1. Mase sasada halak porlu ididi?

TIAP tahun, dong do marribu halak na ididi. Bahat do humbani sidea na poso ope anjaha dong homa na dakdanak. Sidea domma marlajar humbani na etek. Ai sonai do homa hanima? Anggo nai do, dear ma ai. Haganup halak Kristen maningon do ididi ase boi maluah anjaha manggoluh sadokah ni dokahni.​—Mat. 28:19, 20; 1 Ptr. 3:21.

2. Mase ulang pala mabiar hanima mambahen janji bani Jahowa?

² Anggo hanima domma ididi, pasu-pasuon ni Jahowa ma hanima. Tapi dong do tanggung jawabnima dobkonsi ididi. Idingat hanima do aha na isungkun parambilan bannima sanggah laho ididi? Isungkun do sonon, “Marhitei tobusan ni Jesus Kristus, domma marubah nasiam humbani dousa-dousa nasiam janah mangondoskon diri hubani Jahowa laho mandalankon harosuh-Ni?” Anjaha ibalosi hanima do “eak”. Ai patuduhkon anggo hanima  marjanji do laho mangkaholongi Jahowa janah mambahen Ia do na siporlunan ibagas goluhnima. Ai manosal do hanima mambahen janji ai? Tontu lang ongga hanima manosal. Mase? Halani anggo lang isombah hanima Jahowa, gabe mangihutkon harosuh ni Sibolis do hanima. Sibolis ai jahat do bani jolma. Anjaha marosuh do ia ase hanima lang manombah Jahowa janah lang mandapot hagoluhan sadokah ni dokahni.

3. Pandapotmu, pasu-pasu aha do na ijalo hanima halani mangidangi Jahowa?

³ Rimangi ma pasu-pasu aha do na idapot hanima halani domma marjanji laho mangidangi Jahowa janah ididi. Anjaha hanima pe boi ma mangkatahon, “Jahowa do mangkasomani ahu, seng mabiar ahu. Tor aha ma bahenon ni jolma bangku?” (Ps. 118:6) Tontu megah do uhurta halani boi mangidangi Jahowa janah ai pe boi mambahen Ia marmalas ni uhur.

4, 5. (a) Mase maningon hita sandiri do na mamilih laho mangidangi Jahowa? (b) Parsoalan aha do na boi roh hubanta?

⁴ Ulang iagan hanima anggo namatorasnima saksi Jahowa, hanima pe maningon gabe saksi Jahowa do. Tapi maningon hanima sandiri do na martanggung jawab mambahen haputusan laho mangidangi Jahowa. Mase? Halani lang ibotoh hita i lobei ni ari, aha na boi manguji haporsayaonta bani Jahowa. Umpamani, ra do domma ididi hanima sanggah dakdanak ope. Tapi dobkonsi remaja, ra do tambah masalahmu na legan, anjaha pamingkirionmu pe domma mubah. Sada botou na dob remaja mangkatahon, “Anggo dakdanak ra do lang mabiar ididi, hassi pe holi i parsikolahan, lang dapotan kue ulang tahun ia. Tapi dobkonsi remaja, ra do sasada halak gabe sihol mangkorjahon seks. Halani ai porlu tumang ma idingatni anggo mandalankon podah ni Naibata, ai do na sidearan.”

⁵ Lang pitah na maposo na adong parsoalanni. Hassi pe sasahalak ididi dobkonsi magodang, sai dong do lalap parsoalan ibagas goluh on. Umpamani, dong parsoalan ibagas partongah jabuan, adong panahit, anjaha sunsah mangindahi horja. Halani ai ma, lang soal hita na maposo pakon na matua, porlu do tongtong patoguhkon parhasomananta bani Jahowa.​—Jak. 1:12-14.

6. (a) Sanggah laho ididi, aha do janjinima bani Jahowa? (b) Aha do na boi iparlajari hanima humbani Pilippi 4:11-13?

⁶ Ase boi hanima tongtong marhasoman pakon Jahowa, dingat ma janjimu hu Bani. Marjanji do hanima laho mangidangi Jahowa lang soal aha pe na masa, hassi pe namatoras atap hasomanmu lang be mangidangi Jahowa. (Ps. 27:10) Halani ai, pindo ma pangurupion bani Jahowa ase boi mandalankon janjimu ai.​—Basa Pilippi 4:11-13.

7. Mase hita porlu manjaga parhasomananta pakon Jahowa?

⁷ Sihol do Jahowa ase hanima marhasoman pakon-Si. Tapi maningon ijaga hanima do parhasomananmu ai ase totap toguh. Mase? Halani bahat do na boi mambahen hita gabe manlembang. Sosok ma on songon na ihatahon bani  Pilippi 2:12, “Marhasoman biar pakon gobir ma haporluhon nasiam haluahon nasiam.” Jadi porlu ma ipingkirhon hanima aha na maningon bahenonmu ase totap marhasoman pakon Jahowa. Dingat ma gari juakjuak ni Naibata na dob martahun-tahun mangidangi Jahowa, ujungni dong do na manlembang. Halani ai, aha do na boi mangurupi hanima ase totap marhasoman pakon Jahowa janah mandapot haluahon?

8. Sonaha do hita boi manangihon Jahowa? Anjaha mase porlu ai?

⁸ Ase boi marhasoman pakon Jahowa, porlu do hita marsahap hu Bani anjaha manangihon hata-Ni. Sonaha do hanima boi manangihon hata ni Jahowa? Marhitei mambasa Bibel pakon publikasinta janah marimbagaskon ai. Tujuanta marlajar Bibel sedo na laho mangapal isini, songon anak sikolah na laho ujian. Tapi iparlajari hita Bibel ai, ase lambin bagas pangarusionta pasal Jahowa. Ai do na mambahen hita lambin dohor hu Bani, anjaha Ia pe lambin dohor hubanta.​—Jak. 4:8.

9. Bahan aha do na boi mangurupi hanima marlajar Bibel?

⁹ Bahat do bahan na ipasirsir organisasi na boi ipakei hanima laho marlajar Bibel. Umpamani bani situs jw.org, dong do seri na igoran “Menggali Isi Alkitab” i bagian “Anak Muda”. Bahan on patuduhkon banta sonaha  hita boi mangusihi juakjuak ni Naibata. Adong homa Panduan Belajar “Apa yang Sebenarnya Alkitab Ajarkan?” Bahan ai boi mangurupi hita patoguhkon haporsayaonta janah sonaha caranta boi patorangkon ajaran ni Bibel. Bani artikel “Kaum Muda Bertanya . . . Bagaimana Aku Bisa Menikmati Pembacaan Alkitab?” i Sedarlah! April 2009, patorangkon aha do na boi ibahen hita ase marosuh marlajar Bibel. Jadi porlu tumang do marlajar janah marimangi, ase boi totap marhasoman pakon Naibata.​—Basa Psalmen 119:105.

10. Mase halak Kristen porlu martonggo?

¹⁰ Jadi ase boi lambin orot parhasomananmu pakon Jahowa, porlu do hanima martonggo. Halani martonggo ai doskon marsahap do hita pakon Jahowa. Tapi, ulang ma ibahen hita tonggo ai pitah hasomalan dassa atap pe songon “jimat” na ipakei halak laho manlinggomi dirini. Jahowa marosuh do manangar tonggonta! (Basa Pilippi 4:6.) Halani ai, anggo dong parsoalanmu “ompaskon ma bani Jahowa holsoh ni uhurmu”. (Ps. 55:23) Bahat do sanina-botou na iurupi marhitei tonggo. Hanima pe boi do mangahapkon sisonai!

11. Mase hita maningon martarima kasih bani Jahowa?

¹¹ Tapi ulang ma sanggah dong parsoalan dassa hanima martonggo bani Jahowa. Dingat ma na ihatahon Bibel, “Gabe sipartarima kasih ma nasiam.” (Kol. 3:15) Anggo pitah parsoalan dassa na idingat hita, ra do hita gabe lupa bani pasu-pasu na ibere Jahowa hubanta. Jadi, tiap ari dingat ma siotikanni tolu pasu-pasu na ibere Naibata. Dob ai martarima kasih ma bani Naibata marhitei tonggo. Sada botou na margoran si Abigail na dob ididi sanggah marumur 12 tahun, mangkatahon, “Pitah bani Jahowa do hita talup mangkatahon tarima kasih. Jadi hatahon ma tarima kasih halani ganup pasu-pasu na dob ibere hubanta.” Ipatugahni homa, bahat do na boi idingatni ibagas sadari ai, na mambahen ia gabe martarimakasih bani Jahowa. *

12, 13. Adong do pangalamannima na patuduhkon anggo Jahowa mangurupi hanima, anjaha mase porlu irimangi hita pangurupion ni Jahowa hubanta?

¹² Si Daud domma bahat mangahapkon pangurupion humbani Jahowa. Halani ai ma ihatahon si Daud, “Dai anjaha tonggor nasiam ma dear ni layak ni Jahowa, martuah ma halak na martenger ni uhur Bani.” (Ps. 34:9) Marhitei ayat on, iarusi hita ma anggo hita maningon do mangahapkon pangurupion ni Jahowa. Sanggah i partumpuan, atap pe sanggah mambasa Bibel  pakon publikasi na legan, ididah hita ma sonaha Jahowa mangurupi halak na legan. Tapi ase toguh parhasomananmu pakon Jahowa, maningon iahapkon hanima ma sonaha Jahowa mangurupi hanima. Ai adong do pangalamanmu na patuduhkon anggo Jahowa mangurupi hanima?

¹³ Ganup halak Kristen domma mangahapkon bujur do Jahowa ai. Ia mangontang hita ase dohor hu Bani marhitei Anak-Ni. Jesus mangkatahon, ‘Ise pe lang na boi roh hu bangku, anggo seng Bapa in, na marsuruh Ahu, manogusi.’ (Joh. 6:44) Jadi ai iahapkon hanima do na dohor do Jahowa bamu janah Ia do na manogu hanima gabe juakjuak-Ni? Atap ninuhurmu do sonon, ‘Namatorasku do na itogu Jahowa gabe panombah-Ni, anggo ahu pitah mangihutkon dassa.’ Dingat ma sasintongni domma marhasoman hanima pakon Jahowa, sanggah hanima mambahen janji hu Bani janah ididi. Bibel mangkatahon, “Barang ise na mangkaholongi Naibata, ai do na tinanda ni Naibata.” (1 Kor. 8:3) Halani ai marmegah ni uhur ma halani boi gabe sisombah Jahowa.

14, 15. Pandapotmu, mase ma anggo hanima marbarita boi patoguhkon haporsayaonmu bani Jahowa?

¹⁴ Domma ididah hanima sonaha Jahowa mambahen hanima gabe pangkar, sanggah marbarita i sikkolah atap pe bani ianan na legan. Sipata sunsah do marbarita i sikolah. Halani ra do sidea mangejek hanima. Tarlobih sunsah do homa marbarita bani buei halak. Jadi aha do na boi mangurupi hanima?

¹⁵ Pingkirhon ma mase hanima porsaya bani ajaran ni Bibel. Anggo dong do panduan belajar i jw.org ibagas bahasamu, gunahon ma ai. Panduan ai boi mangurupi hanima laho mambotoh mase hanima porsaya bani ajaran ni Bibel, janah sonaha hanima boi patorangkon ai bani halak na legan. Anggo porsaya hanima bani ajaran ni Bibel janah domma mambotoh sonaha patorangkon ai, gabe tarojur ma hanima laho mambaritahon pasal Jahowa.​—Jer. 20:8, 9.

16. Aha do na mangurupi hanima ase pangkar marbarita?

¹⁶ Hassi pe domma ibotoh hanima sonaha patorangkon ajaran ni Bibel, sipata ra do hanima mabiar marbarita. Dong sada botou na marumur 18 tahun, janah domma ididi sanggah marumur 13 tahun. Ia mangkatahon, “Hubotoh do aha na huhaporsayai, tapi sunsah do patugahkon ai.” Jadi marusaha ma ia ase lang maila marsahap bani hasomanni. Nini do use, “Anggo hasomanku i sikkolah, lang maila sidea marsarita hubangku. Huahap maningon sonai do homa ahu. Jadi hupungkah ma marsarita bani sidea sonon, ‘Nantuari hanami marbarita, baru . . . ’ Dob ai hutoruskon ma use saritangku ai. Hassi pe lang mintor hupatugah  bani sidea pasal ajaran ni Bibel, sipata gabe sidea ma na manungkun hubangku sonaha do hita na marbarita. Gati ma sonai hubahen carani ase urah ahu marbarita bani sidea. Ai ma na mangurupi ahu gabe pangkar!”

17. Aha ope na boi mangurupi hanima ase pangkar marbarita bani na legan?

¹⁷ Anggo dear parlahounta bani halak na legan, sidea pe hormat janah mangkargai aha na ihaporsayai hita. Dong sada botou na margoran si Olivia, marumur 17 tahun janah domma ididi. Ia mangkatahon, “Mabiar do ahu anggo marsarita pasal Bibel bani hasomanku, ra iejek sidea ma holi ahu na bibelon.” Tapi marusaha ma ia ase ulang mabiar. Janah idingatni use, “Sasintongni bahat hasomanku i sikkolah lang pala mananda ise do saksi Jahowa ai. Jadi anggo dear parlahounta, ra do gabe mubah sidea. Anggo hita maila atap pe gobir patorangkon bani sidea haporsayaonta, ra iagan sidea maila do hita gabe saksi Jahowa. Janah sidea pe gabe lang marosuh bani saksi Jahowa. Tapi anggo pangkar hita patugahkon haporsayaonta, ra do on mambahen sidea gabe mangkargai hita.”

18. Aha na boi ibahen hanima ase totap marhasoman pakon Naibata?

¹⁸ Domma iparlajari hita ponting tumang do ase totap toguh parhasomananta pakon Jahowa. Jadi ase totap marhasoman pakon Jahowa, hanima maningon mambasa janah marimangi isi ni Bibel, martonggo bani Jahowa anjaha mamingkirhon sonaha Jahowa domma mangurupi hanima. Anggo ibahen hanima sonai, lambin porsaya ma hanima bani Jahowa anjaha megah ma uhurmu boi marhasoman pakon-Si. Anjaha hanima pe lambin pangkar marbarita bani halak na legan.​—Basa Psalmen 73:28.

19. Aha do pasu-pasuni anggo hita marusaha ase mandapot haluahon?

¹⁹ Jesus mangkatahon, ‘Barang ise na sihol mangirikkon Ahu, iparnalang ma dirini, anjaha iirikkon ma Ahu!’ (Mat. 16:24) Jadi ase hita boi mangirikkon Jesus, hita maningon marjanji laho mangidangi Jahowa anjaha ididi. Anggo hita ididi, bahat do pasu-pasu na idapot hita sonari pakon bani ari simagira, boi manggoluh sadokah ni dokahni i Paradeiso. Jadi tongtong ma marusaha ase boi mandapot haluahon!