DOMMA marumur 80 tahun lobih si Diana, janah bahat tumang do sitarononni. Hona naborit Alzheimer do suamini janah ujungni matei i panti jompo. Dob ai, matei homa dua anakni anjaha ia pe hona kanker payudara. Tapi sanggah martumpu atap pe sanggah mangidangi, tong do malas uhurni ididah sanina botou na legan.

Si John domma mangidangi gabe sintua kaliling sadokah 43 tahun lobih. Marosuh tumang do ia bani tugasni ai. Tapi halani maningon mangurus kaluargani na boritan, lang be gabe sintua kaliling ia. Sanggah pajumpah i kebaktian, ididah sanina botou lang dong na mubah hun bani. Totap do ia marmalas ni uhur.

Sonaha si Diana pakon si John boi totap marmalas ni uhur? Sonaha sasada halak boi totap marmalas ni uhur sanggah marsitaronon atap pe sanggah lang boi be mangkorjahon tugas na iharosuhkon ia? Balosni ai dong bani Bibel. Ihatahon do, “Marmalas ni uhur ma halak parpintor ibagas Jahowa.” (Ps. 64:11) Ase boi iarusi hita ayat ai, iulas hita ma lobei aha do na mambahen hita lang be marmalas ni uhur, janah aha do na mambahen hita totap marmalas ni uhur.

Dong piga-piga na mambahen hita marmalas ni uhur. Umpamani, sanggah baru marhajabuan, tubuhan anak, atap mandapot tugas ibagas organisasi. Ganupan ai boi mambahen malas ni uhur halani sibere-bere humbani Jahowa do ai.​—1 Mus. 2:18, 22; Ps. 127:3; 1 Tim. 3:1.

Tapi halani mubah situasi, ra do lang be totap malas ni uhur ai. Dong pasanganni na marbangkis atap pe marujung goluh. (Hes. 24:18; Hos. 3:1) Dong anakni na manlawan bani namatoras atap pe ipabali hun kuria. Umpamani, anak-anak ni si Samuel lang be mangkorjahon aha na iharosuhkon Jahowa. Si Daud pe bahat do sitarononni ibagas kaluarga halani marbangkis pakon si Batseba. (1 Sam. 8:1-3; 2 Sam. 12:11) Tontu ganupan ai mambahen sidea marpusok ni uhur.

 Sipata hita lang boi be mangkorjahon tugas ibagas organisasi ni Jahowa. Ra do ai halani boritan atap pe maningon mangurus kaluarga na boritan. Atap ra do homa halani dong parubahan ibagas organisasi. Bahat do sanina botou na ibagas situasi sisonai mangkatahon lungun uhurni halani ai.

Hunjon ididah hita dong do piga-piga situasi na mambahen hita lang totap marmalas ni uhur. Jadi, ai boi do hita totap marmalas ni uhur hassi pe ibagas hasunsahan? Tontu boi. Songon si Samuel, si Daud, ampa na leganni, boi totap marmalas ni uhur hassi pe marsitaronon.

Paima roh Jesus hu tanoh on, Bibel mangkatahon ‘marguro-guro do ia tongtong i lobei ni [Jahowa]’. Tangkas ma ibotoh Jesus aha do malas ni uhur ai. (Pod. 8:30) Tapi sanggah ia i tanoh on, bahat do sitarononni. Hassi pe sonai totap do malas uhurni halani mangkorjahon harosuh ni Bapani. (Joh. 4:34) Sonaha pangahapni sanggah ia igantung bani hayu? Bibel mangkatahon martahan do ia manaron sitarononni “gantih ni malas ni uhur na i lobeini”. (Heb. 12:2) Jadi ulas hita ma pasal malas ni uhur humbani na ihatahon Jesus.

Dobkonsi salosei marbarita, mulak ma 70 susian ni Jesus ibagas malas ni uhur, halani boi sidea mangusir begu-begu. Tapi nini Jesus ma, “Ulang ma malas uhurnima, halani tunduk setan-setan ai bannima, tapi malas ma uhurnima, halani domma tarsurat gorannima i nagori atas.” (Luk. 10:1-9, 17, 20) Jadi, dearan do hita marmalas ni uhur halani iharosuhkon Jahowa. Ai do na sipontingan marimbangkon tugas aha pe na ibere hubanta.

Bani panorang na legan marambilan ma Jesus i lobei ni buei halak. Dob ai, ihatahon sada naboru Jahudi ma tontu malas do uhurni inang ni Jesus halani jenges tumang carani mangajar. Tapi Jesus mangkatahon, “Martuah ma na mambogei hata ni Naibata anjaha na marimbagaskon ai!” (Luk. 11:27, 28) Lang salah anggo namatoras megah pangahapni halani anakni. Tapi na mambahen hita totap marmalas ni uhur ai ma anggo  ra hita manangihon Jahowa janah marhasoman pakon-Si.

Anggo ibotoh hita marosuh Jahowa hubanta, ai do na mambahen hita marmalas ni uhur. Janah hassi pe bahat hasunsahanta, hita boi totap marmalas ni uhur. Sasintongni anggo totap hita setia bani Jahowa sanggah marsitaronon, lambin tambah ma malas ni uhurta. (Rom 5:3-5) Anjaha ibere Jahowa do homa tonduy-Ni hubani halak na porsaya Bani. Janah buah ni tonduy do malas ni uhur ai. (Gal. 5:22) Ai ma ase sosok na ihatahon bani Psalmen 64:11, “Marmalas ni uhur ma halak parpintor ibagas Jahowa.”

Ai do homa na mambahen si Diana pakon si John totap marmalas ni uhur hassi pe bahat sitarononni. Nini si Diana, “Songon niombah na tongtong marlinggom bani bapani, sonai do homa ahu marlinggom bani Jahowa. Iurupi Jahowa do ahu ase boi totap marbarita ibagas malas ni uhur.” Sonaha si John boi totap ringgas mangidangi janah marmalas ni uhur age pe lang be gabe sintua kaliling? Nini do, “Bani tahun 1998, sanggah itugaskon ahu mangajari bani Sekolah Pelatihan Pelayanan, lambin pongkut do ahu marlajar Bibel.” Lambin urah ma ia pakon istrini mangihutkon parubahan na ibahen organisasi, halani sadokah on sidea ra mangkorjahon tugas aha pe na ibere Jahowa. Nini use, “Lang ongga manosal hanami.”

Bahat do na mangahapkon tongon do na ihatahon bani Psalmen 64:11. Umpamani, dong sada pasangan i Amerika Serikat na dob mangidangi i Betel sadokah 30 tahun lobih. Tapi dobkonsi ai itugaskon ma sidea gabe perintis istimewa. Nini sidea ma, ‘Lang salah anggo pusok uhurta halani lang boi be mangkorjahon tugas na iharosuhkon hita. Tapi ulang ma lalab sonai pangahapta.’ Dobkonsi das i ianan na itugaskon, mintor marbarita do sidea pakon sanina botou i kuria. Nini sidea use, “Ibagas tonggo ipatugah hanami ma ganup pangindoannami bani Jahowa. Lambin marmalas ni uhur do hanami halani mambotoh ibalosi Jahowa do tonggonami ai. Lang piga dokah dobkonsi hanami i kuria on, mintor dong ma sanina botou na merintis. Anjaha dong do homa dua parlajar Bibelnami na mambahen hamajuon.”

Tapi sai adong do na mambahen hita sunsah. Hassi pe sonai tarapoh do hita mambasa janji ni Jahowa na isurat bani Psalmen 64:11. Pos ma uhurta anggo hita setia bani Jahowa hassi pe bahat sitarononta, hita boi totap ‘marmalas ni uhur ibagas Jahowa’. Anjaha ipaima-ima hita do saud janji-Ni pasal “langit na baru pakon tanoh na baru”. Holi, ganup halak ‘marmalas ni uhur anjaha marolob-olob ronsi sadokah ni dokahni’ halani ganup pambahenan ni Jahowa.​—Jes. 65:17, 18.

Bayangkon ma aha na laho masa ijai. Holi ganupan hita gabe gokan dear. Janah lang dong be na ngayotan sanggah puho bani sogod ni ari. Anjaha salpu ma ganupan na mambahen hita marsitaronon. Marjanji do Jahowa “seng be ingaton na parlobei in, barang puho ibagas uhur”. Dob ai ialo-alo hita do homa halak na hinaholonganta na dob ipapuho. Sarupa ma holi pangahapta songon na matoras na marmalas ni uhur halani ipapuho Jesus boruni na marumur 12 tahun. Bibel mangkatahon, “Gabe longang tumang ma sidea.” (Mrk. 5:42) Ujungni, halak parpintor do na manggoki tanoh on anjaha tongtong do sidea ‘marmalas ni uhur ibagas Jahowa’.