1. Sonaha si Abraham pataridahkon anggo ia porsaya bani hapintoron ni Jahowa? (Idah gambar i atas.)

“MINTOR lang ma pintor Panguhum, siuhumi ganup dunia on?” (1 Mus. 18:25) Sedo halani sangsi si Abraham ase isungkun sonai. Tapi na porsaya tumang do ia anggo Jahowa, pintor do laho manguhum huta Sodom pakon Gomora. Porsaya do ia anggo Jahowa seng ongga “mamunuh parpintor rap pakon parjahat”. Ninuhur ni si Abraham “daoh ma” ai. Pasal diri-Ni, Jahowa sandiri mangkatahon, “Batu gingging in, laing do pambahen-Ni, ai pintor do ganup dalan-Ni; sada Naibata hatengeran ni uhur anjaha seng dong hagedukan-Ni, pintor anjaha bonar do Ia.”—5 Mus. 31:19; 32:4.

2. Mase daoh humbani Jahowa laho mangkorjahon na so pintor?

² Mase si Abraham porsaya na pintor do ganup pambahenan ni Jahowa? Halani Jahowa do siusihan na sidearan na pataridahkon hapintoron. Sasintongni hata  “hapintoron” ampa “uhum” gati do rap igunahon bani Padan na Basaia, halani dos do artini ai. Halani pintor do aturan ni Jahowa, tontu tongtong do ibagas hapintoron Ia manguhumi. Bibel mangkatahon, “Holong do uhur-Ni bani hapintoron ampa uhum.”—Ps. 33:5.

3. Bere ma contoh na pataridahkon pambahenan na so pintor i dunia on.

³ Tarapoh do uhurta halani mambotoh pintor do Jahowa ai. Tapi, bahatan do na so pintor i dunia on. Umpamani, adong do sasada halak na dob ipenjarahon martahun-tahun, hape marhitei tes DNA ibotoh ma anggo ia lang marsalah. Bahat do pambahenan na so pintor mambahen halak gabe mandolei janah marah. Tapi, dong do parlahou na so pintor na mambahen hita sunsah tumang manaron ai. Aha ma ai?

4. Sonaha do haporsayaon ni sasada halak boi iuji?

⁴ Domma somal pambahenan na so pintor i luar ni kuria ni Kristen. Tapi iuji do haporsayaonta sanggah adong pambahenan na so pintor ibagas kuria. Anggo sonai na masa, sonaha do pangahapmu? Gabe tartolsu do nasiam?

5. Mase lang tarsonggot hita anggo adong pambahenan na so pintor i kuria?

⁵ Haganup hita lang gokan dear janah boi mambahen na lepak. Jadi, ra do sipata adong halak na mambahen na so pintor hubanta, atap hita na mambahen na so pintor bani halak i kuria. (1 Joh. 1:8) Hassi pe jarang do on tarjadi, ulang ma tarsonggot atap gabe tartolsu hita halani ai. Ibere Jahowa do hubanta podah hun Bibel na mangurupi hita ase totap setia anggo adong saninanta na mambahen na so pintor hubanta.—Ps. 55:13-15.

6, 7. Pambahenan na so pintor aha do na ibahen bani sada sanina i kuria, janah aha do na ibahenni ase totap martahan?

⁶ Pardiateihon ma aha na masa bani si Willi Diehl. Tahun 1931, mangidangi ma ia i Betel i Bern, Swiss. Tahun 1946, dihut ma ia bani Sikolah Gilead kalas na paualuhkon i New York, A.S. Dob lulus, gabe sintua kaliling ma ia i Swiss. Sanggah sihol marhajabuan Sanina Diehl, ipadas ma ai hu kantor cabang bani bulan Mei 1949. Hape piga-piga sanina na martanggung jawab ijai mangkatahon anggo ia seng boi be mandapot bagian ibagas kuria sobali marintis. “Seng boi be ahu padaskon ambilan,” nini Sanina Diehl. “Dokah do hanami lang isisei, ibahen songon halak na ipabali hun kuria.”

⁷ Aha do na ibahen Sanina Diehl? Ia mangkatahon, “Ibotoh hanami lang manlanggar titah ni Naibata anggo marhajabuan. Jadi, martonggo janah martenger ni uhur do hanami bani Jahowa.” Hassi pe ijia lape iarusi piga-piga sanina pangahap ni Naibata pasal parhajabuan, tapi bani panorangni ipapintor Jahowa do holi ai. Ujungni, ai ma na tarjadi. Ibere ma use tugas bani Sanina Diehl.  Ipasu-pasu Jahowa do hatengeran ni uhurni. * (Idah surat partoruh.) Sungkun ma dirinta: ‘Anggo adong na mambahen na so pintor hubangku, ai sabar do ahu paimahon Jahowa padearhon ai? Atap marpangunsandeian bani diringku do ahu?’—Pod. 11:2; basa Mika 7:7.

8. Mase sipata salah do ra pingkiranta anggo iagan hita adong na mambahen na so pintor?

⁸ Anggo adong pangahapta na mambahen na so pintor i kuria, dingat ma lepak do ra pangahapta ai. Mase? Halani hita lang gokan dear sipata salah sangka do hita. Lang iarusi hita sonaha do sasintongni. Tapi, lang soal salah atap na tongon do pangarusionta ai, maningon do hita manonggohon ai bani Jahowa anjaha marpangunsandeian hu Bani. Ai do na mangurupi hita ase ulang ‘marungut-ungut uhurta dompak Jahowa’.—Basa Podah 19:3.

9. Contoh aha do na laho iulas hita bani artikel on pakon na mangihut?

⁹ Eta parlajari hita tolu contoh humbani juakjuak ni Naibata na basaia, na mangahapkon pambahenan na so pintor. Bani artikel on, iulas hita do pangalaman ni si Josep, pahompu ni si Abraham. Bani artikel na mangihut iulas hita ma aha na ibahen Jahowa bani Raja Ahab ampa apostel Petrus i Antiokhia Siria. Sanggah mangulas contoh ai, pingkirhon ma aha na boi ibahen hita ase totap manjaga parhasomananta pakon Jahowa, tarlobih ma ai sanggah dong na mambahen na so pintor hubanta.

10, 11. (a) Pambahenan na so pintor aha do na iahapkon si Josep? (b) Aha do na masa sanggah si Josep i penjara?

¹⁰ Ongga do pambahenan na so pintor ibahen halak na so tinanda bani si Josep. Tapi, boritan do uhurni sanggah saninani sandiri na mambahen ai hu bani. Sanggah marumur 17 tahun ia, itangkap saninani do ia, janah ijual gabe jabolon. Dob ai iboan ma ia hu Masir. (1 Mus. 37:23-28; 42:21) Ijai, ituduh do si Josep laho pasedahon parinangon ni halak, lanjar ipenjarahon do ia. (1 Mus. 39:17-20) Marsik tumang pangahapni halani ipenjarahon sadokah 13 tahun. Anggo adong na mambahen na so pintor hubanta, parlajaran aha do humbani si Josep na boi mangurupi hita?

¹¹ Sanggah i penjara si Josep, masuk penjara do homa kopala sitahu  anggur. Bani sada borngin marnipi ma sitahu anggur ai. Dob ai iurupi Jahowa ma si Josep mangartihon nipini ai. Ipatorang ma anggo nipi ai mangartihon sitahu anggur ipaluah do holi hun penjara janah boi use mangidangi si Parao. Dob ai ipatugah si Josep ma sonaha situasini bani sitahu anggur ai. Adong do na boi iparlajari hita humbani aha na ihatahon si Josep ampa na lang ihatahonni.—1 Mus. 40:5-13.

12, 13. (a) Ai sip hansa si Josep sanggah dong na mambahen na so pintor hu bani? Patorang. (b) Aha do na lang ipatugah si Josep bani sitahu anggur?

¹² Basa 1 Musa 40:14, 15. Ihatahon si Josep do anggo ia na “tarpangus”. Hata on gati mangartihon “itangkap”. Ijon taridah do, adong na mambahen na so pintor hu bani. Dob ai ipatugah si Josep do homa, anggo ia masuk hu penjara sedo halani na marsalah. Halani ai isuruh si Josep ma sitahu anggur ai laho padaskon hubani si Parao. Ase sonaha? Nini si Josep, “Ase ipadarat ahu hun rumah on.”

¹³ Ai sip hansa si Josep sanggah ibahen na so pintor hu bani? Lang! Ibotoh si Josep do bahat pambahenan na so pintor ibahen hu bani. Halani ai, ipatugahni ma situasi ai bani sitahu  anggur, ase ia iurupi. Tapi Bibel lang mangkatahon anggo si Josep patugahkon bani halak na legan atap pe bani si Parao, saninani do na manangkap ia. Sanggah roh ganup sanina ni si Josep, mardamei ma halak ai, janah dear do ialo-alo si Parao sidea i Masir. Dob ai ibere si Parao ma na “sidearan i sab tanoh ai” bani sidea.—1 Mus. 45:16-20.

14. Aha do na boi mangurupi hita ase ulang hertep marsahap sanggah adong na mambahen na so pintor hubanta i kuria?

¹⁴ Anggo iahap hita adong pambahenan na so pintor i kuria, maningon jaga do hita ase ulang hertep marsahap bani na legan. Tongon, anggo adong na mambahen dousa, maningon ipatugah do ai bani sintua. (3 Mus. 5:1) Tapi, somalni masalah pakon sanina boi ipasalosei marhitei mardamei pakon sidea, jadi ulang mintor ipatugah bani na legan atap pe bani sintua. (Basa Mateus 5:23, 24; 18:15.) Dalankon ma prinsip ni Bibel anggo ai na masa. Sipata domma salah sangka hita. Iagan hita na so pintor do na ibahen, hape lang sonai sasintongni. Janah malas ma uhurta halani lang hertep padaskon hata na mambahen rarat masalah ai! Dingat ma, lang soal hita na sintong atap na lepak, anggo maherteptu hita marsahap, lambin parah do situasi ai. Anggo setia hita bani Jahowa ampa saninanta, on boi mangurupi hita ase ulang mambahen sisonai. Isuratkon do bani psalmen anggo halak “na so panurakon bani parlahouni” ai ma halak “na so manrisai marhitei dilahni, na so mangkorjahon na jahat dompak hasomanni.”—Ps. 15:2, 3; Jak. 3:5.

15. Sonaha do parhasomanan ni si Josep dompak Jahowa ipasu-pasu?

¹⁵ Hita pe boi mandapot parlajaran na ponting humbani si Josep. Sadokah 13 tahun manaron na so pintor, totap do ia porsaya bani Jahowa. (1 Mus. 45:5-8) Lang ongga ia marungut-ungut bani Jahowa. Tontu lang urah si Josep manlupahon hagedukon ai. Tapi lang pusok uhurni halani ai. Na siporlunan, lang ra ia gabe daoh humbani Jahowa halani pambahenan ni halak na so pintor. Halani setia si Josep, boi ia mangidah sonaha Jahowa padearhon situasini janah ipasu-pasu Jahowa do ia pakon kaluargani.

16. Mase porlu dohor hita bani Jahowa sanggah adong pambahenan na so pintor?

¹⁶ Hita pe porlu mangkargai parhasomananta dompak Jahowa. Ulang halani pambahenan na so pintor  humbani saninanta mambahen sirang hita humbani holong ni Naibata. (Rom 8:38, 39) Tapi sanggah adong na mambahen na so pintor hubanta i kuria, eta usihi hita ma si Josep janah lambin dohor hubani Jahowa. Dalankon ma harosuh-Ni. Anggo domma idalankon hita podah hun Bibel, ondoskon hita ma parsoalan ai bani Jahowa. Porsaya ma hita padearon-Ni do ganup na so pintor bani panorangni.

17. Aha na ibahen hita anggo porsaya bani “siuhumi ganup dunia on”?

¹⁷ Bani dunia na jahat on, bahat do na mambahen na so pintor. Sipata i kuria adong na mambahen na so pintor hubani nasiam atap pe halak na itanda nasiam. Tapi, ulang halani ai gabe tartolsu. (Ps. 119:165) Totap ma setia bani Jahowa, martonggo, anjaha marpangunsandeian hu Bani. Dingat ma, lepak do ra hita halani lang mangarusi na sasintongni. Tiru hita ma si Josep janah ulang maherteptu marsahap, halani lambin parah do situasini anggo sonai hita. Marimbangkon marpangunsandeian bani diri sandiri, dearan ma anggo hita totap setia janah sabar paimahon Jahowa laho pasaloseihon ai. On pamalaskon uhur-Ni janah ipasu-pasu Jahowa ma hita songon si Josep. Pos ma uhur ni nasiam, “siuhumi ganup dunia on” do Jahowa anjaha tongtong do Ia mangkorjahon na pintor halani “pintor do ganup dalan-Ni”.— 1 Mus. 18:25; 5 Mus. 32:4.

18. Aha do na laho iulas hita bani artikel na mangihut?

¹⁸ Bani artikel na mangihut, ulas hita ma dua contoh pambahenan na so pintor bani juakjuak ni Naibata na basaia. Humbani contoh ai, iurupi do hita mangusihi hapintoron ni Jahowa marhitei pataridahkon toruh ni uhur ampa ra manasap hasalahan.