Dos do Pangahap ni Nasiam pakon Jahowa pasal Hapintoron?
“Sihol ambilankononku do goran ni Jahowa . . . , Naibata hatengeran ni uhur anjaha seng dong hagedukan-Ni.”
DODING: 110, 2
1, 2. (a) Hagedukan aha do na masa bani si Nabot pakon niombahni? (b) Dua biak aha do na laho iulas hita bani artikel on?
DUA halak na jahat mangkatahon na lang tongon pasal sada dalahi. Hape lang adong buktini janah iuhum matei ma dalahi ai. Pingkirhon ma sonaha pangahap ni parpintor mangidah dalahi ai pakon anakni na lang marsalah ipargijig ronsi matei! On sedo pitah turi-turian. Sintong do ai masa bani si Nabot, juakjuak ni Jahowa, sanggah Raja Ahab mamarentah i Israel.
2 Bani artikel on, iulas hita aha na masa bani si Nabot. Hita ulas homa hasalahan na ibahen sada sintua bani abad na parlobei. Haduasi contoh on mangurupi hita mangusihi hapintoron ni Jahowa marhitei pataridahkon toruh ni uhur ampa ra manasap hasalahan.
HAGEDUKAN NA MASA
3, 4. Halak na sonaha do si Nabot, janah mase lang ra ia manjual pohon anggurni bani Raja Ahab?
3 Juakjuak ni Jahowa na martenger ni uhur do si Nabot. Bani panorang ai bahat do halak Israel na mangihutkon Raja Ahab pakon Ratu Isebel, parrumahni na jahat. Isombah sidea do Baal janah lang mangihutkon parentah ni Jahowa. Legan do si Nabot, arganan do parhasomananni pakon Naibata marimbangkon goluhni.
4 Basa 1 Raja-raja 21:1-3. Sanggah si Ahab sihol mamboli pohon anggur ni si Nabot, atap mambere pohon anggur sidearan gabe gantihni, seng ra si Nabot. Mase? Halani ia mambotoh manlanggar titah ni Naibata do manjual tading-tadingan. Jadi dear ma ia patugahkon, “Ipandang Jahowa do bereonku bamu tading-tadingan ni bapa.” (3 Mus. 25:23; 4 Mus. 36:7) Torang ma anggo si Nabot mambalosi Jahowa.
5. Aha do na ibahen si Isebel ase dapotni pohon anggur ni si Nabot?
5 Halani seng ra ia manjual pohon anggurni, sogam ma uhur ni Raja Ahab pakon parinangonni. Jadi ase dapotni pohon anggur ai, isuruh Ratu Isebel ma dua dalahi ase mangaduhon si Nabot, hape lang adong salahni. Ujungni, ibunuh ma si Nabot pakon anakni. Aha do na laho bahenon ni Jahowa bani parjahat ai?
HAPINTORON NI NAIBATA
6, 7. Sonaha Jahowa pataridahkon holong-Ni bani hapintoron, janah sonaha ai mangapoh kaluarga ampa hasoman ni si Nabot?
6 Isuruh Jahowa ma si Elias patugahkon bani si Ahab, pamunuh ampa panrampas do ia. Aha na laho ibahen Jahowa? Laho ipamatei ma si Ahab, parrumahni, pakon niombahni songon parmatei ni si Nabot ampa niombahni.
7 Pusok do uhur ni kaluarga ampa hasoman ni si Nabot mangidah hajahaton ni si Ahab. Tapi itorih Jahowa do ai, janah mintor ibahen do uhuman. Tarapoh ma sidea dob manangar ai. Tapi, iuji do ra toruh ni uhur ampa hatengeran ni sidea bani Jahowa anggo ibotoh aha na laho masa.
Si Elias patugahkon bani si Ahab, halani domma ipaunduk dirini, lang saud ia iuhum Jahowa
8. Aha na ibahen si Ahab dob manangar panguhuman humbani Jahowa, janah aha do hasilni?
8 Dob itangar si Ahab panguhuman ni Jahowa hu bani, “irigati ma hiouni, anjaha isorungkon ma hiou guni, anjaha marunduk ni uhur ia mardalan”. Ipaunduk si Ahab do dirini! Aha do hasilni? Nini Jahowa ma bani si Elias, “Halani na pinaundukni ai dirini i lobei-Hu, seng be parohon-Ku 1 Raj. 21:27-29; 2 Raj. 10:10, 11, 17) Halani Jahowa, “siuji uhur”, na mambotoh sonaha paruhuran ni jolma, ipataridah ma holong ni atei bani si Ahab.
PARLINGGOMAN DO TORUH NI UHUR
9. Mase martoruh ni uhur gabe parlinggoman bani kaluarga ampa hasoman ni si Nabot?
9 Dob itangar kaluarga ampa hasoman ni si Nabot anggo kaluarga ni si Ahab lang saud iuhum paima matei ia, iuji do ra haporsayaon ni sidea bani Naibata. Tapi parlinggoman do anggo martoruh ni uhur sidea. Mase? Anggo sidea martoruh ni uhur, tongtong ma sidea manombah Jahowa, janah porsaya pintor do haganup pambahenan-Ni. (Basa 5 Musa 32:3, 4.) Bani ari parpuhoon, jumpah ma si Nabot pakon kaluargani na ihaholongi. On ma upah na gokan dear bani sidea. (Job 14:14, 15; Joh. 5:28, 29) Halak na martoruh ni uhur mambotoh “boanon ni Naibata do sagala pambahenan hu paruhuman, haganup na ponop, na dear atap na sambor pe ai”. (Par. 12:14) Ibotoh Jahowa do aha na lang ibotoh hita. Gabe parlinggoman do anggo hita martoruh ni uhur, halani ai boi patoguhkon haporsayaonta.
Gabe parlinggoman do anggo hita martoruh ni uhur
10, 11. (a) Bani situasi na sonaha do pangahapta pasal hapintoron iuji? (b) Sonaha do toruh ni uhur gabe parlinggoman hubanta?
10 Sonaha pangahapta anggo adong sintua na mambahen haputusan na lang iarusi atap na lang iharosuhkon hita? Umpamani, aha do bahenonmu anggo ham atap hasomanmu lang be ibere tugas i kuria? Sonaha pangahapmu bani haputusan ni sintua anggo hasoman goluhmu, hasoman, atap niombahmu ipabali hun kuria? Aha do bahenonmu anggo lang satuju bani sintua na pataridahkon holong ni atei bani sasada halak na mambahen dousa? Bani situasi on, taridah ma porsaya do hita atap lang bani Jahowa pakon cara-Ni mangorganisasi kuria sonari on. Sonaha do toruh ni uhur gabe parlinggoman sanggah masa sisonai hubanta? Ulas hita ma dua cara.
Aha do bahenonmu anggo adong sintua padaskon tugah-tugah na lang iharosuhkon nasiam? (Idah paragrap 10, 11)
11 Na parlobei, anggo toruh maruhur, iakui hita ma lang ganupan na ibotoh hita. Porini pe ibotoh hita, pitah Jahowa do na mambotoh paruhuran ni jolma. (1 Sam. 16:7) Anggo idingat hita on, ibotoh hita ma adong do hahuranganta anjaha porlu do hita mangihutkon pingkiran ni Jahowa. Na paduahon, sanggah hita mangidah atap mangahapkon pambahenan na so pintor, toruh ni uhur boi mangurupi hita ase unduk janah sabar paimahon Jahowa laho pasaloseihon ai. Bibel mangkatahon, “Martuah do halak si habiari Naibata.” Janah ihatahon use, “Tapi seng anjai dear anggo halak parjahat, anjaha seng tarpaganjangsi umurni.” (Par. 8:12, 13) Anggo martoruh ni uhur hita, marguna do ai bani hasomanta na legan.
MARSIPAKULAH-KULAH I KURIA
12. Aha do na laho iulas hita, janah mase?
12 Bani abad na parlobei, toruh ni uhur halak Kristen i Antiokia Siria iuji sanggah sidea ra do atap lang manasap hasalahan hasomanni. Ulas hita ma contoh ai, laho mamareksa aha do bahenonta sanggah dong na mambahen hasalahan. Jahowa totap do mandalankon aturan-Ni hassi pe Ia manggunahon jolma na lang gokan dear.
13, 14. Tugas aha do na ibere bani si Petrus, janah sonaha ia pataridahkon na pangkar do ia?
13 Bani abad na parlobei, itanda halak Kristen do apostel Petrus, ai ma sahalak sintua. Hasoman ni Jesus do ia janah ibere do tugas na ponting bani. (Mat. 16:19) Umpamani, tahun 36 M isuruh do ia marbarita hubani si Kornelius pakon kaluargani. Mase ai sada hak istimewa? Halani si Kornelius sedo halak Jahudi na marsunat. Sanggah ijalo si Kornelius pakon ganup halak na i rumahni tonduy na pansing, iarusi si Petrus ma anggo sidea boi ididi gabe halak Kristen. Nini ma, “Ai pag ma diri mamandang didion halak on, na dob manjalo Tonduy Na Pansing songon hita?”
14 Bani tahun 49 M, martumpu do sintua-sintua i Jerusalem laho mangulas porlu do atap lang halak Kristen na lang Jahudi isunat. Bani panorang ai, pangkar do si Petrus mangkatahon anggo ia sandiri mangidah halak na lang marsunat manjalo tonduy na pansing. Ai do na mangurupi pangurus pusat mambahen haputusan. (Lah. 15:6-11, 13, 14, 28, 29) Halak Jahudi atap lang, malas do uhur ni sidea halani pangkar si Petrus patugahkon ai. Urah ma sidea porsaya bani si Petrus na setia janah toras partonduyonni!
15. Hasalahan aha do na ibahen si Petrus i Antiokia Siria? (Idah gambar bani alaman 21.)
15 Lang piga dokah dobkonsi panorang ai, roh ma use si Petrus hu Antiokia Siria. Ijai, marsaor ma ia pakon saninani na lang marsunat. Malas tumang uhur ni sidea halani boi marlajar humbani pangalaman ni si Petrus. Tapi sompong lang ra be si Petrus mangan pakon sidea. Dihut homa halak Kristen Jahudi na legan, ampa si Barnabas mambahen sisonai. Tontu tarsonggot janah borit ma uhur ni sidea. Mase boi sintua mambahen hasalahan sisonai, na boi mamocah i kuria? Na siporlunan, aha do na boi iparlajari hita humbani hasalahan ni si Petrus, anggo adong sintua na mambahen borit uhurta?
Sonaha do pangahap ni halak na lang marsunat ai mangidah pambahenan ni si Petrus?
16. Sonaha do si Petrus ipasingat, janah sungkun-sungkun aha do na tarpingkirhon hita?
16 Basa Galatia 2:11-14. Biar do si Petrus bani jolma. (Pod. 29:25) Ibotoh si Petrus do anggo Jahowa marosuh bani halak na lang marsunat. Tapi mabiar do ia bani halak Jahudi na mangahap lang suman marsaor pakon halak na lang marsunat. Ihatahon si Paulus do anggo si Petrus domma marsipakulah-kulah. Mase? Halani itangar si Paulus do bani tahun 49 M, si Petrus do na mambela halak Kristen na lang marsunat i Jerusalem. (Lah. 15:12) Sonaha do pangahap ni halak na lang marsunat ai mangidah parlahou ni si Petrus? Ai tartolsu do sidea? Ai lang be mandapot tugas si Petrus halani hasalahan ai?
MANASAP HASALAHAN
17. Aha do gunani bani si Petrus halani Jahowa ra manasap hasalahanni?
17 Toruh maruhur do si Petrus janah ijalo ma sipasingat humbani si Paulus. Lang adong ihatahon Bibel anggo si Petrus lang be ibere tugas. Isuratkon si Petrus do dua buku na gabe bagian hun Bibel. Bani suratni na paduahon, ihatahon si Petrus do anggo si Paulus “hasoman haholonganta”. (2 Ptr. 3:15) Tontu borit ma uhurni halak na lang marsunat ai halani pambahenan ni si Petrus. Age pe sonai totap do ia igunahon Jesus. (Ep. 1:22) Ganup sanina i kuria boi do mangusihi Jesus ampa Bapani na ra manasap hasalahan si Petrus. Andohar ma lang adong na tartolsu halani hahurangan ni si Petrus ai.
18. Attigan do hita porlu mangusihi hapintoron ni Jahowa?
18 Humbani abad na parlobei ronsi sonari, lang adong sintua na gokan dear i kuria. Bibel mangkatahon, “Ganup hita gati marsalah.” (Jak. 3:2) Urah do mangkatahon ai. Tapi sonaha anggo adong saninanta na mambahen na so pintor hubanta? Ai ra do hita mangusihi hapintoron ni Jahowa? Umpamani, sonaha do pangahap ni nasiam anggo dong sintua na mangkatahon pandapot na lepak pasal sasada halak? Ai ra do nasiam tartolsu sanggah adong parsahap ni sintua na mambahen borit uhurmu? Marimbangkon mintor manguhumi sanina ai lang sosok gabe sintua, ai sabar do nasiam paimahon Jesus, kopala ni kuria? Marimbangkon lalab mardingat hasalahanni, ra do nasiam mardingat hatengeran ni uhurni martahun-tahun mangidangi i kuria? Anggo sanina ai totap mangidangi gabe sintua, janah manjalo lambin bahat tugas, ai malas do uhur ni nasiam? Anggo ra nasiam manasap hasalahan, dos do ai nasiam mangusihi hapintoron ni Jahowa.
19. Aha do na sihol bahenonta?
19 Halani holong do hita bani hapintoron, sihol do hita paimahon sanggah Jahowa manasap ganup hagedukan na ibahen Sibolis ampa duniani. (Jes. 65:17) Sanggah mangahapkon na so pintor, eta ma hita martoruh ni uhur mangakui anggo hita lang mambotoh haganupan janah ra manasap hasalahan ni hasomanta. Anggo sonai ibahen hita doskon na mangusihi hapintoron ni Jahowa do ai.