1, 2. Mase seng iharosuhkon Jahowa si Saul gabe raja? (Idah gambar bani alaman 15.)

HALAK na toruh maruhur do si Saul sanggah ipilih Jahowa gabe raja. (1 Sam. 9:1, 2, 21; 10:20-24) Tapi dobkonsi ai, gabe gijang ma uhurni. Bani sada panorang, roh ma halak Palistim mamorangi halak Israel. Ipatugah si Samuel roh do ia laho mambahen galangan bani Jahowa. Tapi, halani lape roh si Samuel, mabiar ma halak Israel janah bahat na manadingkon si Saul. Gabe lang sabar si Saul, janah ia sandiri mambahen galangan. Sasintongni, lang dong hak-ni laho manggalangkon ai. On mambahen Jahowa lang marosuh bani.—1 Sam. 13:5-9.

² Sanggah das si Samuel, marah ma ia bani si Saul halani lang manangihon Jahowa. Tapi pangahap ni si Saul, sedo salahni ai. Anjaha na legan do isalahkon. (1 Sam. 13:10-14) Dobkonsi ai, gabe hengkeng ma uhur ni si Saul. Halani ai seng be iharosuhkon Jahowa ia gabe raja. (1 Sam. 15:22, 23) Dear do hagoluhanni parlobei, tapi sambor do ujungni.—1 Sam. 31:1-6.

3. (a) Sonaha do pandapot ni buei halak pasal martoruh ni uhur? (b) Sungkun-sungkun aha na laho ibalosi hita?

 ³ Bahat do halak marpingkir, lang boi sidea marhasil anggo martoruh ni uhur. Ipajuntul-juntul sidea do dirini. Sahalak na tarsar mangkatahon, “Sonaha pe lang ra ahu toruh maruhur, janah attigan pe lang.” Mase porlu halak Kristen martoruh ni uhur? Aha do toruh ni uhur ai, janah sonaha do na lang martoruh ni uhur? Bani artikel on ibotoh hita ma balosni. Janah bani artikel na mangihut iulas hita ma sonaha hita boi totap martoruh ni uhur hassi pe ra do payah mandalankon ai.

4. Aha do gijang ni uhur ai?

⁴ Bibel patugahkon marsilawanan do gijang ni uhur pakon toruh maruhur. (Basa Podah 11:2.) Si Daud mangindo bani Jahowa, “Ramotkon Ham ma juakjuak-Mu humbani gijang ni uhur.” (Ps. 19:14) Aha do gijang ni uhur ai? Ai ma mangkorjahon na lang hak-ta, ra do halani lang sabar atap laho pajuntul-juntulhon diri. Ganup hita ongga do margijang ni uhur halani lang gokan dear. Tapi songon na iparlajari hita humbani si Saul, anggo gabe hasomalan do ai, lang marosuh Naibata hubanta. Psalmen 119:21 mangkatahon, “Ipalumba Ham do halak na jungkat [atap, na gijang uhur].” Mase seng iharosuhkon Jahowa sonai?

5. Mase salah anggo gijang uhurta?

⁵ Alasan na parlobei, anggo gijang uhurta pataridahkon na lang hormat do ai bani Naibata Jahowa, Sipanggomgom. Na paduahon, anggo ihorjahon hita na lang hak-ta, ra do ai mambahen paringoran. (Pod. 13:10) Na patoluhon, gabe hailaon do banta anggo mangkorjahon na lang hak-ta. (Luk. 14:8, 9) Hunjon tangkas do taridah anggo Jahowa marosuh ase hita toruh maruhur.

6, 7. Sonaha do halak na toruh maruhur marparlahou?

⁶ Halak na toruh maruhur, ihira do hasoman lobihan humbani dirini. (Pil. 2:3) Janah ibotoh do aha na lang tarbahensi anjaha ra mangakui salahni. Ra do sidea manangihon janah marlajar humbani na legan. Marosuh do Jahowa mangidah halak na toruh maruhur.

⁷ Bani Bibel ipatugah do halak na toruh maruhur itandai do dirini janah mambotoh aha na boi ihorjahon ampa aha na lang. Halani ai, bujur do ia janah ihargai do halak na legan.

8. Ase boi tongtong toruh maruhur, aha do na lang boi ipingkirhon hita?

⁸ Sipata, ra do domma gijang uhurta. Mase boi sonai? Boi do halani hita atap pe hasomanta dong tanggung jawab i kuria, mambahen hita marpingkir  porlunan do dirinta marimbangkon na legan. (Rom 12:16) Atap ra do hita domma pajuntul-juntulhon diri. (1 Tim. 2:9, 10) Janah ra do gabe hita na mangatur halak na legan.—1 Kor. 4:6.

9. Aha na mambahen sasahalak gabe gijang uhurni? Patugah ma contoh hun Bibel.

⁹ Anggo lang irajai hita harosuh na salah, gabe gijang ma uhurta. Bahat do halak gabe gijang uhurni halani sihol ipasangap, simburu bani na legan, atap lang boi mangorom ringisni. Ai ma na masa bani si Absalom, si Usia, ampa si Nebukadnesar, na ipatugah bani Bibel. Ibahen Jahowa do sidea mangarusi porlu do martoruh ni uhur.—2 Sam. 15:1-6; 18:9-17; 2 Kron. 26:16-21; Dan. 5:18-21.

10. Mase hita lang boi manguhumi halak? Bere ma contoh hun Bibel.

¹⁰ Ra do adong alasan na legan mase sasahalak sipata lang martoruh ni uhur. Sontohni si Abimelek pakon si Petrus. (1 Mus. 20:2-7; Mat. 26:31-35) Ai tongon do gijang uhur ni sidea? Atap halani lang mambotoh na sasintongni? Atap halani hampung marsahap? Hita lang boi manguhumi sidea halani lang ibotoh hita na ibagas uhurni.—Basa Jakobus 4:12.

11. Aha do na porlu ibotoh hita?

¹¹ Ibotoh halak na toruh maruhur do tugasni ibagas organisasi ni Naibata. Seng iharosuhkon Naibata na geor. Bereon-Ni do bani pagori ni kuria tugas ni bei, halani ganup do ihaporluhon. Legan-legan do hapentaran na ibere Jahowa hubanta. Janah ipaturut do hita mamilih sonaha manggunahon hapentaran ai. Anggo toruh maruhur hita, igunahon hita ma hapentaran ai domu bai harosuh-Ni. (Rom 12:4-8) Sihol do Jahowa ase igunahon hita ai laho pasangapkon-Si janah mangurupi na legan.—Basa 1 Petrus 4:10.

12, 13. Aha na maningon idingat hita anggo adong parubahan ibagas mangidangi Jahowa?

¹² Ra do mubah-ubah tugasta ibagas na mangidangi Jahowa. Sada contoh, pingkirhon ma bahat ni parubahan ibagas hagoluhan ni Jesus. Mulani, pitah ia do tading rap pakon Bapani. (Pod. 8:22) Dob ai, iurupi do bapani manompa ganup malekat, langit, tanoh on, ampa manisia. (Kol. 1:16) Isuruh do ia hu tanoh on, tubuh gabe jolma janah magodang. (Pil. 2:7) Dob hamateanni ipapuho do ia, janah mulak hu surga. Anjaha bani tahun 1914 gabe Raja ma ia ibagas Harajaon ni Naibata. (Heb. 2:9) Bani ari simagira, mubah use tugasni. Dobkonsi Pamarentahan Saribu Tahun, ondoskononni ma use Harajaon ai hubani Jahowa ase “Naibata gabe haganup ibagas haganup”.—1 Kor. 15:28.

¹³ Bahat do homa parubahan ibagas hagoluhanta. Sipata ra do mubah tanggung jawabta halani pilihanta sandiri. Sontohni sihol marhajabuan. Atap gabe marniombah. Ra do iputushon hita mambahen piga-piga  parubahan ase boi mambere gok panorang ibagas na mangidangi Jahowa. Atap ra do mubah use tugasta halani situasi. Ra do bahat atap otik na boi ihorjahon hita. Lang soal poso ope hita atap matua, sehat atap lang, ibotoh Jahowa do sadiha bahat na boi ibahen hita mangidangi Ia. Lang ipindo Jahowa lobih humbani na boi tarbahen hita. Malas do uhur-Ni bani ganup na ihorjahon hita hu Bani.—Heb. 6:10.

14. Sonaha hita iurupi ase megah bai ganup situasi, anggo martoruh ni uhur?

¹⁴ Megah do uhur ni Jesus bani tugas na ibere Jahowa, janah hita pe boi mangusihi ia. (Pod. 8:30, 31) Halak na toruh maruhur megah do bani tugas ampa tanggung jawabni i kuria. Ia seng mangimbangkon tugasni bani na ihorjahon hasomanni. Tapi halani ibotoh tugas ai humbani Jahowa, megah do ia mandalankon ai. Ia pe mangkargai janah malas do uhurni mangurupi na legan. Ibotoh do Jahowa pe mambere tugas bani sidea.—Rom 12:10.

15. Siusihan aha na ibere si Gideon hubanta?

¹⁵ Ibere si Gideon do siusihan na dear pasal toruh ni uhur. Sanggah ia isuruh Jahowa paluahkon halak Israel humbani halak Midian, nini si Gideon ma, “Hanami na saompung do sietekan bani marga Manase, anjaha ahu do sianggian i rumah ni bapa.” (Panguh. 6:15) Tapi porsaya do ia bani Jahowa janah ra manjalo tugas ai.  Dob iarusi na pinindo ni Jahowa, martonggo ma ia mangindo pangurupion hun Bani. (Panguh. 6:36-40) Hassi pe sahalak na gogoh janah pangkar do si Gideon, tapi maruhur do ia. (Panguh. 6:11, 27) Dob ai, sanggah ipindo halak Israel gabe raja, lang ra ia. Mintor mulak do ia hu rumahni dob salosei mangkorjahon tugasni.—Panguh. 8:22, 23, 29.

16, 17. Sonaha do halak na toruh maruhur boi mambahen hamajuon?

¹⁶ Anggo dong na manjalo tugas na baru atap sihol lambin bahat horjani i kuria, sedo artini ai lang toruh maruhur. Songon na ipatugah bani Bibel, dear do anggo sasada halak sihol marhorja roh bahatni laho mangurupi hasoman janah ase lambin talar hamajuonni. (1 Tim. 4:13-15) Tapi, ai maningon dapot tugas do hita ase ra mambahen hamajuon? Lang. Ganup hita porlu do lambin pentar ampa toras ibagas partonduyon ase boi mangidangi Jahowa anjaha mangurupi halak na legan.

¹⁷ Paima manjalo sada tugas, halak na toruh maruhur mamingkirhon lobei boi atap lang ia mangkorjahon ai janah martonggo. Maningon do irimangi, dong do holi panorangni laho mangkorjahon anggo dong na porlu? Anggo lang, ai ra do ia mambagi tugas bani halak na legan? Dob irimangi ganupan, ibotoh do anggo ia lang talup manjolom tugas ai. Anggo toruh maruhur do ia, seng ra ia manjalo ai.

18. (a) Aha do na ibahen halak na toruh maruhur sanggah ibere tugas na baru? (b) Sonaha Rom 12:3 mangurupi hita ase martoruh ni uhur?

¹⁸ Jahowa sihol ase hita “marparlahou ibagas toruh ni uhur”. (Mi. 6:8) Jadi sanggah ibere tugas na baru hubanta, maningon do ipindahi hita podah ni Naibata Jahowa, janah mangindo pangurupion songon si Gideon. Porlu do iarusi hita aha na ihatahon Jahowa hubanta marhitei Bibel ampa organisasi-Ni. Aha pe na ibahen hita ibagas organisasi ni Jahowa, dingat ma ganupan ai sedo halani hapentaranta, tapi halani dear layak ampa pangurupion ni Naibata do. (Ps. 18:36) Halak na toruh maruhur, ‘lang ihira dirini lobih humbani na patut’.—Basa Rom 12:3.

19. Mase porlu hita martoruh ni uhur?

¹⁹ Ibotoh halak na toruh maruhur pitah Jahowa do na talup manjalo ganup hamuliaon halani Ia do Sitompa ampa Na Tang Sitimbulan. (Pangk. 4:11) Anggo martoruh ni uhur hita, megah do uhurta mangkorjahon aha pe ibagas organisasi ni Jahowa. Ihargai hita do paruhuran pakon pandapot ni hasomanta, na mambahen hita gabe marsada. Ase ulang mambahen hasalahan, ipingkirhon do lobei paima ihorjahon. Jadi porlu tumang do halak Kristen martoruh ni uhur halani Jahowa malas do uhur-Ni mangidah halak sisonai. Bani artikel na mangihut, ulas hita ma sonaha boi totap martoruh ni uhur hassi pe payah mandalankon ai.