MASE manggila bapa hubangku? Husaritahon ma lobei sonaha do hagoluhanku. Ahu tubuh tanggal 29 Juli 1929 janah ahu tading bani sada huta i provinsi Bulacan, Filipina. Hutanami on i bagas-bagas janah miskin. Sanggah etek ope ahu roh ma tentara ni halak Japang mamorangi Filipina. Tapi halani parhuta bagas do hanami, lang das porang ai hu hutanami. Ijai lang adong radio, TV, atap pe koran. Jadi humbani sarita ni halak dassa itangar hanami pasal porang ai.

Ahu anak paduahon humbani ualuh na marsanina, ompat dalahi pakon ompat naboru. Sanggah ahu marumur ualuh tahun, i rumah ni ompung ma ahu tading. Hassi pe i Katolik do ompungku margareja, tapi marosuh do ia manjalo basaan pasal Bibel humbani hasomanni. Ongga do ipatuduh ompung bangku basaan pakon Bibel ibagas sahap Tagalog. Basaan ai patuduhkon aha do ajaran na ladung ai. Ahu pe marosuh do homa mambasa Bibel, tarlobih bani buku Mateus ronsi Johannes. Ai ma na mangojur ahu sihol mangirikkon Jesus.​—Joh. 10:27.

Bani tahun 1945, kaluar ma tentara ni Japang humbani Filipina. Isuruh bapa ma ahu ase mulak hu rumah. Anjaha ipaturut ompung do homa ahu mulak. Halani ai mulak ma ahu.

Bani bulan Desember 1945, roh ma Saksi-Saksi Jahowa hun Angat hu hutanami. Dong sahalak saksi na dob matua roh hu rumah janah patorangkon pasal “panorang parpudi.” (2 Tim. 3:1-5) Dob ai iontangni ma hanami ase marlajar Bibel i sada huta na dohor hun hutanami. Jadi laho ma ahu hujai hassi pe namatorasku lang dihut. Ijai adong 20 halak hanami na roh. Dong piga-piga na manungkun pasal ajaran ni Bibel.

Lang sai huarusi aha na iulas sidea. Halani ai, sihol mulak ma ahu. Tapi dobkonsi idodingkon sidea doding harajaon gabe marosuh tumang ma ahu. Gabe lang saud be ahu mulak. Dob salosei mandoding ampa martonggo, iontang ma use hanami hu  Angat ase roh martumpu bani ari Minggu na laho roh.

Partumpuan ai ibahen i rumah ni sanina Cruz. Dong na mardalan nahei hira-hira ualuh kilometer hujai. Adong 50 halak na roh. Lang boi hulupahon ai, halani hudidah dakdanak ijai boi mambalosi sungkun-sungkun pasal Bibel. Dob piga-piga hali ahu martumpu, iontang sanina Damian Santos ma ahu hu rumahni marborngin. Sahalak sintua janah parintis do sanina ai. Jadi marbuali ma hanami pasal Bibel ronsi sogod ni ari.

Hinan, anggo sasada halak domma mangarusi ajaran dasar hun Bibel, boi ma ia ididi. Jadi dobkonsi piga-piga hali ahu martumpu, isungkun sanina-botou ma ahu, “Ai ra do ham ididi?” Huhatahon ma, “Eak, ra ma ge.” Sihol do uhurhu laho mangirikkon “Kristus”. (Kol. 3:24) Laho ma hanami hu sada bah dohorhon ianannami martumpu. Ijai ma ahu pakon sahalak nari ididi bani tanggal 15 Februari 1946.

Hubotoh do anggo domma ididi, maningon tongtong do ahu marbarita songon Jesus. Tapi ihatahon bapa, maposotu ope ahu laho marbarita, janah lang maningon marbarita hassi pe domma ididi. Tapi huhatahon ma bani bapa anggo ahu sihol mandalankon parentah ni Naibata. Marosuh do Jahowa ase hita marbarita. (Mat. 24:14) Anjaha ahu pe sihol pasaudkon janjingku bani Naibata. Halani ai ma manggila bapa songon na husaritahon nongkan. Lalab do ia manlanglangi ahu marbarita. Jadi laho ma ahu hun rumah. On ma parlobei sahali hutadingkon haganupan ase boi mangidangi Jahowa.

Tapi iontang sanina Cruz ma ahu ase tading i rumahni i Angat. Iojurni ma ahu pakon si Nora, ai ma boruni sianggian ase marintis. Jadi bani tanggal 1 November 1947, marintis ma hanami haduasi. Anggo si Nora pindah do ia hu kota na legan. Tapi ahu totap do i Angat.

Dobkonsi dua tahun ahu marintis, roh ma sanina Earl Stewart hun Betel, sihol padaskon ambilan hubani lobih 500 halak. Ia marambilan bani sahap Inggris anjaha huterjemahkon ma ambilanni ai bani sahap Tagalog. On ma na parlobei sahali ahu manerjemahkon humbani bahat ambilan na huterjemahkon sadokah martahun-tahun. Mase ma boi huarusi sahap Inggris, hassi pe pitu tahun dassa ahu marsikolah? Halani guru-gurungku gati do marsahap Inggris. Anjaha halani otik dassa publikasinta bani sahap Tagalog, jadi hubasa ma publikasinta bani sahap Inggris. Ai ma na mangurupi ahu boi mangarusi sahap Inggris.

Ipatugah sanina Stewart ma bani kuria-kuria, anggo missionaris sihol hu New York, AS laho  mandihuti kebaktian Pertambahan Teokratis bani tahun 1950. Halani ai ipindo kantor cabang ma ase adong sada atap dua parintis na ra mangurupi i Betel. Ahu ma sada na ipilih. Sahali nari, hutadingkon ma haganupan, sanina-botou ampa iananku, ase boi mangidangi i Betel.

Bani tanggal 19 Juni 1950, mulai ma ahu marhorja i Betel. Bangunan ni Betel ai, domma dokah anjaha bahat do hayu na banggal ijai. Bolagni adong do hira-hira sahektar. Dong do hira-hira 12 halak sanina na lape mompo na marhorja ijai. Bani sogod ni ari, i dapur ma ahu marhorja. Hira-hira jam 9, manggosok ma ahu. Sonai ma horjangku bani sadari ai. Hassi pe domma mulak missionaris nongkan hun kebaktian internasional, tapi ahu totap do i Betel. Huhorjahon do ganupan na itugaskon hubangku. Umpamani, mangkarduskon basaan, mangurus basaan na ipindo kuria, atap pe manjaga lobi.

Bani tahun 1952, adong do hanami pitu halak dalahi hun Filipina na iontang hu Sikolah Gilead na paduapuluhkon. Malas tumang do uhurhu! Sanggah hanami i Amerika Serikat, bahat tumang do na baru na ididah hanami. Legan do ijai pakon i hutangku hinan.

Umpamani, maningon iparlajari hanami ma cara manggunahon alat elektronik, atap pe barang na lang ongga ididah hanami. Ongga do bani sogod ni ari, sanggah ahu puho, huidah ma i darat domma lopak haganup. On ma parlobei sahali ahu mangidah salju. Jenges tumang. Tapi mintor mangilu tumang ma huahap!

Hassi pe bahat parubahan na maningon ibahen hanami, tapi lang mahua pangahapku. Halani, malas tumang do uhurhu bani sikolah Gilead ai. Bujur do sanina-sanina na mangajari hanami ijon. Iajari do hanami sonaha marlajar na dear atap pe carani mangindahi hatorangan hun publikasinta. Sikolah Gilead on mangurupi ahu ase lambin orot parhasomananku pakon Jahowa.

Dobkonsi salosei sikolah Gilead ai, itugaskon ma ahu gabe parintis istimewa i Bronx, New York. Bani bulan Juli 1953, dihut ma ahu hu Kebaktian Masyarakat Dunia Baru, i Bronx. Dobkonsi ai, itugaskon ma use ahu hu Filipina.

Itugaskon Kantor Cabang ma ahu jadi pengawas kaliling i pulou Luzon tengah, ai ma pulou sibanggalan i Filipina. Marhitei tugas on boi ma huarusi sonaha pangidangion ni Jesus hinan, laho hu huta-huta bagas pakon kota ase mangurupi juakjuak ni Naibata. (1 Ptr. 2:21) I pulou ai, iananku  mangidangi ai ma, i provinsi Bulacan, Nueva Ecija, Tarlac, pakon Zambales. Sipata anggo sihol laho hu sada huta, maningon montas ma ahu hun dolog-dolog Sierra Madre. Anjaha i ianan ai lang dong bus atap pe kereta api. Jadi anggo dong truk na montas ai ma na huambat, janah pitah iatas ni truk ai dassa ahu ibere. Jadi sunsah tumang do pangahapku.

Bahat do kuria-kuria na hurohi, ai ma kuria na baru anjaha etek. Jadi malas tumang ma uhur ni sidea sanggah huurupi sidea laho mambobahon partumpuan pakon sonaha do carani mangidangi.

Dob ai itugaskon ma ahu hu Bicol. Ijai dong do piga-piga kalompok na i huta-huta bagas. Parintis istimewa na ijai itugaskon bani ianan na lape ongga irohi Saksi Jahowa. Bani sada rumah, WC-ni pitah sada lubang na ihurak i tanoh, i atasni ibahen dua hayu gabe sidogei-dogeian. Jadi sanggah ahu iatas ni hayu ai, mintor maponggol ma hayu ai. Gabe madabuh ma ahu hubagas lubang ai. Jadi maningon dokah ma ahu paborsihkon angkulangku.

Jadi sanggah ahu mangidangi ijai, si Nora pe mangidangi homa i Dumaguete City. Jadi mulai taringat ma ahu hubani, halani ondi ai rap do hanami mulai marintis. Hujumpahi ma ia, janah markirim-kirim surat ma hanami. Anjaha tahun 1956, marhajabuan ma hanami. Dobkonsi saminggu, mintor mangidangi ma hanami hu Pulou Rapu Rapu. Ijai maningon mamontasi dolog ma hanami anjaha daoh tumang mardalan nahei sanggah mangidangi. Tapi totap do malas uhurnami halani boi mangurupi sanina-botou na ijai.

Dobkonsi hira-hira ompat tahun hanami mangidangi, itugaskon ma use hanami hu Kantor Cabang bani Januari 1960. Sadokah hanami i Betel bahat tumang do parlajaran na hudapot hun sanina-sanina na dong tanggung jawabni i Betel. Anjaha si Nora pe margantih-gantih do tugasni, tapi totap do malas uhurni marhorja i Betel.

Huidah do sonaha Jahowa mamasu-masu horja parambilanon i Filipina. Hudingat ope sanggah parlobei sahali ahu mangidangi i Betel, hira-hira 10.000 dassa parbarita i Filipina. Tapi sonari, domma dong lobih 200.000 saksi Jahowa ijon. Anjaha dong marratus sanina-botou na mangurupi horja parambilanon i Betel.

Lambin dokah lambin bahat ma horja ijon, jadi porlu ma dong kantor cabang na lobih banggal. Halani ai, ihatahon Pangurus Pusat ma ase hanami pajongjongkon kantor cabang na baru. Jadi, ahu pakon pangawas percetakan mangindahi ianan na dohor hun Betel. Ijai bahat do halak Tionghoa. Isungkun hanami ma sidea, ai adong do halak na ijon na ra manjual tanohni? Tapi lang dong na ra. Anjaha dong sada na mangkatahon, “Anggo halak Tionghoa lang ra manjual, tapi pitah mamboli dassa.”

Tapi lang isangka-sangka hanami, dong ma sada halak na dohor hun Betel ra manjual tanohni, halani sihol pindah ia hu Amerika Serikat. Dob ai dong homa na legan ra manjual tanohni. Anjaha iojurni homa simbalogni ase manjual tanohni hu bannami. Janah halak na mangkatahon “Anggo halak Tionghoa lang ra manjual”, ia pe dihut do homa manjual tanohni. Gabe boi ma hanami pajongjongkon kantor cabang, anjaha tolu hali lompit do banggalni humbani kantor na hinan. Tontu halani Jahowa do on boi saud.

Hinan bani tahun 1950, ahu do siposonan na marhorja i Betel. Tapi sonari hanami ma situanan ijon. Lang ongga ahu manosal manadingkon haganup laho mangirikkon Jesus. Hassi pe iusir namatorasku ahu hun rumah, tapi bahat do sanina-botou na mangkaholongi ahu, anjaha sidea ma na gabe kaluargangku sonari. Anggo ra hita mangkorjahon aha pe na itugaskon Jahowa hu banta, ibere-Ni do haganupan haporluanta. Anjaha martarima kasih do hanami bani Jahowa halani ganupan pasu-pasu-Ni ai. Hanami pe mangojur nasiam ase ra manguji Jahowa.​—Mal. 3:10.

Ongga do iarahkon Jesus sahalak sijalo pajak na margoran si Mateus laho mangirikkonsi. Aha ma na ibahen si Mateus? ‘Itadingkon ma haganup, laho mangirikkonsi’. (Luk. 5:27, 28) Sonari on ahu pe marmalas ni uhur do halani domma manadingkon ganupan laho mangirikkon Jesus. Anjaha huojur ma nasiam ase mambahen sisonai.