1, 2. Sipata, mase dong namatoras na haru uhurni anggo niombahni sihol ididi?

DONG do marribu halak na marjanji laho mangidangi Jahowa janah ididi. Humbani sidea na ididi ai, dong na poso ope janah sidea domma marlajar humbani na etek. (Ps. 1:1-3) Tontu nasiam namatoras sihol do ase niombah ni nasiam ididi.​—Bandingkon 3 Joh. 4.

² Tapi ra do haru uhur ni nasiam. Halani dong piga-piga na maposo na ididah nasiam domma ididi, tapi ujungni manadingkon Jahowa. Anjaha dong homa na marpangahap anggo podah ni Bibel ai, lang marguna be bani sidea. Halani ai, ra do gabe mabiar nasiam, anggo niombah ni nasiam gabe sonai pangahapni janah manadingkon Jahowa. Usih ma ai songon halak Kristen i Epesus. Nini Jesus do bani sidea, “Itadingkon ham do holong ni uhurmu na bani mungkahni ondi.” (Pangk. 2:4)  Jadi sonaha do nasiam boi mangurupi niombah ase totap toguh holongni bani Jahowa, janah ‘lambin magodang anjaha maluah’? (1 Ptr. 2:2) Parlajari hita ma siusihan humbani si Timoteus.

3. (a) Aha do na mambahen si Timoteus ra gabe halak Kristen, anjaha aha do buktini anggo ia mandalankon aha na iparlajarini? (b) Tolu parlajaran aha do na laho iulas hita humbani si Timoteus?

³ Bani tahun 47 M, ai ma parlobei sahali si Paulus roh hu Listra. Ra do ijia si Timoteus na poso ope domma marlajar pasal Jesus janah mamilih gabe halak Kristen. Ihorjahon si Timoteus do aha iparlajarini ai. Dobkonsi dua tahun, dihut ma ia marbarita pakon si Paulus hu kota-kota na legan. Dobkonsi 16 tahun, ihatahon si Paulus ma bani si Timoteus marhitei surat, “Totap ma ham bani na dob ginuruhonmu ampa na hinaporsayaanmu, ai ibotoh ham do ise na mangajarhonsi bamu, anjaha ibotoh ham do humbani haetek-etekonmu nari, Surat Na Pansing [Kitab-Kitab Ibrani] in do, na margogoh papentarhon ham, ase marulih ham bani haluahon marhitei haporsayaon bani Kristus Jesus.” (2 Tim. 3:14, 15) Humbani surat ai, ibotoh hita ma anggo si Timoteus domma (1) mambotoh surat na pansing, (2) porsaya bani aha na iparlajarini, anjaha (3) pentar atap maruhur ase boi maluah marhitei porsaya bani Jesus Kristus.

4. Bahan-bahan aha do na dob ongga igunahon nasiam laho mangajari niombah? (Tonggor ma gambar bani alm. 15.)

⁴ Namatoras maningon do mangajari niombahni pasal isi ni Bibel. Porlu do on ibahen ase niombah boi marhasoman pakon Jahowa. Hassi pe dakdanak ope, boi do sidea marlajar humbani juakjuak ni Naibata na isuratkon i Bibel. Sonari domma ipasirsir organisasi bahan-bahan na boi igunahon namatoras laho mangajari niombahni. Umpamani, dong bahat buku, brosur pakon video-video. Ai domma adong bahan-bahan ai ibagas bahasa ni nasiam?

5. Hunja do ibotoh hita anggo si Timoteus porsaya bani Jesus?

⁵ Lang sungkup mangajari niombah pitah pasal juakjuak ni Naibata atap pe sarita na adong bani Bibel. Dingat ma si Timoteus ihatahon domma ‘porsaya’. Domma iparlajarini Kitab-Kitab Ibrani ‘humbani haetek-etekonni nari’. Halani ai, porsaya ma ia Jesus do Mesias ai. Haporsayaonni na toguh in ma, na mangurupi ia boi ididi anjaha dihut pakon si Paulus gabe misionaris.

6. Sonaha do namatoras boi mangurupi niombah ase porsaya bani ajaran ni Bibel?

⁶ Sonaha do namatoras boi mangurupi niombah ase ‘porsaya’ bani ajaran ni Bibel songon si Timoteus? Maningon sabar ma nasiam. Ulang iagan nasiam  anggo domma porsaya nasiam bani ajaran ni Bibel, niombah ni nasiam pe mintor porsaya do bani ajaran ai. Sidea porlu do ‘manguji haganup’ na iajarhon Bibel, laho patoguhkon haporsayaonni. (Basa 1 Tessalonika 5:21.) Sanggah dong sungkun-sungkun humbani niombah, sabar ma nasiam mangurupi sidea laho mambotoh balosni ai. Sonari, parlajari hita ma siusihan humbani halak na legan.

7, 8. (a) Sonaha sada bapa pataridahkon hasabaron sanggah mangajari boruni? (b) Aha do na porlu idingat nasiam sanggah mangajari niombah?

⁷ Sanina Thomas, dong do boruni na marumur 11 tahun. Sipata isungkun boruni do sonon, “Ai marhitei evolusi do Jahowa manompa tanoh on?” Atap pe, “Mase ma hita lang dihut pemilu?” Sipata lang mintor ipatugah si Thomas aha na maningon ihaporsayai boruni ai. Halani ibotoh si Thomas do, sasahalak boi porsaya bani ajaran ni Bibel anggo dong bukti-buktini.

⁸ Ibotoh si Thomas do anggo ia maningon sabar laho mangajari boruni ai. Anjaha ganup halak Kristen sasintongni maningon sabar do. (Kol. 3:12) Ibotoh si Thomas do maningon gati ma ia marsahapi pakon boruni ai ase lambin toguh haporsayaon ni boruni. Jadi boruni ai pe maningon do marimbagaskon aha na iparlajarini humbani Bibel. Ihatahon si Thomas do, “Na siporlunan, maningon ibotoh hanami do, ai porsaya do ia atap lang bani ajaran ni Bibel. Dearan do anggo dong sungkun-sungkunni, marimbangkon mintor porsaya bani aha na ihatahon hanami.”

9. Sonaha do namatoras mangurupi niombahni ase porsaya bani Hata ni Naibata?

⁹ Anggo namatoras sabar mangurupi niombahni, ujungni sidea boi mangarusi “sonaha ganjangni ampa bolagni, bagasni ampa gijangni” hasintongan ni Bibel. (Ep. 3:18) Pasosok ma aha na iajarhon nasiam domu bani umur ni sidea. Anggo domma toguh haporsayaon ni sidea, lambin pangkar ma sidea patugahkon ajaran ni Bibel bani halak na legan, atap pe bani hasomanni sakalas. (1 Ptr. 3:15) Umpamani, ai iarusi sidea do aha na iajarhon Bibel pasal halak matei? Ai boi do ipatorang sidea pasal ai bani halak na legan? * Dingat ma maningon sabar do nasiam mangurupi sidea ase porsaya bani Hata ni Naibata. Anjaha lang soya-soya anggo sonai ibahen nasiam.​—5 Mus. 6:6, 7.

10. Aha do siporlunan na maningon ibahen nasiam sanggah mangajari niombah?

¹⁰ Na siporlunan, maningon ipatuduh nasiam ma siusihan ase sidea boi patoguhkon haporsayaonni bani Jahowa.  Dong sada botou na margoran si Stephanie janah dong do tolu boruni. Ia mangkatahon, “Hassi pe etek ope niombahku, domma hurimangi on, ‘Ai hupatugah do bani sidea mase ahu porsaya bani Jahowa ampa holongni, anjaha mase sintong do ganup pambahenan-Ni? Ai boi do ididah sidea anggo ahu tongon-tongon mangkaholongi Jahowa?’ Anggo ahu pe lang porsaya, sonaha ma niombahku boi porsaya bani Jahowa?”

11, 12. Sonaha do halak na pentar ai, anjaha mase lang umur ni sasada halak na manontuhon anggo ia pentar?

¹¹ Domma iparlajari hita anggo si Timoteus domma (1) mambotoh Hata ni Naibata anjaha (2) porsaya bani aha na iparlajarini. Tapi aha do artini sanggah ihatahon si Paulus anggo Hata ni Naibata boi mambahen si Timoteus gabe ‘pentar’ ase ‘maluah’?

¹² Bani buku Pemahaman Alkitab Jilid 1, ipatorang ma sonaha do halak na pentar ai. Ihatahon ijai anggo halak na pentar, “dong do habotohon ampa pangarusionni laho pasaloseihon parsoalan, padaohkon diri humbani na sambor, pasaudkon sura-surani anjaha mamodahi halak na legan. Marlawanan do hapentaran pakon haotoon”. Bibel mangkatahon, “Haotoon do longkot ibagas uhur ni dakdanak.” (Pod. 22:15) Jadi halak na pentar atap pe maruhur, sasintongni ai ma halak na mabiar bani Jahowa janah ra mandalankon parentah-Ni. Sedo umur ni sasada halak na manontuhon anggo ia pentar.​—Basa Psalmen 111:10.

13. Sonaha do na maposo patuduhkon anggo sidea maruhur?

¹³ Na maposo na toguh parhasomananni pakon Jahowa, lang ra ‘iboan-boan’ harosuh ni sandiri atap pe mangihutkon harosuh ni hasomanni. (Ep. 4:14) Tapi sidea ai ma “na dob pasomal-somalhon dirini, gabe ibotoh parleganan ni na madear ampa na masambor”. (Heb. 5:14) Halani ai, hassi pe ia lang rap pakon namatorasni atap pe halak na legan, totap do ia boi mambahen haputusan na dear. (Pil. 2:12) Jadi maningon pentar janah maruhur ma sidea ase boi maluah. (Basa Podah 24:14.) Sonaha do nasiam boi mangurupi niombah ase maruhur? Maningon boi ma ididah sidea anggo nasiam lang pitah mangajarhon podah ni Bibel, tapi taridah do homa humbani parlahoumu.​—Rom 2:21-23.

14, 15. (a) Aha do na porlu ipingkirhon na maposo na sihol ididi? (b) Sonaha do namatoras boi mangurupi niombah ase mangarusi gunani mandalankon podah ni Naibata?

¹⁴ Ase lambin toguh haporsayaon niombah, lang sungkup pitah patugahkon aha na dear pakon na sambor. Tapi urupi ma sidea mangarusi podah  ni Bibel. Boi ma isuruh nasiam ase sidea mamingkirhon sungkun-sungkun on: ‘Marosuh do ahu janah lang salah huahap ai, tapi mase ma ilarang Bibel ai? Mase ahu porsaya anggo podah ni Bibel tongtong do marguna bangku?’​—Jes. 48:17, 18.

¹⁵ Anggo niombahmu sihol ididi, urupi ma sidea ase mangarusi aha do tanggung jawabni dobkonsi ididi. Sonaha do pangahap ni sidea bani tanggung jawab ai? Aha do tantangan ni sidea? Mase banggalan do pasu-pasu na idapot marimbangkon tantanganni? (Mrk. 10:29, 30) Jadi ponting tumang do ganupan ai irimangi niombah na sihol ididi. Urupi ma sidea ase mangarusi aha do gunani anggo sidea mandalankon podah hun Bibel, anjaha sonaha do ujungni anggo lang idalankon sidea ai. Anggo iarusi sidea ganupan ai, ujungni boi ma sidea porsaya anggo podah ni Bibel tongtong do marguna bani sidea.​—5 Mus. 30:19, 20.

16. Aha do na porlu ibahen namatoras anggo niombahni domma galek haporsayaonni dobkonsi ididi?

¹⁶ Sonaha anggo lambin dokah lambin galek haporsayaonni niombahmu  dobkonsi ididi? Umpamani, ra do domma rosuhan sidea mangihutkon parlahou ni dunia on. Atap ra do iahap sidea lang dong be gunani mandalankon podah ni Bibel. (Ps. 73:1-3, 12, 13) Porini pe sonai, ulang ma mintor manggila nasiam bani sidea. Tapi patugah ma, holong do uhurmu hu bani janah sihol do nasiam mangurupi sidea.

17, 18. Anggo galek haporsayaon ni niombah, sonaha do namatoras boi mangurupi sidea?

¹⁷ Na maposo na dob ididi, ai patuduhkon anggo sidea domma marjanji laho mangkaholongi Jahowa, janah mambahen Ia na siporlunan ibagas goluhni. (Basa Markus 12:30.) Jadi maningon idalankon ma janji ai, halani ponting tumang do ai i lobei ni Jahowa. (Par. 5:3, 4) Patugah ma pasal ai bani niombah. Tapi paima ai, dear do lobei anggo ipindahi nasiam podah na ipasirsir organisasi bani namatoras. Dob ai, anggo domma sosok panorangni, dear ma patugah bani niombah ponting tumang do mandalankon janji na dob ibahen bani Jahowa. Janah patugah homa anggo sidea mamilih mangidangi Jahowa, parohkon bahat pasu-pasu do ai.

¹⁸ Nasiam boi do mangidah podah na dear bani apendiks “Pertanyaan Orang Tua” bani buku Pertanyaan Kaum Muda—Jawaban yang Praktis Jilid 1. Ijai ihatahon, sipata galek do haporsayaon ni niombah sedo halani lang marosuh ia bani ajaran ni Bibel. Tapi ra do halani dong masalahni. Umpamani, ra do lungunan pangahapni, halani i parsikolahan bahat hasomanni na mangejek. Ra do homa iaganni anggo ia lang boi mambahen hamajuon songon sanina-botou na legan. Halani ai, ulang ma namatoras mintor marpangahap anggo niombahni ai lang marosuh bani hasintongan. Bani apendiks ai dong do podah bani namatoras, ase sidea boi mangurupi niombah na galek haporsayaonni.

19. Sonaha do namatoras boi mangurupi niombahni gabe ‘pentar’ ase ‘maluah’?

¹⁹ Jadi namatoras martanggung jawab do laho ‘pagodang-godangkon [niombah] ibagas ajar ampa podah ni Tuhan in!’ (Ep. 6:4) Songon na dob iulas hita, namatoras maningon do mangajari niombahni pasal isi ni Bibel. Janah sidea maningon mangurupi niombah, ase porsaya bani ajaran ni Bibel. Anggo domma toguh haporsayaon ni niombah, gabe ra ma mambahen janji janah mambere na sidearan bani Jahowa. Sai andohar ma, Bibel, tonduy na pansing, ampa pangurupion ni namatoras boi mangurupi sidea gabe ‘pentar’ ase ‘maluah’.