“Jumpah i Paradeiso da!”
“Rap pakon ahu ma ho i Paradeiso!”—LUK. 23:43.
1, 2. Aha do pandapot ni buei halak pasal paradeiso ai?
DOBKONSI salosei kebaktian i Seoul, Korea, malas do uhur ni ganup sanina botou. Sanggah laho mulak sanina botou na roh hun nagori na legan, marsurak ma sidea mangkatahon, “Jumpah i Paradeiso da!” Ai ibotoh nasiam do aha paradeiso na ihatahon sidea ai?
2 Marmasam do pandapot ni halak pasal paradeiso. Dong na mangkatahon pitah ibagas nipi dassa ai. Na leganni ihatahon do ai sada ianan na jenges janah sonang do halak na tading ijai. Sonaha pandapot ni nasiam? Porsaya do ham dong Paradeiso ai?
3. Bani Bibel, ija do parlobei sahali ipatugah pasal Paradeiso?
3 Bani Bibel ipatugah dong do hinan paradeiso i tanoh on janah dong do use ai bani ari simagira. Bani buku Sada Musa do parlobei sahali ipatugah pasal Paradeiso. Bani Bibel Catholic Douay Version na iterjemahkon humbani sahap Latin, 1 Musa 2:8 mangkatahon, “Humbani mungkahni domma ibahen Naibata sada pohon hasonangan. Ijai ma tading manisia na itompa Ia.” (Cetak tebal redaksi.) Bani sahap Heber hata na isetak tobal ai isobut pohon Eden. Hata “Eden” artini “Hasonangan”. Tongon, sonang do halak na marianan ijai halani jenges iananni, bahat sipanganon, janah manisia pakon binatang pe mardamei.—1 Mus. 1:29-31.
4. Mase boi ihatahon pohon Eden ai do paradeiso?
4 Hata “pohon” bani sahap Heber anggo iterjemahkon hu sahap Junani gabe pa·raʹdei·sos. Buku Cyclopaedia na ibahen si M’Clintock pakon si Strong mangkatahon anggo itangar halak Junani hata pa·raʹdei·sos, gabe ibayangkon sidea ma sada pohon na jenges. Ijai bahat hayu na marbuah janah rap manggagat do ursa pakon biribiri. Lang dong na mambahen hajahaton ijai.—Bandingkon 1 Mus. 2:15, 16.
5, 6. Mase si Adam pakon si Hawa lang be tading i Paradeiso, janah aha do ra na isungkun halak?
5 I pohon sisonai ma inahkon Jahowa si Adam pakon si Hawa. Tapi halani sidea lang manangihon Jahowa, iusir ma sidea hunjai. Lang boi be sidea tading ijai, sonai homa ginomparni. (1 Mus. 3:23, 24) Hassi pe lang dong be na marianan ijai, tapi dong ope pohon ai ronsi roh Bah na Sumbang bani masa ni si Noak.
6 Ra do adong na manungkun, ‘Ai dong do holi Paradeiso i tanoh on? Aha ma buktini? Mase ma nasiam porsaya anggo nasiam boi manggoluh i Paradeiso rap pakon na hinaholonganmu? Ai boi do ipatorang nasiam mase boi adong paradeiso bani ari simagira?’
BUKTI NA PATUDUHKON DONG DO HOLI PARADEISO
7, 8. (a) Aha do na ijanjihon Jahowa bani si Abraham? (b) Aha do na dob ibotoh si Abraham pasal janji ni Jahowa ai?
7 Pitah Jahowa do na boi mambalosi sungkun-sungkun ai halani Ia do na mambahen Paradeiso. Anjaha ipatugah Ia do pasal ai ibagas Bibel. Umpamani ulas hita ma aha na ihatahon Jahowa bani si Abraham. Ihatahon Jahowa do laho bahenon-Ni ma ginompar ni si Abraham “songon horsik na i topi ni laut”. Anjaha marjanji do Jahowa bani si Abraham, ‘Marhitei ginomparmu, dapotan pasu-pasu ma sagala bangsa na i tanoh on, halani itangihon ho do sorang-Ku.’ (1 Mus. 22:17, 18) Dob ai iulakkon Jahowa do use janji-Ni ai bani anak ampa pahompu ni si Abraham.—Basa 1 Musa 26:4; 28:14.
8 Lang adong ipatugah ibagas Bibel anggo si Abraham marpingkir i surga do saud janji ai. Jadi sanggah ihatahon Jahowa dapotan pasu-pasu do holi “sagala bangsa na i tanoh on”, tontu domma ibotoh si Abraham anggo ai saud i tanoh on. Tapi, ai pitah on dassa bukti hun Bibel na patuduhkon dong do holi paradeiso i tanoh on?
9, 10. Aha ope janji ni Naibata na mambahen hita porsaya dong do holi paradeiso?
9 Ipatugah Jahowa do bani si Daud, ginompar ni si Abraham, pasal aha na laho masa bani ari simagira. Ihatahon do “seng dong be parjahat”. (Ps. 37:1, 2, 10) Tapi “na lamlam maruhur do sitean tanoh in, anjaha hamalaskonon ni uhur ni sidea do hadameion na gok”. Isuratkon si Daud do homa, “Teanon ni halak parpintor do tanoh in, anjaha tongtong do sidea marianan ijin.” (Ps. 37:11, 29; 2 Sam. 23:2) Aha ma pengaruhni ai bani halak na sihol mangkorjahon harosuh ni Jahowa? Gabe porsaya ma sidea pitah halak parpintor do holi na mangiankon tanoh on, janah ibahen ma tanoh on gabe paradeiso songon pohon Eden.
Panjahaion na dob saud patuduhkon dong do holi paradeiso i tanoh on
10 Dob piga-piga dokah, bahat do halak Israel na manadingkon Jahowa. Halani ai ipaturut Jahowa ma halak Babel manaluhon sidea, anjaha bahat ma sidea na iboan hu habuangan. (2 Kron. 36:15-21; Jer. 4:22-27) Tapi marhitei panjahaion, ipatugah Jahowa do anggo sidea mulak do use hu tanoh ni sidea dobkonsi 70 tahun i habuangan. Tongon, saud do panjahaion ai. Tapi dong do homa artini ai hubanta sonari on. Ulas hita ma sonaha panjahaion na dob saud ai boi mambahen hita porsaya dong do holi paradeiso i tanoh on.
11. Aha do na dob saud humbani panjahaion Jesaya 11:6-9, anjaha aha do ra na sihol ibotoh hita?
11 Basa Jesaya 11:6-9. Marhitei nabi Jesaya Naibata patugahkon dong do hadameion sanggah mulak halak Israel hu tanohni. Lang dong be manisia atap pe binatang na manjahati. Na maposo pakon na matua sonang ma pangahapni. Sonai do situasi i pohon Eden hinan. (Jes. 51:3) Anjaha lang pitah i Israel, tapi ipatugah nabi Jesaya do homa “habotohon pasal Jahowa do manggoki tanoh in, songon bah na manggoki laut”. Sadihari do saud janji ai? Tontu lang bani panorang ai, tapi bani ari simagira do.
12. (a) Pasu-pasu aha do na iahapkon halak Israel na mulak hun habuangan Babel? (b) Aha ma na patuduhkon anggo panjahaion bani Jesaya 35:5-10 saud do use bani ari simagira?
12 Basa Jesaya 35:5-10. Iulakkon si Jesaya do patugahkon lang dong manisia atap pe binatang panoroh na manjahati halak Israel na mulak hun habuangan Babel. Ihatahon do use bahat do holi bah ijai. Halani ai jenges ma suan-suanan janah ramos buahni, songon i pohon Eden hinan. (1 Mus. 2:10-14; Jer. 31:12) Sonaha bani panjahaion na legan? Umpamani dong ihatahon ipamalum do holi halak na mapitung, na repat, ampa na nengel. Tapi lang tarjadi ai bani masa ni halak Israel ai. On patuduhkon laho ipamalum Naibata do sagala naborit bani ari simagira.
13, 14. Humbani Jesaya 65:21-23, panjahaion na ija do na dob saud, tapi panjahaion na ija do na lape saud? (Tonggor ma gambar bani alm. 3.)
13 Basa Jesaya 65:21-23. Sanggah mulak halak Israel hu tanohni, lang dong rumah na jenges ijai ampa pohon anggur. Tapi gabe mubah ma situasini halani ipasu-pasu Jahowa do sidea. Tontu malas tumang uhur ni sidea boi mangiankon rumah na ipajongjong sidea, janah mangankon buah humbani aha na isuan sidea!
14 Bani panjahaion ai pe dong ihatahon anggo umurta dos “songon umur ni hayu”. Piga-piga hayu dong do na marumur marribu tahun. Ase boi sonai ganjang ni umur ni manisia, maningon sehat ma sidea. Janah anggo sidea tading bani ianan na jenges ampa dong homa hadameion, tontu ai ma paradeiso! Anjaha saud do holi panjahaion ai!
Sonaha janji ni Jesus pasal Paradeiso laho ipasaud? (Tonggor ma paragrap 15, 16)
15. Pasu-pasu aha do na ipatugah bani buku Jesaya?
15 Pingkirhon ma bukti-bukti na dob iulas hita na patuduhkon dong do holi paradeiso bani ari simagira. Holi, ipasu-pasu Naibata do ganup halak i sab dunia on. Ijai lang dong be binatang panoroh atap pe halak na manjahati. Halak na mapitung, na nengel, ampa na repat, ipamalum do holi. Ipajongjong sidea do rumahni sandiri anjaha mangankon aha na isuan sidea. Ganjangan ma umur ni sidea marimbangkon umur ni hayu. On ma bukti-bukti hun Bibel na patuduhkon anggo holi saud do paradeiso ai. Tapi dong do halak na lang porsaya anggo paradeiso ai saud i tanoh on. Sonaha ham mambalosi ai? Bukti aha do na ipatuduh ham ase boi sidea porsaya? Dong bukti na legan na ipatugah Jesus. Ai ma na laho iulas hita.
HU PARADEISO DO HOLI HO!
16, 17. Nantigan do Jesus patugahkon pasal Paradeiso?
16 Hassi pe Jesus lang marsalah, igantungkon do ia bani sada hayu rap pakon dua parjahat. Tapi ujungni, sada humbani parjahat ai mambotoh anggo Jesus ai raja. Halani ai ihatahon ia ma, “Ham Jesus, ingat ham ma ahu, anggo das ma ham bani Harajaonmu.” (Luk. 23:39-42) Dob ai marjanji ma Jesus bani parjahat ai. Janji ai isuratkon do bani Lukas 23:43. Hunjai ibotoh hita ma dong pangarapan bani ari simagira. Tapi marlegan-legan do pandapot ni halak pasal ija do ibahen tanda koma sanggah manuratkon aha na isahapkon Jesus ai. Dong pakar Alkitab na mambahen tanda koma paima hata “sadari on”. Gabe sonon ma iterjemahkon, “Sintong do hatang-Kon bam, sadari on rap pakon ahu ma ho i Paradeiso!” Tapi sanggah Jesus mangkatahon “sadari on”, aha do artini ai?
17 Bani panorangta sonari, somal do ipakei tanda koma ase lambin tangkas iarusi hita artini sada kalimat. Tapi bani gulungan manuskrip Junani na hinan, lang gati ipakei tanda baca. Jadi ra do sungkun-sungkun hita, ai on do na ihatahon Jesus, “Huhatahon do bam, sadari on rap pakon ahu ma ho i Paradeiso”? Atap sonon do ihatahon ia, “Huhatahon do bam sadari on, rap pakon ahu ma ho i Paradeiso”? Bani piga-piga Bibel sonari on, dong do penerjemah na mambahen tanda koma paima atap pe dobkonsi hata “sadari on”, domu bani pangarusion ni sidea.
18, 19. Sonaha ase hita boi mangarusi aha na ihatahon Jesus ai?
18 Tapi dingat hita ma aha na ongga ihatahon Jesus bani susianni. Nini do, “Anak ni Jolma in tolu ari tolu borngin ibagas tanoh.” Dob ai ihatahon use, “Ondoskononkon ma Anak ni Jolma in hubagas tangan ni halak, gabe Mat. 12:40; 16:21; 17:22, 23; Mrk. 10:34) Tongon sonai do na masa songon na ihatahon apostel Petrus. (Lah. 10:39, 40) Jadi bani ari parmatei ni Jesus pakon parjahat ai, lang mintor laho sidea hu Paradeiso. Bibel mangkatahon “i nagori toruh” atap pe i kuburan do Jesus sadokah tolu ari ronsi Naibata papuhohon ia.—Lah. 2:31, 32. *
bunuhon ni sidea ma ia, dob ai pagoluhon do ia bani ari patoluhon.” (19 Jadi sanggah Jesus mangkatahon, “Sintong do hatang-Kon bam sadari on”, artini ia mambahen janji bani parjahat ai. Gari bani masa ni si Musa pe domma somal ihatahon halak sonai. Ongga do ihatahon si Musa sonon, “Maningon parimbagaskonon nasiam do ganup hata on, sagala na hutonahkon bamu sadari on.”—5 Mus. 6:6; 7:11; 8:1, 19; 30:15.
20. Aha ope na mangurupi hita ase boi mangarusi janji ni Jesus ai?
20 Sada penerjemah Bibel hun Timur Tengah mangkatahon, “Humbani aha na ihatahon Jesus ai, sasintongni hata na laho ipatangkas ai ma ‘sadari on’. Halani ai sonon do sosokni ayat ai
ibasa, ‘Sintong do hatang-Kon bam sadari on, rap pakon ahu ma ho i Paradeiso.’ Artini bani ari ai do ibahen janji ai janah laho ipasaud i pudian ni ari.” Ihatahon penerjemah ai homa somal do halak ijia mangkatahon sonai laho patuduhkon anggo “janji na dob ibahen sidea tongon-tongon do itopati”. Hira-hira 1.600 tahun na salpu, ibagas Bibel terjemahan Siria, ayat ai iterjemahkon gabe, “Amen, huhatahon do bam sadari on anggo holi rap pakon ahu ma ho i Pohon Eden.” Tontu gabe tarapoh do uhurta manangar janji ai.21. Pangarapan aha do na ijanjihon Jesus bani parjahat ai, janah mase?
21 Hunja ibotoh hita anggo Paradeiso na imaksud Jesus ai sedo i surga? Dong piga-piga alasanni. Na parlobei, parjahat ai lang mambotoh padan na dob ibahen Jesus pakon susianni na laho mamarentah hu surga. (Luk. 22:29) Dob ai, parjahat ai lape ididi. Halani ai ia lang ipilih hu surga. (Joh. 3:3-6, 12) Tontu paradeiso i tanoh on do na ijanjihon Jesus bani parjahat ai. Martahun-tahun dobkonsi ai, ibagas sada panonggoran, dong ididah si Paulus sada dalahi “na iboan hu Paradeiso”. (2 Kor. 12:1-4, Terjemahan Dunia Baru) Jadi hassi pe si Paulus pakon apostel na legan laho mamarentah hu surga, tapi ibotoh si Paulus do adong paradeiso bani ari simagira. * Ai i tanoh on do holi paradeiso ai? Anjaha sihol do nasiam hujai?
AHA DO NA IPAIMA-IMA NASIAM?
22, 23. Aha do na ipaima-ima ham?
22 Dingat ma na ihatahon si Daud anggo holi “teanon ni halak parpintor do tanoh in”. (Ps. 37:29; 2 Ptr. 3:13) Janah ganup halak ijai ra mandalankon titah ni Naibata. Anjaha bani Jesaya 65:22 ihatahon, “Songon umur ni hayu, sonai do umur ni bangsang-Ku.” On patuduhkon ganup panombah ni Jahowa boi do holi manggoluh ronsi marribu tahun. Ai porsaya do nasiam pasal ai? Eak, halani bani Pangungkabon 21:1-4 ihatahon ipasu-pasu Jahowa do ganup jolma janah holi “seng dong be hamatean”.
23 Domma tangkas iarusi hita aha na iajarhon Bibel pasal Paradeiso. Hinan domma magou Paradeiso halani mardousa si Adam pakon si Hawa. Tapi songon na ijanjihon Naibata, pasu-pasuon-Ni do ganup jolma janah ibahen do tanoh on gabe paradeiso bani ari simagira. Si Daud mangkatahon anggo halak parpintor ampa na lamlam maruhur boi manean tanoh on janah manggoluh sadokah ni dokahni. Dob ai, humbani buku Jesaya iurupi do hita ase totap sabar paimahon sanggah tanoh on ibahen gabe paradeiso na jenges. Attigan do ai saud? Sanggah Jesus pasaudkon janjini bani parjahat ai. Nasiam pe boi do holi dihut i Paradeiso. Bani panorang ai saud ma na ihatahon sanina botou na roh hu kebaktian i Korea, “Jumpah i Paradeiso da!”
^ par. 18 Profesor C. Marvin Pate manuratkon bahat do pakar Alkitab na porsaya sanggah Jesus mangkatahon “sadari on”, artini dob matei ia mintor hu Paradeiso do ia bani ari ai. Tapi nini Profesor Pate use anggo na ihaporsayai sidea ai lang sosok bani hatorangan ni Bibel. Umpamani bani Bibel ihatahon dob matei Jesus, i kuburan do ia, anjaha dob piga-piga dokah hu surga do ia.—Mat. 12:40; Lah. 2:31; Rom 10:7.
^ par. 21 Tonggor ma “Pertanyaan Pembaca” bani Menara Pengawal Desember 2018.