1, 2. Mase juakjuak ni Naibata maningon totap manjaga dirini? (Tonggor ma gambar bani alm. 27.)

TIAP ari, bahat do halak na boritan na itambari dokter pakon perawat. Tapi dokter pakon perawat ai porlu do manjaga diri ase ulang hona naborit humbani halak na boritan ai. Sonai homa ma juakjuak ni Jahowa sonari on. Sipata dong do hita na tading atap pe rap marhorja pakon halak na lang manombah Jahowa. Jadi lang sai urah laho manjaga dirinta ase ulang maniru parlahou ni sidea.

² Songon na ipatugah si Paulus bani si Timoteus, bahat do holi halak na marparlahou na sambor bani panorang parpudi. Sidea lang ra mandalankon aturan ni Naibata. (Basa 2 Timoteus 3:1-5, 13.) Hassi pe lang marosuh hita bani parlahou ni sidea, tapi anggo lang jaga hita, boi do ujungni hita pe gabe maniru sidea. (Pod. 13:20) Bani artikel on, iulas hita ma sonaha do juakjuak ni Naibata legan pakon dunia on. Dob ai iulas hita use, aha na boi ibahen hita ase ulang marparlahou songon sidea, sanggah hita mangurupi sidea laho mananda Jahowa.

3. Parlahou na sonaha do na ipatugah bani buku 2 Timoteus 3:2-5?

 ³ Ihatahon si Paulus do bani panorang parpudi, “roh ma ari hasunsahan”. Ipatugahni do sonaha holi parlahou ni bueinan halak i dunia on. Adong 19 sifat na masambor na isuratkonni. Ia pe ongga do patugahkon sifat-sifat sisonai bani buku Rom 1:29-31. Tapi ibagas Kitab-Kitab Yunani Kristen, pitah bani buku 2 Timoteus ai dassa na patugahkon pasal parlahou atap sifat-sifat sisonai. Dob ai bani buku 2 Timoteus 3:2-5, dong do ihatahon si Paulus hata “jolma”. Artini, dong do dalahi atap naboru na mangkorjahon na sambor ai. Tapi lang ganupan halak na marparlahou sisonai. Anggo halak Kristen legan do pakon sidea.​—Basa Maleaki 3:18.

4. Sonaha do halak na margijang ni uhur ai?

⁴ Dobkonsi ihatahon si Paulus mangkaholongi dirini ma jolma ijai ampa paruhur duit, ihatahonni do use bahat do holi halak na gabe parhata toal, paruhur gijang, ampa na pajuntul-pajuntulhon diri. Halak sisonai gatih do mangahap gijangan do dirini marimbangkon na legan. Ra do sonai pangahapni, halani jengesni rupani, bahat na boi ibahenni, atap halani dong pangkatni. Marosuh tumang do halak sisonai ase ipuji-puji. Dong sada pakar mangkatahon anggo halak na gijang maruhur ai usih do songon halak na manombah dirini sandiri. Pakar na legan mangkatahon, halak na gijang maruhur pe lang marosuh manonggor halak na gijang homa uhurni.

5. Bere ma contoh pasal juakjuak ni Naibata na gabe gijang uhurni.

⁵ Magigi do Jahowa bani halak na gijang uhurni atap “mata na mangenjeng”. (Pod. 6:16, 17) Halak sisonai lang boi marhasoman pakon Naibata. (Ps. 10:4) Sibolis pe gijang do homa uhurni. (1 Tim. 3:6) Hassi pe sonai, dong do juakjuak ni Naibata na gabe gijang uhurni. Umpamani, Raja Usia hun Juda. Mungkahni setia do ia bani Jahowa. Tapi ihatahon Bibel do, “Dob markuasa ia, gijang ma uhurni gabe hamagouanni; ai mardousa do ia dompak Jahowa, Naibatani”. Itutung si Usia do dahupa i rumah panumbahan. Hape lang dong hakni laho mangkorjahon ai. Na leganni, Raja Hiskia pe ongga do margijang ni uhur.​—2 Kron. 26:16; 32:25, 26.

6. Aha do na boi mambahen si Daud gabe margijang ni uhur? Tapi aha do na mangurupisi ase totap martoruh ni uhur?

⁶ Somalni ra do gabe gijang maruhur sasada halak halani jenges ni rupani, pandei marmusik, jago, halani tarsar, atap pe bahat na mamujisi. Tapi anggo si Daud lang sonai. Totap do ia martoruh ni uhur sadokah goluhni. Umpamani, dobkonsi ibunuh si Daud si Goliat, ihatahon Raja Saul ma bani ase ia gabe helani. Tapi nini si Daud ma, “Ise ma ahu, anjaha aha ma pangkungku pakon ginompar ni bapa i Israel, ase maningon gabe hela ni raja in ahu?” (1 Sam. 18:18) Aha do na boi mangurupi si Daud ase totap martoruh ni uhur? Halani idingatni do, pentar pe ia atap aha pe na boi ibahenni, halani martoruh ni uhur do Jahowa laho mangurupisi.  (Ps. 113:5-8) Ibotoh si Daud do aha pe na dong bani, humbani Jahowa do ai.​—Bandingkon 1 Kor. 4:7.

7. Aha do na mangurupi hita ase martoruh ni uhur?

⁷ Songon si Daud, marusaha do juakjuak ni Naibata ase totap martoruh ni uhur. Dingat hita ma hassi pe Jahowa Na Tang Sitimbulan, tapi martoruh ni uhur do Ia. Dalankon hita ma podah ni Bibel on, “Pakei nasiam ma biak paridopniuhuran, habasaron, toruh ni uhur, halamlamon, ampa lumbang ni uhur.” (Kol. 3:12) Ibotoh hita do homa anggo holong ai, “seng mangunsagah anjaha ipajuntul-juntul dirini”. (1 Kor. 13:4) Usih songon sada paramangon na marosuh marlajar Bibel halani mangidah parlahou ni parinangonni na dear, sonai homa ma halak na legan pe, ra do gabe tarojur laho mananda Jahowa, anggo hita martoruh ni uhur.​—1 Ptr. 3:1.

8. (a) Sonari on, sonaha do parlahou ni buei halak bani namatorasni? (b) Aha na iparentahkon Bibel bani niombah?

⁸ Ipatugah si Paulus do anggo bani panorang parpudi, buei do halak na lang mambalosi na matorasni. Sonari on anggo ididah hita bani TV, buku, atap pe film, gati do patuduhkon lang salah anggo niombah lang ra manangihon namatorasni. Tapi, anggo niombah lang ra manangihon namatorasni, lang dong hadameion ibagas kaluarga. Sapari i Junani, anggo dong niombah na mambogbogi namatorasni, ipapulig ma ia i hutani, anjaha lang boi be ia mandalankon hakni. Anjaha bani uhum ni halak Rom, anggo dong niombah na mambogbogi bapani, dos do uhumanni songon pamunuh. Bani Kitab Heber ampa Kitab Junani, ijai pe dong do parentah ase niombah maningon hormat do bani namatorasni. Jadi domma dokah ibotoh halak anggo niombah maningon do hormat bani namatorasni.​—2 Mus. 20:12; Ep. 6:1-3.

9. Aha do na mangurupi niombah ase manangihon na matorasni?

⁹ Aha do na mangurupi niombah ase manangihon na matorasni? Porlu ma idingat niombah aha na dob ibahen namatorasni bani sidea, janah martarimakasih ma bani namatorasni. Dingat ma, Jahowa pe sihol do ase niombah manangihon na matorasni. Niombah pe boi do mansaritahon bani hasomanni sonaha bujurni namatorasni. On boi mangurupi hasomanni ase ra homa hormat bani namatorasni. Sipata dong do namatoras na lang mangkaholongi niombahni. Halani ai, niombah pe gabe sunsah ma hormat bani sidea. Tapi anggo iahapkon niombah do holong ni na matoras, on ma na mangurupi sidea gabe urah mambalosi namatorasni. On ma na iahapkon sada garama na margoran si Austin. Nini do,  “Gati do ahu sihol mangkorjahon na lepak. Tapi ibere namatorasku ma podah na dear hubangku, anjaha ipatorangni homa mase sidea mambahen aturan ai. Sidea pe parduli do homa hubangku. On ma na mangurupi ahu ase manangihon sidea, janah mambahen malas uhur ni sidea.”

10, 11. (a) Aha do na patuduhkon anggo buei halak sonari on lang mangkaholongi halak na legan? (b) Aha do na mambahen halak Kristen legan pakon halak na mabuei?

¹⁰ Ihatahon si Paulus do homa buei do halak na lang mangkaholongi halak na legan. Umpamani, dong do halak na lang mambotoh martarima kasih. Artini, lang ihargai sidea pambahenan ni halak hubani sidea. Dob ai bahat do homa na mangkorjahon na butak. Sidea pe lang ra mardear bani na legan. Dob ai dong na manrisai atap sipartahi-tahi, artini gatih do sidea mangejek Naibata pakon halak na legan. Na leganni, sipanukas-nukasi do sidea, artini marosuh do sidea mangkatahon na lang tongon pasal halak na legan. *

¹¹ Tapi anggo juakjuak ni Naibata, sidea mangkaholongi halak na legan. Sasintongni ipatugah Jesus do pasal ai. Ihatahon Jesus anggo ibagas Titah ni si Musa, dong do iparentahkon ase mangkaholongi hasoman. Tapi mangkaholongi Naibata do na sipontingan. (Mat. 22:38, 39) Ihatahon Jesus do homa anggo halak Kristen na sintong, ai ma anggo sidea marsihaholongan. (Basa Johannes 13:34, 35.) Anjaha munsuhni pe maningon do ihaholongi.​—Mat. 5:43, 44.

12. Sonaha do Jesus patuduhkon holong bani halak na legan?

¹² Jesus pe mangkaholongi halak na legan do. Taridah do ai sanggah roh ia hu huta-huta laho mambaritahon pasal Harajaon ni Naibata. Ipamalum do homa halak na mapitung, na repat atap na timpang, na nengel, anjaha papuhohon halak na matei. (Luk. 7:22) Jesus pe ra do mambere hagoluhanni laho manobus manisia, hassi pe buei halak na marsogam ni uhur hu bani. Tongon-tongon do Jesus mangusihi Bapani na parholong. Sonai homa ma Saksi-Saksi Jahowa i sab tanoh on, marusaha do sidea mangusihi holong na ipatuduh Jesus.

13. Aha do hasilni anggo hita mangkaholongi halak na legan?

¹³ Anggo ihaholongi hita halak na legan, on boi mangojur na legan laho mananda Jahowa. Umpamani, dong sada dalahi hun Thailand na dihut bani kebaktian regional. Ijai ididahni ma anggo ganupan sanina-botounta marsihaholongan. Halani ai dobkonsi mulak hun kebaktian, ipindoni ma bani saksi Jahowa ase ia marlajar Bibel dua hali saminggu. Dob ai, marbarita ma ia bani ganup kaluargani. Dobkonsi onom bulan marlajar Bibel, dapot tugas ma ia i Balei Harajaon laho mambasa Bibel. Halani ai, sonaha hita patuduhkon holong bani halak na legan? Rimangi ma: ‘Ai marusaha do ahu mangurupi kaluargangku, sanina-botou atap halak  na legan? Ai huhaholongi do halak na legan, songon Jahowa na mangkaholongi sidea ?’

14, 15. Sonaha do parlahou ni buei halak sonari on? Tapi hamubahon aha do na ibahen piga-piga halak?

¹⁴ Bani panorang parpudi, sambor tumang do parlahou ni buei halak. Umpamani, buei do halak na magigi bani na madear. Dob ai dong homa na lang mambotoh mangorom dirini ampa parringis-ringis. Na leganni hampung maruhur atap na so siat hata. Artini lang ra mamingkirhon sonaha pangahap ni halak na legan, pitah uhur-uhurni dassa.

¹⁵ Buei do parlahou ni jolma na songon binatang panoroh hinan, tapi sonari domma mubah gabe halak na bujur. Pasal on domma dokah ipatugah bani Bibel. (Basa Jesaya 11:6, 7.) Ihatahon Bibel do anggo sorigala ampa singa, rap manggagat do pakon biribiri ampa anak ni lombu. Mase boi sonai? Halani ihatahon Bibel do use, “Habotohon pasal Jahowa do manggoki tanoh in.” (Jes. 11:9) Tapi anggo binatang lang boi marlajar pasal Jahowa. Jadi ayat ai patugahkon pasal halak na sambor parlahouni na mambahen hamubahon.

16. Sonaha do Bibel boi mangurupi halak mambahen hamubahon?

¹⁶ Bahat do halak na paringis-ringis  hinan songon sorigala, tapi boi do mubah. Bahat do pangalaman sisonai boi ibasa hita i jw.org, bani bagian “Alkitab Mengubah Kehidupan”. Dobkonsi sidea marlajar pasal Jahowa, gabe lang be sidea songon halak na marsipakulah-kulah manombah Naibata, hape sambor do parlahouni. Tapi marusaha do sidea mambahen hamubahon, atap ihatahon songon na mamakei “jolma na baru, na tinompa usih hubani Naibata, ibagas hapintoron ampa hapansingon na botul.” (Ep. 4:23, 24) Sanggah sidea marlajar Bibel, ibotohni ma maningon idalankon do aturan ni Naibata. On ma na mangurupi sidea mambahen hamubahon ibagas hagoluhanni. Hassi pe lang urah mambahen hamubahon ai, tapi iurupi Naibata do sidea ase boi mandalankon harosuh-Ni.

17. Aha do na boi ibahen hita ase lang maniru halak na sambor parlahouni?

¹⁷ Sonari domma tangkas taridah ise do juakjuak ni Naibata pakon na lang. Halani ai, maningon jaga ma hita ase ulang marparlahou songon sidea. Maningon isimbili atap ipadaoh hita ma dirinta humbani sidea na marparlahou songon na ipatugah bani 2 Timoteus 3:2-5. Tontu lang sai urah on. Halani ra do sidea hasomanta sahorja, hasoman sakalas, atap pe tetangganta. Tapi aha do na mangurupi hita ase ulang maniru sidea? Maningon ipatoguh hita ma parhasomananta pakon Jahowa, marhitei marlajar Bibel ampa marhasoman pakon halak na mangkaholongi Jahowa.

18. Sipata, aha do na mambahen halak na legan gabe tarojur laho mananda Jahowa?

¹⁸ Tontu sihol do uhurta mangurupi halak na legan ase mananda Jahowa. Pindo ma pangurupion bani Jahowa ase hita boi marbarita bani sidea bani panorang na dear. Ulang ma maila patugahkon anggo hita Saksi-Saksi Jahowa. Anggo ididah halak parlahounta na madear, parohkon hasangapon do ai bani Jahowa, sedo hubanta. Iparentahkon Jahowa do hita ase padaohkon diri humbani “hisap-hisap dunia on, ase iparlahouhon hita hapormanon, hapintoron, ampa hadaulaton i dunia on”. (Tit. 2:11-14) Anggo iusihi hita Jahowa anjaha ihorjahon hita harosuh-Ni, ra do adong na gabe tarojur laho mananda Jahowa janah mangkatahon, “Rap ma hita laho, ai domma ibogei hanami, Naibata do hasoman nasiam”.​—Sak. 8:23.