1, 2. Dobkonsi Jesus hu surga, aha do na ipingkirhon ganup apostelni?

APOSTEL ni Jesus tumpu i Dolog Jetun manonoi Jesus ai ma tuan ampa hasoman ni sidea, tarangkat hu surga anjaha ilingodi hombun. (Lah. 1:9, 10) Hira-hira dua tahun Jesus mangajari, mangojur, janah mambobahon sidea. Tapi Jesus domma laho. Aha ma na maningon ibahen sidea?

² Paima laho hu surga ihatahon Jesus do bani susianni, “Gabe saksing-Ku ma hanima i Jerusalem ampa i sab Judea ampa i Samaria ampa das hu ujung ni tanoh on.” (Lah. 1:8) Boi do sidea mangkorjahon ai? Marjanji do Jesus laho mambere tonduy na pansing laho mangurupi sidea. (Lah. 1:5) Tapi, ise do na mangurupi sidea ampa mangatur horja parambilanon i tanoh on? Ibotoh ganup apostel do anggo Jahowa mamilih pambobai bani halak Israel sapari. Jadi ra do ipingkirhon sidea Jahowa  pe mamilih bani sidea na laho gabe pambobai.

3. (a) Dobkonsi Jesus hu surga, aha do na maningon ibahen apostel ni Jesus? (b) Sungkun-sungkun aha do na laho iulas hita bani artikel on?

³ Lang piga dokah dobkonsi Jesus hu surga, ipareksa susianni ma na tarsurat in, martonggo mangindo pangurupion ni Naibata, janah mamilih si Matias gantih ni si Judas Iskariot. (Lah. 1:15-26) Mase on porlu bani Jahowa pakon sidea? Halani ibotoh sidea do maningon adong 12 apostel. * (Idah surat partoruh.) Domma ipilih janah iajari Jesus ganup apostelni laho mandalankon tugas na ponting. Tugas aha do ai? Janah sonaha Jesus mangurupi sidea? Sonaha pangaturan ai sarupa ronsi sonari? Anjaha sonaha hita ‘mardingat na mambobahon’ hita, tarlobih mardingat “juakjuak na bujur anjaha na maruhur”?—Heb. 13:7; Mat. 24:45.

4. Aha do tugas ni sintua ampa apostel i Jerusalem?

⁴ Bani ari Pentakosta tahun 33 M ma, mungkahni apostel mambobahon i kuria Kristen. Ihatahon Bibel do “jongjong ma si Petrus rap pakon na sapuluh sada ai” janah mangajarhon hasintongan na mambere haluahon bani halak simbuei. (Lah. 2:14, 15) Ujungni bahat halak ijai gabe halak Kristen. Dob ai sidea na baru gabe halak Kristen ai ‘totap do bani podah ni apostel’. (Lah. 2:42) Martanggung jawab do homa apostel mangatur keuangan i kuria. (Lah. 4:34, 35) Iajari janah itonggohon do homa juakjuak ni Naibata. Nini sidea, “Tonggo ampa horja parambilannon ai ma horjahononnami.” (Lah. 6:4) Anjaha isuruh do halak Kristen na pandei marbarita hu ianan na legan. (Lah. 8:14, 15) Dob ai, sintua na iminaki rap marhorja pakon ganup apostel laho mambobahon i kuria. Sidea gabe pangurus pusat na mambere tugah-tugah bai ganup kuria.—Lah. 15:2.

5, 6. (a) Sonaha tonduy na pansing mampargogohi pangurus pusat? (Idah gambar bani alaman 20 ) (b) Sonaha malekat mangurupi pangurus pusat? (c) Sonaha Hata ni Naibata manogu-nogu pangurus pusat?

⁵ Halak Kristen bani abad na parlobei porsaya anggo Jahowa do na mambobahon pangurus pusat marhitei Jesus. Mase? Na parlobei, tonduy na pansing do na mampargogohi sidea. (Joh.16:13) Ijalo ganup halak na iminaki do tonduy na pansing. Tapi tarlobih ma ai bani sintua ampa apostel na mambobahon i Jerusalem. Umpamani,  bani tahun 49, iurupi tonduy na pansing do pangurus pusat laho mambere haputusan pasal parsunaton. Halani iirikon kuria do haputusan ai, “gabe lambin toguhni ma haporsayaon ni kuria ai, anjaha lambin tambah do bilangan ni sidea ganup ari”. (Lah. 16:4, 5) Humbani surat na itongos hu kuria-kuria pasal parsunaton ai, taridah ma marhorja do tonduy na pansing bani sidea, janah iurupi do homa sidea pataridahkon holong ampa haporsayaon.—Lah. 15:11, 25-29; Gal. 5:22, 23.

⁶ Na paduahon, iurupi malekat do pangurus pusat. Umpamani, ongga do malekat patugahkon bani si Kornelius ase mangindahi si Petrus. Dobkonsi marbarita si Petrus bani si Kornelius ampa kaluargani, ijalo sidea ma tonduy na mapansing hassi pe lape isunat sidea. Si Kornelius do halak na lang marsunat na parlobei gabe halak Kristen. Sanggah itangar apostel na legan pasal ai, sidea porsaya ai do harosuh ni Naibata janah ijalo sidea ma halak na lang marsunat hu kuria Kristen. (Lah. 11:13-18) Hunjon boi ididah hita anggo malekat mangurupi horja parambilanon na iatur pangurus pusat. (Lah. 5:19, 20) Na patoluhon, itogu-togu Hata ni Naibata do pangurus pusat. Igunahon pangurus pusat do na tarsurat in sanggah mambahen haputusan pasal ajaran Kristen ampa mangatur kuria.—Lah. 1:20-22; 15:15-20.

7. Hunja ibotoh hita Jesus do na mambobahon bani abad na parlobei?

⁷ Hassi pe pangurus pusat na mambobahon i kuria, tapi ibotoh sidea Jesus do na sasintongni na gabe Pambobai. Hunja ibotoh hita? Si Paulus mangkatahon ipilih Kristus do “deba gabe apostel”. Ihatahonni use Kristus do na gabe “ulu” atap Pambobai ni kuria. (Ep. 4:11, 15) Susian ai lang ra mamakei goran ni apostel gabe goran ni kalompok ni sidea, tapi ‘igoran do susian ai halak Kristen’. (Lah. 11:26) Ibotoh si Paulus do ganup susian porlu mangihutkon ajaran na sintong humbani apostel ampa sintua na mambobahon i kuria. Kristus do ulu ni ganup dalahi sonai homa pangurus pusat. Songon na ihatahon si Paulus, “Sihol ma botohon nasiam, ninuhurhu, ‘Kristus do ulu ni haganup [dalahi].’” Dob ai nini use, “Anjaha Naibata do ulu ni Kristus in.” (1 Kor. 11:2, 3) Taridah ma ipilih Jahowa do Jesus Kristus, Anak-Ni, gabe pambobai i kuria.

8, 9. Tugas na ponting aha do na ihorjahon sanina Russell?

⁸ Tahun 1870, si Charles Taze Russell pakon hasomanni marusaha manombah Naibata domu bani ajaran ni Bibel janah mangurupi na legan mangkorjahon na sarupa. Ase boi padaskon hasintongan bani marbagei sahap, ibahen ma sada badan hukum na margoran Lembaga Risalah Menara Pengawal Zion bani tahun 1884 janah Sanina Russell ma gabe presiden. * (Idah surat partoruh.) Itangkasi ma Bibel janah pangkar patugahkon anggo na iajarhon  gereja pasal Naibata Sitolu Sada ampa tonduy na totap manggoluh, sedo ajaran ni Bibel. Ipatugah do homa harorohan ni Jesus na paduahalihon lang boi ididah ampa bani tahun 1914 do ujung ni “gok panorang ni parbegu”. (Luk. 21:24) Ipakei si Russell do arta, panorang, ampa gogohni laho mangajari halak na legan. Taridah ma ipilih Jahowa pakon Jesus do si Russell na laho gabe pambobai.

⁹ Sanina Russell lang ra ipasangap atap ipuji-puji halak. Bani tahun 1986, ia mangkatahon ganup dalahi na mambobahon sonai homa ia, lang ra ipasangap. Seng ra sidea ibere titel, atap pe ipakei goranni bani humpulan na ija pe. Dob ai ihatahon ma, “Sedo horja ni manisia on.”

10. (a) Nantigan do itotapkon Jesus “juakjuak na bujur anjaha na maruhur”? (b) Patorang ma mase Pangurus Pusat legan pakon Lembaga Menara Pengawal.

¹⁰ Bani tahun 1919, tolu tahun dob marujung goluh Sanina Charles Taze Russell, itotapkon Jesus ma “juakjuak na bujur anjaha na maruhur”. Laho maraha? Mambere susianni “mangan bani panorangni”. (Mat. 24:45) Humbani panorang ai ma piga-piga dalahi na iminaki pasirsirhon buku partonduyon i kantor pusat Brooklyn, New York. Bani tahun 1940 ipatandahon ma hata “pangurus pusat” bani bukunta. Ondi ai, pangurus pusat ma direktur ni badan hukum Lembaga Alkitab Risalah Menara Pengawal. Tapi bani tahun 1971 ipatugah ma anggo Pangurus Pusat legan pakon badan hukum Lembaga Menara Pengawal, halani Lembaga ai martanggung jawab pasal hukum tumang. Humbani panorang ai, sanina na iminaki boi gabe anggota ni Pangurus Pusat anggo sidea lang direktur ni Lembaga. Baru-baru on, piga-piga halak humbani ‘biribiri na legan’ boi gabe direktur Lembaga ampa badan hukum na ipakei Juakjuak ni Naibata. Halani ai ma, Pangurus Pusat boi dear pasirsirhon pangajarion ampa tugah-tugah humbani Bibel. (Joh. 10:16; Lah. 6:4) Bani majallah Menara Pengawal 15 Juli 2013 ipatorang do anggo “juakjuak na bujur anjaha na maruhur” ai ma tumpuan humbani piga-piga dalahi na iminaki na gabe Pangurus Pusat.

11. Sonaha do Pangurus Pusat mambahen haputusan?

¹¹ Marrapot do Pangurus Pusat sahali saminggu laho mambahen haputusan. On mangurupi, ase boi sapanriah. (Pod. 20:18) Sarupa do ganupan anggota Pangurus Pusat ai. Halani ai tiap tahun margantih do na mambobahon rapot. (1 Pet. 5:1) Sonai homa do ibahen bani onom panitia na ibobahon Pangurus Pusat. Lang dong anggota  Pangurus Pusat na mangahap dirini gabe pambobai bani saninani. Ganup sidea ihatahon do homa jabolon, halani sidea pe manjalo sipanganon partonduyon humbani juakjuak na bujur janah mangihutkon tugah-tugahni.

12. Sungkun-sungkun aha do na laho iulas?

¹² Ra do Pangurus Pusat lepak sanggah patorangkon Bibel atap pe mangarahkon organisasi halani sidea sedo halak na sempurna. Sontohni bani Indeks Publikasi Menara Pengawal, dong bagian “Pengertian yang Diperjelas”, ai ma na marisi daptar pangarusionta na lambin torang humbani tahun 1870. Lang ihatahon Jesus anggo juakjuak na maruhur pasirsirhon sipanganon partonduyon na sempurna. Jadi sonaha do hita mambalosi sungkun-sungkun ni Jesus on, “Ai ise do juakjuak na bujur anjaha na maruhur?” (Mat. 24:45) Aha do na  pataridahkon anggo Pangurus Pusat ai ma juakjuak na bujur? Ulas hita ma tolu alasanni na mangurupi pangurus pusat bani panorang ni apostel.

13. Sonaha do tonduy na pansing mangurupi Pangurus Pusat?

¹³ Iurupi tonduy na pansing do Pangurus Pusat. Marhitei tonduy ai boi do Pangurus Pusat mangarusi hasintongan ni Bibel na lape iarusi hinan. Sontohni, idah ma daptar “Pengertian yang Diperjelas” na dob ipatugah nongkan. Lang adong na boi mangarusi pingkiran ni Naibata marhitei hapentaran ni sandiri! (Basa 1 Korint 2:10) Sarupa do na iahapkon Pangurus Pusat songon na ihatahon si Paulus on, “In do na hinatahonnami, seng ibagas hata hapentaron ni jolma na targuruhon, tapi na pinodahan ni Tonduy do.” (1 Kor. 2:13) Marratus tahun paima tahun 1919, bahat do ajaran na ladung. Tapi dob ai, mase hasintongan ni Bibel boi iarusi? Halani Naibata do na mangurupi marhitei tonduy-Ni!

14. Domu bani Pangungkabon 14:6, 7, sonaha do malekat mangurupi Pangurus Pusat ampa juakjuak ni Naibata sonari on?

¹⁴ Iurupi malekat do Pangurus Pusat. Adong lobih ualuh juta parbarita na iatur Pangurus Pusat ibagas horja parambilanon i sab dunia on. Janah marhasil do horja ai. Mase? Halani malekat do na mangurupi sidea. (Basa Pangungkabon 14:6, 7.) Bahat do na iurupi malekat ase parbarita boi jumpah bani halak na baru ope martonggo mangindo pangurupion ni Naibata! * (Idah surat partoruh.) Lambin banggal do horja parambilanon hassi pe i nagori na ilarang. On pataridahkon malekat do na mangurupi horja ai.

15. Sonaha do Pangurus Pusat legan humbani pambobai ni ugama na legan? Patorang ma.

¹⁵ Itogu-togu Hata ni Naibata do Pangurus Pusat. (Basa Johannes 17:17.) Umpamani, bani Menara Pengawal 1 Juni 1973 adong sungkun-sungkun, “ai boi do na totap mangissop ididi”. Domu bani hatorangan hun Bibel, tangkas do ipatugah lang boi. Bani Menara Pengawal ai dong piga-piga ayat na patorangkon mase sidea na totap mangissop maningon ipabali hun kuria. (1 Kor. 5:7; 2 Kor. 7:1) Dob ai ihatahon use anggo aturan ai sedo humbani manisia, tapi “humbani Hata-Ni tarsurat in do ai”. Lang adong ugama na legan na pangkar mangihutkon haganup ajaran ni Bibel. Halani sunsah do iahapkon sidea mandalankon ai. Na baru on ihatahon buku agama Amerika Serikat ma, “Ganup anggota pakon pambobai ni gereja tongtong do mangubah ajaranni ase sosok pakon harosuh ni buei halak.” Tapi anggo Pangurus Pusat seng sonai. Sidea mangihutkon Hata ni Naibata. On pataridahkon Naibata do na sasintongni na mambobahon juakjuak-Ni sonari on.

16. Aha do sada cara ase boi hita mardingat Pangurus Pusat?

¹⁶ Basa Heber 13:7. Bibel mangkatahon ase hita mardingat sidea na mambobahon hita. Sada cara na boi  hita mandalankon ai, ai ma marhitei manonggohon Pangurus Pusat. (Ep. 6:18) Bahat tumang do tanggung jawab ni sidea ibagas organisasi on, sontohni pasirsirhon sipanganon partonduyon hubani hita, mangatur horja parambilanon i sab dunia on, ampa mangatur keuangan na ijalo organisasi. Halani ai porlu do hita tongtong manonggohon sidea!

17, 18. (a) Mase hita porlu mangihutkon tugah-tugah humbani Pangurus Pusat? (b) Sonaha do hita mangusihi Pangurus Pusat pakon Jesus ibagas horja parambilanon ijai pe hita marianan?

¹⁷ Hita pe boi mardingat Pangurus Pusat marhitei mangihutkon tugah-tugah na ipadas sidea hubanta. Ibere sidea do tugah-tugah marhitei buku-buku partonduyon, partumpuan-partumpuan, ampa i kebaktian. Sidea do na mamilih haganup sintua kaliling, janah sintua kaliling mamilih sintua i kuria-kuria. Anggo sintua kaliling ampa sintua mangihutkon tugah-tugah na ipadas Pangurus Pusat ai, on pataridahkon anggo sidea mardingat. Anjaha anggo itangihon hita sidea na mambobahon, ai pataridahkon anggo hita manangihon Jesus na gabe Pambobai.—Heb. 13:17.

¹⁸ Cara na legan hita boi mardingat Pangurus Pusat ai ma marhitei mambere sidearan bani horja parambilanon. Bani buku Heber 13:7 iojur do ganup hita ase mangusihi haporsayaon ni sidea na mambobahon hita. Ringgas do Pangurus Pusat ai mandalankon horja parambilanon. Ai sonai do homa hita? Anggo eak, malas ma uhurta ma hita manangar na ihatahon Jesus, “Haganup na binahen nasiam bani sada halak angging-Ku na etek-etek on, na hu Bangku do in ibahen nasiam.”—Mat. 25:34-40.

19. Mase porlu hita mamilih mangihutkon Jesus?

¹⁹ Hassi pe Jesus domma mulak hu surga, tapi lang tadingkononni susianni. (Mat. 28:20) Sanggah i tanoh on, ibotoh Jesus do anggo ia iurupi tonduy na pansing, malekat, ampa Hata ni Naibata. Sonari iurupi ia do homa juakjuak na maruhur. Totap do Pangurus Pusat ‘mangirikkon Anak ni biribiri in’ ai ma Jesus “atap huja pe Ia laho”. (Pangk. 14:4) Anggo iirikkon hita tugah-tugah humbani Pangurus Pusat, sarupa do ai na mangirikkon Pambobainta ma ai, in ma Jesus. Lang piga dokah nari, toguon ni Jesus ma hita hu hagoluhan sadokah ni dokahni. (Pangk. 7:14-17) Lang adong pambobai ni manisia na legan na manjanjihon sisonai!