Sasintongni boi do namin itangkap sidea tapi seng ra sidea. Anggo ra sidea mangurupi ase saud harosuh ni Jahowa, dapotan upah ma sidea. Tapi lang adong age aha na ibahen sidea. Legan do halak na i huta Meroz on pakon si Jael, na pangkar mangurupi.—Panguh. 5:24-27.

12. Pambahenan na legan aha do na ipatorang bani Panguhum 5:9, 10? Aha do parlajaranni hubanta?

¹² Bani Panguhum 5:9, 10, ididah hita do sonaha pambahenan ni na 10.000 halak na rosuh mambere dirini legan pakon halak na lang rosuh mambere dirini. Ibere si Debora ampa si Barak do pujian hubani “puanglima ni Israel, hubani sidea na mamberehon dirini, humbani rosuhni i tongah-tongah ni bangsa in”. Rosuh do sidea mambere dirini laho marporang rap pakon si Barak hu dolog Tabor ampa hu habungan na marhubang i Kison. Legan tumang do sidea humbani halak na “mangajak halode silopak” na mangahap dirini ponting. Halak on, songon na “hundul i atas ni parmadani” pakon “na mardalan i dalan”, rosuh mangindahi hasonangan. Jadi, ipasingat do halak na mangindahi hasonangan ase ipardiateihon ai! Porlu do ipingkirhon sidea halani lang dihut mangurupi horja ni Jahowa. Sonari, porlu do homa  ipingkirhon hita, ringgas do hita mambere diri atap lang laho mangurupi horja ni Jahowa.

13. Sonaha do na ibahen halak Ruben, Dan, pakon Asser legan humbani na ibahen halak Sebulon pakon Naftali?

¹³ Na 10.000 halak nongkan ai, boi mangidah pambahenan ni Jahowa, Pargogoh na So Tarimbang. Sidea boi patugahkon “dear layak ni Jahowa” bani halak na legan. (Panguh. 5:11) Tapi legan do halak Ruben, Dan, pakon Asser. Sidea pitah mamingkirhon habayakon, biri-birini, kapalni, ampa pelabuhanni, sedo harosuh ni Jahowa. (Panguh. 5:15-17) Tapi lang ganup halak sonai. Anggo halak Sebulon ampa Naftali “ra mamberehon hosahni hu hamatean” laho mangurupi si Debora pakon si Barak. (Panguh. 5:18) Dong parlajaran na ponting na boi ibuat hita humbani sidea.

14. Sonaha hita boi mangurupi pamarentahan ni Jahowa sonari on?

¹⁴ Sonari, hita lang isuruh marporang ase dihut bani horja ni Jahowa. Tapi hita boi mangurupi pamarentahan ni Naibata marhitei ringgas janah pangkar marbarita. Sonari bahat do halak na iporluhon laho mangurupi ibagas horja ni Jahowa. Marjuta saninanta, dalahi, naboru, ampa na maposo rosuh mambere dirini dihut ibagas dinas sepenuh waktu. Adong na gabe parintis, mangidangi i Betel, ampa pajongjongkon Balei Harajaon. Dong homa na mangurupi i kebaktian. Piga-piga sintua mangurupi gabe Panitia Penghubung Rumah Sakit ampa mangorganisasi kebaktian. Pos ma uhurta anggo Jahowa mangkargai haringgasonta, janah seng lupa bani pambahenanta.—Heb. 6:10.

15. Hunja do ibotoh hita anggo marosuh do hita mambere diri bani horja ni Jahowa?

 ¹⁵ Jadi pingkirhon hita ma, rosuh do hita atap lang mambere diri. Sungkun ma dirinta, ‘Ai hupaturut do na legan bahatan marhorja hun bangku? Ai habayakon do siporlunan bangku marimbangkon mangidangi Jahowa? Atap hutiru do haporsayaon ampa habaranion ni si Barak, si Debora, si Jael, pakon na 10.000 halak marhitei rosuh manggunahon na dong bangku laho mangidangi Jahowa? Ai dong do sura-surangku laho pindah hu kota atap nagori na legan laho mangindahi habayakon? Anggo sonai, ai domma hupingkirhon aha do pangkorhonni bani kaluarga ampa kuria janah manonggohon ai?’ * (Idah surat partoruh.)

16. Hassi pe Jahowa do simada haganup, aha do na boi ibere hita hu Bani?

¹⁶ Ibere Jahowa do hubanta panorang laho mangurupi pamarentahan-Ni. Humbani masa ni si Adam pakon si Hawa ronsi sonari, sihol do Sibolis ase jolma manlawan Jahowa. Tapi anggo pamarentahan-Ni do na iurupi hita, tangkas ma ipatuduh hita bani Sibolis hampit ise do hita. Haporsayaon ampa tenger ni uhur do na mangojur hita mangidangi Jahowa, janah on do na pamalaskon uhur-Ni. (Pod. 23:15, 16) Anggo setia hita, Jahowa boi marbalos bani ladung ni Sibolis. (Pod. 27:11) Na boi ibere hita bani Jahowa ai ma pambalosionta. Maharga do ai Bani, janah pamalaskon uhur-Ni.

17. Aha do na iajarhon Panguhum 5:31 pasal ari simagira?

¹⁷ Tongkin nari, pitah halak na mangapiti pamarentahan ni Jahowa na mangiankon tanoh on. Ipaima-ima hita do ai! Songon si Debora pakon si Barak ma pangahapta na mandoding, “Sonin ma siap ganup munsuhmu, ale Jahowa. Tapi anggo na mangkaholongi Ham, songon mata ni ari na poltak bani hagogohonni do.” (Panguh. 5:31) Ai ma na masa sanggah iripaskon Jahowa dunia ni Sibolis on. Sanggah Harmagedon, Jahowa lang mamorluhon jolma laho manripaskon munsuh-Ni. Tapi, “jongjong” hansa hita anjaha ‘mangidah hamonangan, na sihol bereon ni Naibata’. (2 Kron. 20:17) Paima roh ari ai, sonari ma panorangni ase ringgas janah pangkar hita mangapiti pamarentahan ni Jahowa.

18. Aha do gunani anggo rosuh hita mambere diri mangidangi Jahowa?

¹⁸ Sanggah monang sidea, mandoding do si Debora pakon si Barak mamuji Jahowa sedo jolma. Sidea mandoding, “Halani rosuh uhur ni bangsa in manggalangkon dirini; puji ma Jahowa!” (Panguh. 5:1, 2) Sonai homa anggo rosuh hita mangidangiSi, tarojur ma na legan ‘mamuji Jahowa!’